Biiyaʼ guiraʼ ni nuu lu sitiu riʼ

guyé lu índice

Ca profecía ni dxandíʼ maʼ guca cumplir

Ca profecía ni dxandíʼ maʼ guca cumplir

Casi maca bizéʼtenu que, gudxite si oráculo de Delfos que rey Creso, pur ni gúdxibe laa que bicaalú rey stiʼ Persia ne biniti. Peru lu Biblia zeeda ti profecía ni cuzeeteʼ de rey stiʼ Persia, ne guca cumplir ni módopeʼ guníʼcabe zazaaca ni.

Chupa gayuaa iza ante (gale Ciro), maca bizeeteʼ profeta Isaías labe, ne bisiene ximodo zuni ganarbe guidxi Babilonia.

Isaías 44:24, 27, 28. «Ndiʼ nga ni maʼ guníʼ Jiobá, [...] xa ni rabi nisa ziáʼ: “Bibidxi; ne zucuiidxeʼ guiráʼ guiiguʼ stiluʼ”; ni riníʼ de Ciro: “Laabe nga pastor stinneʼ, ne guiráʼ cani gacalaʼdxeʼ laabe zúnibe guiráʼ xixé ni”; ne ora guiniéʼ de Jerusalén: “Zabiguetaʼ zucuícabe ni sti biaje”, ne templu que: “zúnicabe cimientu stini”».

Según historiador griegu Heródoto, ejércitu stiʼ Ciro guleechú guiiguʼ didi ndaaniʼ guidxi Babilonia. Pur ni biʼniʼ Ciro, gunda gudíʼdibe guiiguʼ que ne ca soldadu stibe ne zaqué gunda biuube ndaaniʼ guidxi que. Biʼniʼ ganársibe guleebe ca Judíu ni nuu de esclavu Babilonia ne bidiibe lugar guibiguétacaʼ ne guni chaahuicaʼ Jerusalén, purtiʼ raca setenta iza de binitilúcabe ni.

Isaías 45:1. «Ndiʼ nga gudxi Jiobá hombre ni gulí, Ciro, ni maʼ naazeʼ náʼ ladu derechu, para guneʼ mandar guidxi roʼ nezalú, para gaxhaʼ poder stiʼ ca rey, para guxheleʼ ca puertaʼ de chupa ndaga nezalú ne cadi guieeguʼ ca puertaʼ ca».

Guyuu ca persa ndaaniʼ guidxi que, neza ra puertaʼ naroʼbaʼ stini, purtiʼ qué nudiicabe cuenta biaanaxeleʼ ni. Pa ñaca ñanna ca babilonio xi cá ique Ciro guni, nuseegucaʼ guiráʼ ca puertaʼ ni nuu gaxha de guiiguʼ que. Peru cumu qué ñúnicabe ni la? maʼ qué ñapa guidxi que gastiʼ ni nulá laa.

Cásica guca cumplir profecía riʼ, zeedaruʼ xcaadxi profecía lu Biblia ni maʼ guca cumplir cásipeʼ modo gucuá cani. * Gadxé ca profecía riʼ de ni riníʼ binni chigaca, ne stale biaje zeeda cani de ca dios falsu, peru ca profecía ni cá lu Biblia, zeeda cani de Dios ni dxandí, «Ni riníʼ ximodo riluxe xiixa ni ruzulú, ne ni riníʼ dede ante ca cosa ni caʼruʼ gaca» (Isaías 46:10).

Jiobá, tobi lucha Dios ni dxandíʼ, laasi nga zanda guiníʼ dxandí zaca xiixa. Ne labe raca significar  «Laabe nga rúnibe ni gueeda gaca», ndiʼ riníʼ napa Dios poder para guiníʼ xi chiguizaaca despué ne zanda gúnibe guiráʼ ni maʼ guniʼbe. Nga runi zanda guni crenu zuni cumplirbe guiráʼ ni maʼ biʼniʼ prometerbe.

CA PROFECÍA NI CAYACA CUMPLIR CA DXI RIʼ

¿Ñuuláʼdxiluʼ ñánnaluʼ xi maca cá lu Biblia zazaaca ca dxi stinu riʼ la? Raca biaʼ chupa mil iza, maca guníʼ Biblia nagana zaca ca últimu dxi riʼ. Peru, ¿xii nga ca últimu dxi ni caninu yaʼ? Cadi ca últimu dxi stiʼ Guidxilayú riʼ o ca binni nabeza ndaaniʼ ni, sínuque ca últimu dxi stiʼ guiráʼ guendaridinde, ni runi tuuxa ora ruquiichináʼ binni pobre ne ca yuubaʼ ni cayuniná binni maʼ raca stale iza. Guidúʼyanu caadxi profecía ni caníʼ de ca últimu dxi.

