Biiyaʼ guiraʼ ni nuu lu sitiu riʼ

guyé lu índice

¿Ximodo naca Dios?

¿Ximodo naca Dios?

Para gaca xhamígunu ti binni primeru naquiiñeʼ gánnanu ximodo laabe. Zacaca rizaaca né Dios, para gaca xhamígunu laabe naquiiñeʼ gunibiaʼnu ca cualidad stibe. Ra jma gunibiaʼnu ca cualidad riʼ jma zadxíñanu gaxha de laabe. De lade guiráʼ ca cualidad galán napa Dios, nuu tapa de laaca ni jma rihuinni: poder, guendanuuxpiaaniʼ, guendaruni jneza ne guendarannaxhii.

NAPA DIOS PODER

«¡Ay, Jiobá, Señor ni jma nandxóʼ! Liipeʼ nga bizaʼluʼ guibáʼ ne guidxilayú pur poder stiluʼ» (JEREMÍAS 32:17).

Guiráʼ ni bizáʼ Dios rusihuinni ni poder stibe. Guzéʼtenu ti ejemplu, ¿xi rizaaca ora guireʼnu lu gubidxa ti dxi nandáʼ? Cadi dxandíʼ runi sentirnu ruzaaquiʼ ni ládinu la? calor ni runi sentirnu ca rusihuinni ni pabiáʼ poder napa Jiobá. ¿Pabiáʼ stipa napa Gubidxa ca yaʼ? Nandáʼ núcleo stini biaʼ 15.000.000 °C (27.000.000 °F). Cada segundu rundaa Gubidxa ca energía ni zeeda gaca biaʼ energía stiʼ stale gayuaa millón de bomba nuclear.

Peru pa guchaaganu Gubidxa ca né ca estrella ni nuu lu guidubi universu nuu de laaca ni jma naroʼbaʼ que Gubidxa. Ca científicu nacaʼ, zándaca estrella ni láʼ UY Scuti nga tobi de ca estrella ni jma naroʼbaʼ nuu lu universu ni runibiáʼ binni, naroʼbaʼ ni ti mil gadxe gayuaa biaje jma que Gubidxa. Pa ñuu estrella riʼ lugar stiʼ Gubidxa la? ñabi ni Guidxilayú riʼ ne nidiʼdiʼ ni dede lu órbita stiʼ Júpiter.  Ra gánnanu ndiʼ racané ni laanu guiénenu xiñee guníʼ Jeremías pur poder stiʼ Jiobá biʼniʼ guibáʼ ne Guidxilayú.

¿Ximodo racané poder stiʼ Dios laanu? Qué zanda diʼ guibáninu sin guiráʼ ni bizáʼ Dios, casi Gubidxa ne guiráʼ recursu natural stiʼ Guidxilayú. Ne cadi ngasi, Dios laaca riquiiñeʼ poder stiʼ para gacané cada tobi de laanu. ¿Ximodo yaʼ? Lu primé siglu que bidii Jiobá poder Jesús para guni milagru. Biblia ná: «Maʼ ruuyaʼ ca ciegu, maʼ rizá ca ni nachiitaʼ ñee, maʼ bianda ca ni napa lepra, maʼ runadiaga ca diagacuaataʼ, maʼ bibani ca ni maʼ guti» (Mateo 11:5TNM). ¿Ca dxi stinu riʼ yaʼ? Biblia ná: «Rudiibe poder tuuxa ni maʼ bidxaga». Ne laaca ná ni: «Cani cabeza gacané Jiobá laacaʼ la? zabiguetaʼ stipa sticaʼ» (Isaías 40:29, 31). Laaca zanda gudii Dios laanu poder para gudxíʼlunu ca guendanagana ridídinu o para guni huantarnu cani (2 Corintios 4:7). ¿Cadi dxandíʼ runi sentirluʼ nuuluʼ jma gaxha de Dios ora gánnaluʼ pabiáʼ nadxiibe laanu ne riquiiñebe poder stibe para gacanebe laanu la?

GUIZÁʼ NUU XPIAANIʼ DIOS

«Pabiáʼ stale nga cani maʼ bíʼniluʼ Jiobá. Né guendabiaaniʼ nga bíʼniluʼ de guiráʼ ni» (SALMO 104:24).

Ra jma guizíʼdinu de guiráʼ ni bizáʼ Dios, jma zadxagayaanu pabiáʼ nuu xpiaanibe. Dede nuu ti materia stiʼ ciencia ni láʼ biomimética luni runi estudiar ca científicu guiráʼ ni bizáʼ Jiobá ne runi copiárcabe cani para guni chaahuicabe xiixa cosa bizáʼcabe. Runi copiárcabe sistema stiʼ ca cosa riʼ dede para gúnicabe ti velcro hasta ti avión.

