Biiyaʼ guiraʼ ni nuu lu sitiu riʼ

guyé lu índice

«Cadi guiaana dxí tu de ganaxhii saa tu casi enda biʼchiʼ»

«Cadi guiaana dxí tu de ganaxhii saa tu casi enda biʼchiʼ»

«Cadi guiaana dxí tu de ganaxhii saa tu casi enda biʼchiʼ» (HEBREOS 13:1).

DIIDXAʼ RIUUNDAʼ: NE 20

1, 2. Xiñee bicaa Pablu carta ra nuu ca hebreu.

LU IZA 61 que nabé galán modo nabani ca xpinni Cristu de Israel ne gastiʼ cadi cuchiiñaʼ laacaʼ. Daguyoo apóstol Pablu Roma, peru cabézabe cueecabe laabe nagueenda. Ne Timoteu, tobi de cani rinebe guiráʼ ra riebe, deruʼ biree cárcel. Guirópacabe cá íquecabe chigánnacabe ca hermanu de Judea (Hebreos 13:23). Peru mayaca guchaa modo nabánicabe. Cayaadxaʼ gaayuʼ si iza para uguu ejércitu stiʼ Roma leʼ Jerusalén. Ne maca gudxi Jesús ca cristianu de Judea ne de Jerusalén naquiiñeʼ guireecaʼ de raqué ne checaʼ sti ladu ora gúʼyacaʼ maʼ naguu ca soldadu leʼ Jerusalén (Lucas 21:20-24).

2 Ma gudiʼdiʼ 28 iza de guníʼ Jesús xi chigaca Jerusalén. Neca bicaalú binni ca cristianu de Israel lu ca iza ni maʼ gudiʼdiʼ riʼ ne gúpacaʼ stale guendanagana, qué nucheenecaʼ Dios (Hebreos 10:32-34). Peru mayaca tiidiʼ ca hermanu riʼ tobi de ca prueba jma naroʼbaʼ ra naquiiñeʼ gusihuínnicaʼ pa naguidxi nuu fe sticaʼ (Mateo 24:20, 21; Hebreos 12:4). Pa racaláʼdxicabe guzuubacabe stiidxaʼ Jesús ne guilácabe la? caquiiñeʼ gápacabe fe ne guni huantárcabe casi qué huayuu dxi gúnicabe ni (biindaʼ  Hebreos 10:36-39). Ngue runi, biquiiñeʼ Jiobá Pablu para gucaa ti carta ra nuu ca hermanu que ne laani nga ni runibiaʼnu casi carta ni gucuá ra nuu ca hebreu. Zudii carta riʼ stipa laacabe ne zacaneni laacabe guni huantárcabe intiica guendanagana gueeda luguiácabe.

3. Xiñee nabé risaca carta ni gucuá ra nuu ca hebreu que para laanu.

3 Nabé risaca carta bicaa apóstol Pablu riʼ para laanu. Xiñee yaʼ. Purtiʼ nabáninu cásica bibani ca cristianu de Judea. Laaca nabáninu ti tiempu ni «jma nagana». Nabé huacaalú binni stale hermanu stinu ne huayápacaʼ xcaadxi guendanagana naroʼbaʼ, peru cásica biʼniʼ ca cristianu de Judea, maʼ bisihuinni ca hermanu riʼ naguidxi fe sticaʼ casi ti guié ngola ne cadi cucheenecaʼ Dios (2 Timoteo 3:1, 12). Nuu stale de laanu nabáninu galán tiempu riʼ ne cadi cucaalú guirutiʼ laanu. Peru, cásica gutaná ca cristianu ni bibani ca dxi stiʼ Pablu que, laanu laaca naquiiñeʼ gatananu, purtiʼ maʼ zeeda dxiña dxi tiidinu lu tobi de ca prueba ni jma naroʼbaʼ ra naquiiñeʼ gusihuínninu pa naguidxi fe stinu (biindaʼ Lucas 21:34-36).

4. a) Xi textu zaquiiñenu iza 2016. b) Xiñee bibí versículo riʼ.

4 Xi zacané laanu guni huantarnu prueba ni zeeda riʼ yaʼ. Ni zanda gacané laanu nga conseju risaca ni ridúʼndanu lu Hebreos 13:1. Racá na sicaríʼ: «Cadi guiaana dxí tu de ganaxhii saa tu casi enda biʼchiʼ». Laani nga tobi de ca conseju bidii Pablu ca hebreu para gacané laacabe gaca fe stícabe naguidxi. Maʼ bibí versículo riʼ para textu stiʼ iza 2016. Xiñee yaʼ. Purtiʼ laaca zacaneni laanu gaca fe stinu jma naguidxi.

