Biiyaʼ guiraʼ ni nuu lu sitiu riʼ

guyé lu índice

 TEMA STIʼ PORTADA

Xiñee gucaná ne guti Jesús

Xiñee gucaná ne guti Jesús

«Pur tobi hombre [Adán] biuu enda ruchee ndaani guidxilayú, ne guti be purti bichee be» (Romanos 5:12).

Ñuuláʼdxiluʼ nibániluʼ sin qué ñuu dxi ñátiluʼ la? Stale binni niníʼ ñuulaʼdxiʼ, peru para laacaʼ nagana ni. Nácabe guendaguti ca nga ra riluxe xquendanabani binni.

Laga pa ñúninu guendarinabadiidxaʼ ca sti modo yaʼ. Ñuuláʼdxiluʼ ñátiluʼ nagasi ca la? Guirutiʼ niníʼ ñuulaʼdxiʼ. Purtiʼ neca nápanu guendanagana, guiranu riuuláʼdxinu guibáninu. Biblia na bizáʼ Dios laanu para chuuláʼdxinu guibáninu: «Guluube tiempu ni qué gapa ra guiluxe ndaaniʼ ladxidóʼ binni» (Eclesiastés 3:11).

Ni dxandíʼ nga laanu qué ribáninu xadxí. Xi guca yaʼ. Maʼ biʼniʼ Dios xiixa para guni chaahuiʼ guendanagana riʼ la? Nabé riguixhedxí Biblia ladxidoʼno pur modo ricabi ca guendarinabadiidxaʼ riʼ ne rábini laanu xiñee gucaná ne guti Jesús.

XI GUCA YAʼ

Lu guionnaʼ capítulo ra ruzulú libru stiʼ Génesis ruzeeteni gudxi Dios ca primé binni, Adán ne Eva, zanda guibánicaʼ sin qué chuʼ dxi gáticaʼ ne laaca gúdxibe laacaʼ xi gúnicaʼ para cadi guníticaʼ ni. Laaca ruzeeteʼ ni qué nuzuubacabe diidxaʼ ngue runi biníticabe ni. Cadi nagana modo rusiene Biblia ni, nga runi stale tu riníʼ ique ti cuentu si ni. Peru cásica ca Evangeliu, libru stiʼ Génesis rusihuinni naca ti libru ni caníʼ de historia ni zanda guni crenu. *

Xi bizaaca pur qué nuzuubaʼ Adán diidxaʼ yaʼ. Sicaríʼ na Biblia: «Pur tobi hombre [Adán] biuu enda ruchee ndaani guidxilayú, ne guti be purti bichee be, ne zacá ucuá enda guti que irá xixé binni, purti laca bichee caʼ» (Romanos 5:12). Bichee Adán ra qué nuzuubaʼ diidxaʼ. Zaqué nga binítibe guendanabani ni qué zaluxe que, despué bióʼxhobe ne gútibe. Cumu de laabe nga ziúpanu la? laaca gulenenu donda. Nga runi raca huaranu, rióxhonu ne rátinu. Ne nga rusihuinni dxandíʼ ni rusiene ca científicu ca yanna: xiñee rindee ti baʼduhuiiniʼ bixhoze ne jñaa.  Guidúʼyanu xi biʼniʼ Dios para biʼniʼ chaahuiʼ guendanagana riʼ.

XI BIʼNIʼ DIOS

Gudixhe chaahuiʼ Jiobá Dios xi naquiiñeʼ guni para guibiguetaʼ ni biniti Adán que ti ganda guibani ca xiiñibe sin qué chuʼ dxi gáticaʼ. Xi bíʼnibe yaʼ.

Biblia na: «Ni riaxa pecadu nga enda guti» (Romanos 6:23). Guendaguti ca nga ni ribeendú binni ora guchee. Nga runi, Adán la? guti purtiʼ bichee. Ngaca nga laanu, cumu rucheʼnu la? laaca rátinu. Peru cumu qué gápanu donda pur ni bizaaca que la? biá Dios laanu ne biseendaʼ Xiiñiʼ, Jesucristu, casi ñaca niguixe ni nuzáʼbinu. Ximodo gudíxebe ni nuzáʼbinu yaʼ.

Guendaguti stiʼ Jesús gucaneni para guibani binni nayecheʼ ne qué chuʼ dxi gatiʼ

Ra qué nuzuubaʼ Adán, ti hombre sin donda, diidxaʼ guiráʼ binni beeda gaca binni ruchee ne ráticaʼ; nga runi biquiiñeʼ sti hombre, laaca sin donda, ni guzuubaʼ diidxaʼ dede ra gatiʼ para quixe ni nuzáʼbinu. Sicaríʼ rusiene Biblia ni: «Pur hombre ni qué nuzuuba diidxa que, uyuu stale tu bichee, ne zaqueca pur stobi ni bizuuba diidxa que, ziuu stale tu zaxá stonda» (Romanos 5:19). «Stobi» ni rieeteʼ lu textu riʼ nga Jesús, ni bisaana guibáʼ, guca ti binni sin donda * ne guti pur laanu. Ni bíʼnibe ca racaneni para guxhá Dios stóndanu ne ganda guibáninu sin qué chuʼ dxi gátinu.

