Biiyaʼ guiraʼ ni nuu lu sitiu riʼ

guyé lu índice

Guninenu Jiobá dxiiñaʼ guiráʼ dxi

Guninenu Jiobá dxiiñaʼ guiráʼ dxi

«Tobi si runi né du Dios dxiiñaʼ» (1 COR. 3:9).

DIIDXAʼ RIUUNDAʼ: sjj 64 NE sjj 111

1. ¿Gunáʼ nga caadxi modo zanda guninenu Jiobá dxiiñaʼ?

DXI bizáʼ Jiobá laanu la? gucaláʼdxibe ñacanenu laabe para ñaca cumplir ni gudixhe íquebe. Peru, neca nácanu imperfectu la? zanda guninenu laabe dxiiñaʼ guiráʼ dxi. Biblia ná runinenu Dios dxiiñaʼ ora runi predicarnu ne ora racanenu binni gaca discípulo (1 Cor. 3:5-9). Ti privilegiu guizáʼ naroʼbaʼ nga gulí Dios ni bizáʼ universu ne ni jma napa poder laanu para gacanenu laa gaca ti dxiiñaʼ ni nabé risaca. Peru nuu xcaadxi modo zanda guninenu Jiobá dxiiñaʼ. Lu tema riʼ zazíʼdinu chupa chonna de laacani casi: ora racanenu familia stinu ne ca hermanu, ora rácanu hospitalariu, ora riuʼnu listu para gúninu dxiiñaʼ ndaaniʼ organización stiʼ Dios ne ora rúninu jma lu xhiiñaʼ Dios (Col. 3:23).

2. ¿Xiñee cadi naquiiñeʼ guchaaganu dxiiñaʼ ni rúninu para Jiobá ne ni runi xcaadxi?

2 Laga cayuni estudiarnu tema riʼ, cadi guchaaganu dxiiñaʼ ni rúninu para Jiobá ne ni runi xcaadxi. Cadi guiaandaʼ laanu gadxé gadxé iza napa cada tobi, gadxé circunstancia stinu ne ni zanda guni cada tobi de laanu ne cadi guiranu nazaacanu. Apóstol Pablo guníʼ: «Cada tobi guʼya chaahui ni cayuni, ne pa nanna jneza ni cayuni la? zieche né ni, ne qué zazaalaʼdxi ni cayuni stobi» (Gál. 6:4).

 GACANENU FAMILIA STINU NE CA HERMANU

3. ¿Xiñee zanda guininu ora rapa tuuxa de familia stiʼ cayuniné Jiobá dxiiñaʼ?

3 Ni ribeza Jiobá de ca xpinni nga gápacaʼ familia sticaʼ. Guzéʼtenu ti ejemplu, nuu tu laa caquiiñeʼ guni dxiiñaʼ para gapa familia stiʼ ni tiidiné dxi. Stale gunaa riaana ra lidxi para gusiniisi ca xiiñihuiiniʼ. Ne nuu xpinni Cristu caquiiñeʼ gapa bixhoze o jñaa, purtiʼ maʼ nagólacaʼ. Ndiʼ nga ca cosa ni caquiiñeʼ gúninu. Biblia ná: «Ti hermanu ni qué ulabi ca lisaa ne jma rusi pa qué ulabi ca binni lidxi, ma biree de ni runi cre, ne zeda aca jma nadxaba que ni qué runi cre» (1 Tim. 5:8). Pa rúninu tobi de cani bizéʼtenu riʼ, zándaca maʼ huaxiéʼ tiempu rápanu para gúninu ca cosa espiritual casi modo ñuuláʼdxinu ñúninu cani. Peru cadi naquiiñeʼ guireʼnu gana. Cadi guiaandaʼ laanu ni riuulaʼdxiʼ Dios nga gápanu familia stinu (1 Cor. 10:31).

