Biiyaʼ guiraʼ ni nuu lu sitiu riʼ

guyé lu índice

Guendaracané: ti cualidad ni rusihuinni tuuxa pur ni runi ne pur ni riníʼ

Guendaracané: ti cualidad ni rusihuinni tuuxa pur ni runi ne pur ni riníʼ

GUIRANU riuuláʼdxinu guizaaláʼdxicabe laanu ne guni tratárcabe laanu galán. Peru ¿xi zanda gúninu para gácanu ti binni ni rizaalaʼdxiʼ stobi ne ni runi tratar xcaadxi galán yaʼ?

Riquiiñeʼ Biblia diidxaʼ guendaracané o benignidad para gusihuinni pabiáʼ rizaalaʼdxiʼ ti binni xcaadxi, rusihuinni binni ni ora riniʼné xcaadxi né diidxaʼ nadóʼ ne ora runi xiixa pur stobi. Diidxaʼ benignidad qué riníʼ si ni gaca tobi nachaʼhuiʼ né xcaadxi. Sínuque naca ni ti cosa ni riale de ti binni guni purtiʼ nadxii stobi ne purtiʼ runi sentir ni runi sentir xcaadxi. Ne cualidad riʼ naca ni parte de fruto ni rudii espíritu stiʼ Dios ni caquiiñeʼ gapa ca xpinni Cristu (Gál. 5:22, 23). Nga runi, guidúʼyanu ximodo huasihuinni Jiobá ne Jesús cualidad riʼ ne ximodo zanda chinándanu ejemplu stícabe.

RUUYAʼ JIOBÁ XII NGA NI JMA GALÁN PARA GUIRÁʼ BINNI

Gacanenu ti binni ne gácanu nachaʼhuiʼ né laa, casi ngueca cani. * Rusihuinni Jiobá ca cualidad riʼ né guiráʼ xixé binni, dede né «cani qué rudii diuxquixe laabe ne cani cuchee né laabe» (Luc. 6:35). Guzéʼtenu ti ejemplu, Jiobá la? «rudii lugar guzaani gubidxa sti ra nuu cani nachaʼhui ne ra nuu cani nadxabaʼ, ne rusaba nisa guie ra nuu cani runi ni na, ne ra nuu cani qué runi ni na» (Mat. 5:45). Nga runi, dede ca binni ni qué runi cré pa Jiobá bizáʼ laacaʼ ricaacaʼ guiráʼ ni rudiibe para guibani binni ne randa ribánicaʼ nayecheʼ caadxi dxi.

Guidúʼyanu pabiáʼ galán ejemplu bidii Jiobá laanu pur modo biʼniʼ tratarbe Adán ne Eva. Despué de bicheenécabe Jiobá, gudíbacabe bandaga stiʼ yaga duʼgaʼ para guchiicabe xcuérpucabe. Peru nanna Dios zaquiiñecabe lari ni gácucabe para guibánicabe fuera de jardín que purtiʼ dxaʼ yaga guiichi ne yaga guiʼxhiʼ lu layú que. Cumu biiyabe xi caquiiñecaʼ la? bíʼnibe lari de piel para laacaʼ (Gén. 3:7, 17, 18, 21).

Neca runi tratar Jiobá bien binni malu ne binni ni nachaʼhuiʼ la? jma racaláʼdxibe gacanebe ca xpínnibe ni runi ni nabe. Guzéʼtenu ti ejemplu, ca dxi bibani profeta Zacarías la? guyuu ti ángel xizaa purtiʼ biaanadxí ca binni ni cayuni chaahuiʼ templu nuu Jerusalén. Bicaadiaga Dios laabe ne bicabi laabe né diidxaʼ sicarú ni gudixhedxí ladxidoʼbe (Zac. 1:12, 13). Laaca ngaca bizaaca profeta Elías. Guyuu ti tiempu de tantu nuube desanimadu gunábabe Jiobá gátibe. Biene Dios ni cayuni sentirbe, ne pur ngue biseendaʼ ti ángel ra nuube para cuʼ gana laabe. Ne laaca gudxi laabe cadi stúbibe nuube. Pur modo gucané Jiobá Elías ne pur ca diidxaʼ ni gudxi laabe gucané cani profeta riʼ cadi gusaana asignación stiʼ (1 Rey. 19:1-18). Peru ¿tuu nga yenanda ejemplu stiʼ Dios jma jneza ora biʼniʼ tratar xcaadxi galán yaʼ?

