Biiyaʼ guiraʼ ni nuu lu sitiu riʼ

guyé lu índice

Xiñee risácaruʼ xquendanabániluʼ

Xiñee risácaruʼ xquendanabániluʼ

Faizal, ti iza despué de guti xheelaʼ biʼniʼ operárcabe laa de corazón, ti operación nabé nagana. Sicaríʼ guníʼ hombre riʼ: «Ora ruundaʼ libru stiʼ Job, rudieeʼ cuenta nuu xi pur bicaa Jiobá ni bizaacabe lu Biblia. Guizáʼ ratadxí ladxidoʼloʼ ora ruundaluʼ gudiʼdiʼ ti binni ni ruzeeteʼ Biblia nipeʼ cadíʼdiluʼ». Ne laaca bizeeteʼ: «Risácaruʼ xquendanabaneʼ».

Tarsha, gutiʼ jñaabe dxi nácabe ti baʼdudxaapaʼ. Sicaríʼ guniʼbe: «Ra gunibiaʼnu Creador stinu racané ni gapa xquendanabáninu sentidu. Rápanu esperanza ne riuʼnu nayecheʼ neca guidxaagalunu guendanagana. Napa Jiobá stale poder para gacané ne cuʼ gana laanu guiráʼ dxi».

CASI bidúʼyanu lu ca artículo gudiʼdiʼ que despué de gapa tuuxa ti problema ni runi traumar laa la? zándaca gaca nagana para laa gudxiilú guendanabani. Ne zándaca nagasi cadíʼdiluʼ lu ti guendanagana ne caníʼ íqueluʼ maʼ qué risaca xquendanabániluʼ o guirutiʼ rizaalaʼdxiʼ lii. Peru zanda chuʼluʼ seguru racaná Dios ora ruuyaʼ cayacanaluʼ. Risácaluʼ stale para laabe.

Gupa hombre bicaa Salmo capítulo 86 confianza Dios, ngue runi gúdxibe laa ca diidxaʼ riʼ: «Rucaariʼdxeʼ lii dxi cadideʼ lu guendanagana, purtiʼ zacábiluʼ naa» (Salmo 86:7). Peru, zándaca riníʼ íqueluʼ: «¿Ximodo ricabi Dios ca oración stinu ora nuunu xizaa yaʼ?».

Neca qué guni chaahuiʼ Dios guiráʼ ca problema stinu la? cayuni prometerbe laanu zaguixhedxibe ladxidoʼno para gudxíʼlunu cani. Stiidxabe, Biblia, ná: «Cadi chuʼ tu xizaa de gastiʼ, sínuque lainíʼ né Dios. Lainaba laa irá ni caquiiñe tu, ne laudii diuxquixe laa. Ne óraque zaguixhe dxí ladxidóʼ to dede iruti zanda guiene ximodo ni. Ma qué zadxibi ladxidóʼ to, ne zata dxí xquenda biaani tu» (Filipenses 4:6, 7). Ora guʼndaʼ chaahuiluʼ ca textu zeeda lu Biblia riʼ la? zudiiluʼ cuenta pabiáʼ rizaalaʼdxiʼ Dios lii.

Rizaalaʼdxiʼ Dios lii

Qué rusiaandaʼ Dios nin ti gorrión «ne laatu la? jma risaca tu que stale mani huiiniʼ» (Lucas 12:6, 7).

GUNÍʼ IQUE NDIʼ: Risaca ti gorrión ni jma nahuiiniʼ nezalú Dios. Peru jma risaca binni guidxilayú que ca gorrión ca para Dios. Ne de lade guiráʼ ni maʼ bizaʼbe, laanu nga ni jma risaca purtiʼ guyanu casi laabe ne zanda guni cultivarnu ne gusihuínninu ca cualidad galán ni nápabe (Génesis 1:26, 27).

