Biiyaʼ guiraʼ ni nuu lu sitiu riʼ

guyé lu índice

Qué ziuu dxi gusaana de gacané Biblia laanu

Qué ziuu dxi gusaana de gacané Biblia laanu

BIXUILÚ canazaluʼ ndaaniʼ ti museu ne cayuuyaluʼ guiráʼ ca monumentu nuu raqué. Casi guiráʼ cani maʼ nade huecu, maʼ nayooxhoʼ ne maʼ cayaya cani, ne nuu de laacani cayaadxaʼ ti ndaa. Peru nuu tobi ni rihuinni nazaaca. Ne guizáʼ galán diseñu stini. Óraque rinabadiidxaluʼ guía que, «¿ñee laani nga ni jma nacubi lade guiráʼ ca monumentu nuu raríʼ la?». Laabe ricábibe lii, «coʼ, laani nga tobi de cani jma nayooxhoʼ ne qué huayuni chaahuicabe ni». Biguetaʼ gunabadiidxaluʼ laabe, «¿ñee guluu chaahuitu ni paxaraa la?». Para gúdxibe lii, «coʼ, laani nga ni huayuni huantar stale cosa, huagaani nisaguié, bi yooxhoʼ, ne huayacalaʼdxiʼ binni cuanaʼ ni». Óraque zándaca guiníʼ íqueluʼ: «Peru ¿xidé guyáʼ ni yaʼ?».

Zanda guininu zeeda gaca Biblia casi monumentu galán riʼ. Laani nga libru ni jma nayooxhoʼ lade guiráʼ ca libru ni nuu. Dxandíʼ nga nuu stale libru maʼ nayooxhoʼ, peru ra zidiʼdiʼ iza ziyaca feu cani casi ca monumentu ni maʼ nade huecu ne maʼ cayaya stubi. Ca tema científicu ni riete lu ca libru riʼ maʼ qué riquiiñeʼ binni cani ne cumu maʼ biʼniʼ investigarcabe cani la? yanna riʼ riquiiñecabe ca conocimientu jma nacubi stiʼ ca tema científicu riʼ. Ni rusiidiʼ ca libru riʼ de medicina, maʼ qué riquiiñeʼ binni cani purtiʼ lugar de gacané cani zándaca guniná cani binni. Ne stale de ca libru yooxhoʼ riʼ maʼ ti ndaa si cani riaana, purtiʼ maʼ huaniti stale pedazu de laacani o maʼ cayaya cani.

Peru maʼ gadxé nga Biblia de ca libru riʼ. Neca maʼ raca jma de chonna mil gaayuʼ gayuaa iza de gucuá ni, peru de yanna racaneruʼ ni binni. Maʼ raca stale iza huayúbicabe modo gunitilúcabe ni, dede guyuu ora bizaaquicabe ni, huaníʼcabe mal de laani ne huayuni prohibírcabe ni, neca zacá qué huabeendúcabe gastiʼ. Zaa maʼ xadxí de gucuá Biblia, ne neca maʼ nuu stale conocimientu nacubi, cani zeeda luni rusihuinni cani maca dede ante bizeeteʼ ni cosa ni qué ñanna binni  dxiqué (biiyaʼ recuadru ni láʼ «¿Ñee maʼ nayooxhopeʼ Biblia la? o zándaruʼ gacané ni laanu yanna?»).

CA PRINCIPIU NI CAQUIIÑENU YANNA RIʼ

Neca zacá, zándaca guinabadiidxaluʼ laaca lii: «¿Ñee dxandíʼ zándaruʼ gacané ca conseju zeeda lu Biblia laanu la?». Para guidxélaluʼ respuesta riʼ, guníʼ ique guiráʼ ca guendanagana ridxaagalú binni guidxilayú. ¿Gunáʼ de laacani nga ni jma ruchibi laanu yaʼ? Zándaca guiníʼ íqueluʼ guerra, contaminación, guendaquéiquiiñeʼ o corrupción. Yanna bindaa chaahuiʼ cani rusiidiʼ Biblia, ne ora gúniluʼ ni, gunabadiidxaʼ laaca lii: «¿Ñee rábiluʼ nibani binni guidxilayú jma galán pa guiranu ninándanu ca principiu zeeda lu Biblia la?».