 EJEMPLU STIʼ JESÚS

Biaʼ tiempu biʼniʼ predicar Jesús ndaaniʼ Guidxilayú riʼ, binibiáʼ binni laabe casi ti binni ni ruuyaʼ xii nga jma galán para stobi ne casi tuuxa ni racané xcaadxi. Qué ñácabe ti binni naduxhuʼ ne qué nucaabe binni guni ni nabe. Ne cumu runi sentirbe ni runi sentir sti binni la? gúdxibe laacaʼ ca diidxaʼ riʼ: «Latáʼ ra nuaa irá ni ma bidxaga [..,] zaziilaʼdxi ladxidóʼ to». Ne laaca guniʼbe: «Laudxiiba ayubu stinne xa yanni tu purti nasisi ni» (Mat. 11:28-30). Nga runi stale binni guzananda laabe guiráʼ ladu guyebe. Ne cumu biabe laacaʼ la? biyaanabe laacaʼ, bisiándabe cani huará ne bisiidibe laacaʼ stale cosa de Bixhózebe (Mar. 6:34; Mat. 14:14; 15:32-38).

Biene Jesús ca sentimientu napa binni ne biʼniʼ tratarbe laacaʼ galán. Siempre gúcabe nachaʼhuiʼ né guiráʼ binni ni biyubi laabe dede ne ora cadi cabézabe laacaʼ (Luc. 9:10, 11). Ti biaje, bidxiña ti gunaa ni maʼ ziné doce iza de caxii rini ra nuube ne gudaʼnaʼ xhábabe para guianda. Cadi naquiiñeʼ ñuni gunaa riʼ ndiʼ purtiʼ cadi nayabe casi ná Ley que (Lev. 15:25-28). Peru qué nidindené Jesús laabe. Lugar de nga la? biabe gunaa ni cadxibi riʼ ne gúdxibe laa: «Bianda lu, xiiñeʼ, purti bini cre luʼ. Yanna, sicarú uyé, ma bianda lu ne ma qué zabigueta ru ni» (Mar. 5:25-34). Guca Jesús ti binni ni biiyaʼ xii nga ni jma galán para sti binni.

TI CUALIDAD NI CAQUIIÑEʼ GUSIHUÍNNINU PUR NI GÚNINU

Ca ejemplu ni bizéʼtenu riʼ rusihuinni ni naquiiñeʼ gúninu xiixa pa racaláʼdxinu gacanenu stobi. Para bisihuinni Jesús pabiáʼ risaca nga gúninu xiixa para gacanenu stobi la? guniʼbe parábola stiʼ ti samaritanu ni guca nachaʼhuiʼ. Neca qué raca llevar ca samaritanu ca judíu la? samaritanu ni bizeeteʼ Jesús riʼ, biabe judíu ni gucaná que, ni biaʼ biaʼ qué ñuuti si caadxi gubaanaʼ laa. Bisiándabe ca herida stiʼ, yenebe laa ti ra yoo para guiaana ne gudíxebe xpixuaanaʼ yoo que para gapa hombre que. Dede gúdxibe hombre que zaguíxebe laa guiráʼ ni guniti (Luc. 10:29-37).

