Biiyaʼ guiraʼ ni nuu lu sitiu riʼ

guyé lu índice

Xi rúniluʼ ante quixhe íqueluʼ gúniluʼ xiixa

Xi rúniluʼ ante quixhe íqueluʼ gúniluʼ xiixa

«Lauyubi ganna tu xi na Señor» (EFESIOS 5:17).

DIIDXAʼ RIUUNDAʼ: 11 NE 22

1. a) Gunáʼ nga caadxi de ca mandatu zeeda lu Biblia. b) Xi ribeendunu ora rúninu ni na cani.

LU BIBLIA zeeda ca mandatu ra cusiene chaahuiʼ Jiobá laanu xipeʼ nga racalaʼdxiʼ gúninu. Guzéʼtenu caadxi ejemplu, laabe maʼ guniʼbe malu guni adorarnu bidóʼ, cuánanu, xhúdxinu o chúʼnenu ni cadi xheelanu (1 Corintios 6:9, 10). Ne laaca bidii Jesús mandatu riʼ ca discípulo stiʼ: «Laché ra nuu binni de guiráʼ guidxi, lagusiidiʼ laacaʼ gácacaʼ discípulo, lacuunisa laacaʼ lu lá Bixhozeʼ ne lu lá Xiiñiʼ ne lu lá espíritu santu, lagusiidiʼ laacaʼ gúnicaʼ guiráʼ ni maʼ bineʼ mandar laatu. Ne laganna qué zaxeleʼ de laatu guiráʼ dxi dede ora guiluxe modo nabani binni guidxilayú» (Mateo 28:19, 20TNM). Ora rúninu ni biʼniʼ mandar Jiobá ne Xiiñiʼ laanu la? ribeendunu stale cosa galán. Rusiidiʼ ca ley stiʼ Dios laanu ximodo gápanu laanu ne familia stinu. Laaca racané cani laanu chuʼnu jma nazaaca ne nayecheʼ. Peru ni jma risaca nga gúninu ni na ca mandatu stiʼ Jiobá, casi gucheechenu diidxaʼ. Pa gúninu ni la? ziechenebe laanu ne zaguube ndaayaʼ laanu.

2, 3. a) Xiñee qué rudii Biblia ley para cada cosa ni naquiiñeʼ gúninu. b) Gunáʼ nga ca guendarinabadiidxaʼ zacábinu lu tema riʼ. (Biiyaʼ foto ni zeeda ra ruzulú tema riʼ).

2 Dxandíʼ, lu Biblia cadi zeeda diʼ ley ni caníʼ ximódopeʼ  naquiiñeʼ gúninu stale cosa. Guzéʼtenu ti ejemplu. Qué riníʼ Biblia xi lari naquiiñeʼ gácunu o gunáʼ ni cadi naquiiñeʼ gácunu. Nabé rusihuinni ndiʼ pabiáʼ nuu xpiaaniʼ Jiobá. Xiñee yaʼ. Purtiʼ gadxé gadxé modo racu binni lari lu guidubi Guidxilayú. Ne nuu sti cosa, ruchaa ca moda ca ra zidiʼdiʼ tiempu. Peru ca conseju rudii Biblia ra na ximodo naquiiñeʼ gácunu lari, qué ruchaa diʼ cani. Lu Biblia laaca gastiʼ diʼ ti lista ra cá xi clase dxiiñaʼ zanda gúninu o xi tratamientu ni cudii ti doctor zanda guicaanu, o xi guiráʼ zanda gúninu para gaca divertirnu. Xi runi Jiobá yaʼ. Rudiibe lugar cada binni ne cada xaíque stiʼ ti familia guʼyaʼ xi zanda guni lu cada tobi de cani maʼ bizéʼtenu riʼ.

3 Zándaca racaláʼdxinu quixhe íquenu gúninu ti cosa nabé risaca, peru cadi zeeda ti ley lu Biblia ra na ximódopeʼ naquiiñeʼ gaca ni. Para gánnanu xi gúninu la? galán guinabadiidxanu laca laanu: «Ñee risaca para Jiobá ni quixheʼ iqueʼ guneʼ la? Ñee zanda quixheʼ iqueʼ guneʼ intiica cosa inque si qué gucheeniáʼ ti ley ni zeeda lu Biblia la? Ximodo zanda gannaʼ zusiecheʼ Jiobá né ni chiguneʼ riʼ yaʼ». Zacábinu ca guendarinabadiidxaʼ ca lu tema riʼ.

ÑEE RISÁCAPEʼ NGA CANI RIGUIXHE ÍQUENU GÚNINU LA?

4, 5. Xi zabeendunu ne xi zabeendú xcaadxi binni pur cani quixhe íquenu gúninu.

4 Nuu binni riníʼ ique zanda guni guiráʼ ni gacalaʼdxiʼ. Peru laanu qué riníʼ íquenu zacá, purtiʼ racaláʼdxinu gusiéchenu Jiobá. Nga runi, ante quixhe íquenu gúninu xiixa, naquiiñeʼ guidúʼyanu xiná Biblia ne chinándanu ni. Guidúʼyanu ti ejemplu, Biblia rabi laanu xi riníʼ ique Jiobá de rini, ne rinándanu ni na ni (Génesis 9:4; Hechos 15:28, 29). Zanda guinábanu Jiobá gacané laanu quixhe íquenu gúninu ni chuulaʼdxiʼ.

