Biiyaʼ guiraʼ ni nuu lu sitiu riʼ

guyé lu índice

Dxi biʼniʼ mandar Dios, guiráʼ ni bizaʼbe gúpacaʼ guendariuudxi ne guyuucaʼ tobi si.

¿Xiñee caquiiñenu gueeda Reinu stiʼ Dios?

¿Xiñee caquiiñenu gueeda Reinu stiʼ Dios?

Dede dxi guyuu binni lu Guidxilayú riʼ, Jehová, Dios ni bizáʼ laanu, laasibe nga biʼniʼ mandarbe ne bíʼnibe ni né guendarannaxhii. Ngue runi bíʼnibe ti lugar sicarú para guibani binni, jardín de Edén, ra guyuu stale guendaró. Ne bidii Dios binni dxiiñaʼ ni guyuulaʼdxiʼ (Génesis 1:28, 29; 2:8, 15). Dxi Dios si biʼniʼ mandar, guiráʼ binni gupa guendariuudxi ne guyuucaʼ tobi si.

Qué niná Adán ne Eva ñuni mandar Dios laacaʼ.

Biblia ná ti ángel ni qué nuzuubaʼ diidxaʼ —Binidxabaʼ— bicaa binni guiníʼ ique cadi jneza modo runi mandar Dios ne casi ora niniʼbe jma galán zabánicaʼ pa qué guni mandar Dios laacaʼ. Triste guininu ni peru ca primé binni guyuu lu Guidxilayú, Adán ne Eva, yenándacaʼ ni ná Binidxabaʼ ne maʼ qué nuzuubacaʼ stiidxaʼ Dios (Génesis 3:1-6; Apocalipsis 12:9).

Ra bidxiideche Adán ne Eva Jehová ne qué ñápacaʼ laabe casi gobernante sticaʼ, biníticabe Paraísu ra nabézacabe ra nibánicabe sin ñáticabe ne sin ñaca huarácabe (Génesis 3:17-19). Ni bíʼnicabe riʼ laaca bininá ni ca xiiñicabe. Biblia ná cumu bichee Adán la? «biuu pecadu ndaaniʼ guidxilayú, ne pur pecadu ca biuu guendaguti» (Romanos 5:17). Yanna pur pecadu ca maʼ nuu sti guendanagana: «Binni huayuni mandar binni para si gacanacaʼ» (Eclesiastés 8:9). Nga runi zanda guininu ora runi mandar binni laca laa, riuu guendanagana guiráʼ ladu.

BIZULÚ BIʼNIʼ MANDAR BINNI

Qué niná Nemrod ñuni mandar Dios laa.

Primé binni ni ruzeeteʼ Biblia biʼniʼ mandar nga Nemrod, peru qué ninabe ñuni mandar Dios laabe. Ne lu ca iza ni maʼ gudiʼdiʼ ca nabé huayuni abusar ca gobiernu de autoridad sticaʼ. Nga runi, raca biaʼ chonna mil iza bicaa rey Salomón ca diidxaʼ riʼ: «Biiyaʼ guiráʼ nisa cayete lú ca binni ni cuquiichinácabe, peru qué gápacaʼ tu quixhedxí ladxidoʼcaʼ. Guizáʼ nadipaʼ ca binni ni cuquiichináʼ laacabe» (Eclesiastés 4:1).

Tiempu riʼ laaca zacaca rizaaca. Ti informe stiʼ Naciones Unidas ni biree lu iza 2009 ná cada dxi tidiʼ jma stale binni riníʼ ique «nuu stale guendanagana «purtiʼ cadi jneza modo runi mandar gobiernu».

CAQUIIÑEʼ GACA XIIXA NAGUEENDA

Caquiiñeʼ binni guidxilayú ti buen gobiernu ne tuuxa ni guni mandar laacaʼ jneza. Ne nga peʼ nga ni maʼ guníʼ Dios ni bizáʼ laanu chiguni.

Nin ca mejor gobiernu qué huayanda guni chaahuicaʼ guiráʼ guendanagana ni napa binni.

Maʼ guluu Dios listu Reinu stiʼ o ti gobiernu ni chichuu lugar stiʼ guiráʼ ca gobiernu ni nuu ndaaniʼ guidxilayú, «ne laani ziaanani ne qué ziuu dxi guilúxeni» (Daniel 2:44). Laani nga Reinu ni rinabaʼ millón binni lu oración de padrenuestro (Mateo 6:9, 10). Peru cadi Dios nga chigaca Rey stiʼ Reinu ca, sínuque maʼ gulibe tuuxa ni maʼ bibani lu Guidxilayú riʼ. ¿Tuu laabe yaʼ?