Biiyaʼ guiraʼ ni nuu lu sitiu riʼ

guyé lu índice

Guni respetarnu «ni ma bichaaga Dios»

Guni respetarnu «ni ma bichaaga Dios»

«Cadi indaa binni ni ma bichaaga Dios» (MAR. 10:9).

DIIDXAʼ RIUUNDAʼ: sjj 131 NE sjj 132

1, 2. ¿Xi naquiiñeʼ gucaa ca diidxaʼ ni zeeda lu Hebreos 13:4 laanu gúninu?

GUIRANU racaláʼdxinu gusisácanu Jiobá. Ne naquiiñeʼ gúninu ni purtiʼ runi merecerbe ni, ne cayuni prometerbe laanu zusisácabe laanu pa gúninu ni (1 Sam. 2:30; Prov. 3:9; Apoc. 4:11). Peru laaca racaláʼdxibe guni respetarnu xcaadxi binni, casi ca autoridad ne ca gobiernu (Rom. 12:10; 13:7). Peru nuu ti cosa ni jma naquiiñeʼ gusisácanu o guni respetarnu, laani nga guendaxheelaʼ.

2 Apóstol Pablo bicaa: «Cadi gapa tu enda xheela casi enda riguite. Cani ma bichaganá la? cadi uchee né xheelaʼ» (Heb. 13:4). Né ca diidxaʼ riʼ cadi caníʼ si Pablo xi caquiiñeʼ guni ca guendaxheelaʼ ca, sínuque cayábibe ca xpinni Cristu gusisácacaʼ guendaxheelaʼ. Peru ¿ñee zacá ridúʼyanu xquendaxheelanu ne xquendaxheelaʼ xcaadxi la?

3. ¿Xi conseju galán bidii Jesús para ca guendaxheelaʼ? (Biiyaʼ dibuju ni zeeda ra ruzulú tema riʼ).

3 Pa rusisácanu guendaxheelaʼ ne runi respetarnu ni la? zusihuínninu zinándanu ejemplu stiʼ Jesús. Purtiʼ dxi gunabadiidxaʼ ca fariseu laabe pa jneza gaca divorciar binni la? guniʼbe ca diidxaʼ gudxi Jiobá primé guendaxheelaʼ guyuu ndaaniʼ Guidxilayú riʼ: «Pur nga runi zusaana hombre bixhoze ne jñaa ne zadxaaga xheelaʼ. Ne zacá zeda gaca cabe tobi si». Ne laaca guniʼbe:  «Cadi indaa binni ni ma bichaaga Dios» (biindaʼ Marcos 10:2-12; Gén. 2:24).

4. ¿Xi gucalaʼdxiʼ Jiobá dxi gudixe guichaganáʼ binni?

4 Nga runi, gunna dxiichiʼ Jesús Dios nga gudixe guichaganáʼ binni ne guníʼ naquiiñeʼ guibánicabe juntu para siempre. Qué ñabi diʼ Jiobá Adán ne Eva zanda gaca divorciarcaʼ para guiluxe xquendaxheelacaʼ, sínuque ni gucaláʼdxibe nga nibani Adán ne Eva juntu para siempre.

NI RUCHAA XQUENDAXHEELAʼ BINNI

5. ¿Pora nga riluxe xquendaxheelaʼ binni?

5 Pur bichee Adán la? guyuu stale cambiu. Tobi de laani nga guendaguti, ne zuniná ni ca guendaxheelaʼ. Ne apóstol Pablo bisiene de laani dxi gúdxibe ca xpinni Cristu de primé siglu cadi chinándacaʼ Ley stiʼ Moisés. Laaca gúdxibe laacaʼ ora gati xheelaʼ binni nga riluxe guendaxheelaʼ sticaʼ, ne hombre o gunaa ni nabani ca nuu libre para guichaganáʼ sti biaje (Rom. 7:1-3).

