Biiyaʼ guiraʼ ni nuu lu sitiu riʼ

guyé lu índice

¿Ñee riuu Dios lugar stiluʼ la?

¿Ñee riuu Dios lugar stiluʼ la?

XI RIZÍʼDINU DE MODO GUYÁʼ BINNI

Empatía nga capacidad ni napa ti binni para chuʼ lugar stiʼ stobi, guʼyaʼ, guni sentir ne guiene ni cayuni sentirbe. Doctor Rick Hanson, ti especialista ni racané binni ni huará xquendabiaaniʼ, guníʼ «nenu empatía ca lu ca gen stinu».

GUNÍʼ IQUE NDIʼ: ¿Xiñee laanu nápanu capacidad de chuʼnu lugar stiʼ stobi ne ca maniʼ ca coʼ yaʼ? Biblia rusiene bizáʼ Dios laanu casi laa (Génesis 1:26). Nga riníʼ, zanda gácanu casi laabe ne gusihuínninu ca cualidad galán nápabe. Nga runi, ora chuʼnu lugar stiʼ stobi, cusihuínninu empatía stiʼ Jiobá, Dios ni Bizáʼ guiráʼ ni nuu ne ni riáʼ binni (Proverbios 14:31).

XI RUSIIDIʼ BIBLIA LAANU DE MODO RUSIHUINNI DIOS EMPATÍA

Riuu Dios lugar stinu, ne nanaláʼdxibe gúʼyabe laanu cayacananu. Ora guininu de modo gucaná ca israelita dxi guyuucaʼ casi esclavu Egipto ne modo guzácabe cuarenta iza lu desiertu, Biblia ná: «Biaʼ tiempu gucanácabe, laabe laaca gucanabe» (Isaías 63:9). Racá ridúʼyanu qué ñanna si Dios cayacaná xquidxi, sínuque laaca biʼniʼ sentirbe yuubaʼ sticaʼ. Laapebe guniʼbe: «Nannaʼ dxicheʼ xi guendananá cadíʼdicabe» (Éxodo 3:7). «Purtiʼ ni canaʼ laatu —ná Dios— cagaʼnaʼ guié bizaluaʼ» (Zacarías 2:8). Nga runi, ora guninácabe laanu, casi ñaca ñúnicabe ni laabe.

Neca gabi ladxidoʼno laanu cadi jneza ni cayúninu o qué runi merecernu guiá Dios laanu, Biblia cayabi laanu «jma nandxóʼ Dios que laani ne laa nanna irá ni nuu ndaani ni» (1 Juan 3:19, 20). Runibiáʼ chaahuiʼ Dios laanu, jma qué biaʼ runibiaʼnu laaca laanu. Nánnabe xi guiráʼ cazaacanu, xi riníʼ íquenu, xi runi sentirnu, ne riuube lugar stinu.

Zanda ganna dxíchinu pa guyúbinu Dios para gatadxí ladxidoʼno, zudiibe laanu guendanuuxpiaaniʼ ne zacanebe laanu ora guidxaagalunu guendanagana

 Biblia cayabi laanu:

  • «Nga runi, zucaarídxiluʼ, ne Jiobá zacabi lii; zanabuʼ gacanebe lii, ne laabe zaniʼbe: “¡Raríʼ nuaaʼ!”» (ISAÍAS 58:9).

  • «Purtiʼ nannaʼ dxiicheʼ xi naguixheʼ iqueʼ guneʼ né laatu, ná Jiobá, naguixheʼ iqueʼ chúʼdxitu, ne cadi gacanatu, para gudieeʼ laatu ti futuro ne ti esperanza. Laatu zucaarídxitu naa ne zeedatu para guni orartu naa ne zucaadiagaʼ laatu» (JEREMÍAS 29:11, 12).

  • «Gudaa nisa ni riete luaʼ, ya, ndaaniʼ odre stiluʼ. ¿Ñee cadi cá cani lu libru stiluʼ la?» (SALMO 56:8).

RUNIBIÁʼ DIOS LAANU, RIÉNEBE LAANU NE RIUUBE LUGAR STINU

Ra gánnanu riene Dios laanu, ¿ñee zacané ni laanu para gudxíʼlunu ca guendanagana nápanu la? Guidúʼyanu ni bizaaca María.

«Guuyaʼ xiiñeʼ de 18 iza guniná cáncer laa chupa iza ne gatiʼ, guizáʼ triste ni. ¿Xiñee ndiʼ nabé naná guendanabani riʼ pue? Bidxiicheniáʼ Jiobá purtiʼ qué nucueezabe ni guca xiiñeʼ que.

»Bineʼ sentir cadi nadxii diʼ Jiobá naa. Gudiʼdiʼ si xhoopaʼ iza, gudxeʼ guiráʼ ni runeʼ sentir ti xhamigaʼ de congregación stinneʼ ni guizáʼ nachaʼhuiʼ ne riene naa. Bicaadiágasibe naa panda hora ne sin gucueezabe naa, bisietenaláʼdxibe naa ti textu zeeda lu Biblia ni yendá ladxiduáʼ: 1 Juan 3:19, 20 ra ná “jma nandxóʼ Dios que [ladxidoʼno] ne laa nanna irá ni nuu ndaani ni”. Ne de raqué bisiénebe naa, riene Jiobá ca yuubaʼ ni ridídinu.

»Nin né ni gúdxibe naa que, cadxiicheruáʼ. Ngue runi biindaʼ Salmo 94:19 ra ná: “Ora bidale cani ruchiiñaʼ xquendabiaaneʼ, lii gudixhedxiluʼ xhialmaʼ pur guiráʼ ni gúdxiluʼ naa”. Ngapeʼ nga ca diidxaʼ ni caquiiñeʼ gucaadiaʼgaʼ. Últimu la? gudxeʼ Jiobá pabiáʼ naná yuubaʼ napaʼ, ne gupaʼ stale confianza zucaadiagabe naa ne ziénebe naa. Ngue gudixhedxí ladxiduáʼ».

¡Guizáʼ ratadxí ladxidoʼno gánnanu riene Dios laanu ne riuube lugar stinu! Peru ¿xiñee nuu stale yuubaʼ yaʼ? ¿Ñee cayuni castigar Dios laanu pur xiixa pecadu bíninu la? ¿Ñee ziuu dxi cueebe ca yuubaʼ ca la? Lu xcaadxi artículo ca zacábinu ca pregunta riʼ.