Biiyaʼ guiraʼ ni nuu lu sitiu riʼ

guyé lu índice

Rusiidiʼ Biblia ni dxandíʼ de Dios ne de Jesucristu

Rusiidiʼ Biblia ni dxandíʼ de Dios ne de Jesucristu

Neca runi adorar binni stale dios, ti Dios si ni dxandíʼ nga nuu (Juan 17:3). Laabe nga Dios «ni jma nandxóʼ», ni bizáʼ guiráʼ xixé ni nuu ne ra cadá guendanabani. Laasibe nga naquiiñeʼ guni adorarnu (Daniel 7:18; Apocalipsis 4:11).

¿Tuu nga Dios?

Dxi gucuá Biblia bicaacabe lá Dios BIAʼ 7,000 BIAJE

JEHOVÁ Lá Dios

SEÑOR DIOS BIXHÓZENU Caadxi título napa Jehová

Tu labe. Laapebe nabe: «Naa nga Jehová. Nga nga laʼyaʼ» (Isaías 42:8). Biaʼ gadxe mil biaje riete lá Dios lu Biblia. Peru stale Biblia rúnicaʼ ti cosa ni cadi jneza ora ruchaacaʼ labe ne rucaacaʼ título casi Señor. Racalaʼdxiʼ Dios gácaluʼ xhamigu, nga runi racaláʼdxibe iquiiñeluʼ labe (Salmo 105:1).

Ca título nápabe. Lu Biblia zeeda caadxi modo rábicabe Jehová casi, Dios, ni jma napa poder, ni bizáʼ guiráʼ xixé ni nuu, Bixhózenu, Señor ne ni runi mandar guiráʼ xixé ni nuu. Biblia laaca ruzeeteʼ de caadxi oración ni bíʼnicabe Dios ra biquiiñecabe xiixa título para guiniʼnécabe laabe ne ra biquiiñecabe labe, Jehová (Daniel 9:4).

 Ximodo laabe. Naca Dios ti espíritu (Juan 4:24). Biblia ruzeeteʼ «nin ti binni qué huayuu dxi guʼyaʼ Dios» (Juan 1:18). Laaca rabi Biblia laanu napa Dios sentimientu, nga runi, pur cani gúninu zanda gusiéchenu laabe o zanda cuʼnu laabe triste (Salmo 78:40, 41; Proverbios 27:11).

Ca cualidad sicarú nápabe. Para Dios la? biaʼca risaca guiráʼ binni, gastiʼ naca padé laa o ximodo biniisi (Hechos 10:34, 35). Laaca rápabe misericordia binni, riabe laacaʼ, rápabe paciencia, qué rusaana de gannaxhiibe ne qué rusiguiibe (Éxodo 34:6, 7). Peru de guiráʼ cualidad nápabe, nuu tapa ni guizáʼ rusihuínnibe.

Nápabe poder. Laabe nga Dios ni jma napa poder. Ndiʼ riníʼ zanda gúnibe guiráʼ ni runi prometerbe (Génesis 17:1).

Nuu xpiaanibe. Guirútiruʼ jma nuu xpiaaniʼ qué Dios. Nga runi, Biblia ná: «Tobi lucha Dios nga nuu xpiaaniʼ» (Romanos 16:27).

Rúnibe ni jneza. Siempre runi Dios ni jneza. Biblia cayabi laanu: «Jneza guiráʼ ni rúnibe» ne qué rúnibe cosa malu (Deuteronomio 32:4).

Rannaxhiibe. Biblia ná: «Dios nga guendarannaxhii» (1 Juan 4:8). Qué rusihuinni si Dios guendarannaxhii, sínuque nácabe guendarannaxhii. Ne guendarannaxhii ca rucaani laabe gúnibe guiráʼ ni gacaláʼdxibe para gacanebe laanu.

Raca xhamígube binni. Dios nga Bixhózenu ni nuu guibáʼ ne ni nadxii laanu (Mateo 6:9). Pa gápanu fe laabe, zanda gácanu xhamígube (Salmo 25:14). Dios racalaʼdxiʼ chuʼnu gaxha de laa ora guni orarnu ne gábinu laa guiráʼ problema nápanu, purtiʼ dxandíʼ peʼ rizaaláʼdxibe laanu (Santiago 4:8; 1 Pedro 5:7).

¿Ñee laaca Dios nga Jesucristu la?

Cadi Jesús nga Dios. Maʼ gadxé Jesús, purtiʼ Dios peʼ nga bizáʼ laabe. Nga runi Biblia ruzeeteʼ nácabe Xiiñiʼ Dios (Juan 20:31). Bizáʼ si Jehová Jesús, baʼduʼ primé stiʼ, biquiiñebe laa casi tobi ni runi xhiiñabe jneza peʼ para bizáʼ universu ne guiráʼ cosa nabani (Proverbios 8:30, 31; Colosenses 1:15, 16).

 Qué ñuu dxi niníʼ Jesús laa nga Dios. Laapebe guniʼbe: «Naa nga representante stibe, ne laabe biseendabe naa» (Juan 7:29). Ne dxi guniʼné Jesús tobi de ca gunaa ni naca xpínnibe, guniʼbe ca diidxaʼ riʼ: «Bixhozeʼ ne Bixhózetu» ne «Dios stinneʼ ne Dios stitu» (Juan 20:17). Guti si Jesús, bisibani Jehová laa para cheʼ guibáʼ, ne bicuibe laa laadu derechu stibe ne bidiibe laa autoridad para guni mandar (Mateo 28:18; Hechos 2:32, 33).

Zanda gacané Jesús lii guidxíñaluʼ Dios

Beedabe ndaaniʼ Guidxilayú para gusiidibe laanu ximodo Bixhózebe. Jehová guníʼ de Jesús: «Ndiʼ nga Xiiñeʼ ni nadxieeʼ. Lagucaadiaga laa» (Marcos 9:7). Jesús nga ni jma runibiáʼ Dios, nga runi guníʼ: «Ne guirutiʼ runibiáʼ Bixhozeʼ jma que naa, ne ca ni gacalaʼdxeʼ gusiideʼ de Bixhozeʼ» (Lucas 10:22).

Guizáʼ jneza modo rusihuínnibe ca cualidad stiʼ Dios. Jneza peʼ modo bisihuinni Jesús ca cualidad stiʼ Bixhoze, ngue runi gunda guníʼ: «Ni maʼ biiyaʼ naa la? laaca maʼ biiyaʼ Bixhozeʼ» (Juan 14:9). Pur guiráʼ ni guníʼ Jesús ne ni biʼniʼ gucanebe binni guidxiña Dios purtiʼ zaqué biluiʼbe guendarannaxhii ni napa Bixhózebe laacaʼ. Ngue runi Jesús guníʼ: «Naa nga neza, ni dxandíʼ ne guendanabani. Guirutiʼ zanda cheʼ ra nuu Bixhozeʼ pa cadi pur naa» (Juan 14:6). Laaca guniʼbe: «Ca ni dxandíʼ runi adorar Dios zuni adorarcaʼ laabe né espíritu ne ni dxandíʼ. Purtiʼ cuyubi Dios clase binni ca para guni adorar laa» (Juan 4:23). ¡Guníʼ ique! Cuyubi Jehová binni casi lii, ni riuulaʼdxiʼ guiziidiʼ ni dxandíʼ de laabe.