GÁCANU BINNI NADÓʼ

«Dichoso ni riguixhe dxí enda ridínde, purti runi xiiñi Dios laa» (Mateo 5:9). «Laguni biaʼ ganda para cadi chuʼ dinde né tu irutiʼ. Zaa guni cabe ni laacabe peru cadi né rusi ca laatu» (Romanos 12:18).

GUIANU BINNI NE GUNI PERDONARNU

«Dichoso ni riá stobi, purti laca ziá Dios laa» (Mateo 5:7). «Cadi gusaana de guni huantarsaatu, ne laguni perdonar de guidubi ladxidoʼto pa tuuxa napa xiixa queja né laatu. Cásica biʼniʼ perdonar Jiobá * guiráʼ xixetu, zacaca laguni» (Colosenses 3:13TNM).

CHUʼNU TOBI SI NE CA BINNI DE GADXÉ GADXÉ RAZA

«De ti binni si ulee [Dios] binni de irá raza ni nuu ndaani guidxilayú, ne gudixhe be pabiáʼ indaa cada raza ne paraa cueza caʼ» (Hechos 17:26). «Biaʼca risaca irá binni nezalú Dios. Tutiica idxibi laabe ne guni jneza, runi xiiñi be laa, gasti naca xi raza laa» (Hechos 10:34, 35).

GÁPANU GUIDXILAYÚ STINU

«Ne guluu Jiobá Dios hombre que ndaaniʼ jardín de Edén para guni dxiiñaʼ ndaaniʼ ni ne gapa ni» (Génesis 2:15). «Ne zunitilú [Dios] cani binitilú guidxilayú» (Revelación [Apocalipsis] 11:18).

CADI GACHELUNU GÁPANU BUELTU NE GACANANALÁʼDXINU INMORALIDAD SEXUAL

«Laguuya gá laatu ne enda ruyubi gapa bidxichi, purti cadi nga si nga enda nabani sti binni» (Lucas 12:15). «Yáquexa ma xpinni Dios laatu la? ma cadi lica guiete enda rapa jnadxii lade tu, nin guni tu gasti ru ni nadxabaʼ, nin uyubi tu gapa tu xiixa para laasi tu» (Efesios 5:3).

GÁCANU HONRADU NE GÚNINU DXIIÑAʼ JNEZA

«Ne ni racalaʼdxi du nga irá ni guni du, guni du jneza» (Hebreos 13:18). «Ni uca gubaana la? ma cadi cuanaʼ, sínuque ma iquiiñe ná para guni dxiiña jneza» (Efesios 4:28).

GACANENU CANI CAQUIIÑEʼ NI

«[Laquixhedxí ladxidóʼ cani nuu triste], ne cani caʼru uzuhuaa chaahui, ne cadi ixhacalaʼdxi tu laacaʼ» (1 Tesalonicenses 5:14). Caquiiñeʼ «acané nu ca [huérfanu] ne ca viuda ni cadiʼdi ra nagana» (Santiago 1:27).

Cadi cayabi si Biblia laanu xi gúninu, sínuque rusiidiʼ ni laanu pabiáʼ risaca chinándanu ca principiu riʼ lu xquendanabáninu. Pa ninanda guiráʼ binni ca principiu riʼ lu xquendanabani, ¿cadi rábiluʼ ñacané ni para ñaca chaahuiʼ guiráʼ ca guendanagana nuu lu guidxilayú riʼ la? Ni dxandíʼ nga yanna peʼ nga jma caquiiñenu ca conseju zeeda lu Biblia. Peru ¿ximodo zanda gacané Biblia lii yaʼ?

