Biiyaʼ guiraʼ ni nuu lu sitiu riʼ

guyé lu índice

Guianu guiráʼ xixé binni

Guianu guiráʼ xixé binni

DXI bisiidiʼ Jesús ca discípulo stiʼ ximodo guni predicarcaʼ, maca nánnabe cadi guiráʼ diʼ binni zadxaagalú laacabe galán (Luc. 10:3, 5, 6). Ora maʼ canayuni predicarnu nuu biaje ridxaaganu binni ni ridindené laanu o dede runinacaʼ laanu. Pur modo runi tratar binni laanu nuu biaje raca nagana para laanu guianu laacaʼ.

Ti binni ni riáʼ la? ruuyaʼ xi problema napa xcaadxi binni ne xi caquiiñecabe, riáʼ laacabe ne ruyubi ximodo gacané laacabe. Pa qué guianu binni la? maʼ qué ziuʼnu nayecheʼ ora guni predicarnu ne maʼ huaxiéʼ zacanenu laacaʼ. Peru pa gúninu stipa pur guianu binni la? qué zusaana de chuʼnu nayecheʼ. Zeeda gaca ni casi ora niguʼnu yaga lu bele para cadi guizuíʼ (1 Tes. 5:19).

¿Ximodo zanda guizíʼdinu guianu binni neca nuu biaje gaca ni nagana para laanu yaʼ? Guidúʼyanu chonna ejemplu ni zanda chinándanu: ejemplu stiʼ Jiobá, stiʼ Jesús ne stiʼ apóstol Pablo.

GUIANU BINNI CÁSICA RIÁʼ JIOBÁ BINNI

Maʼ raca stale mil iza de cayuni huantar Jiobá guiníʼcabe cosa ni cadi dxandíʼ de laa. Neca rúnicabe laabe zacá, «nachaʼhui be ne cani qué rudii diuxquixe laabe ne cani cuchee né laabe» (Luc. 6:35). Ne rusihuínnibe nacháʼhuibe purtiʼ nápabe paciencia ne racaláʼdxibe guilá guiráʼ xixé binni (1 Tim. 2:3-4). Neca nanalaʼdxiʼ Dios cosa malu, risaca binni para laabe ne qué racaláʼdxibe guinitilú nin tobi (2 Ped. 3:9).

Nanna Jiobá nuseeguʼ Binidxabaʼ lú ca binni ni qué runi cré (2 Cor. 4:3, 4). Stale binni dede nahuiinicaʼ maʼ bisiidicabe laacaʼ cosa ni cadi dxandíʼ de Dios. Nga runi raca nagana para stale binni guni cré ni rusiidiʼ Biblia. Peru racalaʼdxiʼ Jiobá gacané laacabe. ¿Ximodo nánnanu ni yaʼ?

Guidúʼyanu xi bizaaca ca binni de Nínive. Neca malu laacabe, gudxi Jiobá Jonás: «¿Ñee cadi laaca naquiiñeʼ guiaʼyaʼ Nínive guidxi roʼ, ra nuu jma de ti gayuaa gande mil hombre ni qué ganna xii nga ni jneza de ni cadi jneza, ne ca maniʼ sticaʼ la?» (Jon. 4:11). Bidii Jiobá cuenta qué runibiáʼ ca binni de Nínive laa. Ngue runi biabe laacaʼ ne biseendabe Jonás chitidxi laacaʼ xi cá íquebe gúnibe.

Cásica rusisaca Jiobá binni la? zacaca risácacabe para laanu. Zanda chinándanu ejemplu stiʼ Jiobá pa racaláʼdxinu gacanenu cani rucaadiaga laanu, neca ruluíʼ qué zuni crecaʼ ni rusiidiʼ Biblia.

GUIANU BINNI CÁSICA BIÁʼ JESÚS BINNI

Jesús laaca biáʼ binni ni caquiiñeʼ tu gacané laacaʼ en sentidu espiritual, cásica riáʼ Bixhózebe binni. «Ora biʼya be irá ca binni que la? biá be laacaʼ, purti qué ganna ca xi guni ca ne iruti cayaca né laacaʼ. Nuu ca casi dendxu ni qué gapa pastor» (Mat. 9:36). Biiyaʼ Jesús xi nuu ndaaniʼ ladxidóʼ binni. Bidiibe cuenta pabiáʼ runiná ca xaíque yuʼduʼ que ca binni ni rigucaadiaga laacaʼ ne puru cosa ni cadi dxandíʼ rusiidicaʼ binni. Neca nanna Jesús pur ca guendanagana ni guidxaagalú ca binni que zusaanacaʼ de sanándacaʼ laabe la? bisiidibe laacaʼ «stale cosa» (Mar. 4:1-9).