4. Ca hermanu ni napa xiiñiʼ, ¿ximodo zanda gúnicaʼ ni ná Reinu primé lu xquendanabánicaʼ ne xi zabeenducaʼ?

4 Ca hermanu ni napa xiiñiʼ runinecaʼ Jiobá dxiiñaʼ ora riguucaʼ gana ca xiiñicaʼ para gápacaʼ meta espiritual. Ra tiidiʼ iza, stale de ca xcuidihuiiniʼ ca rúnicaʼ xhiiñaʼ Dios de tiempu completu ne runi servircaʼ zitu de familia sticaʼ. Nuu de laacabe naca misioneru, xcaadxi naca precursor regular ni cayacané ra nuu necesidad ne xcaadxi la? cayuni servir Betel. Cumu nabézacabe zitu la? qué ruuyapeʼ familia stícabe laacabe casi ñuuláʼdxicaʼ. Neca cadi seguidu ruuyaʼ ca hermanu riʼ ca xiiñicaʼ, peru nuucaʼ dispuestu gúnicaʼ intiica sacrificiu ne cuʼcaʼ gana laacabe para cadi gusaanacabe asignación sticabe. ¿Xiñee rúnicabe ni yaʼ? Purtiʼ riéchecaʼ gúʼyacaʼ cayuni xiiñicaʼ ni ná Reinu primé lu xquendanabánicaʼ (3 Juan 4). Zándaca runi sentírcabe casi biʼniʼ sentir Ana dxi bidii Samuel para guni servir Dios, guniʼbe casi ñaca nutiiñebe xiiñibe Jiobá. Ca hermanu ni napa xiiñiʼ ni cayuni servir lu ti asignación, ruuyacaʼ ni casi ti privilegiu ni nabé risaca purtiʼ zacá nga ti modo cayuninécabe Dios dxiiñaʼ (1 Sam. 1:28).

5. ¿Ximodo zanda gacanenu ca hermanu ni nuu ndaaniʼ congregación stinu yaʼ? (Biiyaʼ ca foto ni zeeda ra ruzulú tema riʼ).

5 ¿Laga pa qué gápanu nin ti responsabilidad ni cuee tiempu stinu yaʼ? Zanda gacanenu ca hermanu ni maʼ huaniisi, cani huará o cani caquiiñeʼ tu gacané laa. Laaca zanda gacanenu cani rapa ca hermanu ni maʼ huaniisi o cani huará. ¿Xiñee qué guidúʼyanu pa nuu tuuxa hermanu ndaaniʼ congregación ni caquiiñeʼ tu gacané laa yaʼ? Casi pa nuu ti hermana ni cayapa bixhoze ni maʼ nagola. ¿Ñee zanda gápaluʼ bixhózebe para ganda gúnibe xcaadxi cosa la? O zanda gaca ofrecernu chicaanu tuuxa para chinenu laa reunión, chigánnanu tuuxa ni nuu ra hospital, chisinu o gúninu mandadu stiʼ tuuxa. Pa gúninu cani bizéʼtenu riʼ, zacanenu Jiobá para guicabi oración stiʼ ca hermanu riʼ (biindaʼ 1 Corintios 10:24).

GÁCANU HOSPITALARIU

6. ¿Ximodo nga gaca tuuxa hospitalariu?

6 Ca binni ni runiné Dios dxiiñaʼ runibiáʼcabe laacaʼ casi binni hospitalariu. Lu ca Escrituras Griegas Cristianas, diidxaʼ «hospitalidad» riníʼ ni «gaca tuuxa nachaʼhuiʼ né ti binni ni qué runibiáʼ» (Heb. 13:2). Ndaaniʼ Biblia zeeda stale relatu ni rusiidiʼ laanu gácanu hospitalariu (Gén. 18:1-5). Naquiiñeʼ gápanu costumbre de chuʼnu listu para gacanenu xcaadxi, pa nácacaʼ hermanu stinu o pa coʼ (Gál. 6:10).

7. ¿Xiñee naquiiñeʼ gácanu hospitalariu né ca siervu de tiempu completu ni riganna congregación stinu?

7 Zanda guninenu Dios dxiiñaʼ ra gácanu  hospitalariu ne ca siervu de tiempu completu ni riganna congregación stinu (biindaʼ 3 Juan 5, 8). Ora riganna ca hermanu riʼ congregación stinu, rápanu oportunidad de ugúʼsaanu gana laanu pur fe stinu (Rom. 1:11, 12). Guzéʼtenu xi bizaaca ti hermanu láʼ Olaf. Raca caadxi iza, dxi joven laabe, yeganna ti superintendente de circuito solteru congregación stibe, peru guirutiʼ ñuni hospedar hermanu riʼ. Ngue runi gunabadiidxaʼ Olaf bixhoze ne jñaa, ni cadi naca testigu, pa zanda guiaana hermanu riʼ ra lídxicabe. Gúdxicabe Olaf zanda, xi si la? napa xidé gasiʼ lu sillón. Guizáʼ galán ni bíʼnibe que. Qué riaandaʼ Olaf guiráʼ ni guleendú semana que. Sicaríʼ guniʼbe: «Naa ne superintendente de circuito que riásadu tempranu guiráʼ dxi, ne laga cadeʼdu la? rinidu de caadxi tema nabé galán. Modo guluu hermanu que gana naa bicaa ni naa chúʼladxeʼ guneʼ servir de tiempu completu». Maʼ cuarenta iza de naca Olaf misioneru ndaaniʼ stale guidxi.

