Biiyaʼ guiraʼ ni nuu lu sitiu riʼ

guyé lu índice

 ARTÍCULO DE ESTUDIU 17

«Rabeʼ laatu xhamiguaʼ»

«Rabeʼ laatu xhamiguaʼ»

«Rabeʼ laatu xhamiguaʼ, purtiʼ maʼ gudxeʼ laatu guiráʼ ni binadiagaʼ de Bixhozeʼ» (JUAN 15:15).

CANCIÓN 13 Chinándanu ejemplu stiʼ Cristu

NI ZAZÍʼDINU *

1. ¿Xi caquiiñeʼ guni chupa binni para gaca xhamígucaʼ?

PARA ganda gaca xhamigu chupa binni la? caquiiñeʼ guidxaagacaʼ ne güicaʼ diidxaʼ de ni riníʼ íquecaʼ, ni runi sentircaʼ ne ni rizaacacaʼ. Peru ora guiníʼ íquenu gaca xhamígunu Jesús, zándaca guidúʼyanu ni nagana. Guidúʼyanu caadxi razón.

2. ¿Gunáʼ nga primé razón ni rusihuinni zándaca gaca nagana para laanu gaca xhamígunu Jesús?

2 Primé razón nga purtiʼ qué ridúʼyanu Jesús. Nga peʼ nga ni bizaaca caadxi xpinni Cristu ni bibani lu primé siglu. Nga runi, gudxi apóstol Pedro laacabe: «Neca qué ñuu dxi ñuuyatu laabe, peru nadxiitu laabe. Neca qué ruuyatu laabe yanna, peru nápatu fe laabe» (1 Ped. 1:8). Ndiʼ rusihuinni cadi caquiiñeʼ peʼ guidúʼyanu Jesús para gaca xhamígunu laa.

3. ¿Gunáʼ nga guiropa razón ni rusihuinni zándaca gaca nagana para laanu gaca xhamígunu Jesús?

3 Guiropa razón nga purtiʼ qué randa rinínenu Jesús. Ora runi orarnu, rinínenu Jehová. Dxandíʼ nga runi orarnu lu lá Jesús, peru qué rinínenu laabe. Ne qué racalaʼdxiʼ Jesús guni orarnu laa, purtiʼ ora runi orarnu cayuni adorarnu Jehová, ne Jehová si nga naquiiñeʼ gaca adorar (Mat. 4:10). Neca zacá, zanda gusihuínninu nadxiinu Jesús.

4. a) ¿Gunáʼ nga guionna razón ni rusihuinni zándaca gaca nagana para laanu gaca xhamígunu Jesús? b) ¿Xi zadúʼyanu lu artículo riʼ?

 4 Guionna razón nga qué zanda guidxaaganu Jesús purtiʼ nuube guibáʼ. Peru neca qué zanda chuʼnu gaxha de Jesús, zanda gánnanu stale cosa de laa. Lu artículo riʼ zadúʼyanu tapa cosa ni caquiiñeʼ gúninu para jma gaca xhamígunu laabe. Peru primeru guidúʼyanu xiñee nabé risaca gaca xhamígunu Cristu.

¿XIÑEE CAQUIIÑEʼ GACA XHAMÍGUNU JESÚS?

5. ¿Xiñee naquiiñeʼ gaca xhamígunu Jesús? (Laaca zanda gúʼyaluʼ recuadru ni láʼ « Gaca xhamígunu Jesús racaneni laanu gaca xhamígunu Jehová» ne « Ximodo caquiiñeʼ guidúʼyanu Jesús»).

5 Caquiiñeʼ gaca xhamígunu Jesús para chuʼnu jma gaxha de Jehová. ¿Xiñee yaʼ? Guidúʼyanu chupa razón. Primé, sicaríʼ gudxi Jesús ca discípulo stiʼ: «Bixhozeʼ piaʼ nadxii laatu, purtiʼ nadxiitu naa» (Juan 16:27). Ne laaca guniʼbe: «Guirutiʼ zanda cheʼ ra nuu Bixhozeʼ pa cadi pur naa» (Juan 14:6). Pa gacaláʼdxinu gaca xhamígunu Jehová sin gaca xhamígunu Jesús la? zeeda gácani casi ora ñacaláʼdxinu ñuʼnu ndaaniʼ ti yoo sin ñuʼnu neza ra puertaʼ stini primé. Biquiiñeʼ Jesús ti ejemplu casi ni bizéʼtenu riʼ ora guníʼ laa «nga puertaʼ stiʼ ca dendxuʼ» (Juan 10:7). Guiropa razón nga purtiʼ bisihuinni peʼ Jesús ca cualidad stiʼ Bixhoze. Gúdxibe ca discípulo stibe: «Ni maʼ biiyaʼ naa la? laaca maʼ biiyaʼ Bixhozeʼ» (Juan 14:9). Nga runi, pa gunibiaʼnu Jesús zanda gunibiaʼnu Jehová. Ra jma guizíʼdinu de Jesús, jma zannaxhiinu laa. Ne ra jma guidxíñanu Jesús, jma zannaxhiinu Bixhoze.