Textu stiʼ iza 2016 nga Lagannaxhiisaa casi guendabiʼchiʼ (Hebreos 13:1).

XI RINÍʼ GANNAXHIISAANU CASI GUENDABIʼCHIʼ

5. Xi riníʼ gannaxhiisaanu casi guendabiʼchiʼ.

5 Ximodo zanda guiénenu ca diidxaʼ gannaxhiisaanu casi guendabiʼchiʼ yaʼ. Dxiqué biquiiñeʼ ca diidxaʼ riʼ ora maʼ caníʼcabe de cariñu ni runi sentir tuuxa pur familia stiʼ o pur tuuxa ni nabé xhamigu (Juan 11:36). Nga runi, laanu ca xpinni Cristu, qué rinísinu bíʼchinu o bizáʼnanu tuuxa hermanu, coʼ, sínuque dxandíʼ zacapeʼ nga laani (Mateo 23:8). Pablu guníʼ: «Laganaxhii saa casi enda biʼchiʼ, cada tobi usisaca stobi ne cadi laca laa» (Romanos 12:10). Ca diidxaʼ riʼ rusihuínnicani naquiiñeʼ gannaxhiinu ca hermanu stinu de guidubi ladxidoʼno. Pa gannaxhiisaanu casi guendabiʼchiʼ ne gúninu ni modo biʼniʼ mandar Cristu la? jma zaca xhamígunu ne ziuʼnu tobi si.

6. Laanu, cani dxandíʼ xpinni Cristu, tuu nga nadxiinu casi ora ñácacaʼ bíʼchinu ne bizáʼnanu.

6 Sicaríʼ guníʼ ti hombre ni nabé nanna de tema riʼ: «Ca cristianu si nga huaquiiñecaʼ diidxaʼ “laganaxhii saa casi enda biʼchiʼ” lu ca libru sticaʼ». Dxiqué biquiiñeʼ ca judíu diidxaʼ «bicheʼ o bizanaʼ» ora guiníʼnecaʼ ti binnilídxicaʼ o tuuxa ni nabé xhamígucaʼ. Qué ñuu dxi ñábicabe ti binni ni cadi judíu «bicheʼ o bizanaʼ». Peru, para cani dxandíʼ xpinni Cristu la? guiráʼ ca xpinni Jiobá nga bíʼchicabe ne bizáʼnacabe, neca de gadxé gadxé guidxi laacaʼ (Romanos 10:12). Nga runi, guiranu nadxiisaanu casi bíʼchinu ne bizáʼnanu, purtiʼ nga nga ni maʼ bisiidiʼ Jiobá laanu (1 Tesalonicenses 4:9). Peru, xiñee naquiiñeʼ gannaxhiisaanu casi guendabiʼchiʼ ne cadi gusaana de gúninu ni yaʼ.

XIÑEE RISACA CADI GUSAANA DE GANNAXHIINU CA HERMANU

7. a) Gunáʼ nga razón jma risaca nápanu para gannaxhiinu ca hermanu. b) Xi sti razón nápanu para gannaxhiinu ca hermanu.

7 Razón ni jma risaca para gannaxhiinu ca hermanu nga purtiʼ Jiobá peʼ cayuni mandar laanu gúninu ni. Qué zanda diʼ gannaxhiinu Jiobá pa cadi nadxiinu laacabe (1 Juan 4:7, 20, 21). Sti razón para gannaxhiinu ca hermanu nga purtiʼ riquiiñeʼ  gacanésaanu, jmaruʼ si ora cadídinu lu xiixa guendanagana. Ora bicaa Pablu ra nuu ca hebreu la? nánnabe maʼ cadi stale diʼ cayaadxaʼ para guxooñeʼ ca hermanu que ne gusaanacaʼ guiráʼ ni nápacaʼ. Maca guníʼ Jesús nagana zaca tiempu que (Marcos 13:14-18; Lucas 21:21-23). Ngue runi, ante guedandá ca tiempu nagana que, naquiiñeʼ gannaxhiisaa ca xpinni Cristu que jma (Romanos 12:9).

