Biiyaʼ guiraʼ ni nuu lu sitiu riʼ

guyé lu índice

Biyubi modo gacaneluʼ ca hermanu lu ni caquiiñecaʼ, gudixhedxí ladxidoʼcaʼ o gucané laacaʼ gúnicaʼ xhiiñaʼ Dios.

«Ñee zanda gacaʼ misioneru ndaaniʼ congregación stinneʼ la?»

«Ñee zanda gacaʼ misioneru ndaaniʼ congregación stinneʼ la?»

ANTE cheʼ Jesús guibáʼ, gudxi ca discípulo stiʼ ca diidxaʼ riʼ: «Chi güi tu stiidxa ndaani guidxi Jerusalén ne idubi Judea ne Samaria ne idubi naca guidxilayú» (Hechos 1:8). Peru, ximodo zanda guireeche diidxaʼ lu guidubi Guidxilayú yaʼ.

Martin Goodman, ti profesor stiʼ ti Universidad de Oxford, guníʼ: «Ra biʼniʼ ca xpinni Cristu dxiiñaʼ ni gucuaacaʼ bihuinni maʼ gadxé laacaʼ que xcaadxi religión, dede né ca judíu, ra bizulú Imperiu stiʼ Roma». Bicheeche Jesús diidxaʼ stale guidxi, ngue runi biene ca discípulo que laaca naquiiñeʼ checaʼ guiráʼ guidxi para guyúbicaʼ binni ni rapa gana guiziidiʼ ni dxandíʼ (Lucas 4:43). Ngue runi gupa congregación cristiana ni guyuu lu primé siglu que «apóstol», diidxaʼ riʼ riníʼ ni «tuuxa ni biseendacabe laa». Ca apóstol que biseendacabe laacaʼ para gucheechecaʼ diidxaʼ (Marcos 3:14). Jesús bidii mandatu riʼ laacabe: «Laché ne lachigusiidiʼ binni de guiráʼ guidxi sananda naa» (Mateo 28:18-20).

Tiempu riʼ, nuu stale xpinni Jiobá lu guidubi naca Guidxilayú ni riuulaʼdxiʼ gucheeche diidxaʼ casi ti misioneru cásica biʼniʼ ca apóstol que. Ora raca invitación para gucheechecabe diidxaʼ ra jma caquiiñeʼ, riníʼcabe: «¡Raríʼ nuaaʼ! Biseendaʼ naa» (Isaías 6:8). Stale tu maʼ nuu sti guidxi zitu, casi ca mil de cani maʼ guyé Scuela stiʼ Galaad. Xcaadxi maʼ guyé sti lugar ndaaniʼ xquidxi. Ne nuu tu maʼ biziidiʼ sti idioma para gacané ca grupu o congregación ni riníʼ sti diidxaʼ. Peru cadi guiníʼ íquenu qué raca ni nagana para laacabe, sínuque rúnicabe stipa para gusihuínnicabe nadxiicabe Jiobá ne nadxiicabe binni. Ora maʼ guníʼ íquecabe ni ne gúʼyacabe  zanda la? riécabe ra jma caquiiñeʼ tu gucheeche diidxaʼ (Lucas 14:28-30). Nabé cayacané ca hermanu riʼ.

Dxandíʼ, gadxé gadxé nga modo nabáninu. Ne cadi guiráʼ diʼ ca Testigu nga zanda chindézacaʼ sti lugar o guiziidicaʼ sti diidxaʼ. Peru guiranu zanda guinabadiidxanu laca laanu: «Ñee zanda gacaʼ casi ti misioneru ndaaniʼ congregación stinneʼ la?».

GUCA MISIONERU NDAANIʼ CONGREGACIÓN STILUʼ

Biiyaʼ ximodo nuucabe ne xi caquiiñecabe para ganda

Nanna dxíchinu bicheeche ca xpinni Cristu ni bibani lu primé siglu que diidxaʼ né stale gana casi ti misioneru, peru stale de laacaʼ qué nireecaʼ de ndaaniʼ xquídxicaʼ. Peru biáʼsipeʼ para guirácabe nga conseju bidii Pablu Timoteu: «Bicaa ique güi lu stiidxa Cristu ne biʼni irá ni bisaana Dios ladxi nouʼ» (2 Timoteo 4:5). Conseju riʼ laaca nabé risaca ni para laanu tiempu riʼ. Mandatu de gucheechenu diidxaʼ ne gúninu discípulo ca para guiráʼ ca xpinni Cristu ni, neca de gadxé gadxé guidxi laacabe. Dede ndaaniʼ congregación stinu zanda gacanenu casi runi ti misioneru.