6. ¿Xi sti razón nápanu para gaca xhamígunu Jesús?

 6 Caquiiñeʼ gaca xhamígunu Jesús para guicabi Jehová ca oración stinu. Ndiʼ riníʼ cadi caquiiñeʼ si guininu «de lu lá Jesús» cada guilúxenu oración stinu. Caquiiñeʼ guiénenu ximodo riquiiñeʼ Jehová laabe para guicabi ca oración stinu. Sicaríʼ gudxi Jesús ca apóstol stiʼ: «Intiica cosa ni guinábatu lu laʼyaʼ, zuneʼ ni» (Juan 14:13). Jehová nga ni rucaadiaga ne ricabi ca oración stinu, peru maʼ bidiibe Jesús autoridad para guni ni maʼ gudixhe íquebe (Mat. 28:18). Peru ante guicábibe laanu, ruuyabe pa maʼ zinándanu ca conseju stiʼ Jesús, tobi de laani ná: «Pa guni perdonartu ni gucheené binni laatu, laaca zuni perdonar Bixhózetu ni nuu guibáʼ laatu. Peru pa qué guni perdonartu ni gucheené binni laatu, laaca qué zuni perdonar Bixhózetu ni gucheetu» (Mat. 6:14, 15). ¿Cadi dxandíʼ caquiiñeʼ gácanu nachaʼhuiʼ né sti binni cásica nachaʼhuiʼ Jehová ne Jesús né laanu la?

7. ¿Xi caquiiñeʼ gúninu para cueendunu ni galán pur guendaguti stiʼ Jesús?

7 Ca binni si ni gaca xhamigu Jesús nga zabeenducaʼ ni galán pur guendaguti stibe. ¿Ximodo nánnanu ni yaʼ? Purtiʼ Jesús guníʼ zudii «xpida pur ca xhamigu» (Juan 15:13). Ca xpinni Dios ni bibani ante gueeda Jesús lu Guidxilayú riʼ napa xidé guiziidicaʼ de laabe ne gannaxhiicaʼ laabe. Ziasa hombre ne gunaa casi Abrahán, Sara, Moisés ne Rahab para guibánicaʼ sti biaje, peru caquiiñeʼ gaca xhamígucabe Jesús para guicaacabe guendanabani ni qué zaluxe (Juan 17:3; Hech. 24:15; Heb. 11:8-12, 24-26, 31).

8, 9. Casi ná Juan 15:4, 5, ¿xi zanda gúninu purtiʼ xhamígunu Jesús, ne xiñee risaca chuʼnu gaxha de laabe?

8 Nápanu privilegiu guninenu Jesús dxiiñaʼ de gaca predicar ne gusíʼdinu binni ca noticia galán stiʼ Reinu. Dxi guyuube ndaaniʼ Guidxilayú riʼ, bisiidibe binni ni dxandíʼ de Dios. Ne despué biguétabe guibáʼ, maʼ nácabe Xaíque stiʼ congregación, ne cayuni dirigirbe dxiiñaʼ de gaca predicar. Ruuyabe ne rusisácabe stipa ni rúninu para gacanenu biaʼ tiica si binni gunibiáʼ laabe ne Bixhózebe. Ne qué zanda gúninu dxiiñaʼ riʼ pa qué gacané Jehová ne Jesús laanu (biindaʼ Juan 15:4, 5).

9 Rusiidiʼ peʼ Biblia laanu caquiiñeʼ gannaxhiinu Jesús pa racaláʼdxinu chuulaʼdxiʼ Jehová ni rúninu. Nga runi, guidúʼyanu tapa cosa ni caquiiñeʼ gúninu para gaca xhamígunu Jesús.

XIMODO ZANDA GACA XHAMÍGUNU JESÚS

Zanda gaca xhamígunu Jesús 1) pa gunibiáʼ chaahuinu laa, 2) pa guiníʼ íquenu modo riníʼ ique ne gúninu ni rúnibe, 3) pa gacanenu ca ungidu ne 4) pa guni apoyarnu guiráʼ cambiu ni cayaca ndaaniʼ congregación. (Biiyaʼ párrafo 10 hasta 14). *

10. ¿Gunáʼ nga primé cosa ni caquiiñeʼ gúninu para gaca xhamígunu Jesús?