6. Lu Ley bidii Dios Moisés que, ¿ximodo rusihuinni ni nabé risaca guendaxheelaʼ para Dios?

6 Lu Ley bidii Dios guidxi Israel zeeda caadxi cosa ni cusiene de guendaxheelaʼ. Guidúʼyanu tobi de laacani. Lu Ley que ná zanda gapa ti hombre jma de ti xheelaʼ, práctica riʼ runibiáʼcabe ni casi poligamia, ne maca runi practicar binni ni dede ante gudii Jiobá ca Ley que ca israelita. Peru gucané Ley que ca gunaa ne ca baʼduhuiiniʼ para cadi guniná ca hombre laacaʼ. Guzéʼtenu ti ejemplu, pa guichaganáʼ ti hombre israelita ti esclava ne despué gápabe sti xheelabe la? caquiiñeruʼ gudiibe guiráʼ ni iquiiñeʼ primé xheelabe cásica bíʼnibe ni ante, tantu en sentidu material, emocional ne sexual. Dios gudxi ca hombre que gápacaʼ ca gunaa (Éx. 21:9, 10). Maʼ qué rinándanu Ley bidii Dios ca israelita, peru racá ridúʼyanu pabiáʼ rusisacaʼ Dios guendaxheelaʼ. Ne ndiʼ racané laanu guni respetarnu guendaxheelaʼ.

7, 8. a) Casi riete lu Deuteronomio 24:1, ¿xi rudii Ley que lugar guni binni? b) ¿Ximodo ruuyaʼ Jiobá gaca divorciar binni?

7 ¿Xi caníʼ Ley que de divorcio yaʼ? Neca risaca guendaxheelaʼ para Dios la? bidiibe lugar gaca divorciar ca israelita (biindaʼ Deuteronomio 24:1). Pa guʼyaʼ hombre ca runi xheelaʼ «xiixa ni cadi jneza» la? óraca si nga zanda gaca divorciar de laabe. Peru ¿xii nga «ni cadi jneza» ca yaʼ? Qué ruzeeteʼ Ley ca xii ni. Peru zándaca laani nga xiixa cosa malu, ne cadi ti cosa ni huaxiéʼ risaca (Deut. 23:14). Peru dxi bibani Jesús stale de ca judíu que raca divorciarcaʼ pur intiica si cosa (Mat. 19:3). Peru laanu qué racaláʼdxinu gúninu casi bíʼnicabe.

8 Tiempu bibani profeta Malaquías que la? stale hombre rucheené ne raca divorciar de xheelaʼ, zándaca para guichaganacaʼ sti gunaa jma joven ni qué runi adorar Dios. Profeta Malaquías guníʼ ximodo ruuyaʼ Jiobá guni hombre ca cosa ca. Profeta riʼ bicaa nanalaʼdxiʼ Jiobá «gaca divorciar binni» (Mal. 2:14-16). Ca diidxaʼ riʼ biaʼsi cani né ni cá lu Stiidxaʼ Dios ora caníʼ de guendaxheelaʼ, racá ná caquiiñeʼ «guicanú [hombre] xheelaʼ, ne zeeda gácacabe tobi si» (Gén. 2:24). Ne laaca guníʼ ique Jesús cásica riníʼ ique Bixhoze ora guníʼ: «Ni ma bichaaga Dios la? ma cadi indaa binni guidxilayú» (Mat. 19:6).

PORA SI ZANDA GACA DIVORCIAR BINNI

9. ¿Ximodo zanda guiénenu ca diidxaʼ guníʼ Jesús ni zeeda lu Marcos 10:11, 12?

9 Zándaca nuu tu guinabadiidxaʼ: «¿Ñee nuu razón para gaca divorciar ti xpinni Cristu ne guichaganáʼ sti biaje la?». Ti biaje bisiene Jesús ximodo ruuyaʼ gaca divorciar binni, sicaríʼ guniʼbe: «Ora ilaa né ti hombre xheelaʼ ne ichaganá adxé gunaa la? cuchee né xheelaʼ. Ne pa usaana ti gunaa xheelaʼ ne ichaganá stobi la? laca cuchee ne xheelaʼ» (Mar. 10:11, 12; Luc. 16:18). Nanna  dxiichinu runi respetar Jesús guendaxheelaʼ, ne laaca racaláʼdxibe guni respetar xcaadxi binni ni. Nga runi, tutiica gaca divorciar de xheelaʼ pur intiica si pretextu ne guichaganáʼ sti gunaa maʼ cayuni cometer adulterio. Ne zacá ni purtiʼ tutiica gaca divorciar de xheelaʼ pur intiica si cosa la? qué rixá xquendaxheelaʼ nezalú Dios. Para Dios la? guirópacabe «zeeda gácacabe tobi si». Ne laaca guníʼ Jesús pa gaca divorciar hombre de xheelaʼ cusaana laabe en peligru ne zándaca guni cometer xheelabe adulterio. ¿Xiñee yaʼ? Purtiʼ tiempu que, ti gunaa ni gaca divorciar xheelaʼ de laa la? zucaa ni laa guyubi guichaganáʼ sti biaje para gapa guiráʼ ni iquiiñeʼ. Peru pa gúnibe ni la? maʼ cayuni cometerbe adulterio.