Bizalú binni nga tobi de ca cosa jma sicarú ni bizáʼ Dios.

Peru gastiʼ sti cosa ni jma rusihuinni pabiáʼ nuu xpiaaniʼ Dios que modo bizaʼbe cuerpu stiʼ binni. Guiníʼ íquenu de ximodo raca formar ti baʼduhuiiniʼ. Ruzulú procesu riʼ né ti célula ni maʼ guca fecundar ra zeeda información genética stiʼ baʼduhuiiniʼ ca. Raca dividir célula riʼ stale parte igual. Peru redandá ti hora ruzulú ruchaa ca célula riʼ ne raca cani stale tipu de célula casi ca célula ni nuu lu rini, lu ca nerviu ne lu dxita ládinu. Ne despué riáʼ ca órganu ne ruzulú runi cani dxiiñaʼ. Gaʼ beeu despué, primé célula riʼ reeda gaca ni ti baʼduhuiiniʼ ni napa mil de millón de célula. Ora guidúʼyanu pabiáʼ jneza modo guyanu, stale tu laa riníʼ casi guníʼ ti hombre bicaa Biblia: «Zaguaaʼ naróʼ stiluʼ purtiʼ ridxagayaaʼ modo bizaʼluʼ naa dede ruchíbini naa» (Salmo 139:14).

¿Ximodo racané guendanuuxpiaaniʼ stiʼ Dios laanu yaʼ? Nanna Dios ni bizáʼ laanu xi caquiiñenu para chuʼnu nayecheʼ. Cumu guizáʼ nuu xpiaanibe la? zanda gudiibe laanu conseju galán lu Stiidxabe, Biblia. Guzéʼtenu ti ejemplu, laabe cayábibe laanu: «Laguni perdonar ni guni stobi laatu» (Colosenses 3:13). ¿Ñee biaʼsi conseju riʼ la? Biaʼsi pue. Ca investigador maʼ bidiicaʼ cuenta, ora runi perdonar ti binni racané ni para gasiʼ jma galán ne huaxiéʼ raca huará de presión arterial. Laaca racané ni para cadi gapa binni depresión ne xcaadxi guendahuará. Naca Dios casi ti xhamígunu ni nuu xpiaaniʼ ni rizaalaʼdxiʼ laanu ne qué rusaana de gudii conseju galán laanu (2 Timoteo 3:16, 17). ¿Ñuuláʼdxiluʼ ñápaluʼ ti xhamíguluʼ zacá la?

 RUNI DIOS NI JNEZA

«Nadxii Jiobá guendaruni jneza» (SALMO 37:28).

Qué rusaana Dios de guni ni jneza. Ne qué ziuu dxi gúnibe xiixa cosa malu (Job 34:10). Ne ora guni juzgarbe la? rúnibe ni jneza, zacá guníʼ ti hombre bicaa Salmo: «Zuni juzgarluʼ ca guidxi ca jneza» (Salmo 67:4). Qué ruuyaʼ si Jiobá ni nuu ndaaniʼ ladxidoʼno, sínuque nánnabe ni dxandíʼ ne runi juzgarbe jneza (1 Samuel 16:7). Ne cadi ngasi, laaca ruuyaʼ Dios guiráʼ injusticia ne guiráʼ cosa ni qué raca jneza lu Guidxilayú riʼ, laabe maʼ biʼniʼ prometerbe zunitilube ca binni malu de lu guidxilayú (Proverbios 2:22).

Peru nga qué riníʼ naca Dios ti juez malu ni riuulaʼdxiʼ guni castigar binni. Ora caquiiñeʼ gúnibe ni la? rusihuínnibe misericordia. Biblia ná Jiobá «rilaselaʼdxiʼ binni, [...] ne nachaʼhuiʼ», dede né ca binni malu ni raca arrepentir de guidubi ladxidóʼ. ¿Ñee cadi zacá nga rihuinni rúnibe ni jneza la? (Salmo 103:8; 2 Pedro 3:9).

¿Ximodo racané guendaruni jneza stiʼ Dios laanu? Apóstol Pedro guníʼ: «Biaʼca risaca irá binni nezalú Dios. Tutiica idxibi laabe ne guni jneza, runi xiiñi be laa, gasti naca xi raza laa» (Hechos 10:34, 35). Cumu qué riuu Dios pur caadxi si binni la? guiranu ribeendunu ni galán purtiʼ rúnibe ni jneza. Gastiʼ naca xi raza laanu, xi guidxi nabézanu, pa nápanu bueltu o pa coʼ, rudiibe lugar guni adorardu laabe.