8. Xi naquiiñeʼ gúninu yanna, ante guzulú gran tribulación.

8 Mayaca guzulú ca dxi jma nagana o gran tribulación (Marcos 13:19; Apocalipsis 7:1-3). Ora maʼ guzulú ni la? naquiiñeʼ chinándanu ni na mandatu riʼ: «Binni xquídxecaʼ lachuu ndaaniʼ ca cuartu stitu, ne laguseeguʼ puertaʼ stini. Lagucaachilú ti ratu dede ora maʼ gudiʼdiʼ xiana stinneʼ» (Isaías 26:20). Xii nga «ca cuartu stitu» ni rieeteʼ raríʼ yaʼ. Zándaca laacani nga ca congregación stinu. Ndaaniʼ cani nga runi adorarnu Jiobá né ca hermanu stinu. Peru naquiiñeʼ gúninu sti cosa aparte de guidagulisaanu guiráʼ semana. Bisietenalaʼdxiʼ Pablu ca cristianu hebreu naquiiñeʼ gusihuínnicaʼ nadxiisaacaʼ ne gúnicaʼ cosa galán pur xcaadxi hermanu (Hebreos 10:24, 25). Yanna nga caquiiñeʼ gaca guendarannaxhii stinu jma nadipaʼ, purtiʼ zacaneni laanu guni huantarnu intiica guendanagana gueeda luguianu.

9. a) Gunáʼ nga ca modo zanda gusihuínninu dxandíʼ nadxiinu ca hermanu stinu. b) Bizeeteʼ ti ejemplu ni guca neza ra nabézaluʼ ra bisihuinni ca hermanu pabiáʼ nadxiisaacaʼ.

9 Nuu stale modo ra zanda gusihuínninu nadxiinu ca hermanu stinu yanna, ante guzulú gran tribulación. Stale de laacabe nabé racaná ora gaca ti xu roʼ, ora chuʼ nisa ra lídxicaʼ, ora gueeda ti huracán, ora gaca ti tsunami, ne xcaadxi desastre natural. Xcaadxi cayacanacaʼ purtiʼ canazanándacabe laacaʼ (Mateo 24:6-9). Ne stale tu qué gapa bueltu pur guiráʼ guendaquéiquiiñeʼ cayaca lu Guidxilayú riʼ (Apocalipsis 6:5,6). Dxandíʼ cadale ca guendanagana cadiʼdiʼ ca hermanu stinu, peru racaneni laanu gápanu jma razón para gusihuínninu nadxiinu laacabe. Naquiiñeʼ gannaxhiinu ca hermanu stinu jma, neca maʼ huaxiéʼ rihuinni pa nadxiisaa binni ndaaniʼ Guidxilayú riʼ (Mateo 24:12). [1]

XIMODO ZANDA GUSIHUÍNNINU NADXIINU CA HERMANU

10. Xi zadúʼyanu lu ca párrafo ni zeeda riʼ.

10 Nuu stale guendanagana ndaaniʼ Guidxilayú riʼ, yanna, xi zanda gúninu para cadi gusaana de gannaxhiinu ca hermanu stinu yaʼ. Ximodo zanda gusihuínninu dxandíʼ nadxiinu laacabe casi guendabiʼchiʼ yaʼ. Bizeeteʼ apóstol Pablu caadxi modo zanda gúninu ni lu capítulo 13 stiʼ Hebreos, despué de guníʼ: «Cadi guiaana dxí tu de ganaxhii saa tu casi enda biʼchiʼ». Guidúʼyanu xhoopaʼ modo zanda gusihuínninu ni.

11, 12. Xi riníʼ guidxaagalunu cani zeeda de sti guidxi. (Biiyaʼ foto ni zeeda ra ruzulú tema riʼ).

11 «Cadi guiaanda laatu uchagalú tu cani zeeda de sti guidxi» (biindaʼ Hebreos 13:2). Xi riníʼ guidxaagalunu cani zeeda de sti guidxi yaʼ. Ca diidxaʼ ca riníʼcani gácanu nachaʼhuiʼ né cani qué runibiaʼnu. Zándaca rusietenalaʼdxiʼ ndiʼ laanu ni biʼniʼ Abrahán ne Lot. Guirópacabe gúcacabe nachaʼhuiʼ ora bidxaagalúcabe caadxi binni ni qué runibiáʼcabe, despué gúnnacabe ángel laacaʼ (Génesis 18:2-5; 19:1-3). Xiñee bizeeteʼ Pablu ejemplu riʼ nezalú ca cristianu hebreu yaʼ. Para uguube gana laacaʼ gusihuínnicaʼ nadxiicaʼ stobi ora gácacaʼ nachaʼhuiʼ né binni ni qué runibiaʼcaʼ.