10. ¿Pora si nga zanda gaca divorciar ti xpinni Cristu ne guichaganáʼ sti biaje yaʼ?

10 Peru laaca guníʼ Jesús nuu ti razón para ganda guixá ti guendaxheelaʼ. Laa guníʼ: «Cayábecaʼ laatu, tutiica gaca divorciar de xheelaʼ ne guichaganáʼ stobi, neca qué ñuuné xheelabe stobi [o biʼniʼ cometer fornicación] la? maʼ guendarapa jnadxii nga» (Mat. 19:9TNM). Ne laaca ngaca bizeeteʼ Jesús dxi bidii ti discursu lu ti dani (Mat. 5:31, 32). Lu guiropaʼ relatu riʼ guniʼbe de fornicación, o inmoralidad sexual (lu diidxaʼ griegu, pornéia). Riquiiñeʼ diidxaʼ riʼ ora cayete de stale clase pecadu sexual ni runi cometer binni neca maʼ bichaganáʼ, casi adulterio, prostitución, gapa chupa binni ni caʼruʼ guichaganáʼ relación sexual, gaca binni muxeʼ o nguiuʼ ne chuʼné binni maniʼ. Guzéʼtenu ti ejemplu, pa guni cometer ti hombre inmoralidad sexual la? xheelabe nga naquiiñeʼ guni decidir pa zaca divorciar de laabe o coʼ. Pa gúnibe ni la? rixá guendaxheelaʼ ca nezalú Dios.

11. ¿Xiñee zándaca guicaa ti hombre o ti gunaa decisión de cadi gaca divorciar neca nápabe base bíblica para gúnibe ni?

11 Qué niníʼ diʼ Jesús caquiiñeʼ gaca divorciar ti binni de xheelaʼ ni biʼniʼ cometer inmoralidad sexual (pornéia). Guzéʼtenu ti ejemplu, ti gunaa zanda guicaa decisión de cadi gaca divorciar de xheelaʼ neca bicheené xheelaʼ laa. Zándaca nadxiirube xheelabe ne nuu dispuesta guni perdonarbe laa ne gúnicabe stipa pur guni chaahuicabe xquendaxheelacabe. Ne naquiiñeʼ gánnabe pa gaca  divorciarbe de xheelabe la? zápabe caadxi problema. Guzéʼtenu caadxi de laacani, ¿xi gúnibe para gápabe ni iquiiñebe tantu en sentidu material ne sexual yaʼ? ¿Xi gaca de laabe pa guni sentirbe stúbibe yaʼ? Ne pa nápabe xiiñibe, ¿zaca nagana para laabe gusiniisibe laacaʼ pa gaca divorciarbe la? (1 Cor. 7:14). Ni dxandíʼ nga zadxaagalú hombre o gunaa ni gaca divorciar de xheelaʼ caadxi guendanagana.

12, 13. a) ¿Xi bizaaca lu guendaxheelaʼ stiʼ Oseas? b) ¿Xiñee biguetaʼ yené Oseas Gómer ra lidxi? c) ¿Xi rusiidiʼ ndiʼ laanu de guendaxheelaʼ?

12 Ni bizaaca profeta Oseas rusiidiʼ ni laanu ximodo ruuyaʼ Jiobá guendaxheelaʼ. Gudxi Jiobá laabe guichaganabe ti gunaa lá Gómer. Ne zeeda gaca gunaa riʼ ti gunaa ni zapa jnadxii ne gudxi Dios laabe gapanebe gunaa riʼ xiiñibe. Gupa Gómer ti xiiñiʼ Oseas (Os. 1:2, 3). Peru despué gúpabe ti dxaapahuiiniʼ ne ti hombrehuiiniʼ, zándaca xiiñiʼ gadxé hombre. Neca biʼniʼ cometerbe adulterio chupa chonna biaje la? qué nusaana Oseas laabe. Peru ra gudiʼdiʼ tiempu bisaana gunaa riʼ laabe ne beeda gaca esclava. Peru guzíʼ Oseas laabe (Os. 3:1, 2). Biquiiñeʼ Jiobá ni bizaaca Oseas riʼ para gusihuinni panda biaje biʼniʼ perdonarbe guidxi Israel despué de bicheenecaʼ laabe ne despué de biʼniʼ adorarcaʼ sti Dios. ¿Xi rusiidiʼ ndiʼ laanu yaʼ?