2 Timoteo 3:1-5. «Jma nagana zaca ni ora mayaca izaa xhi guidxilayú. Purti zuyubi binni para laa si, ne nisi bidxichi zacá ique caʼ. Zuni ca laaca nandxóʼ ne zaca ca nayáʼ, ne zaguiñe yu ca stiidxa Dios. Ma qué zuzuuba ca stiidxa jñaa ca ne bixhoze caʼ ne qué zulabi ca laacabe. Zabani ca modo na ique caʼ ne nin zanna ca pa nuu Dios. Qué zanaxhii ca binni ne qué ziá ca irutiʼ, ne nisi zazá ca zaníʼ ca binni. Qué zanda ucueeza ca laca laaca de guni ca ni na ique caʼ. Zuniná cabe binni ne zaca nanalaʼdxi cabe irá ni jneza. Zutoo cabe xhamigu cabe, ne qué zuni lú cabe guni cabe intiisi, ne zudxiiba cabe laca laacabe. Zuyubi cabe ni chuʼlaʼdxi cabe lugar de nuyubi cabe Dios. Zaná cabe runi cre cabe Dios, peru qué zusihuinni cabe enda nandxóʼ stiʼ».

¿Ñee huayuuyaluʼ zeʼ dxi zidale binni ni naca zacá la? ¿Ñee cadi rábiluʼ nabáninu lade binni orgulloso ni ruyubi puru para laasi ne nisi bueltu ricá íquecaʼ la? ¿O huayuuyaluʼ binni ni nabé exigente laa ne nin qué riná chuʼ razón la? Laaca huayuuyaluʼ maʼ qué ruzuubaʼ xiiñiʼ binni diidxaʼ ne nuu tu ruyubi ni chuulaʼdxiʼ lugar de nuyubi Dios. Ne zeʼ dxi jmaruʼ si feu modo nabani binni.

Mateo 24:6, 7. «Ne zanna tu cayaca guerra ti ladu ne nuu de gaca ni sti ladu [...]. Zucaa lú ti gobiernu sti gobiernu ne zucaa lú ti guidxi sti guidxi».

Según caadxi cálculo, lu ca guerra ni maʼ guca dede lu iza 1914 hasta ca dxi stinu riʼ, huayati jma de ti gayuaa millón de binni. Bixuiʼlú pabiáʼ huayuunaʼ stale binni ne huayacaná pur guiráʼ guendaguti riʼ. Pur guiráʼ ni huayaca riʼ, ¿ñee huayacané ni para maʼ cadi chuʼruʼ guerra la?

Mateo 24:7TNM. «Ziaadxaʼ ni gó binni».

Programa Mundial de Alimentos ná: «Guidxilayú riʼ runi producir ni stale guendaró para guiráʼ binni nabeza luni, peru 815 millón de binni, 1 de cada 9, ridiʼdiʼ dxi sin gó. Ne 1 de cada 3 nuu desnutridu». Guiráʼ iza rati jma de chonna millón de xcuidihuiiniʼ pur guendarindaana.

Lucas 21:11. «Zaca stale xu roʼ».

Guiráʼ iza raca biá 50,000 xu naroʼbaʼ ne 100 de ca xu riʼ runiná cani stale edificiu. Ne casi guiráʼ iza raca ti xu naroʼbaʼ lu Guidxilayú riʼ. Según ti estudiu ni guca entre iza 1975 ne 2000, huayati 471,000 binni pur xu naroʼbaʼ.

Mateo 24:14. «Zuiʼ cabe stiidxa Dios de idubi naca guidxilayú para ganna irá xixé guidxi modo runi mandar, ne dxi que ru nga iluxe guidxilayú riʼ».

Yanna riʼ nuu jma de xhono millón de testigu stiʼ Jiobá ni runi predicar ca noticia galán de Reinu stiʼ Dios lu jma de 240 guidxi, zándapeʼ guininu guidubi naca Guidxilayú. Runadiágacabe mensaje riʼ ndaaniʼ stale guidxi roʼ ra nuu stale binni, ne ndaaniʼ ca guidxihuiiniʼ ni nuu zitu, ne lu ca dani ne ndaaniʼ guiʼxhiʼ. Peru profecía ca laaca ruzeeteʼ ora maʼ guníʼ Dios maʼ guca predicar guidubi Guidxilayú la? oraqueruʼ nga «iluxe guidxilayú riʼ» ¿Xi riníʼ ndiʼ yaʼ? Riníʼ ni zanitilú guiráʼ gobiernu stiʼ Guidxilayú riʼ ne zuchaa modo nabani binni ora guni mandar Reinu stiʼ Dios. ¿Gunáʼ nga ca promesa chiguni cumplir Reinu riʼ yaʼ? Lu ca yaza ni zeeda ca zadxélaluʼ respuesta ca.