8. ¿Xiñee naquiiñeʼ gácanu nachaʼhui né binni neca ruluíʼ qué zudiicaʼ xquíxepeʼ laanu? Bizeeteʼ ti ejemplu.

8 Nuu stale modo zanda gácanu nachaʼhuiʼ né ca binni ni qué runibiaʼnu neca qué gudiicaʼ xquíxepeʼ laanu. Guzéʼtenu ti ejemplu ni bizaaca ndaaniʼ guidxi España. Ti dxi laga cudii ti publicadora estudiu ti señora de Ecuador ni láʼ Yésica, málasi bizulú cayuunabe. Para gunabadiidxaʼ hermana que laabe xi cayácabe, gudxi Yésica laabe ante cheʼ España la? guizáʼ pobre laa ne cayetenalaʼdxiʼ xi bizaaca ti dxi qué gapa ni gó. Nisa si nápabe para gudiibe xiiñibe. Laga nuabe dxaapahuiiniʼ stibe cusisiaasibe laa, bizulú cayuni orarbe. Nin cadi xadxí, málasi bixhidxináʼ chupa Testigu ra puertaʼ stibe. Nabé feu modo biʼniʼ tratarbe ca hermana que dede guchézabe revista ni bidiicaʼ laabe. Ne gúdxibe laacaʼ: «¿Ñee ndiʼ nga gudieeʼ gó xiiñeʼ la?». Biyubi ca hermana que modo guni calmarcaʼ laabe, peru qué ñanda. Gupa si ratu, biguetaʼ ca hermana que ne bisaanacaʼ ti dxumi dxaʼ guendaró ndaaniʼ ra puertaʼ stibe. Ngue runi cayuunabe purtiʼ cayetenaláʼdxibe pabiáʼ nachaʼhuiʼ guca ca hermana que né laabe ne cayuni sentirbe mal purtiʼ bicabi Dios oración stibe ne laabe qué nulábibe laa. Peru yanna maʼ gucuaabe decisión de gúnibe ni ná Jiobá, purtiʼ guca ca hermana que nachaʼhuiʼ né laabe (Ecl. 11:1, 6).

CHUʼNU LISTU PARA GÚNINU DXIIÑAʼ NDAANIʼ ORGANIZACIÓN STIʼ DIOS

9, 10. a) Tiempu bibani ca israelita, ¿pora nga biquiiñecabe binni para guni dxiiñaʼ de voluntariu? b) ¿Bizeeteʼ caadxi dxiiñaʼ ni caquiiñeʼ gaca ndaaniʼ congregación?

9 Tiempu bibani ca israelita, guyuu ora biquiiñecabe binni para guni dxiiñaʼ de voluntariu (Éx. 36:2; 1 Crón. 29:5; Neh. 11:2). Tiempu riʼ, laaca nápanu stale oportunidad de iquiiñenu tiempu stinu, ni nápanu ne ni nánnanu gúninu para gacanenu ca hermanu stinu. Pa gúninu ni, ziuʼnu nayecheʼ ne zacaanu stale ndaayaʼ.

10 Riguu Stiidxaʼ Dios gana ca hombre guninecaʼ Jiobá dxiiñaʼ, ra gácacaʼ siervu ministerial ne ancianu (1 Tim. 3:1, 8, 9; 1 Ped. 5:2, 3). Ca hermanu ni runiné Jiobá dxiiñaʼ riuuláʼdxicaʼ gacanecaʼ ca hermanu en sentidu espiritual ne lu xcaadxi cosa (Hech. 6:1-4). ¿Ñee huanabadiidxaʼ ca ancianu lii pa zanda guʼnuʼ de acomodador, gaca encargarluʼ de literatura o territorio o gacaneluʼ gaca dxiiñaʼ de mantenimientu la? Ca hermanu ni racané lu ca dxiiñaʼ ni bizéʼtenu riʼ riniʼcaʼ runi sentircaʼ galán ora racanecaʼ xcaadxi.

Cani runi dxiiñaʼ para organización stiʼ Dios ridxélacaʼ jma xhamígucaʼ lu dxiiñaʼ riʼ. (Biiyaʼ párrafo 11).

11. ¿Xi biʼniʼ ca hermana ni binibiáʼ Margie lu grupu de construcción pur laa?