XIÑEE GUCANÁ NE GUTI JESÚS

Peru, xiñee naquiiñepeʼ gatiʼ Jesús para ugaandanu ca ndiʼ yaʼ. Qué ñanda niguixhe Dios ti ley ni nudii lugar nibani cani za de Adán sin qué ñuu dxi ñáticaʼ la? Ñanda ñúnibe ni purtiʼ laasibe nga nápabe derechu para gúnibe ni, peru pa ñúnibe ni, nucheenebe ley ni gudíxhebe ra caníʼ ni riaxa pecadu nga guendaguti. Ley ni gudixe Dios que, qué zanda diʼ guixá ni ne cadi nácani ti ley ni guidxaa ora tiica si gápacabe gana. Nabé risaca ley riʼ para gaca ni jneza (Salmo 37:28).

Pa ñaca qué ñuni Dios ni jneza dxi que, maʼ qué ñuni crenu pa ñúnirube ni jneza. Quíxhenu ti ejemplu, ñee nusihuínnibe rúnibe ni jneza ora  niniʼbe tu laa de cani za de Adán que guibani sin gatiʼ la? Ñee ñúnibe guiráʼ ni maʼ bidii stiidxabe la? Ra qué nucheenebe ley ni gudíxhebe para ganda guilanu, racané ni laanu gánnanu qué zusaana de gúnibe ni jneza.

Ra gutiʼ Xiiñiʼ Dios gucané ni ganda guibani binni ndaaniʼ ti paraísu sin qué chuʼ dxi gatiʼ. Sicaríʼ guníʼ Jesús: «Purti nadxii xhaata Dios binni guidxilayú ngue runi bidii tobi lucha Xiiñiʼ, ti irá tu guni cre Xiiñi be que la? cadi initilú sínuque gapa enda nabani ni qué zaluxe» (Juan 3:16). Guendaguti stiʼ Jesús rusihuínnini runi Dios ni jneza, peru cadi ngasi laaca rusihuínnini pabiáʼ nadxiibe laanu.

Peru caʼruʼ diʼ guicábinu pregunta riʼ: xiñee gupa xidé gucaná ne guti Jesús modo tan feu riʼ pue. Ra bizuubabe diidxaʼ dede ra gútibe, bisihuínnibe rusiguii Binidxabaʼ dxi guníʼ guiráʼ binni zusaana Dios ora tiidicaʼ lu guendanagana (Job 2:4, 5). Ruluíʼ dxandíʼ ngue napa Binidxabaʼ razón dxi bicaa primé hombre que guchee. Peru Jesús, ti hombre ni laaca qué ñalené donda, bizuubaʼ diidxaʼ neca jma naná guiráʼ ni gudiʼdiʼ (1 Corintios 15:45). Zaqué bisihuínnibe ñanda nuzuubaʼ Adán stiidxaʼ Dios pa ñacalaʼdxiʼ. Bisaana Jesús ejemplu riʼ para chinándanu (1 Pedro 2:21). Pur bizuubaʼ Jesús diidxaʼ bidii Dios laabe ti guendanabani guibáʼ ne maʼ qué ziuu dxi gátibe.

XIMODO RACANÉ NI LII

Dxandíʼ nga guti Jesús ne pur laani zanda guibáninu sin qué chuʼ dxi gátinu. Nga runi guinabadiidxanu sti biaje: Ñuuláʼdxiluʼ nibániluʼ sin qué ñuu dxi ñátiluʼ la? Guníʼ Jesús xi naquiiñeʼ gúninu para ugaandanu ni: «Ne zacaa cabe enda nabani ca ra gunibiáʼ cabe lii ne ra gunibiáʼ cabe Jesucristu ni biseenda luʼ. Lii nga tobi lucha Dios ni dxandíʼ» (Juan 17:3).

Cani rucaa revista riʼ riguʼdu gana lii gunibiaʼluʼ Jiobá, Dios ni dxandíʼ, ne Xiiñibe, Jesucristu. Ziuulaʼdxiʼ ca testigu stiʼ Jiobá de neza ra lídxiluʼ gacanecaʼ lii. Laaca zadxélaluʼ ni gacané lii lu sitiu www.jw.org/zai.

^ párrafo 8 Biiyaʼ tema ni láʼ «Carácter histórico de Génesis» ni zeeda lu Perspicacia para comprender las Escrituras, volumen 1, yaza 1017, ni nuu lu jw.org (Guyé ra na PUBLICACIONES > BIBLIOTECA EN LÍNEA).

^ párrafo 13 Dede guibáʼ bitiidiʼ Dios xquendanabani Xiiñiʼ ndaaniʼ María. Biquiiñebe espíritu santu stibe para gápabe baʼduhuiiniʼ que ti cadi guicá donda stiʼ jñaa laa (Lucas 1:31, 35).