12 Ximodo zanda gusihuínninu riuuláʼdxinu guidxaagalunu sti binni yaʼ. Zanda  guni invitarnu ca hermanu stinu ra lídxinu para guidóʼnenu laacaʼ gueta o para chúʼnenu laacaʼ nayecheʼ ti ratu. Ne ora chiganna superintendente de circuito ne xheelaʼ congregación stinu, zanda guni invitarnu laacabe neca qué runibiaʼnu laacabe (3 Juan 5-8). Cadi naquiiñeʼ diʼ gúninu stale guendaró nin gúninu stale gastu. Ni racaláʼdxinu nga cuʼnu gana laacabe, cadi gúninu xiixa para si guʼyaʼ binni riuuláʼdxinu gudiʼnu. Ne laaca qué runi invitarnu cani zanda guni invitar laanu sti biaje (Lucas 10:42; 14:12-14). Neca nabé nuu xhiiñanu, naquiiñeʼ guidxaagalunu sti binni.

13, 14. Ximodo zanda gacanenu ca hermanu ni deguyoo.

13 «Laguietenalaʼdxi cani yeguyoo» (biindaʼ Hebreos 13:3). Dxi bicaa Pablu ca diidxaʼ riʼ, caníʼ íquebe de ca hermanu ni deguyoo purtiʼ qué nacaʼ gucheenecaʼ Jiobá. Biechené Pablu ca cristianu hebreu purtiʼ qué nusaanacaʼ «ca hermanu ni bieguyoo» (Hebreos 10:34). Tapa iza bieguyoo Pablu que, gucané ca hermanu ni nabeza gaxha de raqué laa. Peru nuu xcaadxi ni nabeza zitu. Ximodo gucanécabe laabe yaʼ. Nabé biʼniʼ orárcabe pur laabe (Filipenses 1:12-14; Hebreos 13:18, 19).

14 Ca dxi riʼ, laaca deguyoo stale hermanu purtiʼ qué nacaʼ gucheenecaʼ Jiobá. Ca hermanu ni nabeza gaxha de laacabe, racanecaʼ laacabe de stale modo. Peru stale de laanu nuunu zitu de laacabe. Ximodo zanda gacanenu laacabe ne gusihuínninu qué rusiáʼndanu laacabe yaʼ. Pa nadxiinu laacabe casi guendabiʼchiʼ la? qué zusaana de guni orarnu pur laacabe. Zanda guni orarnu pur ca hermanu, ca hermana dede né pur ca xcuidihuiiniʼ ni deguyoo ndaaniʼ guidxi Eritrea. Ládecabe nuu Paulos Eyassu, Isaac Mogos ne Negede Teklemariam. Ca hermanu riʼ maʼ zinecaʼ jma de 20 iza ndaaniʼ cárcel.

15. Ximodo zanda gusihuínninu runi respetarnu guendaxheelaʼ.

15 «Cadi gapa tu enda xheela casi enda riguite» (biindaʼ Hebreos 13:4). Sti modo gusihuínninu nadxiinu ca hermanu stinu nga guni respetarnu guendaxheelaʼ ne gácanu nayá en sentidu moral (1 Timoteo 5:1, 2). Guzéʼtenu ti ejemplu. Pa chúʼnenu ti hermanu o ti hermana ni cadi xheelanu la? zuninanu laabe ne zuninanu familia stibe. Ne laaca zunítinu confianza ni napa ca hermanu laanu (1 Tesalonicenses 4:3-8). Yanna guiníʼ íquenu ximodo guni sentir ti hermana pa ganna ruuyaʼ xheelaʼ pornografía. Ñee zuni sentirbe nadxii xheelabe laabe ne runi respetar xquendaxheelacabe la? Coʼ (Mateo 5:28).

16. Xiñee naquiiñeʼ chuʼnu nayecheʼ né ni nápanu.

16 «Laguieche né biaʼ tiica napa tu» (biindaʼ Hebreos 13:5). Para chinándanu conseju stiʼ Pablu riʼ, naquiiñeʼ gápanu confianza Jiobá. Pa nápanu confianza laabe la? zudiʼnu cuenta jma risaca ca hermanu stinu que ca cosa risaca nuu lu Guidxilayú, casi bueltu (1 Timoteo 6:6-8). Laaca ziuʼnu nayecheʼ né cani nápanu ne qué ziuʼnu triste pur modo nabáninu. Qué zachelunu gápanu ni napa stobi ne qué zaninu mal de laacaʼ. Jma galán gácanu binni ni riuulaʼdxiʼ gudii de ni napa (1 Timoteo 6:17-19).