Casi ca misioneru ni rié sti guidxi ruyúbicaʼ ximodo guibánicaʼ ne guiaacaʼ raqué purtiʼ nuucabe ti lugar ra qué runibiáʼcabe. Xi zanda guininu de laanu yaʼ. Pa qué zanda chindézanu sti lugar ra caquiiñeʼ tu gucheeche diidxaʼ, ñee zanda guchaʼnu modo rinínenu binni lu territorio stiʼ congregación stinu la? Guidúʼyanu ti ejemplu: lu iza 1940, guluucabe gana ca Testigu gucheechecaʼ diidxaʼ lu calle ti dxi ndaaniʼ semana. Ñee huayúniluʼ ni la? Xi tal xa pa niquiiñeluʼ ca exhibidor para nucheecheluʼ diidxaʼ yaʼ. Ñee huaníʼ íqueluʼ gúniluʼ cani maʼ bizéʼtenu ca, neca zándaca nacubi cani para lii la?

Uguuluʼ gana laacabe gúnicabe jma lu xhiiñaʼ Jiobá.

Pa guiníʼ íquenu zanda gúninu cani, qué zaca nagana para laanu gucheechenu diidxaʼ né stale gana. Stale biaje, cani riníʼ cheʼ sti lugar ra caquiiñeʼ guireeche diidxaʼ o cheʼ ra riníʼcabe sti diidxaʼ nabé nánnacaʼ gucheechecaʼ diidxaʼ. Nga runi, randa racanécabe xcaadxi publicador guni dxiiñaʼ ca jneza. Ca misioneru ca racanecaʼ xcaadxi hermanu gúnicaʼ dxiiñaʼ ni raca ndaaniʼ congregación dede ra guiziidiʼ chaahuicaʼ. Pa ti hombre ni maʼ guyuunisa lii, ñee naguixhe íqueluʼ gácaluʼ siervu ministerial o  ancianu para gacaneluʼ ca hermanu ni nuu ra congregación stiluʼ la? (1 Timoteo 3:1).

GUCANÉ NE GUDIXHEDXÍ LADXIDÓʼ TU CAQUIIÑEʼ NI

Gacaneluʼ laacabe lu ni caquiiñecabe gaca.

Racanenu ora rucheechenu diidxaʼ né stale gana ne chuʼnu listu para guicaanu xiixa dxiiñaʼ ndaaniʼ congregación, peru laaca zanda gacanenu lu xcaadxi cosa. Guiranu, zaa nácanu nahuiiniʼ o maʼ huaniisi, hombre o gunaa, zanda gacanenu gatadxí ladxidóʼ cani caquiiñeʼ ni (Colosenses 4:11).

Para ganda gacanenu ca xcompañérunu, caquiiñeʼ gunibiáʼ chaahuinu laacabe. Nga runi Biblia na «acané saa nu» (Hebreos 10:24). Qué riníʼ diʼ nga cayuʼnu lu xquendanabani binni, sínuque racaláʼdxinu gunibiaʼnu laacabe ti gánnanu xi caquiiñecabe. Zanda gacanenu laacabe lu xiixa cosa ni caquiiñecabe gaca, quixhedxinu ladxidóʼcabe o gacanenu laacabe gúnicabe xhiiñaʼ Dios né stale gana. Dxandíʼ, xhiiñaʼ ca ancianu o ca siervu ministerial nga gacanecaʼ ca hermanu nuu ra congregación (Gálatas 6:1). Peru guiranu zanda gacanenu cani maʼ zigola, o tuuxa familia ni cadiʼdiʼ lu xiixa guendanagana.

Quixhedxiluʼ ladxidóʼcabe ora cadíʼdicabe ti guendanagana.

Guidúʼyanu xi bizaaca ti biaje. Gudiʼdiʼ Salvatore lu ti guendanagana naroʼbaʼ, ngue runi gupa xidé bitoobe negocio stibe, lídxibe ne stáleruʼ cosa ni napa binnilídxibe. Guyuube xizaa, purtiʼ guníʼ íquebe ximodo gudiibe ni iquiiñeʼ binnilídxibe. Peru sti familia de congregación stibe bidii cuenta caquiiñeʼ chuʼ tu gacané laacabe. Qué nusaana familia que laacabe ne bidii laacabe bueltu, ne laaca gucanécabe Salvatore ne xheelaʼ guidxélacaʼ dxiiñaʼ. Stale gueelaʼ bicaadiaga familia que laacabe ne guluucaʼ gana laacabe. Xi guleendúcabe yaʼ. Nabé guca xhamigu guiropaʼ familia riʼ. Neca guyuucabe xizaa primé que, guirácabe rietenaláʼdxicabe ca dxi galán gudíʼdicabe.

Cani dxandíʼ xpinni Cristu, riniʼcaʼ de ni runi crecaʼ. Jesús gudixhe ejemplu ca, nga runi naquiiñeʼ gacanenu guiráʼ binni ganna de guiráʼ cosa ni galán maʼ bizabiruaa Dios chiguni. Pa zanda chuunu sti ladu ra caquiiñeʼ chuʼ tu gacané o pa coʼ la? guiranu caquiiñeʼ gucáʼ íquenu gacanenu congregación stinu (Gálatas 6:10). Ora gudiʼnu tiempu stinu, stipa stinu ne xpuéltunu jma ziéchenu lu guiráʼ ni gúninu (Colosenses 1:10; Hechos 20:35).