Biiyaʼ guiraʼ ni nuu lu sitiu riʼ

guyé lu índice

 CANI NAGUU CHAAHUIʼ XQUIDXI DIOS

Ximodo bizulú guca predicar stiidxaʼ Reinu ndaaniʼ guidxi Portugal

Ximodo bizulú guca predicar stiidxaʼ Reinu ndaaniʼ guidxi Portugal

CADXELASAA ca ola stiʼ océano Atlántico cascu stiʼ ti barcu ni zé Europa. Tobi de ca hombre ni zé ndaaniʼ barcu que nga George Young, ne cayetenaláʼdxibe guiráʼ ni guleendube ra bíʼnibe dxiiñaʼ stiʼ Reinu ndaaniʼ guidxi Brasil. * Ne laga jma zixeleʼ barcu que la? ziníʼ íquebe sti asignación ni gucuaabe, España ne Portugal, ti lugar ra huaxiéʼ huayuni predicárcabe stiidxaʼ Reinu. Caníʼ íquebe ora chindabe la? zuni organizarbe ti reunión para guni discursar hermanu Joseph F. Rutherford ne quíʼzibe 300,000 tratadu.

Zé hermanu George Young ndaaniʼ barcu

Lu iza 1925, yendá hermanu Young guidxi Lisboa (Portugal). Tiempu riʼ, nabé nuudinde ca binni de lugar que. Lu iza 1910 dxi guca revolución republicana, maʼ qué ninácabe ñuni mandar ti rey guidxi que ne dxi guca revolución riʼ gúxhacabe caadxi privilegiu ni gupa religión Católica. Gupa ca binni de guidxi que jma libertad, peru neca zaqué guyuuruʼ ni bichiiñaʼ laacaʼ.

Dxi maʼ nuu George Young listu para gudii hermanu Rutherford ti discursu, gulee gobiernu que ti ley ra ná cadi naquiiñeʼ gaca reunir binni pur grupu, purtiʼ nuu ca binni ni cucaalú gobiernu que chuʼcaʼ ne guni mandarcaʼ guidxi que. Gudxi hombre ni naca secretariu stiʼ Sociedad Bíblica Británica y Extranjera hermanu Young ziuu tu zucaalú laa. Neca zaqué, gunábabe permisu para iquiiñebe gimnasio stiʼ Escuela Secundaria Camões, ne bidiicabe permisu que laabe.

Gunda 13 de mayo, dxi chigudii hermanu Rutherford discursu que, ne maʼ cabezasicabe gucaadiágacabe laabe. Ca letreru ni nanda lu ca edificiu que ne ca periódicu que cayuni cani anunciu de discursu ni láʼ «Cómo vivir en la Tierra para siempre». Ngue runi nagueendaca gulee ca religión ni cucaalú laacabe que lu periódicu ti tema ni láʼ «guedandá caadxi profeta falsu» para guni avisarcaʼ binni. Laaca guyécabe ra puertaʼ stiʼ gimnasio que ne gudiizicabe mil de folletu ni cusiidiʼ gadxé de ni chigusiidiʼ hermanu Rutherford.

Neca zaqué guyé biaʼ chupa mil binni ne casi biáʼqueca biaanaʼ fuera, purtiʼ maʼ gastiʼ lugar. Stale de laacabe guizáʼ nuucabe gucaadiágacabe discursu que dede gudxíʼbacaʼ lu ca escalera de doo ni nuu guriá gimnasio que, ne nuu tu laa gurí lu ca aparatu ra rúnicabe ejerciciu.

Peru bizaaca caadxi cosa ni cadi cabézacabe. Guyé ca binni ni cucaalú laacabe que yegúnicaʼ ridxi raqué ne gundaacaʼ caadxi banguʼ. Peru qué nidxiichi diʼ hermanu Rutherford, ni bíʼnibe nga gudxíʼbabe lu ti mexaʼ para ganda gucaadiaga ca binni que laabe. Ora bilúxebe, maʼ biaʼ galaa gueelaʼ, jma de ti mil chupa gayuaa binni bisaana dirección stiʼ ne lá para guseendacabe publicación ra nuucaʼ. Sti dxi queca, gulee periódicu ni láʼ O Século ti tema ni caníʼ de discursu ni bidii hermanu Rutherford.

Lu beeu septiembre iza 1925, ndaaniʼ guidxi Portugal, bizulú biree revista La Torre del Vigía, ni  runibiaʼnu yanna casi revista Torre stiʼ ni Rapa lu diidxaʼ portugués (para tiempu que maʼ biree ti versión stiʼ revista riʼ lu diidxaʼ portugués ndaaniʼ guidxi Brasil). Tiempu queca, ndaaniʼ guidxi Brasil nabeza ti Binni Ruundaʼ Biblia ni láʼ Virgílio Ferguson ne caníʼ ique chindeza Portugal para gacané lu xhiiñaʼ Reinu. Juntu bíʼninebe hermanu George Young dxiiñaʼ ndaaniʼ ti sucursalhuiiniʼ ni gupa ca Binni Ruundaʼ Biblia ndaaniʼ guidxi Brasil. Nin que nindaa gucuaa Virgílio ne Lizzie, xheelaʼ, ti barcu para checaʼ Portugal para gúʼyacaʼ hermanu Young raqué sti biaje. Ne biáʼsipeʼ tiempu yendácabe, purtiʼ chiguiree hermanu Young chiguni predicar xcaadxi lugar casi Unión Soviética.