11 Ca hermanu ni racané lu ca dxiiñaʼ ni raca ndaaniʼ xquidxi Dios ridxélacaʼ  jma xhamígucaʼ. Guzéʼtenu experiencia stiʼ Margie, ti hermana ni biʼniʼ dxiiñaʼ dieciocho iza ra ribí Yoo stiʼ Reinu. Ca iza bíʼnibe dxiiñaʼ riʼ, biʼniʼ capacitarbe stale hermana joven. Biiyaʼ Margie ni casi ti oportunidad para cúʼsaacaʼ gana laacaʼ en sentidu espiritual (Rom. 1:12). Ne dxi gudíʼdibe lu guendanagana, ca xhamígabe ni binibiaʼbe lu grupu de construcción gucanecaʼ laabe ne gudixhédxicaʼ ladxidoʼbe. ¿Ñee maʼ huayacaneluʼ ra gurí ti Yoo stiʼ Reinu la? Pa nánnanu gúninu xiixa dxiiñaʼ o pa coʼ, zanda chigacanenu.

12. ¿Ximodo zanda gacanenu ora guizaaca xiixa desastre?

12 Ora rizaaca xiixa desastre, rapa ca xpinni Dios oportunidad para guninecaʼ Jiobá dxiiñaʼ ra gacanecaʼ ca hermanu. Ti modo zanda gúnicabe ni nga ora runi donarcabe bueltu para ca hermanu ni gucaná (Juan 13:34, 35; Hech. 11:27-30). Laaca zanda chigacanécabe para guiá o cuiʼ lidxi ca hermanu sti biaje. Guzéʼtenu xi bizaaca ti hermana de Polonia láʼ Gabriela, bixhiá lídxibe dxi bilaahua lugar ra nabézabe. Peru guizáʼ gutadxí ladxidoʼbe dxi guyé ca hermanu de congregación ni nuu gaxha de ra nabézabe yegacanecaʼ laabe. Sicaríʼ guniʼbe: «Qué zuzeetediáʼ de cani biniteʼ, purtiʼ cosa material si cani. Mejor guinieeʼ de ca cosa galán ni guleenduáʼ. Guiráʼ ni gudideʼ, gucané ni naa gudieeʼ cuenta ti privilegiu nga gacaʼ parte de xquidxi Dios, ti lugar ra zanda chuʼnu nayecheʼ ne gastiʼ qué zanda guchaaganu ni». Stale de ca hermanu ni hayacanécabe laacaʼ despué de guizaaca ti desastre, riniʼcaʼ zacaca runi sentircaʼ. Ne cani runiné Jiobá dxiiñaʼ ra gacanecaʼ xcaadxi hermanu laaca riuucaʼ nayecheʼ (biindaʼ Hechos 20:35; 2 Corintios 9:6, 7).

13. Ora gacanenu de voluntariu, ¿xiñee jma rucaa ni laanu gannaxhiinu Jiobá? Bizeeteʼ ti ejemplu.

13 Ti hermana láʼ Stephanie ne xcaadxi publicador biʼniʼ sentircaʼ nayecheʼ purtiʼ bíʼninecaʼ Dios dxiiñaʼ. ¿Ximodo bíʼnicabe ni yaʼ? Ra gucanécabe xcaadxi Testigu ni bixooñeʼ de xquidxi pur guerra ni yendeza Estados Unidos. Stephanie ne xcaadxi Testigu biyúbicaʼ yoo para guiaana ca hermanu que. Laabe guniʼbe: «Ora bidúʼyadu pabiáʼ cayecheʼ ca hermanu ne cudiicaʼ  xquíxepeʼ purtiʼ biʼniʼ sentircaʼ dxandíʼ nadxii ca hermanu laacaʼ la? biniibi ni ladxidoʼdo. Laacabe caníʼ íquecabe laadu nga gucanedu laacabe, peru jma stale cosa nga ni maʼ bíʼnicabe pur laadu. Ora bidúʼyadu pabiáʼ nadxiicabe Jiobá, nuucabe tobi si, nápacabe fe ne confianza Jiobá la? gucané ni laadu gannaxhiidu Dios jma. Ne laaca maʼ gucané ni laadu gusisácadu guiráʼ ni rudii Jiobá laanu mediante organización stiʼ».

GÚNINU JMA LU XHIIÑAʼ DIOS

14, 15. a) ¿Ximodo bicabi profeta Isaías ora gunabadiidxaʼ Jiobá laa pa zuni ti dxiiñaʼ? b) ¿Ximodo zanda chinándanu ejemplu stibe?

