Biiyaʼ guiraʼ ni nuu lu sitiu riʼ

guyé lu índice

¿Tu lá Dios?

¿Tu lá Dios?

Zándaca primé ni rinabadiidxanu ti binni ora racaláʼdxinu gunibiaʼnu laa nga: «¿Tu laluʼ?». Pa ninabadiidxanu nga Dios, ¿xi nicábibe laanu yaʼ?

«Naa nga Jiobá. Nga nga laʼyaʼ» (Isaías 42:8).

¿Ñee huayunadiágaluʼ lá ca la? Zándaca coʼ, purtiʼ stale traductor stiʼ Biblia huaxiéʼ riquiiñeʼ ni, ne nuu tu laa qué licapeʼ rucaa ni. Stale biaje ruchaacabe ni pur SEÑOR. Peru lu ca manuscritu yooxhoʼ stiʼ Biblia ni gucuá lu ca diidxaʼ guníʼcabe dxiqué, zeeda lá Dios jma de gadxe mil biaje. Lu diidxaʼ hebreu ricá ni né tapa letra YHWH o JHVH, ne lu diidxastiá huayaca traducir ni casi «Jehová».

Zeeda lá Dios lu ca documentu stiʼ Biblia ni gucuá lu diidxaʼ hebreu ne lu xcaadxi traducción.

Rollo ni bidxela gaxha de mar Muerto stiʼ libru de Salmos (primé siglu d. j., HEBREU)

Traducción stiʼ Tyndale (1530, INGLÉS)

Versión Reina-Valera (1602, DIIDXASTIÁ)

Union Version (1919, CHINU)

XIÑEE RISACA LÁ DIOS

Risaca ni para Dios. Guirutiʼ qué nibí tu guiree lá Dios; laabe gulibe ni. Laapebe nabe: «Ndiʼ nga laʼyaʼ ne qué ziuu dxi guiaandaʼ ni, qué ziuu dxi gusaana de gusisácacabe ni» (Éxodo 3:15). Lu Biblia, jma stale biaje zeeda lá Dios que xcaadxi título casi Todopoderoso, Padre, Señor o Dios ne jma zeeda labe que lá xcaadxi binni casi Abrahán, Moisés, David o Jesús. Racalaʼdxiʼ Jiobá gunibiaʼnu lá. Biblia ná: «Ti ganna binni laluʼ nga Jiobá, lii si nga ni nuu jma luguiáʼ lu guidubi naca guidxilayú» (Salmo 83:18).

Risaca ni para Jesús. Lu oración ni runibiáʼcabe casi padrenuestro, bisiidiʼ Jesús ca xpinni guni orarcaʼ sicaríʼ: «Gaca santificar laluʼ» (Mateo 6:9TNM). Ne laaca guníʼ Jesús lu ti oración: «Bixhozeʼ, bisisaca lá lu jma» (Juan 12:28) Ni jma biyubi Jesús nga guisaca lá Dios. Ngue runi guniʼbe: «Maʼ bisiideʼ laacabe tu laluʼ, ne zusiideruaʼ ni» (Juan 17:26TNM).

Risaca ni para cani runibiáʼ Dios. Ca xpinni Dios ni bibani dxiqué gúnnacaʼ pur ni riníʼ lá Dios zanda gápabe ne gulabe laacaʼ. Tobi de laacabe guníʼ: «Lá Jiobá zeeda gaca casi ti torre nadipaʼ. Ra nuu ni ruxooñeʼ binni nachaʼhuiʼ para guilá». Ne stobi guníʼ: «Guiráʼ cani guiníʼ lá Jiobá ora guinábacaʼ laabe gacanebe laacaʼ, zalacaʼ» (Proverbios 18:10; Joel 2:32). Biblia laaca rusiene zanna binni tuu  nga ca xpinni Dios pur lá. «Guiráʼ ca guidxi ca la? cada tobi zazá lu lá dios stiʼ; peru laadu la? qué ziuu dxi gusaanadu de sadu lu lá Jiobá, Dios stidu» (Miqueas 4:5; Hechos 15:14).

XI RUSIIDIʼ LÁ DIOS LII

Rusihuinni ni gástiruʼ stobi casi Dios. Stale expertu ná, lá Jiobá riníʼ ni «Laabe nga ni runi ni gueeda gaca». Modo guníʼ Jiobá de laa ora guniʼné Moisés racané ni laanu guiénenu xi raca significar labe. Dios guníʼ: «Naa zeeda gacaʼ ni cueʼ gacaʼ» (Éxodo 3:14). Nga runi labe rusiidiʼ ni laanu, laabe nga bizaʼbe guirá ni nuu, ne pur laabe nga nuu guiráʼ cosa. Laaca rusiidiʼ ni laanu zanda gueeda gácabe intiica ni caquiiñeʼ o iquiiñebe guiráʼ ni bizaʼbe para guni cumplirbe propósitu stibe. Ca lá rudiicabe laabe rusihuinni cani pabiáʼ poder nápabe, risácabe stale, peru lá si Jiobá ca, rusihuinni ni tupeʼ nga laabe ne xi zanda gúnibe.

Rusihuinni ni rizaalaʼdxiʼ Dios cada tobi de laanu. Ni raca significar lá Dios rusihuinni ni pabiáʼ nadxiibe guiráʼ ni bizaʼbe, dede né laanu. Cumu maʼ gúdxibe laanu tu labe la? nga rusihuinni racaláʼdxibe gunibiaʼnu laabe. Ante guinabadiidxanu tu labe, mápeca gúdxibe ni laanu. Qué racalaʼdxiʼ Dios guiníʼ íquenu cadi dxandíʼ nuu o zitu nuu de laanu, sínuque dxandíʼ nabánibe ne nuube gaxha de laanu ne zanda guidxíñanu laabe (Salmo 73:28).

Ora iquiiñenu labe, rusihuínninu racaláʼdxinu gunibiaʼnu laabe. Bixuiʼlú racaláʼdxiluʼ gaca xhamíguluʼ tuuxa ne rábiluʼ laabe guiniʼbe laluʼ ora guiníʼnebe lii. ¿Ximodo ñuni sentirluʼ pa qué ninabe niniʼbe laluʼ yaʼ? Zándaca niníʼ íqueluʼ qué racaláʼdxibe gaca xhamígube lii. Zacaca nga rizaaca né Jiobá. Laabe racaláʼdxibe iquiiñenu labe purtiʼ maʼ gúdxibe laanu tu labe. Ora rininu ni, rusihuínninu racaláʼdxinu guidxíñanu laabe. Biblia ruzeeteʼ nanna Dios tuu nga ca binni riníʼ ique lu labe (Malaquías 3:16).

Para guzulú gunibiaʼnu Dios, nabé risaca gánnanu tu labe. Peru cadi ngasi nga laani. Caquiiñeʼ gunibiaʼnu ximódopeʼ laabe.

¿TU LÁʼ DIOS? Jiobá nga lá Dios. Ne labe ca riníʼ ni laasibe zanda guni cumplirbe guiráʼ ni maʼ gudixhe íquebe.