Biiyaʼ guiraʼ ni nuu lu sitiu riʼ

guyé lu índice

Ca hermanu ni maʼ guca nombrar: lachinanda ejemplu stiʼ Timoteo

Ca hermanu ni maʼ guca nombrar: lachinanda ejemplu stiʼ Timoteo

IZA de serviciu ni gudiʼdiʼ ca, lu guidubi Guidxilayú guca nombrar mil de testigu stiʼ Jiobá ancianu ne siervu ministerial. Pa lii nga tobi de ca hermanu ni guca nombrar riʼ, nuudu seguru nuuluʼ nayecheʼ pur asignación ni gucuaaluʼ.

Nga runi, zándaca nuuluʼ nervioso ne normal guni sentirluʼ zacá. Sicaríʼ guníʼ ti ancianu joven láʼ Jason: «Dxi biʼniʼ nombrárcabe naa guníʼ iqueʼ qué zanda guneʼ cumplir né responsabilidad ni bidiicabe naa que». Laaca biʼniʼ sentir Moisés ne Jeremías qué zanda gúnicaʼ dxiiñaʼ ni bidii Jiobá laacaʼ (Éx. 4:10; Jer. 1:6). ¿Ñee huayuni sentirluʼ zacá la? ¿Xi zanda gúniluʼ para cadi guni sentirluʼ zacá ne cadi gusaana de guiniisiluʼ lu xhiiñaʼ Dios yaʼ? Guidúʼyanu ejemplu stiʼ Timoteo (Hech. 16:1-3).

LACHINANDA EJEMPLU GALÁN STIʼ TIMOTEO

Zándaca napa Timoteo biaʼ gande iza dxi biʼniʼ invitar Pablo laa chiné laabe lu ca viaje misional stiʼ. Zándaca dxi bizulube guníʼ íquebe qué zanda gúnibe dxiiñaʼ gucuaabe que ne zándaca laaca guca nagana para laabe gúnibe dxiiñaʼ que ndaaniʼ congregación (1 Tim. 4:11, 12; 2 Tim. 1:1, 2, 7). Peru chii iza despué, gudxi Pablo ca diidxaʼ riʼ ca xpinni Cristu de Filipos: «Ribeza acané Señor Jesús naa ti guiuba guseenda Timoteu ra nuu tu [...]. Laasi be lade irá ni runi né naa dxiiña zanaxhii laatu casi nadxiee laatu [o nuu dispuestu gacané laatu]» (Filip. 2:19, 20).

¿Xi biʼniʼ Timoteo para guca ti ancianu ni biʼniʼ xhiiñaʼ jneza yaʼ? Guidúʼyanu xhoopaʼ cosa ni zanda guiziidiluʼ de laabe.

1. Bizaaláʼdxibe binni. Pablo gudxi ca hermanu de Filipos naca Timoteo ti binni ni rizaalaʼdxiʼ laacaʼ (Filip. 2:20). Ne dxandíʼ bizaalaʼdxiʼ Timoteo xcaadxi binni. Ni jma gucuá íquebe nga gacanebe xcaadxi para chuʼcaʼ naguidxi en sentidu espiritual ne guyuube dispuestu gúnibe intiica sacrificiu pur laacaʼ.

Ti hermanu ni maʼ ziné jma de gande iza de naca ancianu ni láʼ William cudii sugerencia riʼ cani nacubi guca nombrar ancianu o siervu ministerial: «Biʼniʼ tratar ca hermanu né cariñu ne biʼniʼ cumplir ca responsabilidad nápaluʼ ndaaniʼ congregación, peru laaca bizaalaʼdxiʼ ni caquiiñecabe». Nga runi, cadi gácaluʼ casi tuuxa ni rusá autobús ni jma cá ique chindá ra parada que guindisaʼ binni.