14 ¿Ñuuláʼdxiluʼ ñúniluʼ jma lu xhiiñaʼ Jiobá la? ¿Ñee nuuluʼ dispuestu chindézaluʼ ti lugar ra caquiiñeʼ jma tu guni xhiiñaʼ Jiobá la? Dxandíʼ, cadi caquiiñeʼ chindeza guiráʼ xpinni Dios sti lugar para gusihuínnicaʼ riuuláʼdxicaʼ gudiicaʼ de ni nápacaʼ. Peru nuu xcaadxi hermanu la? randa rindeza sti lugar para guni jma lu xhiiñaʼ Jiobá. Ricábicabe casi bicabi profeta Isaías ora gunabadiidxaʼ Jiobá laa: «Tu guseendaʼ, ne tu cheʼ para guiníʼ pur laanu yaʼ», óraque bicábibe «¡Raríʼ nuaaʼ! Biseendaʼ naa» (Is. 6:8). ¿Ñee laaca racaláʼdxinu guicábinu casi bicabi Isaías ora chuʼ ti oportunidad para chigacanenu la? ¿Paraaruʼ caquiiñeʼ tu gacané yaʼ?

15 Ora guníʼ Jesús de dxiiñaʼ de gaca predicar ne gacanenu binni gaca discípulo guniʼbe: «Ma stale binni cabeza si ucaa diaga stiidxa Dios. Tu güi ni nga huaxiéʼ. Yanna lainaba lu Dios useenda stale tu guni dxiiña ca, ti laabe nga xpixuaana ni» (Mat. 9:37, 38). ¿Ñee zanda chiguni servirnu de precursor ra jma nuu necesidad la? O ¿zanda guni animarnu tuuxa guni ni la? Stale hermanu, ruuyacaʼ ti modo jma galán zanda gusihuínnicaʼ nadxiicaʼ Dios ne prójimo sticaʼ nga chigacanecaʼ ti lugar ra jma caquiiñeʼ tu guni predicar. ¿Ñee nuuruʼ xcaadxi modo para gúninu jma lu xhiiñaʼ Dios la? Pa guni aprovecharnu ca oportunidad riʼ, ziuʼnu nayecheʼ.

16, 17. ¿Xi xcaadxi cosa zanda ugaanda cani racalaʼdxiʼ guni jma lu xhiiñaʼ Jiobá?

16 ¿Ñee nuunu dispuestu gúninu dxiiñaʼ Betel o lu construcción neca guni invitarcabe laanu ti tiempu o casi voluntario externo la? Caquiiñeʼ stale hermanu ni nuu dispuestu guni servir ra nuu necesidad ne ni guni intiica dxiiñaʼ gudiicabe laa. Zándaca maʼ nánnanu gúninu xiixa dxiiñaʼ ne maʼ nápanu experiencia, peru nuu biaje zuni asignarcabe laanu gadxé dxiiñaʼ. Intiica dxiiñaʼ gudiicabe laanu gúninu la? rusisaca Jiobá ca binni ni riuulaʼdxiʼ gacané ra caquiiñeʼ (Sal. 110:3).

17 Pa racaláʼdxinu guizíʼdinu jma para guni servirnu Jiobá la? zúninu stipa para chuunu Escuela para Evangelizadores del Reino. Runi preparar scuela riʼ ca hombre ne gunaa espiritual ni cayuni dxiiñaʼ de tiempu completu para ganda iquiiñeʼ organización stiʼ Jiobá laacabe jma. Ca hermanu ni rié scuela riʼ, nuucaʼ dispuestu chiguni servircaʼ ratiica guseendacabe laacaʼ despué de gaca graduarcaʼ. ¿Nuunu dispuestu chuunu scuela riʼ para guninu jma lu xhiiñaʼ Jiobá la? (1 Cor. 9:23).

18. ¿Xi zabeendunu pa guninenu Jiobá dxiiñaʼ guiráʼ dxi?

18 Guiranu, ca xpinni Jiobá, racaláʼdxinu gudiʼnu de ni nápanu, gannaxhiinu ne gácanu nachaʼhuiʼ, ne guizaaláʼdxinu binni guiráʼ dxi. Pa gúninu ni zuni sentirnu nayecheʼ ne zápanu guendariuudxi (Gál. 5:22, 23). Neca gadxé gadxé circunstancia stinu, guiranu zanda guibáninu nayecheʼ ra chinándanu ejemplu stiʼ Jiobá ora rudiʼnu de ni nápanu. Ne chuʼnu lade ca binni ni nadxiibe, cani runiné laabe dxiiñaʼ (Prov. 3:9, 10).