Cadi guireʼnu gana pa qué gucaadiaga binni laanu casi ziuunu

Ruchaa xquendanabani binni ne laaca zanda guchaacaʼ modo laacaʼ ne gucaadiágacaʼ laanu

 Ora qué riná binni gucaadiaga laanu lu predicación, naquiiñeʼ gúninu stipa pur guidúʼyanu xi nuu ndaaniʼ ladxidóʼcabe ne guiníʼ íquenu xi pur bicábicabe laanu zacá. Zándaca nuu tu laa qué riuulaʼdxiʼ guʼndaʼ Biblia o qué riná guiziidiʼ purtiʼ feu xpiaʼ ca binni ni ná naca xpinni Cristu. Nuu de laacabe la? zándaca nuu tu gudxi laacaʼ xiixa ni cadi dxandíʼ de laanu o de ni runi crenu. Ne zándaca nuu tu qué riná gucaadiaga laanu purtiʼ ridxibi pa guni burla xfamilia o ca vecinu stiʼ laa.

Xcaadxi la? qué riná gucaadiaga purtiʼ huayápacaʼ guendananá ni nabé huayuniná laacaʼ. Ti misionera láʼ Kim ná: «Ti lugar ra runi predicardu, stale binni gucaná pur ti guerra ni guca raqué, purtiʼ biníticabe guiráʼ ni nápacabe. Qué gápacabe nin ti esperanza para lu futuro. Guizáʼ maʼ bireecabe gana ne qué gápacabe confianza guirutiʼ. Gatigá ridxéladu binni ni qué riná gucaadiaga laadu. Ti biaje canayuneʼ predicar, biaaxhacabe luguiaʼyaʼ».

¿Xi runi Kim para cadi gusaana de guiáʼ binni yaʼ? Sicaríʼ guniʼbe: «Ora qué guni tratar binni naa galán la? runeʼ stipa pur guietenaladxeʼ ca diidxaʼ ni zeeda lu Proverbios 19:11: “Ti hombre ni riene qué ridxiichi nagueenda”. Ora guietenaladxeʼ modo nabani ca binni riʼ, racané ni naa guiaʼyaʼ laacabe. Ne cadi guirácabe runi tratárcabe laadu mal. Purtiʼ nápadu stale revisita raqué ne nabé rucaadiágacaʼ laadu».

Laaca galán guiníʼ íquenu xi ñúninu pa ñuʼnu lugar stiʼ ca binni ni nuu lu territorio ra runi predicarnu. ¿Ñee nucaʼdiáganu pa guiráʼ biaje ñábicabe laanu cosa ni cadi dxandíʼ de ca testigu stiʼ Jiobá la? Zándaca laaca qué nucaʼdiáganu, peru ñuuláʼdxinu ñuu tu laa ñáʼ laanu. Pa qué gusiáʼndanu mandatu bidii Jesús ra ná guni tratarnu binni cásica racaláʼdxinu guni tratárcabe laanu la? zacané ni laanu chuʼnu lugar stiʼ ca binni ca neca riuu ora raca ni nagana para laanu (Mat. 7:12).

GUIANU BINNI CÁSICA BIÁʼ PABLO BINNI

Biáʼ Pablo binni dede né cani bininá laa. ¿Xiñee yaʼ? Purtiʼ qué ñaandaʼ laabe ximodo gúcabe ante gunibiaʼbe Stiidxaʼ Dios. Laabe guniʼbe: «Unié laabe chiqué, uzaya nanda ca xpinni be, ne udinde nia laacaʼ. Peru biá Dios naa purti caʼru gune cre dxi bine ni, ne qué ganna xi cayuneʼ» (1 Tim. 1:13). Qué ñaandaʼ laabe biáʼ Jiobá ne Jesús laabe. Zándaca ora runi predicarbe ca binni que bietenaláʼdxibe ximodo gúcabe dxiqué.