Cumu biaʼca risácanu nezalú Dios la? zanda gudiibe laanu stale ndaayaʼ gastiʼ naca pa nápanu bueltu o pa coʼ, pa de gadxé raza o de gadxé guidxi laanu.

Dios ni bizáʼ laanu racaláʼdxibe chinándanu ejemplu stibe ne gúninu ni jneza ti ganda cueendunu ni galán, nga runi bidiibe laanu ti conciencia. Stiidxaʼ Dios ná naca conciencia ca casi ti ley ni nuu ndaaniʼ ladxidoʼno ne racané ni laanu gánnanu pa cayúninu ni jneza o pa coʼ (Romanos 2:15). ¿Ximodo racané ndiʼ laanu yaʼ? Pa gusíʼdinu conciencia stinu guni ni jneza zacané ni laanu para cadi gúninu xiixa cosa malu ni guniná laanu. Ne pa gucheʼnu, zanda gucaa ni laanu gaca arrepentirnu ne gusaana de gúninu xiixa cosa malu. Pa guiénenu  modo runi Dios ni jneza zacané ni laanu ne zuchiña ni laanu gaxha de laabe.

NACA DIOS GUENDARANNAXHII

«Dios nga guendarannaxhii» (1 JUAN 4:8, TNM).

Qué riníʼ diʼ Biblia naca Dios poder, guendanuuxpiaaniʼ o nácabe ni jneza. Peru Biblia ná naca Dios guendarannaxhii. ¿Xiñee yaʼ? Purtiʼ neca pur poder stibe zanda gúnibe xiixa, ne gusihuínnibe nuu xpiaanibe ne jneza guiráʼ ni rúnibe, peru ni rucaa laabe gúnibe ni nga guendarannaxhii.

Neca cadi caquiiñeʼ Jiobá xiixa nin guirutiʼ, peru guendarannaxhii stibe bicaa ni laabe guzaʼbe ca ángel para chuʼcaʼ guibáʼ ne binni para guibani lu Guidxilayú para gápabe ne gannaxhiibe laacaʼ. Sin cuézabe guicaabe xiixa, bíʼnibe ti lugar galán para guibani binni ne laani nga Guidxilayú. Ne dede yanna rusihuinni Jiobá guendarannaxhii stiʼ pur binni, purtiʼ «rudii lugar guzaani gubidxa sti ra nuu cani nachaʼhui ne ra nuu cani nadxabaʼ, ne rusaba nisa guie ra nuu cani runi ni na, ne ra nuu cani qué runi ni na» (Mateo 5:45).

Ne laaca nabé «nadxii Jiobá binni ne [...] riá laacabe» (Santiago 5:11TNM). Rusihuínnibe guendarannaxhii stibe ca binni ni dxandíʼ runi stipa pur gunibiáʼ laabe ne guidxiña gaxha de laabe. Runibiáʼ Dios cada tobi de laanu, ne «gaxha doʼ nuu be de cada tobi de laanu» (Hechos 17:27).

¿Ximodo racané guendarannaxhii stiʼ Dios laanu yaʼ? Rusihuinni Dios nadxii laanu de stale modo, guzéʼtenu caadxi ejemplu, casi ora gúʼyanu cuxidxi ti baʼduhuiiniʼ, guni sentirnu guendarannaxhii stiʼ familia stinu, ora guiaaziʼ Gubidxa... Dxandíʼ, zándaca cadi tan caquiiñenu ni para guibáninu, peru guizáʼ rusiecheʼ cani laanu.

Sti modo rusihuinni Dios nadxii laanu nga purtiʼ bidiibe laanu ti modo guinínenu laabe ne laani nga: oración. Biblia cayabi laanu: «Cadi chuʼ tu xizaa de gastiʼ, sínuque lainíʼ né Dios. Lainaba laa irá ni caquiiñe tu, ne laudii diuxquixe laa». Racalaʼdxiʼ Bixhózenu Jiobá ni nadxii laanu gábinu laa xi guiráʼ riguu xizaa laanu. Pa gúninu ni la? laabe cayuni prometerbe laanu zaguixhedxibe ladxidoʼno «dede iruti zanda guiene ximodo ni» (Filipenses 4:6, 7).

Lu artículo riʼ, maʼ bizéʼtenu ca cualidad ni jma rihuinni stiʼ Dios: poder, guendanuuxpiaaniʼ, guendaruni jneza ne guendarannaxhii. Yanna runi invitardu lii gúʼndaluʼ jma ti gánnaluʼ xi maʼ biʼniʼ Dios pur lii ne xi chigúnibe.

¿XIMODO NACA DIOS? Gástiruʼ stobi ni jma napa poder, ni nuu xpiaaniʼ, ne ni runi jneza que Jiobá. Peru cualidad stibe ni jma rihuinni nga guendarannaxhii.