Biiyaʼ guiraʼ ni nuu lu sitiu riʼ

guyé lu índice

¿Ñee maʼ nayooxhopeʼ Biblia la? o zándaruʼ gacané ni laanu yanna?

¿Ñee maʼ nayooxhopeʼ Biblia la? o zándaruʼ gacané ni laanu yanna?

CIENCIA

CADI NACA BIBLIA TI LIBRU DE CIENCIA, PERU MACA DEDE ANTE BIZEETEʼ NI COSA NI QUÉ ÑANNA BINNI DXIQUÉ. GUIDÚʼYANU CAADXI EJEMPLU.

¿Ñee guyuu tu bizáʼ universu la?

Guyuu ti tiempu qué ñuni cré ca científicu ni jma nanna pa guyuu tu bizáʼ universu. Yanna, maʼ stale de laacaʼ runi crecaʼ ni. Biblia maca guníʼ guyuu tu bizáʼ ni (Génesis 1:1).

¿Xi forma napa Guidxilayú?

Stale binni bibani dxiqué guníʼ iquecaʼ planu Guidxilayú. Lu siglu gaayuʼ ante de ca dxi stiʼ Jesús, caadxi científicu griegu guniʼcaʼ esfera Guidxilayú riʼ. Peru maca de ante, lu siglu xhono ante de ca dxi stiʼ Jesús, ti hombre bicaa Biblia láʼ Isaías maca bizeeteʼ redondo Guidxilayú ra biquiiñeʼ ti diidxaʼ ni laaca zanda gaca traducir casi «esfera» (Isaías 40:22).

¿Ñee riuxe guiráʼ cani bizáʼ Dios guibáʼ la?

Aristóteles, ti científicu griegu ni bibani lu siglu tapa ante de ca dxi stiʼ Jesús bisiidiʼ guiráʼ cani nuu guibáʼ qué ruchaa cani ne qué raca dé cani, peru Guidxilayú riʼ riuxe. Stale gayuaa iza zacá biʼniʼ cré binni, peru lu siglu diecinueve ca científicu guleecaʼ ti concepto ni biree lá entropía, luni riete guiráʼ cosa ni nuu guibáʼ ne Guidxilayú riuxe cani. Tobi de ca científicu ni gucané guca concepto riʼ nga lord Kelvin, laa bidii cuenta xi rusiidiʼ Biblia de guibáʼ ne Guidxilayú: «cásica riuxe ti lari laacani laaca ziuxe cani» (Salmo 102:25, 26). Kelvin biʼniʼ cré ni zeeda lu Biblia ra ná zanda gucueeza Dios de guiuxe ne guinitilú guiráʼ ni bizáʼ (Eclesiastés 1:4).

¿Ñee nuu xi nuáʼ ca planeta ca la?

Aristóteles bisiidiʼ guiráʼ ni nuu guibáʼ nuucani ndaaniʼ caadxi esfera ni qué rihuinni, cada esfera nuu ndaaniʼ stobi jma naroʼbaʼ, ne galaa de laacani nuu Guidxilayú. Lu siglu dieciocho despué de ca dxi stiʼ Jesús, bizulú biʼniʼ cré ca científicu zándaca zaʼbiʼ ca planeta ca lu bi. Peru dede lu siglu quince ante de ca dxi stiʼ Jesús, maca gucuá lu Biblia, lu libru stiʼ Job, «gastiʼ naguu [Dios] para guaʼ guidxilayú» (Job 26:7).

 MEDICINA

CADI NACA BIBLIA TI LIBRU DE MEDICINA, PERU NAPA NI CAADXI PRINCIPIU NI CUSIENE XIMODO ZANDA CHUʼ BINNI NAZAACA NI QUÉ ÑANNA BINNI DXIQUÉ.

Chuʼ ti binni huará cuarentena

Ley ni gucuaa Moisés que ná naquiiñeʼ guixeleʼ cani huará de lepra de ca binni nazaacaʼ. Peru maʼ despué de bizulú ca epidemia lu Edad Media nga bizulú guluucabe binni cuarentena, ne de yanna runi binni ni (capítulo 13 ne 14 stiʼ Levítico).

Quiʼbiʼ ladi tuuxa despué de canaʼ ti gueʼtuʼ

Ra maʼ ziluxe siglu diecinueve, guti stale binni purtiʼ qué riguiibiʼ náʼ ca doctor ora cánacaʼ ti gueʼtuʼ ne despué gúʼyacaʼ ti paciente. Peru lu Ley ni gucuaa Moisés maca cá tu laa canaʼ ti gueʼtuʼ cadi naquiiñeʼ chuʼ lade binni ni cayuni adorar Dios. Ne laaca guníʼ ni naquiiñeʼ cheʼ binni ndaaniʼ templu que para guiaʼriʼ ladi ne nisa. Cani bíʼnicabe riʼ laaca gucané ni laacabe chuʼcabe nazaaca (Números 19:11, 19).

Gucaachicaʼ ni cuicaʼ ndaaniʼ yú

Guiráʼ iza, jma de galaa millón de xcuidi ráticaʼ de yuubaʼ ndaaniʼ, stale de laacaʼ purtiʼ qué rucaachi binni ni cuiʼ ndaaniʼ yú. Lu Ley ni gucuaa Moisés que ná naquiiñeʼ gucaachiʼ binni ni cuiʼ ndaaniʼ yú ne gaca ni zitu de ra nabeza binni (Deuteronomio 23:13).

Pora naquiiñeʼ gaca circuncidar binni

Ley stiʼ Dios que ná naquiiñeʼ gaca circuncidar ti baʼduhuiiniʼ lu xhono gubidxa de gule (Levítico 12:3). Nanene raca cuagular rini stiʼ ca baʼduhuiiniʼ lu primé semana galecaʼ. Tiempu bibani ca binni ruzeeteʼ Biblia, ante chuʼ ca tratamientu ni nuu yanna, cueza binni jma de ti semana para guni circuncidar ti baʼduhuiiniʼ gupa ni laacaʼ de guizaacacaʼ xiixa.

Ora chuʼ tobi nayecheʼ racané ni chuʼ nazaaca en sentidu físicu ne emocional

Ca doctor ni runi investigar ne ca científicu nacaʼ ora chuʼ tobi nayecheʼ, gapa esperanza, gudii xquíxepeʼ ne chuʼ listu para guni perdonar racané ni para chuʼ ti binni nazaaca. Biblia ná: «Ti ladxidóʼ nayecheʼ la? racané para guianda ra gucaná, peru ti binni nuu triste la? rirá stipa stiʼ» (Proverbios 17:22).