Biiyaʼ guiraʼ ni nuu lu sitiu riʼ

guyé lu índice

Zanda guibániluʼ sin chuʼ dxi gátiluʼ ndaaniʼ Guidxilayú riʼ

Zanda guibániluʼ sin chuʼ dxi gátiluʼ ndaaniʼ Guidxilayú riʼ

¡TI ESPERANZA GUIZÁʼ SICARÚ! Dios ni Bizáʼ laanu maʼ biʼniʼ prometer zabáninu sin qué chuʼ dxi gátinu raríʼ, ndaaniʼ Guidxilayú riʼ. Peru nagana raca para stale binni guni cré ni. Purtiʼ stale tu laa riníʼ ique, guiranu napa xidé gátinu, purtiʼ guendaguti ca nácani parte de guendanabani. Xcaadxi ná zanda guibáninu para siempre guibáʼ peru despué de gátinu. ¿Lii xi riníʼ íqueluʼ?

Ante guicábiluʼ, runi invitardu lii gúʼyaluʼ ximodo ricabi Biblia ca pregunta riʼ: Pur modo bizáʼ Dios laanu, ¿pabiáʼ tiempu zanda guibáninu? ¿Xi para bizáʼ Dios Guidxilayú ne binni? ¿Xiñee rátinu?

GADXÉ MODO BIZÁʼ DIOS LAANU

Ora guchaaganu laanu né xcaadxi cosa ni bizáʼ Dios, rudiʼnu cuenta maʼ gadxé modo bizaʼbe laanu. ¿Xiñee gadxé laanu yaʼ? Purtiʼ Biblia ruzeeteʼ guyanu casi Dios (Génesis 1:26, 27). ¿Xi riníʼ nga yaʼ? Riníʼ ni, bizáʼ Dios laanu né ca cualidad ni napa, casi guendarannaxhii ne gúninu ni jneza.

Bidii Dios laanu capacidad de guiníʼ íquenu ne gánnanu xii nga ni jneza ne ni cadi jneza, ne deseu de gunibiaʼnu ne gaca xhamígunu laabe. Nga runi, riuuláʼdxinu guidúʼyanu guiráʼ ni nuu guibáʼ, ca cosa sicarú stiʼ naturaleza, ne xcaadxi cosa casi arte, música ne poesía. Peru, ti cosa ni dxandíʼ runi laanu gadxé nga, nápanu capacidad de guni adorarnu Dios ni Bizáʼ laanu. Guiráʼ cani bizéʼtenu riʼ nga runi laanu gadxé de xcaadxi cosa ni nabani.

Guníʼ ique ndiʼ: pa ñacalaʼdxiʼ Dios nibáninu caadxi si iza, ¿xiñee bizaʼbe laanu para cadi chuʼ dxi gusaana de guizíʼdinu ne iquiiñenu guiráʼ capacidad riʼ yaʼ? Purtiʼ racaláʼdxibe guibáninu nayecheʼ ndaaniʼ Guidxilayú riʼ sin qué chuʼ dxi gátinu.

NI MACA GUDIXHE IQUE DIOS GUNI

Nuu caadxi binni riníʼ ique qué ñuu dxi niguixhe ique Dios nibani binni xadxí ndaaniʼ Guidxilayú. Nácabe zidídisinu ndaaniʼ Guidxilayú para guihuinni tuu nga zanda cheʼ guibáʼ ne guibani sin qué chuʼ dxi gatiʼ. Pa ñaca ni zacá, ¿cadi dxandíʼ ñapa Dios donda pur guiráʼ cosa malu nuu ndaaniʼ Guidxilayú riʼ la? Maʼ qué nusihuinni Dios modo laa. Purtiʼ Biblia ná: «Laabe nga Guié, ca dxiiñaʼ stibe biaʼsi cani, purtiʼ guiráʼ neza stibe jneza cani. Dios ni runi ni riníʼ, ne qué runi ni malu; Dios ni runi ni jneza ne qué ruchee» (Deuteronomio 32:4).

 Biblia cusiene xiñee bizáʼ Dios Guidxilayú: «Stiʼ Jiobá nga guibáʼ, peru guidxilayú ca maʼ bidiibe ni binni» (Salmo 115:16). Zacá ni, Dios bizáʼ Guidxilayú stinu riʼ para guibani binni ndaaniʼ ni, ne guluube guiráʼ ni caquiiñenu para ganda guibáninu nayecheʼ sin qué chuʼ dxi gátinu (Génesis 2:8, 9).

«Stiʼ Jiobá nga guibáʼ, peru guidxilayú ca maʼ bidiibe ni binni» (Salmo 115:16).