2. Gudixhe íquebe gúnibe ca cosa espiritual primé lu xquendanabánibe. Guníʼ si Pablo de modo guca Timoteo, guníʼ ca diidxaʼ riʼ: «Xcaadxi la? jma ricá ique ca laca laacaʼ, ne qué rizaalaʼdxi ca xhiiña Cristu» (Filip. 2:21). Nuu Pablo Roma dxi bicaa ca diidxaʼ riʼ, ngue runi bidiibe cuenta jma cá ique ca hermanu que guni tendercaʼ ca cosa sticaʼ, ne ora rúnicaʼ xhiiñaʼ Dios la? rúnicaʼ biá randa si. Peru Timoteo qué ñuni zacá. Ora gúpabe oportunidad gúnibe jma lu xhiiñaʼ Jiobá la? bíʼnibe casi biʼniʼ Isaías ora guníʼ: «¡Raríʼ nuaaʼ! Biseendaʼ naa» (Is. 6:8).

¿Xi zanda gúniluʼ para gácaluʼ equilibradu ora guni tenderluʼ ca cosa stiluʼ ne ora guni tenderluʼ ca responsabilidad espiritual ni nápaluʼ yaʼ? Primé, biiyaʼ xii nga ni jma risaca gúniluʼ. Pablo guníʼ pabiáʼ risaca gánnanu gunáʼ nga ca cosa ni «dxandí risaca» (Filip. 1:10). Biiyaʼ xii nga ni ná Dios jma risaca ne biʼniʼ cani. Guiropa, cadi gúniluʼ stale cosa. Cadi gúniluʼ xiixa ni cuee tiempu stiluʼ ne ni gusidxaga lii. Pablo bidii conseju riʼ Timoteo: «Stale ni cadi jneza riguba yu cani nahuiini ruʼ. Bixele de laacani ne bidxii lú ibani lu  jneza. Bini cre Dios ne gunaxhii binni ne biyubi cadi tinde tu» (2 Tim. 2:22).

3. Bíʼnibe dxiiñaʼ nadipaʼ para bíʼnibe ni ná Jiobá. Bisietenalaʼdxiʼ Pablo ca hermanu de Filipos ximodo guca Timoteo: «Ma nanna tu pabiáʼ rudxii lú Timoteu dxiiña ne modo huayacané naa ra canayué stiidxa Cristu, casi ñaca xiiñe laa» (Filip. 2:22). Qué ñaca Timoteo ti binni nachaabaʼ. Laabe ne Pablo bíʼnicabe dxiiñaʼ juntu ne ngue gucané laacabe gaca xhamígucabe jma.

Nuu stale dxiiñaʼ ndaaniʼ organización stiʼ Dios, dxiiñaʼ ni zaguu lii nayecheʼ ne ni zuchiiñaʼ lii jma gaxha de ca hermanu. Nga runi, gudixhe ique cadi gusaanaluʼ de gúniluʼ «xhiiña Señor biaʼ ra ganda ti» (1 Cor. 15:58).

4. Bíʼnibe ni biziidibe. Bicaa Pablo ca diidxaʼ riʼ ra nuu Timoteo: «Ma nanna chaahui lu ni bisiideʼ ne modo bibaneʼ, xi cá ique guneʼ, ne xi rune cre. Qué huaxhacaladxe irutiʼ, sínuque huayanaxhieeʼ iráʼ, ne nannu irá ni udide» (2 Tim. 3:10). Cumu biʼniʼ Timoteo ni biziidiʼ la? gunda gucuaabe jma responsabilidad ndaaniʼ congregación (1 Cor. 4:17).