Permisu stiʼ Lizzie ne Virgílio Ferguson para cuézacaʼ ndaaniʼ sti guidxi (1928)

Dxi bicaalú ca militar gobiernu stiʼ Portugal, jmaruʼ si bicaalúcabe xquidxi Dios. Peru jmaruʼ si naguidxi guca fe stiʼ hermanu Ferguson. Nagueendaca biyúbibe modo gápabe grupuhuiiniʼ de Binni Ruundaʼ Biblia para cadi gusaanacaʼ de gúnicaʼ xhiiñaʼ Dios ne gunábabe permisu ca autoridad para gaca reunión ra lídxibe. Lu beeu octubre iza 1927, bidii ca autoridad que permisu laabe.

Lu primé iza de cayuni mandar ca militar que, biaʼ tapa gayuaa cincuenta binni bicaa lá para guicaa revista La Torre del Vigía. Ne pur ca tratadu ne ca folletu que, gunda yendá Stiidxaʼ Dios dede ca parte jma zitu stiʼ Imperiu stiʼ Portugal casi, Angola, las Azores, Cabo Verde, Goa (India), Madeira, Mozambique ne Timor Oriental.

Ra maʼ ziluxe iza 1920, yendá Manuel da Silva Jordão, ndaaniʼ guidxi Lisboa, ti jardineru humilde. Dxi nabézabe Brasil bicaadiágabe ti discursu ni bidii hermanu Young. Nagueendaca bidiibe cuenta dxandíʼ ni cusiidiʼ hermanu que, ne bicaa ni laabe gacanebe hermanu Ferguson para gaca predicar stiidxaʼ Reinu ra nuu jma binni. Ngue runi gúcabe colportor, dxiqué zaca biree láʼ ca precursor. Cumu maca nexheʼ chaahuiʼ ximodo guiree ne guiaaziʼ ca publicación que la? nagueenda biroobaʼ congregaciónhuiiniʼ ni nuu Lisboa que.

Lu iza 1934, biguetaʼ hermanu Ferguson ne xheelaʼ Brasil. Peru para tiempu riʼ maʼ yendá Stiidxaʼ Dios ndaaniʼ guidxi Portugal. Neca nuu guendanagana Europa pur guerra civil española ne pur Segunda Guerra Mundial la? qué nusaana grupuhuiiniʼ de hermanu ni nuu Portugal que de nuzuubacaʼ stiidxaʼ Dios. Guyuu ti tiempu la? beeda gaca grupuhuiiniʼ riʼ casi caadxi buu ni cá gui. Peru lu iza 1947 yendá ti misioneru ni guca graduar lu Scuela stiʼ Galaad ni láʼ John Cooke ra nuucabe, casi ora nibanilú gui que sti biaje. Dede dxiqué guizáʼ bidale publicador. Neca lu iza 1962 bicueeza gobiernu dxiiñaʼ ni rúnicabe la? jmaruʼ si bidálecabe. Lu beeu diciembre iza 1974, dxi bidii gobiernu derechu ca testigu stiʼ Jiobá para gúnicaʼ dxiiñaʼ ndaaniʼ guidxi que, maʼ nuu jma de trece mil publicador.

Tiempu riʼ, maʼ nuu jma de cincuenta mil publicador ni runi predicar Stiidxaʼ Dios ndaaniʼ guidxi Portugal ne lu caadxi isla ra riníʼcabe diidxaʼ portugués, casi las Azores ne Madeira. Ládecabe nuu familia stiʼ ca hermanu ni bicaadiaga discursu ni bidii hermanu Rutherford lu iza 1925.

Rudiʼnu xquíxepeʼ Jiobá ne ca hermanu ni biʼniʼ predicar stiidxaʼ Reinu primé biaje ndaaniʼ guidxi Portugal, ne gúcacaʼ nadxibalú cásipeʼ guníʼ Pablo, purtiʼ biʼniʼ predicárcabe stiidxaʼ Cristu ndaaniʼ guidxi riʼ (Rom. 15:15, 16). (Cani naguu chaahuiʼ xquidxi Dios Portugal).

^ párrafo 3 Biiyaʼ tema ni láʼ «Cayaadxaruʼ gaca stale dxiiñaʼ», ni biree lu revista Torre stiʼ ni rapa 15 stiʼ mayo 2014, yaza 31 ne 32.