Biiyaʼ guiraʼ ni nuu lu sitiu riʼ

guyé lu índice

 TEMA STIʼ PORTADA | XIÑEE GUCANÁ NE GUTI JESÚS

Ñee dxandíʼ bizaaca ni la?

Ñee dxandíʼ bizaaca ni la?

Biiticabe Jesús de Nazaret lu iza 33. Guníʼcabe cucaalube gobiernu, guluucabe golpe laabe sin ñácabe laabe ne bicaacabe laabe lu ti yaga, ra guizáʼ feu modo gútibe. Peru bisibani Dios laabe sti biaje ne cuarenta dxi despué bibiguétabe guibáʼ.

Nánnanu de relatu riʼ pur guidapaʼ Evangeliu ni zeeda lu Nuevo Testamento, o Escrituras Griegas Cristianas. Peru, ñee dxandíʼ bizaaca guiráʼ ndiʼ la? Nabé risaca gánnanu respuesta stiʼ pregunta riʼ, purtiʼ pa ti cuentu si ni la? qué nisaca diʼ fe stiʼ ca xpinni Cristu ne laaca cadi dxandíʼ diʼ nga nibézanu ti paraísu ra zabáninu sin qué chuu dxi gátinu (1 Corintios 15:14). Yanna, pa dxandíʼ bizaaca ni, sicarú cani cabézanu gacaʼ. Nga runi, ñee dxandíʼ guiráʼ ni rieeteʼ lu ca Evangeliu ca la? o cuentu si cani.

NI NA HISTORIA

Gadxepeʼ ca Evangeliu de ca cuentu nanna binni, purtiʼ bicaacabe cani né stale cuidadu ne dxandíʼ cani. Ruzeeteʼ cani lá binni ni laaca ruzeeteʼ ca historiador ne laaca ruzeeteʼ cani stale lugar ni riganna binni dede yanna (Lucas 3:1, 2, 23).

 Caadxi hombre ni bicaa libru de primé ne guiropa siglu, bizeetecaʼ de Jesús. * Modo biiticabe laabe, casi cá ni lu ca Evangeliu, zacapeʼ nga modo biiti ca romanu binni dxiqué. Ne cadi ngasi, guiráʼ cani cá lúcani dxandíʼ cani ne nuu xi pur gucuá cani, ne dede nuu biaje ruzeeteʼ cani xiixa ni cadi galán biʼniʼ ca discípulo stibe (Mateo 26:56; Lucas 22:24-26; Juan 18:10, 11). Guiráʼ ndiʼ rusihuinni qué nusiguii diʼ cani bicaa ca Evangeliu ca ne biaʼsi guiráʼ ni guníʼcabe de Jesús.

ÑEE BIASA JESÚS DE LADE GUEʼTUʼ LA?

Neca guiráʼ binni runi cré dxandíʼ bibani Jesús, nuu tu qué runi cré pa dxandíʼ biásabe de lade gueʼtuʼ. Dede ca apóstol stibe qué ñuni crecaʼ ni primé que (Lucas 24:11). Peru biʼniʼ crécabe ni ora laacabe ne xcaadxi discípulo biiyacabe Jesús gadxé gadxé lugar biasa si de lade gueʼtuʼ. Ti biaje biiyaʼ jma de gaayuʼ gayuaa binni laabe tobi si lugar (1 Corintios 15:6).

Guca ca discípulo que nadxibalú dede guluucaʼ xquendanabánicaʼ ra naxoo, purtiʼ guniʼcaʼ nezalú guiráʼ binni, dede né cani biiti Jesús, maʼ biásabe de lade gueʼtuʼ (Hechos 4:1-3, 10, 19, 20; 5:27-32). Ñee nuguucabe xquendanabánicabe ra naxoo pa ñaca cadi dxandíʼ biasa Jesús de lade gueʼtuʼ la? Coʼ xa. Purtiʼ ra biʼniʼ crécabe dxandíʼ biasa Jesús de lade gueʼtuʼ, gucaneni para ganda gacané ca xpinni Cristu que binni cásica cayaca ni yanna.

Ca relatu ni zeeda lu ca Evangeliu ni caníʼ modo gutiʼ Jesús ne ra biasa de lade gueʼtuʼ, rusihuínnicani naca cani historia ni zanda guni crenu. Pa gúʼndaluʼ ca relatu riʼ, zudiiluʼ cuenta dxandíʼ bizaaca cani rieeteʼ lúcani. Peru ni jma zacané lii gúʼyaluʼ dxandíʼ cani nga guiéneluʼ xiñee bizaaca cani. Lu sti tema ca zadúʼyanu ni.

^ párrafo 7 Tácito, ni gule biaʼ lu iza 55, bicaa sicaríʼ: «[Ca xpinni Cristu] bíʼnicabe ni na Cristu, hombre biiti Poncio Pilatu dxi naca Tiberio rey». Xcaadxi hombre bicaa libru ne laaca bizeetecaʼ de Jesús nga historiador romanu Suetonio ne historiador judíu láʼ Josefo (primé siglu), ne Plinio ni nahuiiniʼ, gobernador stiʼ Bitinia (ra bizulú guiropa siglu).