¿Ñee nápaluʼ ti xhamíguluʼ ni maʼ biniisi lu stiidxaʼ Dios ne jma napa experiencia que lii ni zanda chinándaluʼ ejemplu stiʼ la? Pa coʼ la? ¿xiñee qué guyúbiluʼ tuuxa gacané lii yaʼ? Ti hermanu ni láʼ Tom ni maʼ ziné stale iza de naca ancianu rietenalaʼdxiʼ: «Ti ancianu ni napa stale experiencia bizaalaʼdxiʼ naa ne gúcabe maestru stinneʼ. Nabé gunabaʼ laabe conseju gatigá, ne bineʼ guiráʼ ni gúdxibe naa. Ngue gucané naa guneʼ sentir jma seguru».

5. Qué nusaanabe de niniisibe en sentidu espiritual. Guluu Pablo gana Timoteo para gucaa ique sáʼ «gaxha de Dios» (1 Tim. 4:7). Ti atleta zanda gapa ti entrenador, peru laaca caquiiñeʼ guni entrenarbe stúbibe. Sicaríʼ gudxi Pablo Timoteo: «Bichiña irá ca hermanu, biinda né laaca stiidxa Dios, bisiidi chaahui ca hermanu ne ucané laaca udxii lú ca lu xhiiña Dios [...]. Bicaalaʼdxi guʼnu irá ni cayabe lii riʼ, de idubi ladxidóʼ loʼ, ti guʼya cabe ze dxi ziyene lu jma» (1 Tim. 4:13-15).

Lii laaca zándaruʼ guni mejorarluʼ. Biʼniʼ stipa pur guiniisiluʼ jma en sentidu espiritual. Ne biʼniʼ stipa pur guiziidiluʼ cani nacubi cusiidiʼ organización stiʼ Dios yanna riʼ. Cadi guni confiarluʼ laca lii. Cadi guiníʼ íqueluʼ purtiʼ si maʼ nápaluʼ stale experiencia zanda gúniluʼ intiica cosa sin guyúbiluʼ xiixa información ni caníʼ de laani. Biʼniʼ cásica biʼniʼ Timoteo, biiyaʼ guibániluʼ jneza ne biiyaʼ gusiidiluʼ ni jneza (1 Tim. 4:16).

6. Bidiibe lugar gacané espíritu stiʼ Jiobá laabe. Ra caníʼ apóstol Pablo de dxiiñaʼ ni gucuaa Timoteo, bisietenaláʼdxibe laa zacané espíritu santu laa para gapa responsabilidad ni maʼ gucuaa (2 Tim. 1:14). Para ganda gapa Timoteo dxiiñaʼ ni maʼ gucuaa que la? caquiiñeʼ gudii lugar gacané espíritu santu laa.

Donald, ti hermanu ni maʼ napa stale iza de naca ancianu guníʼ: «Ca hermanu ni napa privilegiu ndaaniʼ congregación, caquiiñeʼ gápacaʼ ne gusisaca amistad ni nápacaʼ né Jiobá, zacá ziuucaʼ jma naguidxi en sentidu espiritual. Pa guinábacabe Dios gudii laacabe espíritu stiʼ ne gápacaʼ ca cualidad stini la? zeeda gácacabe ti ndaayaʼ para ca hermanu stícabe» (Sal. 84:7; 1 Ped. 4:11).

BISISACA PRIVILEGIU STILUʼ

Guizáʼ galán rihuinni nuu stale hermanu casi lii, ni nacubi gucuaa privilegiu ndaaniʼ congregación ni caniisi en sentidu espiritual. Jason, ni bizéʼtenu ra bizulunu que guníʼ: «Biaʼ iza maʼ ziniáʼ de cayuneʼ servir de ancianu, maʼ biziideʼ stale ne yanna runeʼ sentir maʼ qué ridxibeʼ. Nayecheʼ runeʼ dxiiñaʼ ni napaʼ ne ruuyaʼ ni casi ti privilegiu naroʼbaʼ».

Yanna lii yaʼ, ¿ñee zaniisirouʼ en sentidu espiritual la? Gudixhe ique chinándaluʼ ejemplu stiʼ Timoteo. Zacá zeeda gácaluʼ ti ndaayaʼ para xquidxi Jiobá.