Dios cusiene lu Stiidxaʼ xiñee bizáʼ binni. Gúdxibe ca diidxaʼ riʼ primé pareja que: «Laguchá guidxilayú riʼ ne laguni dxiiñaʼ luni, ne lagapa ca benda nuu ndaaniʼ nisadóʼ ne ca maniʼ ripapa guibáʼ ne guiráʼ maniʼ nuu lu guidxilayú» (Génesis 1:28). ¡Ti ndaayaʼ nga gápacabe Guidxilayú riʼ ne gúnicabe ni ti paraísu! Gunna Adán ne Eva zanda guibánicaʼ né ca xiiñicaʼ sin qué chuʼ dxi gáticaʼ ndaaniʼ Guidxilayú riʼ ne cadi guibáʼ.

¿XIÑEE RÁTINU?

Biblia rusiene bicaalú tobi de ca ángel bizáʼ Dios laa. Despué biree lá ángel riʼ Binidxabaʼ, laa bicaalú ne gucalaʼdxiʼ nucueeza propósitu stiʼ Dios. ¿Ximodo bíʼnibe ni yaʼ?

Gudxite Binidxabaʼ Adán ne Eva, para gucaalucaʼ Dios. Casi ora ñábibe laacaʼ que naʼ Dios gudii laacaʼ xiixa cosa nabé galán, laani nga derechu ni nápacaʼ de cuicaʼ xii nga ni jneza ne ni cadi jneza. Ne zaqué guyuucaʼ pur Binidxabaʼ ne bidxiidéchecaʼ Dios. Peru ¿xi bizaacaʼ yaʼ? Ra gudiʼdiʼ tiempu gúticabe, casi maca guníʼ Dios. Biníticabe oportunidad de nibánicabe sin ñuu dxi ñáticabe ndaaniʼ ti paraísu lu Guidxilayú riʼ (Génesis 2:17; 3:1-6; 5:5).

Biaʼ dxi huabani binni nabé huayacaná pur bicaalú Adán ne Eva Dios. Stiidxaʼ Dios ná: «Pur tobi hombre biuu enda ruchee ndaani guidxilayú, ne guti be purti bichee be, ne zacá ucuá enda guti que irá xixé binni, purti laca bichee caʼ» (Romanos 5:12). Nga runi rátinu purtiʼ biʼniʼ heredarnu pecadu ne guendaguti, ne cadi purtiʼ malu Dios.

ZANDA GUIBÁNILUʼ SIN QUÉ CHUʼ DXI GÁTILUʼ NDAANIʼ GUIDXILAYÚ RIʼ

Neca bicaalúcabe Dios ndaaniʼ jardín de Edén, qué nuchaa ni gudixhe ique Dios guni para binni ne para Guidxilayú. Pur guendarannaxhii ne justicia stibe bicaa cani laabe gúnibe xiixa para gulabe laanu de lu náʼ pecadu ne guendaguti. Apóstol Pablo bisiene: «Purti ni riaxa pecadu nga enda guti, peru ni rudii Dios nga enda nabani ni qué zaluxe, pur Cristu Jesús Señor stinu» (Romanos 6:23). Tantu nadxii Dios laanu «bidii tobi lucha Xiiñiʼ [Jesucristu], ti irá tu guni cre Xiiñi be que la? cadi initilú sínuque gapa enda nabani ni qué zaluxe» (Juan 3:16). Ra guti Jesús pur laanu, gudíxebe para guilanu ne zacá gápanu guiráʼ ni biniti Adán. *

Maʼ cadi candaa zaca Guidxilayú riʼ ti paraísu casi maʼ biʼniʼ prometer Dios. Para ganda chuʼluʼ ndaaniʼ paraísu ca la? caquiiñeʼ chinándaluʼ conseju ni bidii Jesús riʼ: «Laguiuu neza ni napa puerta nabéʼ, purti neza ni xilaga puerta sti la? nga neza ladu rinitilú binni, purti ruluíʼ jma galán neza que, ne stale tu riuu ladu que. Peru neza enda nabani la? jma nabé puerta ne nagana neza stiʼ, ne huaxiéʼ tu ridxela ni» (Mateo 7:13, 14). Lu naluʼ nuu futuro stiluʼ. ¿Xi decisión guicaaluʼ yaʼ?

^ párrafo 17 Pa racaláʼdxiluʼ gánnaluʼ xi zabeenduluʼ pur ni biaxa pur laanu la?, biindaʼ capítulo 5 stiʼ libru Xipeʼ ndiʼ cusiidiʼ Biblia, ni biʼniʼ ca testigu stiʼ Jiobá. Laaca nuu ni lu jw.org.