Biiyaʼ guiraʼ ni nuu lu sitiu riʼ

guyé lu índice

«Guieluluʼ biiyaʼ naa dxi nácaruaʼ ti embrión» (SALMO 139:16).

¿Ñee riene Dios ni runi sentirluʼ la?

¿Ñee riene Dios ni runi sentirluʼ la?

XI RIZÍʼDINU DE MODO GUYÁʼ BINNI

Guníʼ ique xiñee nabé tobi si riuu ca cuachi. Entre guirópacabe nuu xiixa nabé sicarú. Ti directora stiʼ ti organización ra runi estudiárcabe ximodo nga ca cuachi, Nancy Segal, ni laaca napa ti benda cuachi, guníʼ nuu caadxi cuachi «guizáʼ rienesaacaʼ ne sin guinabadiidxacaʼ». Ne ti gunaa guníʼ ximodo laa ne benda: «Guirópadu runibiáʼ chaahuidu ximodo laadu».

¿Xiñee rizaaca ndiʼ yaʼ? Dxandíʼ, rizaaca ni pur modo biniisicabe ne lugar ra biniisicabe, peru caadxi estudiu ruzeetecaʼ, rizaaca ni purtiʼ casi tobi si genética stícabe.

GUNÍʼ IQUE NDIʼ: Guendaridxagayaa nga modo bizáʼ Jiobá ca gen stiʼ binni, nga runi, zanda guiníʼ íquenu guirútiruʼ zanda guiene laanu casi riénebe laanu. Nga runi, salmista David bicaa: «Gupa chaahuiluʼ naa ndaaniʼ jñaa. Biiyaluʼ guiráʼ ca dxita ladeʼ dxi cayáʼ cani ra nagaʼchiʼ [...]. Guieluluʼ biiyaʼ naa dxi nácaruaʼ ti embrión, ne lu libru stiluʼ maca cá xi guiráʼ zeeda luni» (Salmo 139:13, 15, 16). Dios si nga runibiáʼ ne riene ximodo naca genética stinu, peru cadi ngasi, laaca nánnabe guiráʼ ca cosa ni gudídinu ne xiñee bichaʼnu modo laanu. Pur nga, zanda gánnanu guirútiruʼ zanda guiene laanu casi riénebe laanu.

XI RUSIIDIʼ BIBLIA DE MODO RIENE DIOS LAANU

Sicaríʼ biʼniʼ orar Rey David: «Oh Jiobá, lii maʼ biʼniʼ examinar chaahuiluʼ naa, ne maʼ runibiaʼluʼ naa. Maʼ nánnaluʼ pora ribiéʼ ne pora riasaʼ. Neca nuuluʼ zitu, nánnaluʼ xi caníʼ iqueʼ. Ne ante guiree ti diidxaʼ ruaaʼ, lii, oh Jiobá, mápeca nánnaluʼ guiráʼ ni» (Salmo 139:1, 2, 4). Runibiáʼ chaahuiʼ Jiobá guiráʼ cani runi sentirnu, dede ne guiráʼ ni racaláʼdxinu gúninu (1 Crónicas 28:9; 1 Samuel 16:6, 7). ¿Xi rusiidiʼ ni laanu de Dios yaʼ?

Rusiidiʼ ni laanu neca qué ganda guininu xi caníʼ íquenu ne xi cayuni sentirnu ora guni orarnu, peru Dios ni Bizáʼ laanu mápeca nanna ni. Laabe ruuyabe ni rúninu, ne laaca riénebe xi pur cayúninu ni. Peru cadi ngasi, laaca zanda gánnabe xi ñúninu pa málasi nuchaa modo nabáninu. Cumu Dios nga bizáʼ laanu né capacidad de gannaxhiinu la? zanda ganna dxíchinu racaláʼdxibe gunibiaʼbe ne guiénebe ca cosa galán riníʼ íquenu ne xi pur rúninu cani (1 Juan 4:7-10).

Ruuyaʼ Dios guiráʼ ni. Rizaaláʼdxibe laanu ne guirútiruʼ riene laanu casi laabe

 Biblia cayabi laanu:

  • «Purtiʼ cayuuyaʼ Jiobá ca binni nachaʼhuiʼ ne rucaadiágabe ora guiníʼnecaʼ laabe» (1 PEDRO 3:12TNM).

  • Dios cayabi laanu: «Zudieeʼ lii guendariene, ne zusiideʼ lii saluʼ lu neza ni naquiiñeʼ cheluʼ. Zudieeʼ conseju lii ne qué zaxhaluáʼ luguialuʼ» (SALMO 32:8).

NABÉ RIÁ DIOS LAANU

Ra gánnanu riene Dios laanu, ¿ñee zanda gacané ni laanu gudxíʼlunu ca guendanagana stinu la? Guníʼ ique ni bizaaca Anna, ti gunaa de Nigeria. Laa guníʼ: «Nabé guca desesperar, dede guníʼ ique pur gana si nabaneʼ. Ora biʼniʼ diagnosticárcabe naa cáncer de mama, xheelaʼ maʼ guti ne xiiñedxaapaʼ nexheʼ ra hospital pur ti guendahuará láʼ hidrocefalia (ti guendahuará ni rapa binni lu cerebru stiʼ). Guca nagana para naa gataʼ ra hospital dxi ca nexheʼ xiiñeʼ ne guni operárcabe naa, guicaaʼ quimioterapia ne radioterapia».

¿Xi gucané Anna gudxiilú guendanagana que yaʼ? «Nabé riuuladxeʼ guiníʼ iqueʼ lu ca textu ni zeeda lu Biblia, casi Filipenses 4:6, 7 ra ná, “zaguixhe dxí Dios [ladxidoʼno] dede iruti zanda guiene ximodo ni”. Cada biaje guiníʼ iqueʼ lu ca diidxaʼ riʼ, runeʼ sentir nuaaʼ jma gaxha de Jiobá, ne nannaʼ riénebe naa jma que biaʼ riníʼ iqueʼ. Laaca nabé guluu ca hermanu stinneʼ gana naa.

»Neca huaráʼyaruaʼ, peru jma galán nuudu yanna. Maʼ bizíʼdidu chuʼdu nayecheʼ neca tiididu ra nagana, purtiʼ qué rusaana Jiobá laadu. Santiago 5:11 ná: “Riduʼya nu yanna pabiáʼ nayeche biaana cabe ora ma udiʼdi cabe ra nagana sin nixhacalaʼdxi cabe. Casi uca Job: nabé naná ni beeda luguiá be, peru qué nibí sa be atrá. Ne nanna tu xi biʼni Señor para laabe óraque, purti riá Señor binni, ne rilaselaʼdxi [o «rapa misericordia»] laacaʼ”». Biene Jiobá guiráʼ ca guendanagana ni gudiʼdiʼ Job, pur nga, zanda ganna dxíchinu laaca riénebe ca guendanagana stinu.