 ¿XIMODO ZANDA GACANÉ BIBLIA LII TIEMPU NÁBANINU RIʼ YAʼ?

Hombre ni jma nuu xpiaaniʼ guyuu ndaaniʼ Guidxilayú riʼ guníʼ: «Pur ni runi binni rihuinni tu laa» (Mateo 11:19). ¿Cadi dxandíʼ biaʼsi nga ni guniʼbe riʼ la? Para gánnanu pa zanda gacané ca conseju stiʼ Biblia laanu, caquiiñeʼ chinándanu cani ti óraca zadúʼyanu ximodo zacané cani laanu. Nga runi, zándaca guinabadiidxaluʼ laca lii: «Pa dxandíʼ racané ca conseju stiʼ Biblia binni, ¿cadi laaca zanda gacané ni naa la? ¿Ñee dxandipeʼ zanda gacané ni naa guneʼ chaahueʼ ca guendanagana napaʼ yanna riʼ la?». Guidúʼyanu ti ejemplu.

Gupa Diana * ti dxiiñaʼ galán ne nayecheʼ nabani, peru ni málasi nga bidxaagalube caadxi guendanagana: guti baʼdudxaapaʼ stibe, gulaa xquendaxheelabe ne biaanabe sin bueltu. Laabe guniʼbe: «Nabé guyuaaʼ triste, guti xiiñeʼ, gulaa xquendaxheelaʼ ne biniteʼ lidxeʼ. Biniteʼ guiráʼ ni: esperanza, stipa ne modo bibaneʼ dxiqué».

Pur guiráʼ ni bizaaca Diana, biiyabe dxandíʼ ni ná ca diidxaʼ riʼ: «Ca dxi biaʼ ridxiña ca iza stinu nga setenta iza; ne pa naguídxinu la? ochenta iza, peru puru si guendanagana ne yuubaʼ nga ca iza ca; ne nagueenda ridiʼdiʼ cani» (Salmo 90:10).

Para bidxiilú Diana ca guendanagana riʼ, bizulú biʼniʼ estudiar Biblia, ne guleendú stale cosa galán.  Lu guionnaʼ tema zeeda lu revista riʼ zazíʼdinu huabeendú stale binni cosa galán pur yenándacaʼ ca conseju zeeda lu Biblia lu xquendanabani. Maʼ bidiicabe cuenta zeeda gaca Biblia casi monumentu galán ni bizéʼtenu ra bizulú tema riʼ. Ne cadi naca ni casi ca libru yooxhoʼ ni maʼ bisaana binni de iquiiñeʼ. ¿Xiñee rábiluʼ naca Biblia ti libru gadxé de xcaadxi libru yaʼ? ¿Ñee rábiluʼ purtiʼ de Dios zeeda guiráʼ ni cá luni ne cadi stiidxaʼ binni ni la? (1 Tesalonicenses 2:13).

Zándaca guiníʼ íqueluʼ huaxiéʼ si iza ribani binni ne puru si guendanagana ne yuubaʼ ridxaagalú. ¿Tu ruyúbiluʼ para quixhedxí ladxidoʼloʼ, gacané ne gudii conseju lii ora ridxaagaluluʼ guendanagana yaʼ?

Guidúʼyanu chonna modo zanda gacané Biblia lii lu xquendanabániluʼ. Zanda gacané ni lii:

  1. Guni evitarluʼ guendanagana.

  2. Guni chaahuiluʼ xiixa guendanagana guidxaagaluluʼ.

  3. Guni huantarluʼ ca cosa ni qué zanda guchaaluʼ.

Ca tema ni zeeda lu revista riʼ zusiene cani guionna puntu riʼ.

^ párrafo 10 Biblia rusiidiʼ Jiobá nga láʼ Dios (Salmo 83:18).

^ párrafo 24 Lu ca tema riʼ bidxaa lá chupa chonna binni.