Guyuu ora bidxela Pablo binni ni guizáʼ maʼ gucuaa xcu creencia ni cadi dxandíʼ ndaaniʼ ladxidóʼ. ¿Xi bíʼnibe yaʼ? Guidúʼyanu xi bizaaca  ti biaje dxi nuube ndaaniʼ guidxi Atenas. Hechos 17:16 ruzeeteʼ guizáʼ bidxiichi Pablo ora biʼyaʼ «dxá bidóʼ ndaani guidxi que». Neca gadxé ni runi cré ca binni que, biʼniʼ predicarbe laacaʼ (Hech. 17:22, 23). Para ganda gacané Pablo ca binni que guilacaʼ la? guca adaptarbe modo laacaʼ ne ni runi crecaʼ para ganda guni predicarbe laacaʼ (1 Cor. 9:20-23).

Ora guidxélanu binni ni qué riná gucaadiaga laanu o ni napa creencia ni cadi jneza zanda gúninu cásica biʼniʼ apóstol Pablo. Iquiiñenu ni nánnanu para gacanenu laacabe gunibiáʼcabe «diidxaʼ nacubi ne galán de xiixa ni jma sicarú» (Is. 52:7). Guzéʼtenu xi guníʼ ti hermana láʼ Dorothy. Sicaríʼ guniʼbe: «Stale binni ni nuu lu territorio stidu bisiidicabe laacaʼ nabé feu modo runi castigar Dios binni. Ni runeʼ primé nga runeʼ felicitar laacabe purtiʼ runi crécabe Dios, despué ruluéʼ laacabe de lu Biblia pabiáʼ nadxii Jiobá laanu ne xi chiguni lu futuro».

«GUDIXHE DXÍ NI NADXABA PUR NI NACHAʼHUIʼ»

Lu ca últimu dxi riʼ jmaruʼ si malu zaca ca binni ni runi predicarnu (2 Tim. 3:1, 13). Peru cadi naquiiñeʼ gudiʼnu lugar gucaa cani laanu gusaana de guianu binni ne gunítinu guendanayecheʼ ni nápanu. Rudii Jiobá stipa laanu para quixhedxinu ni «nadxaba pur ni nachaʼhuiʼ» (Rom. 12:21). Ti precursora láʼ Jessica guníʼ: «Gatigá ridxéladu binni orgullosa ni runi menu laanu ne mensaje ni rinenu ra nuucaʼ. Zándaca guchiichi ndiʼ laanu. Ora maʼ cayuneʼ predicar ti binni rinabaʼ Jiobá gacané naa guuyaʼ binni ca cásica ruuyabe laa. Zacá jma ricá iqueʼ ximodo gacaniáʼ laacabe lugar de guicá iqueʼ ni runeʼ sentir».

Qué rusaana de guyúbinu ca binni ni racalaʼdxiʼ ganna ni dxandíʼ

Ra tiidiʼ tiempu ziuu tu laa zucaadiaga laanu ora gúʼyacaʼ cayúninu stipa pur gacanenu laacaʼ gunibiaʼcaʼ Jiobá

Laaca naquiiñeʼ guiníʼ íquenu ximodo gacanenu ca hermanu ni runi predicarnenu. Jessica bizeeteʼ: «Pa tobi de laadu gupa xiixa experiencia huaxiéʼ galán la? runeʼ stipa pur cadi guiníʼ iqueʼ ni. Ruchaa de diidxaʼ ne riniéʼ xiixa ni gacané xcaadxi, casi pabiáʼ racané predicación laadu neca qué rucaadiaga binni».

Nanna Jiobá xi guiráʼ guendanagana ridxaagalunu ora runi predicarnu ne nuunu seguru riéchebe stale ora ruuyabe rianu binni cásica riabe laacaʼ (Luc. 6:36). Peru zedandá ora maʼ qué ziáʼ Dios binni. Zanda gápanu confianza maʼ nanna Jiobá padxí gunitilú guidxilayú malu riʼ. Laga cabézanu guedandá dxi ca, cadi naquiiñeʼ gusaana de guni predicarnu (2 Tim. 4:2). Nga runi cadi gusaana de gúninu xhiiñaʼ Dios né stale gana ne guianu guiráʼ xixé binni.