13 Casi maʼ bidúʼyanu ca, pa guni cometer ti xpinni Cristu inmoralidad sexual la? maʼ xheelabe nga guicaa ti decisión. Jesús guníʼ maʼ binni ni qué gapa donda ca nga guʼyaʼ pa zaca divorciar ne zachaganáʼ sti biaje. Peru laaca zanda guni perdonarbe laa. Cadi malu pa gúnibe ni. Biblia ná biguetaʼ Oseas yené Gómer ra lidxi. Ne dede dxi ca maʼ cadi naquiiñeʼ gapa Gómer relación sexual né sti hombre. Qué ñapa Oseas relación sexual né laabe ti tiempu (Os. 3:3). Peru zándaca despué maʼ gúpabe relación sexual né Gómer. Ndiʼ biʼniʼ representar cacaa Jiobá guidxi Israel sti biaje ne maʼ zanda guni servircaʼ laabe (Os. 1:11; 3:3-5). Ni rusiidiʼ ndiʼ laanu nga pa guicaa hombre o gunaa ni biʼniʼ cometer xheelaʼ inmoralidad sexual decisión de cadi gaca divorciar la? zusihuínnibe maʼ biʼniʼ perdonar laabe ora gápacaʼ relación sexual sti biaje (1 Cor. 7:3, 5). Pa guizaaca ndiʼ la? maʼ qué zanda diʼ gaca divorciarbe. Ne dede dxi ca naquiiñeʼ gúnicabe stipa pur gúʼyacabe xquendaxheelacabe casi ruuyaʼ Jiobá ni.

GUNI RESPETARNU GUENDAXHEELAʼ NECA CHUʼ PROBLEMA

14. Casi ná 1 Corintios 7:10, 11, ¿xi zándaca guizaaca caadxi guendaxheelaʼ?

14 De guiranu ca xpinni Cristu naquiiñeʼ guni respetarnu guendaxheelaʼ, cásica runi Jiobá ne Jesús ni. Peru nuu biaje, nuu tu laa qué runi ni, purtiʼ imperfectu laanu (Rom. 7:18-23). Nga runi, cadi naquiiñeʼ guidxagayaanu ora gánnanu gupa ca xpinni Cristu de primé siglu problema lu xquendaxheelacaʼ. Nga runi bicaa Pablo «cadi usaana gunaa xheelaʼ», peru guyuu tu biʼniʼ ni dxiqué (biindaʼ 1 Corintios 7:10, 11).

¿Xi zanda guni tuuxa para guni chaahuiʼ ca guendanagana ni napa lu guendaxheelaʼ stiʼ? (Biiyaʼ párrafo 15).

15, 16. a) ¿Xi naquiiñeʼ guni cani maʼ bichaganáʼ ora nápacaʼ problema ne xiñee? b) ¿Ñee naquiiñeʼ gusabixheelaʼ tuuxa pa cadi xpinni Cristu xheelaʼ la?

15 Qué nuzeeteʼ diʼ Pablo xiñee gulaa ca guendaxheelaʼ riʼ. Peru cadi pur biʼniʼ cometer hombre ca inmoralidad sexual nga bizaaca ni, purtiʼ pa ñaca zacá ni la? ñanda ñaca divorciar gunaa ca de laabe ne nichaganáʼ sti biaje. Bizeeteʼ Pablo zanda guicaa gunaa ca decisión de cadi guichaganáʼ o guibiguetané xheelaʼ. Purtiʼ para Dios nacarúcabe tobi si. Gudxi Pablo ca xpinni Cristu que gúnicaʼ stipa pur cadi gaca divorciarcaʼ de xheelacaʼ, ne guibiguetanecaʼ laacabe pa qué ñúnicabe xiixa cosa malu. Zanda guinabaʼ ca guendaxheelaʼ riʼ gacané ca ancianu laacaʼ. Qué ziuu ca ancianu pur tobi de laacabe, sínuque  zaquiiñecaʼ Biblia para gudiicaʼ conseju laacabe.