«Jiobá, lii maʼ biʼniʼ examinar chaahuiluʼ naa, ne maʼ runibiaʼluʼ naa. Nánnaluʼ xi caníʼ iqueʼ. Biiyaʼ chaahuiʼ naa, biiyaʼ chaahuiʼ xi ruchiiñaʼ xquendabiaaneʼ» (Salmo 139:1, 2, 23).

GUNÍʼ IQUE NDIʼ: Runibiáʼ chaahuiʼ Dios lii. Nánnabe xi runi sentirluʼ ne xi preocupación nápaluʼ ndaaniʼ ladxidoʼloʼ. Neca qué guiene xcaadxi binni pabiáʼ cayacanaluʼ la? rizaalaʼdxiʼ Dios lii ne racalaʼdxiʼ gacané lii. Nga runi risácaruʼ xquendanabániluʼ.

 Napa xquendanabániluʼ sentidu

«Jiobá, bicaadiaga oración stinneʼ; bidii lugar chindá ridxi stinneʼ dede ra nuuluʼ ora guinabaʼ lii gacaneluʼ naa. [...] Gundeteʼ ique para gunadiágaluʼ naa; bicabi naa nagueenda ora guinieniáʼ lii». Zucaadiaga Jiobá «oración stiʼ ca ni qué gapa tu gacané laa» (Salmo 102:1, 2, 17).

GUNÍʼ IQUE NDIʼ: Casi xa ñaca cucaa Dios lu ti guiʼchiʼ tu guiráʼ maʼ biinaʼ dede dxi bizulú cadale binni ndaaniʼ Guidxilayú riʼ (Salmo 56:8). Ne lade ca binni ni maʼ biinaʼ ca nuuluʼ. Ne qué ziaandaʼ laabe guiráʼ ca guendanagana maʼ gudíʼdiluʼ ne pabiáʼ maʼ biinaluʼ purtiʼ para laabe guizáʼ risácaluʼ.

«Cadi chuʼluʼ xizaa, purtiʼ naa nga Dios stiluʼ. Zudieeʼ stipa lii, ya, zacaniáʼ lii. [...] Jiobá Dios stiluʼ [...] cayabi lii: “Cadi guidxíbiluʼ. Naa zacaniáʼ lii”» (Isaías 41:10, 13).

GUNÍʼ IQUE NDIʼ: Racalaʼdxiʼ Dios gacané lii. Pa guiábaluʼ la? zandísabe lii.

Zabáninu jma galán despué

«Purti nadxii xhaata Dios binni guidxilayú ngue runi bidii tobi lucha Xiiñiʼ, ti irá tu guni cre Xiiñi be que la? cadi initilú sínuque gapa enda nabani ni qué zaluxe» (Juan 3:16).

GUNÍʼ IQUE NDIʼ: Tantu nadxii Dios lii dede guyuu dispuestu gudii xquendanabani Jesús, Xiiñiʼ, casi sacrificiu pur lii. Ne pur sacrificiu riʼ zanda gapa xquendanabániluʼ sentidu ne guibániluʼ nayecheʼ para siempre. *

Neca nuuluʼ xizaa ne guiníʼ íqueluʼ maʼ qué zanda guni huantarluʼ la? gulee tiempu para guni estudiarluʼ Biblia ne gupa fe zuni cumplir Dios guiráʼ ni maʼ biʼniʼ prometer. Nga zacané lii chuʼluʼ nayecheʼ ne zacané lii gudiiluʼ cuenta risácaruʼ xquendanabániluʼ.

^ párrafo 19 Pa racaláʼdxiluʼ gánnaluʼ jma de ca beneficiu rápanu pur sacrificiu biʼniʼ Jesús, biiyaʼ videu ni láʼ Guietenaláʼdxinu guendaguti stiʼ Jesús, nuu ni lu jw.org. Guyé ra ná LIBRU NE REVISTA > VIDEU > REUNIÓN NE PREDICACIÓN.