Biiyaʼ guiraʼ ni nuu lu sitiu riʼ

guyé lu índice

Maʼ cadi candaa zabee Dios guiráʼ ni runiná laanu

Maʼ cadi candaa zabee Dios guiráʼ ni runiná laanu

«¿Dede padxí nga gucaaʼ ridxi lii Jiobá para gacaneluʼ naa, ne sin gunadiágaluʼ naa yaʼ? ¿Dede padxí nga gucaaʼ ridxi lii para gulaluʼ naa lade ca guendaridinde riʼ pue?» (Habacuc 1:2, 3). Zacá guníʼ Habacuc, ti hombre chaʼhuiʼ ni bizuubaʼ stiidxaʼ Dios. ¿Ñee guniʼbe zacá purtiʼ qué runi confiarbe Dios la? Coʼ. Dios peʼ gudxi laabe maʼ gudixhe ti dxi para cuee guiráʼ guendananá que (Habacuc 2:2, 3).

Ora laanu o tuuxa binni ni nadxiinu guni sufrir, fácil nga guininu candaa Dios para gacané laanu, ne maʼ naquiiñeʼ ñúnibe xiixa. Peru Biblia cayabi laanu: «Cadi de que candaa [Jiobá] para guni ni ma uníʼ casi na caadxi binni, sínuque cabeza be inaba irá binni perdón laabe, purti qué racalaʼdxi be initilú nin tobi» (2 Pedro 3:9).

¿PADXÍ GUNI DIOS XIIXA?

Maʼ cadi candaa zuni Dios xiixa. Jesús guníʼ zazaaca stale cosa ni zusihuinni «mayaca guiluxe guidxilayú riʼ» ne zuuyaʼ stale binni de tobi si generación ni (Mateo 24:3-42). Ca dxi riʼ, cayaca cumplir profecía riʼ, ndiʼ cusihuinni mayaca chiguni chaahuiʼ Dios modo nabani binni. *

Peru, ¿ñee zanda cuee Dios ca yuubaʼ ca la? Dxi guyuu Jesús ndaaniʼ Guidxilayú riʼ, bisihuínnibe zanda cuee Dios ca yuubaʼ stiʼ binni. Guidúʼyanu caadxi ejemplu.

Ca desastre natural. Ti dxi, ora zeʼ Jesús ne ca apóstol stiʼ lu ti canuá lu nisadóʼ stiʼ Galilea biaba ti bi yooxhoʼ, naroʼbaʼ ne nadipaʼ, ne cayuu ca ola que ndaaniʼ canuá que, dede biaʼ que guilaahuacabe. Raqué bisihuinni Jesús, cásica Bixhózebe, zanda gucueezacaʼ ca desastre natural (Colosenses 1:15, 16). Laabe guniʼbe: «Guta dxí. Ne biaana dxí bi que ne ma qué ñasa ru ola» (Marcos 4:35-39).

Ca guendahuará. Stale binni gunna zanda gusianda Jesús ca binni nacheepaʼ lú ne cani nachiitaʼ ñee, cani rudii ataque laa ne cani napa lepra ne xcaadxi binni huará. Biblia ruzeeteʼ «bisianda [Jesús guiráʼ] binni huará» (Mateo 4:23, 24; 8:16; 11:2-5).

Guendarindaana. Ca dxi biʼniʼ predicar Jesús, biquiiñebe poder ni bidii Bixhózebe laabe para bitálebe caadxi si guendaró nápacabe ne bidiibe ni gudó stale mil de binni (Mateo 14:14-21; 15:32-38).

Guendaguti. Dxi guyuu Jesús ndaaniʼ Guidxilayú riʼ, bisibánibe chonna binni ni maʼ guti, tobi de laacaʼ maʼ ziné ndaʼ tapa gubidxa de guti. Ndiʼ rusihuinni zanda guindisaʼ Jiobá ca binni ni maʼ guti (Marcos 5:35-42; Lucas 7:11-16; Juan 11:3-44).

^ párrafo 5 Pa racalaʼdxuʼ gannuʼ jma de ca últimu dxi, biiyaʼ capítulo 9 stiʼ libru Xipeʼ ndiʼ cusiidiʼ Biblia, ni biʼniʼ ca testigu stiʼ Jiobá. Zanda guindételuʼ ni lu jw.org.