16 Zándaca jma nagana guca ni para ca xpinni Cristu ni cadi hermanu xheelaʼ. Peru ¿ñee zanda gusabixheelaʼ ti xpinni Cristu pa nápacabe problema la? Cadi guiaandaʼ laanu Biblia ná pur inmoralidad sexual si nga zanda gaca divorciar tuuxa, peru qué ruzeeteʼ diʼ ni ca razón para gusabixheelaʼ binni. Pablo guníʼ: «Pa nuu hermana napa xheela ni qué runi cre Cristu, ne na xheela cueza né laa la? [...] cadi usaana xheelaʼ» (1 Cor. 7:12, 13). Dede yanna risaca ni ná principiu riʼ.

17, 18. ¿Xiñee stale xpinni Cristu maʼ gucuaa decisión cadi gusabixheelaʼ neca napa problema lu xquendaxheelaʼ?

17 Zándaca ziuu ora gusihuinni ti hombre ni qué runi cré Cristu qué racalaʼdxiʼ cuezané xheelaʼ. Zándaca runi maltratarbe xheelabe dede guiníʼ ique hermana riʼ zaca huará o dede nuu xquendanabánibe ra naxoo. O zándaca purtiʼ qué rudiibe ni iquiiñeʼ familia stibe o chuʼ hermana riʼ lu peligru de guniti espiritualidad stiʼ. Ora rizaaca ni bizéʼtenu riʼ, nuu hermana ricaa decisión gusabixheelaʼ pa naʼ o qué naʼ xheelaʼ. Peru xcaadxi hermana la? neca cadiʼdiʼ ca problema riʼ qué rúnicaʼ ni. Runi huantarcaʼ ne rúnicaʼ stipa pur gaca chaahuiʼ ca problema sticaʼ. ¿Xiñee rúnicabe ni yaʼ?

18 Ti razón nga purtiʼ neca cadi nabézacabe tobi si la? xheelarúcabe ne zaparúcabe ca guendanagana ni bizéʼtenu ante. Ne apóstol Pablo bizeeteʼ sti razón para cadi gusabixheelaʼ tuuxa. Sicaríʼ bicaabe: «Pa qué runi cre ti hombre peru runi cre xheela la? ziuu ndaaya pur xheelaʼ. Ne zaqueca gunaa ni qué runi cre, laca ziuu ndaaya pur xheelaʼ. Pa qué ñaca ni zacá la? ca xiiñi tu ñaca casi xiiñi cani qué runi cre, peru pur tobi de laatu ni ma runi cre la? ziuu cabe ndaayaʼ» (1 Cor. 7:14). Stale xpinni Cristu maʼ gucuaa decisión cadi gusaana xheelaʼ ni cadi xpinni Cristu neca cadiʼdiʼ ra nagana. Ne stale de laacaʼ riéchecaʼ pur bíʼnicaʼ sacrificiu riʼ purtiʼ guca xheelacaʼ ti testigu stiʼ Jiobá (biindaʼ 1 Corintios 7:16; 1 Ped. 3:1, 2).

19. ¿Xiñee nuu stale guendaxheelaʼ ni naca ti ejemplu ndaaniʼ congregación?

19 Guníʼ Jesús de divorcio ne bidii apóstol Pablo conseju ni zeeda de Dios de ximodo naquiiñeʼ guidúʼyanu ora rusábixheelaʼ tuuxa. Guirópacabe bisiidicabe naquiiñeʼ gusisaca ca xpinni Jiobá guendaxheelaʼ. Tiempu riʼ, nuu stale guendaxheelaʼ ni naca ti ejemplu ndaaniʼ ca congregación ni nuu lu guidubi Guidxilayú. Zándaca ndaaniʼ congregación stinu nuu stale guendaxheelaʼ ni nabani nayecheʼ purtiʼ hombre ca naca leal ne nadxii xheelaʼ ne gunaa ca laaca nadxii xheelaʼ ne runi respetar laabe. Ca guendaxheelaʼ riʼ rusihuinni cani zanda guni respetarnu guendaxheelaʼ. Riéchenu stale purtiʼ millón de hermanu ni maʼ bichaganáʼ rusihuinni dxandíʼ ni ná ca diidxaʼ riʼ: «Zusaana hombre bixhoze ne jñaa para ichaganá xheelaʼ, ne neca chupa cabe peru zaca cabe tobi si» (Efes. 5:31, 33).