17. Xiñee naquiiñeʼ gápanu confianza Jiobá.

17 «Zanda iní nu sin chuʼ nu xizaa» (biindaʼ Hebreos 13:6). Pa nápanu confianza Jiobá la? ziuʼnu nayecheʼ ne zácanu binni nadxibalú para guni huantarnu ca guendanagana ni guidxaagalunu. Ne zacaneni laanu uguʼnu gana ca hermanu stinu ne quixhedxinu ladxidoʼcaʼ. Zacá zusihuínninu nadxiinu laacabe (1 Tesalonicenses 5:14, 15). Pa nápanu confianza Jiobá, laaca ziuʼnu gana ne zácanu nadxibalú  ora gueeda gran tribulación, purtiʼ nánnanu maʼ qué zandaa zulabe laanu (Lucas 21:25-28).

Ñee rusisácanu dxiiñaʼ ni runi ca binnigola pur laanu la? (Biiyaʼ párrafo 18)

18. Xi zacané laanu gannaxhiinu ca binnigola.

18 «Lauzuuba stiidxa cani nuu de xaíque stitu» (biindaʼ Hebreos 13:17). Nabé stale dxiiñaʼ runi ca binnigola pur congregación ne ribeecaʼ tiempu sticaʼ para guni tendercaʼ ni. Nga runi naquiiñeʼ gúninu ni guníʼ Pablu riʼ: «Lausisaca laacabe ne laganaxhii laacabe purti cayuni cabe dxiiña» (1 Tesalonicenses 5:13). Naquiiñeʼ guiníʼ íquenu guiráʼ ni rúnicabe pur laanu. Pa gúninu zacá la? zusihuínninu cudiʼnu xquíxepeʼ laacabe ne zannaxhiinu laacabe jma. Qué racaláʼdxinu gusaana de chúʼcabe nayecheʼ ne guni sentírcabe cadi jneza cayúnicabe xhiiñacabe pur xiixa ni gúninu. Ni racaláʼdxinu nga gacanenu laacabe ne guzúʼbanu stiidxacabe.

CADI GUSAANA DE GANNAXHIINU CA HERMANU STINU

19, 20. Xi zacané laanu gannaxhiinu ca hermanu stinu jma.

19 Nabé runibiáʼ binni ca xpinni Jiobá purtiʼ nadxiicaʼ ca hermanu sticaʼ. Ngaca nga ni biʼniʼ ca xpinni Cristu bibani tiempu stiʼ Pablu que. Neca zaqué, gudxi Pablu laacabe gúnicabe stipa pur gannaxhiisaacabe jma. Guniʼbe: «Laganaxhii jma que biaʼ nadxii tu yanna» (1 Tesalonicenses 4:9, 10). Xi rusiidiʼ ndiʼ laanu yaʼ. Guiranu zanda gacanenu guiniisi guendarannaxhii ni nápanu ca hermanu stinu.

20 Nga runi, cada biaje guidúʼyanu textu stiʼ iza 2016 ndaaniʼ Yoo stiʼ Reinu, naquiiñeʼ guinabadiidxanu laca laanu: «Ñee zanda gudieeʼ de ni napaʼ stobi la? Ximodo zanda gacaniáʼ ca hermanu ni deguyoo. Ñee runeʼ respetar guendaxheelaʼ la? Ñee nayecheʼ nuaaʼ né ni napaʼ la? Xi zacané naa gapaʼ jma confianza Jiobá yaʼ. Ximodo zanda guzuubaʼ stiidxaʼ ca binnigola nuu ndaaniʼ congregación». Guyúbinu modo gúninu xhoopaʼ puntu ni bizéʼtenu riʼ. Zacá qué zaca diʼ textu stiʼ iza riʼ casi ti letreru si ni cá cueʼ Yoo stiʼ Reinu. Zusietenaláʼdxini laanu pabiáʼ risaca chinándanu conseju stiʼ Pablu ora guníʼ: «Cadi guiaana dxí tu de ganaxhii saa tu casi enda biʼchiʼ» (Hebreos 13:1).

^ [1] (párrafo 9): Pa racaláʼdxiluʼ gánnaluʼ ximodo bisihuinni caadxi testigu stiʼ Jiobá pabiáʼ nadxiisaacaʼ ora guca ti desastre natural la? biindaʼ La Atalaya 15 de julio 2002, yaza 8 ne 9, ne libru Proclamadores, capítulo 19.