Biiyaʼ guiraʼ ni nuu lu sitiu riʼ

guyé lu índice

Guni apoyarnu Reinu stiʼ Dios tiempu riʼ

Guni apoyarnu Reinu stiʼ Dios tiempu riʼ

Bixuiʼlú zedadxiña ti huracán nabé nadipaʼ ndaaniʼ xquídxiluʼ. Ne cayabi ca autoridad binni: «¡LAGUIREE NE LAGUYUBI RA GUILATU!». ¿Xi ñúniluʼ yaʼ? ¿Cadi dxandíʼ nuyúbiluʼ ti lugar ra nilaluʼ la?

Tiempu riʼ laaca zedadxiña casi ti huracán luguiáʼ binni. Ne Jesús gulee lani gran tribulación (Mateo 24:21). Ne neca qué zanda guxóʼñenu de laani, zanda guyúbinu ra guilanu. ¿Xi caquiiñeʼ gúninu yaʼ?

Lu discursu bidii Jesús ni láʼ Sermón del Monte bidiibe laanu conseju riʼ: «Cadi gusaana de guyúbitu Reinu ne justicia stiʼ Dios» (Mateo 6:33). ¿Xi riníʼ ca diidxaʼ riʼ yaʼ?

«Cadi gusaana de guyúbitu Reinu». Ndiʼ riníʼ naquiiñeʼ gusisácanu Reinu stiʼ Dios jma que xcaadxi cosa (Mateo 6:25, 32, 33). ¿Xiñee naquiiñeʼ guiníʼ íquenu zacá yaʼ? Purtiʼ binni qué zanda guni chaahuiʼ ca guendanagana nuu lu Guidxilayú riʼ. Dios si nga zanda gúnini.

Cadi gusaana de guyúbitu «justicia stiʼ Dios». Ndiʼ riníʼ caquiiñeʼ gúninu stipa chinándanu ca ley ne ca principiu stiʼ Dios. ¿Xiñee yaʼ? Purtiʼ pa quíxhenu xii nga ni jneza ne ni cadi jneza para laanu la? qué zabeendunu ni galán (Proverbios 16:25). Peru pa chinándanu ca ley stiʼ Jehová, zusiéchenu ladxidoʼbe ne zabeendunu ni galán (Isaías 48:17, 18).

¿Xiñee guníʼ Jesús: «Cadi gusaana de guyúbitu Reinu ne justicia stiʼ Dios primeru»? Purtiʼ nánnabe ziuu tuu laa zándaca gusaana de gúnini ne guiníʼ ique pa gapa stale bueltu zabani jma galán. Ne nuu tuu laa ziuu xhaataʼ xizaa pur gapa ni guibaniné dede maʼ qué zapa tiempu para guyubi Reinu stiʼ Dios (Mateo 6:19-21, 25-32).

 Peru maca biʼniʼ prometer Jesús zapa ca ni guni apoyar Reinu stiʼ Dios ni iquiiñecaʼ tiempu riʼ ne zacaacaʼ stale ndaayaʼ lu ca dxi ni zeeda ca (Mateo 6:33).

Neca biyubi ca primé discípulo stiʼ Jesús Reinu ne justicia stiʼ Dios la? qué ñuuyacabe niree guiráʼ yuubaʼ napa binni. Peru bidxélacabe ra bilácabe. ¿Ximodo bíʼnicabe ni yaʼ?

Ra bíʼnicabe ni ná ca ley stiʼ Dios gupa ni laacabe de ca guendanagana ni gudiʼdiʼ ca binni ni qué nuzuubaʼ stiidxaʼ Jehová. Cumu biʼniʼ crécabe zeeda Reinu stiʼ Dios la? gucané ni laacabe gudxiilúcabe ca guendanagana jma nadipaʼ ni gúpacabe. Ne bidii Dios stipa laacabe para guni huantárcabe (2 Corintios 4:7-9).

¿ÑEE ZUYÚBILUʼ REINU STIʼ DIOS PRIMÉ LU XQUENDANABÁNILUʼ LA?

Ca xpinni Cristu ni bibani lu primé siglu, yenándacaʼ mandatu bidii Jesús laacaʼ de guyúbicaʼ Reinu stiʼ Dios primeru. Ngue runi, biʼniʼ predicárcabe ca noticia galán stiʼ Reinu guidxi ra nabézacabe (Colosenses 1:23). Yanna, tiempu riʼ, ¿ñee nuu tuu laa cayuni dxiiñaʼ riʼ la?

¡Nuu pue! Nanna ca testigu stiʼ Jehová maʼ cadi candaa zunitilú Reinu stiʼ Dios guiráʼ ca cosa malu nuu lu Guidxilayú riʼ. Nga runi, né stale gana rúnicaʼ ni guníʼ Jesús: «Zaca predicar ca noticia galán stiʼ Reinu lu guidubi guidxilayú para gunadiaga guiráʼ xixé guidxi ni, ne oraqueruʼ nga gueeda fin» (Mateo 24:14).

¿Xi zúniluʼ ora gunadiágaluʼ ca noticia galán riʼ yaʼ? Riguʼdu gana lii chinándaluʼ ejemplu stiʼ ca binni ni bibani lu primé siglu ni guyuu ndaaniʼ guidxi Berea, Macedonia. Ora binadiágacabe ca noticia galán stiʼ Reinu ni canayuni predicar apóstol Pablo, gucuaacabe «stiidxaʼ Dios né stale gana», biindaʼ chaahuicabe ni para gúʼyacabe pa dxandíʼ ni binadiágacabe ne bíʼnicabe ni biziidicabe (Hechos 17:11, 12).

Lii laaca zanda gúniluʼ ni bíʼnicabe. Pa guyúbiluʼ Reinu ne justicia stiʼ Dios, zadxélaluʼ ti lugar ra guilaluʼ tiempu riʼ, ne lu ca dxi ni zeeda ca, zápaluʼ guendariuudxi ne maʼ qué ziuu tu guchibi lii.