Zanda gacanenu tuuxa pur ni gúninu, peru laaca zanda gacanenu tuuxa pa gábinu laa caadxi diidxaʼ ni cuʼ gana laa. Biblia ná: «Ora nuu ansiedad ndaaniʼ ladxidóʼ ti hombre, raca deprimir, peru ti diidxaʼ galán la? rusiecheʼ ni laa» (Prov. 12:25). Guendaracané ne guendanachaʼhuiʼ rucaa cani laanu guni animarnu xcaadxi né diidxaʼ galán ni uguu laacaʼ nayecheʼ ni gusihuinni rizaaláʼdxinu laacaʼ. Pa gúninu ndiʼ la? zacanenu xcaadxi gudxiilú ca guendanagana stiʼ (Prov. 16:24).

GÚNINU STIPA PUR GACANENU STOBI

Cumu bizáʼ Dios laanu casi laa la? guiranu zanda gápanu cualidad riʼ (Gén. 1:27). Guidúʼyanu caadxi ejemplu ni zeeda lu Biblia. Dxi zeʼ apóstol Pablo ndaaniʼ guidxi Roma biseendacabe ti soldadu láʼ Julio para gapa laabe. Galán modo biʼniʼ tratar militar riʼ Pablo purtiʼ bidiibe lugar chiganna Pablo ca xhamigu ndaaniʼ guidxi Sidón para gacanecaʼ laabe (Hech. 27:3). Ti tiempu despué, dxi bilaahua apóstol Pablo ne xcaadxi binni, biá ca binni ni nabeza lu isla stiʼ Malta laacabe. Bíʼnicabe ti guí para ganda guidxaa cani bilaahua que ne bíʼnicabe guiráʼ ni gunda para gucanécabe ca hombre riʼ (Hech. 28:1, 2). Guizáʼ galán ni biʼniʼ ca binni riʼ. Peru gacanenu sti binni qué riníʼ ni gúninu xiixa pur tuuxa ora ganda si.

Pa racaláʼdxinu gusiéchenu ladxidóʼ Jiobá la? caquiiñeʼ gusihuínninu cualidad riʼ lu guiráʼ ni gúninu ne pur modo guibáninu. Dxandíʼ, ziuu biaje zaca nagana para laanu gúninu xiixa pur stobi. ¿Xiñee yaʼ? Purtiʼ zándaca qué riná binni gucaadiaga laanu, purtiʼ natuinu, purtiʼ ridxíbinu o purtiʼ cayúninu stipa pur cadi gácanu egoísta. Peru zanda  gudxíʼlunu ca guendanagana riʼ pa guyúbinu gacané espíritu santu laanu ne chinándanu ejemplu stiʼ Jiobá (1 Cor. 2:12).

¿Xi zacané laanu para gánnanu ximódoruʼ zanda gacanenu xcaadxi yaʼ? Naquiiñeʼ guinabadiidxanu laca laanu: «Ora caniʼné tuuxa naa, ¿ñee runeʼ stipa pur guieneʼ ni cayuni sentirbe la? ¿Ñee ruuyaʼ xi caquiiñeʼ xcaadxi la? ¿Padxí nga últimu biaje gucaniáʼ tuuxa ni cadi familia stinneʼ ne ni cadi xhamiguaʼ yaʼ?». Galán quíxenu meta de gunibiaʼnu xcaadxi hermanu de ra congregación stinu, pa gúninu ni la? zánnanu ximodo nuucabe ne xi caquiiñecabe. Ne laaca zanda gúninu xiixa ni ñuuláʼdxinu ñúnicabe pur laanu (Mat. 7:12). Sti cosa ni zanda gúninu nga guinábanu Jiobá gacané laanu ne laabe zaguube ndaayaʼ laanu pur guiráʼ ni gúninu (Luc. 11:13).