10 Primé, gunibiaʼnu Jesús. Para ganda gúninu ni, caquiiñeʼ guidúʼndanu libru stiʼ Mateo, Marcos, Lucas ne Juan. Ora guiníʼ íquenu ni zeeda lu ca relatu de modo bibani Jesús ne guidúʼyanu pabiáʼ nachaʼhuiʼ gúcabe né binni, zannaxhiinu ne zuni respetarnu laabe. Guzéʼtenu ti ejemplu, qué ñuni tratarbe ca discípulo stibe casi esclavu, neca laabe nga Xpixuaanacaʼ. Lugar de nga la? biʼniʼ tratarbe laacaʼ casi xhamígube ne gúdxibe laacaʼ ni riníʼ íquebe ne xi nuu ndaaniʼ ladxidoʼbe (Juan 15:15). Gucanabe ora bíʼyabe cayacanacaʼ ne biinanebe laacaʼ (Juan 11:32-36). Dede ca enemigu  stibe biiyacaʼ guca xhamígube ca binni ni bicaadiaga laabe (Mat. 11:19). Pa guni tratarnu xcaadxi binni cásica biʼniʼ Jesús né ca discípulo stiʼ, ziuʼnu tobi si né laacaʼ, ziuʼnu jma nayecheʼ, zannaxhiinu ne jma zuni respetarnu Cristu.

11. ¿Gunáʼ nga guiropa cosa ni caquiiñeʼ gúninu para gaca xhamígunu Jesús, ne xiñee risaca ni?

11 Guiropa, guiníʼ íquenu ne gácanu casi Jesús. Ra jma gunibiaʼnu Jesús ne guiníʼ íquenu modo riníʼ ique jma zaca xhamígunu laa (1 Cor. 2:16). Peru ¿ximodo zanda chinándanu ejemplu stiʼ Jesús yaʼ? Guzéʼtenu ni bíʼnibe. Para laabe jma risaca nga gacanebe xcaadxi que gúnibe ni riuuláʼdxibe (Mat. 20:28; Rom. 15:1-3). Cumu zacá nga guníʼ íquebe la? bíʼnibe stale cosa pur laacaʼ ne biʼniʼ perdonarbe laacaʼ. Ne qué nidxiichibe nagueenda ora guníʼcabe mal de laabe (Juan 1:46, 47). Ne qué ñúnibe menu ca binni ni qué ñuni ni jneza dxiqué (1 Tim. 1:12-14). Nabé risaca chinándanu ejemplu stibe, purtiʼ guniʼbe: «Sicaríʼ nga zanna binni nácatu discípulo stinneʼ: pa nadxiisaatu» (Juan 13:35). Nga runi, guiníʼ íquenu ndiʼ: «Cásica Jesús, ¿ñee runeʼ stipa chuaaʼ tobi si né ca hermanu stinneʼ la?».

12. ¿Gunáʼ nga guionna cosa ni caquiiñeʼ gúninu para gaca xhamígunu Jesús, ne ximodo caquiiñeʼ gúninu ni?

12 Guionna, guni apoyarnu ca biʼchiʼ Cristu. Para Jesús la? ni gúninu pur ca bíʼchibe ni naca ungidu casi ñaca cayúninu ni para laabe (Mat. 25:34-40). Ti modo zanda gacanenu laacabe nga ora rúninu dxiiñaʼ ni bisaanané Jesús ca xpinni: guininu de Reinu stiʼ Dios ne gacanenu binni gaca discípulo (Mat. 28:19, 20; Hech. 10:42). Nabé risaca dxiiñaʼ ni runi ca «xcaadxi dendxuʼ» purtiʼ racanecaʼ ca biʼchiʼ Cristu para guni tendercaʼ dxiiñaʼ de gaca predicar stiidxaʼ Dios tiempu riʼ (Juan 10:16). Pa nácanu de ca xcaadxi dendxuʼ, cada biaje gúninu dxiiñaʼ riʼ rusihuínninu nadxiinu ca ungidu ne laaca nadxiinu Jesús.

13. ¿Ximodo zanda gúninu ni guníʼ Jesús lu libru stiʼ Lucas 16:9?