TI CUALIDAD NI RIUULAʼDXIʼ XCAADXI

Apóstol Pablo nga sti binni ni biʼniʼ cosa galán pur xcaadxi ne zacá bisaanabe ti ejemplu galán para laanu. Biblia ná nabé galán ridxaagalube cani riganna laabe (Hech. 28:30, 31). Bizaaláʼdxibe binni ne bisihuínnibe ni pur ca diidxaʼ ni guniʼbe ne pur cani bíʼnibe. Ngue runi biyubi binni guieeguʼ laabe. Zacaca laanu, pur ni gúninu zanda gucaʼnu xcaadxi chuulaʼdxiʼ guiziidiʼ Stiidxaʼ Dios. Pa guni tratarnu guiráʼ binni galán la? zanda gacanenu laacabe iguudxi ladxidóʼcabe ne guchaacabe, dede ca binni ni qué riuulaʼdxiʼ ni runi crenu (Rom. 12:20). Ne ra tiidiʼ tiempu dede zándaca chuuláʼdxicaʼ guiziidicaʼ de Jiobá.

Ndaaniʼ Paraísu ni maʼ cadi candaa, ziasa stale binni ni maʼ guti ne ziéchecabe stale ora guni tratar xcaadxi laacabe galán purtiʼ zándaca qué huayuu dxi chuʼ tu guni tratar laacabe galán. Ne zucaa ni laacabe guni tratárcabe xcaadxi zacá. Ne cani gacané xcaadxi ne gusihuinni guendarannaxhii zudii Jiobá laacaʼ guendanabani ni qué zaluxe. Peru cani qué guni ni la? qué zacaacaʼ guendanabani (Sal. 37:9-11). Nuunu seguru zaca Guidxilayú riʼ ti lugar seguru, ra ziuu paz ora maʼ guni mandar Reinu stiʼ Dios. Peru laga cabézanu guedandá dxi ca, ¿xi beneficiu zápanu pa gacanenu xcaadxi yaʼ?

XI BENEFICIU ZÁPANU PA GACANENU XCAADXI

Biblia ná ora ruuyaʼ ti binni ni caquiiñeʼ stobi ne ora racané xcaadxi la? raca beneficiar (Prov. 11:17). Riuulaʼdxiʼ binni ni rúnicabe ne rinándacaʼ ejemplu stícabe. Jesús guníʼ: «Modo guni tratartu xcaadxi, zacaca zuni tratárcabe laatu» (Luc. 6:38TNM). Ne jma nagueenda ridxela ca binni riʼ tu gaca xhamigu.

Bidii apóstol Pablo conseju riʼ ca xpinni Cristu de Éfeso: «Ni guni tu la? lagaca nachaʼhui ne stobi, ne lailaselaʼdxi saa. Laguni perdonar saa casi bini perdonar Dios laatu ra guca né tu Cristu tobi si» (Efes. 4:32). Raca beneficiar ca congregación ca stale ora ruyubi ca hermanu guni sentircaʼ ni runi sentir xcaadxi ne gúnicaʼ stipa pur gacanésaacaʼ. Ca hermanu de ra congregación, qué runi búrlacaʼ xcaadxi para si gusituicaʼ lúcabe, qué riniʼcaʼ diidxaʼ ni guniná ne qué runi critícarcaʼ xcaadxi. Lugar de guiníʼ ca hermanu chisme la? rúnicaʼ stipa pur guiniʼcaʼ diidxaʼ ni cuʼ gana xcaadxi (Prov. 12:18). Ne ra gúnicabe ni la? riniisi ca congregación ca en sentidu espiritual.

Ora racanenu xcaadxi la? naca ni ti cualidad ni zanda gusihuinni tuuxa pur ni guiníʼ ne pur ni guni. Ora rúninu ni la? rinándanu ejemplu stiʼ Jiobá purtiʼ laa naca ti Dios ni rannaxhii ne rudii de ni napa (Efes. 5:1). Laaca racanenu para chuʼ congregación naguidxi en sentidu espiritual ne chuulaʼdxiʼ binni guiziidiʼ cani dxandíʼ rusiidiʼ Stiidxaʼ Dios. Nga runi, gúninu stipa pur gusihuínninu cualidad galán riʼ.

^ párrafo 5 Despué zazíʼdinu ti tema ni caníʼ de guendanachaʼhuiʼ lu serie ni caníʼ de ca cualidad ni rudii espíritu santu.