13 Laaca raca xhamígunu Jehová ne Jesús ora riquiiñenu bueltu stinu para gacanenu gaca dxiiñaʼ sticaʼ (biindaʼ Lucas 16:9). Guzéʼtenu ti ejemplu, zanda gudiʼnu bueltu para gaca predicar ca lugar jma zitu, para cuí ne gudiicabe mantenimientu ca lugar ra runi adorarnu Jehová, ne para gacanécabe ca hermanu ra bizaaca ti desastre. Laaca zanda gusábanu donación ndaaniʼ ca caja huiiniʼ ni nuu ra Yoo stiʼ Reinu ne zanda gacanenu ca hermanu ni caquiiñeʼ tu gacané laacaʼ (Prov. 19:17). Ra gúninu ni, cayuni apoyarnu ca biʼchiʼ Cristu.

14. Casi ná Efesios 4:15, 16, ¿gunáʼ nga guidapa cosa ni caquiiñeʼ gúninu para gaca xhamígunu Jesús?

14 Guidapa, guni apoyarnu guiráʼ cambiu ni cayaca ndaaniʼ congregación. Pa gúninu dxiiñaʼ tobi si né ca hermanu ni maʼ gulí Jesús para gapa laanu la? jma zaca xhamígunu Jesús, Xaíque stiʼ congregación (biindaʼ Efesios 4:15, 16). Guzéʼtenu ti ejemplu, cayuuyaʼ xquidxi Dios iquiiñeʼ ca Yoo stiʼ Reinu ca jneza. Nga runi, maʼ guca caadxi congregación tobi si ne maʼ huadxaa caadxi territorio. Ne yanna maʼ qué riniti peʼ stale bueltu ni rudii ca hermanu para guiroobaʼ xhiiñaʼ Dios. Ne pur nga huayuni caadxi  publicador stipa para guiaacaʼ guiráʼ cambiu cubi riʼ. Zándaca stale iza bidagulisaa ca hermanu riʼ ndaaniʼ ti congregación si ne maʼ biaacaʼ ca hermanu sticaʼ. Peru yanna maʼ gunábacabe laacaʼ guidxaacaʼ de congregación. Guizáʼ riecheʼ Jesús ora ruuyaʼ runi apoyar ca hermanu leal riʼ decisión ni maʼ gucuaa xquidxi Dios.

ZANDA GACA XHAMÍGUNU JESÚS PARA SIEMPRE

15. ¿Xi zazaaca né amistad ni napanenu Jesús lu ca dxi ni zeeda ca?

15 Cabeza ca xpinni Cristu ungidu chuʼcaʼ gaxha de Jesús para siempre ne guni mandárnecaʼ laabe lu Reinu stiʼ Dios. Zuuyacaʼ laabe, zaníʼnecaʼ laabe ne siempre ziuucaʼ gaxha de laabe (Juan 14:2, 3). Ca ni cabeza guibani ndaaniʼ Guidxilayú cubi laaca zannaxhii ne zapa Jesús laacaʼ. Neca qué zuuyacaʼ laabe, zaca xhamígucaʼ laabe jma laga nabánicaʼ nayecheʼ ndaaniʼ Guidxilayú chigudii Jehová ne Jesús laacaʼ (Is. 9:6, 7).

16. ¿Xi guiráʼ ndaayaʼ zacaanu pa gaca xhamígunu Jesús?

16 Ora raca xhamígunu Jesús, ricaanu stale ndaayaʼ. Guzéʼtenu ti ejemplu, nadxiibe laanu ne cayacanebe laanu tiempu riʼ. Laaca nápanu privilegiu guibáninu para siempre. Ne ni jma risaca nga pa gaca xhamígunu Jesús zanda gaca xhamígunu Bixhózebe, Jehová. Nga runi, nabé risaca nga gaca xhamígunu Jesús.

CANCIÓN 17 Riuuladxeʼ

^ párrafo 5 Ca iza guyuu Jesús lu Guidxilayú riʼ biʼniné ca apóstol que laabe dxiiñaʼ, byuíʼnecaʼ laabe diidxaʼ ne guca xhamígucaʼ laabe. Jesús laaca racalaʼdxiʼ gaca xhamígunu laa, peru zándaca gaca ni jma nagana para laanu que para ca apóstol que. ¿Xiñee yaʼ? Lu artículo riʼ zazíʼdinu de laani ne zuzéʼtenu caadxi cosa ni zanda gúninu para jma gaca xhamígunu Jesús.

^ párrafo 55 NI RIHUINNI LU FOTO RIʼ: 1) Ora rápanu adoración en familia, runi estudiarnu ximodo bibani Jesús ne modo biʼniʼ predicar. 2) Ndaaniʼ congregación rúninu stipa chuʼnu tobi si né ca hermanu stinu. 3) Ra guni predicarnu né stale gana, runi apoyarnu ca biʼchiʼ Cristu. 4) Ora raca ca congregación ca tobi si, runi apoyarnu ca decisión ni maʼ gucuaa ca ancianu.