5 Xi zabeendunu pur cani quixhe íquenu gúninu yaʼ. Pa quixhe íquenu gúninu ni jneza la? jma zaca xhamígunu Jiobá. Peru pa qué gúninu ni jneza la? zaxélenu de laabe. Ne zándaca laaca zuninanu stobi pur cani gúninu. Pa quixhe íquenu gúninu xiixa ni cadi jneza la? zándaca gueeda guchiichinu ca hermanu stinu o dede gucaa ni laacaʼ guirá fe sticaʼ. Qué racaláʼdxinu gúninu nga. Laaca qué racaláʼdxinu gutíndenu ca hermanu nuu ra congregación stinu. Racá ridúʼyanu nabé risaca quixhe íquenu gúninu ni jneza (biindaʼ Romanos 14:19 ne Gálatas 6:7).

6. Xi naquiiñeʼ gacané laanu para gánnanu xi quixhe íquenu gúninu.

6 Yanna, pa cadi cayabi Biblia laanu ximodo gúninu xiixa ni racaláʼdxinu, xi naquiiñeʼ gúninu óraca yaʼ. Lugar de gúninu ni rábinu jneza para laanu, jma galán guiníʼ ique chaahuinu ne quixhe íquenu gúninu ni riuulaʼdxiʼ Jiobá. Zacá ziuʼnu seguru zacanebe laanu cueendunu stale cosa galán. Biblia na: «Gunabaʼ Jiobá gabi lii modo saluʼ neza stiluʼ, ne gudixhe ladxidoʼloʼ ndaaniʼ nabe, ne laabe zacanebe lii» (Salmo 37:5).

GÚNINU STIPA PARA GÁNNANU XI RACALAʼDXIʼ JIOBÁ GÚNINU

7. Xi naquiiñeʼ gúninu pa cadi cudii Biblia ti ley ra na ximódopeʼ naquiiñeʼ gúninu xiixa.

7 Peru, ximodo zanda gánnanu xi ziuulaʼdxiʼ Jiobá yaʼ. Efesios 5:17 cayabi laanu: «Lauyubi ganna tu xi na Señor [Jiobá]». Xi cusiidiʼ textu riʼ laanu yaʼ. Cusiidiʼ ni laanu naquiiñeʼ guyúbinu gánnanu xi racalaʼdxiʼ Jiobá gúninu pa gastiʼ ti ley lu Biblia ra na ximódopeʼ naquiiñeʼ gúninu xiixa. Ximodo zanda  gánnanu ni yaʼ. Naquiiñeʼ guni orarnu ne gudiʼnu lugar gusiénebe laanu né espíritu stibe.

8. Ximodo bisihuinni Jesús riene xi racalaʼdxiʼ Jiobá. Bizeeteʼ ti ejemplu.

8 Jesús nabé biʼniʼ stipa pur ganna xi racalaʼdxiʼ Jiobá gúnibe. Guzéʼtenu ti ejemplu. Guiropaʼ biaje bíʼnibe milagru para biyaanabe stale binni ni candaana, biʼniʼ orarbe primeru (Mateo 14:17-20; 15:34-37). Peru dxi bindaanabe ne gucalaʼdxiʼ Binidxabaʼ nucaa laabe ñúnibe caadxi guié pan para ñobe la? qué ninabe ñúnibe milagru que (biindaʼ Mateo 4:2-4). Xiñee qué ñúnibe ni yaʼ. Purtiʼ runibiáʼ chaahuibe Bixhózebe ne nánnabe qué ziuulaʼdxiʼ iquiiñebe espíritu santu para gúnibe xiixa ni gacané laabe. Nanna dxíchibe zanda gabi Dios laabe xi naquiiñeʼ gúnibe ne zudii ni gobe ora maʼ caquiiñebe ni.

9, 10. Xi zacané laanu gánnanu xii nga ni jma jneza gúninu. Bizeeteʼ ti ejemplu.

9 Pa gúninu casi biʼniʼ Jesús ne gápanu confianza zabi Jiobá laanu xi gúninu la? zanda quixhe íquenu gúninu ni jneza. Biblia na: «Gupa confianza Jiobá de guidubi ladxidoʼloʼ, ne cadi chinándaluʼ ni na xpiaaniluʼ. Lu guiráʼ ni gúniluʼ biiyaʼ xi nabe, ne laabe zúnibe ca neza stiluʼ derechu. Cadi guʼnuʼ lii binni nuu xpiaaniʼ. Bidxibi Jiobá ne bixeleʼ de cosa malu» (Proverbios 3:5-7). Ora guidúʼndanu Biblia ne guizíʼdinu ximodo riníʼ ique Jiobá, racané nga laanu gánnanu xi racaláʼdxibe gúninu. Ne ora jma maʼ zizíʼdinu modo riníʼ íquebe, qué zácapeʼ nagana para laanu quixhe íquenu gúninu ni riuuláʼdxibe. Ne laaca jma ziuuláʼdxinu gúninu ni gábibe laanu de guidubi ladxidoʼno (Ezequiel 11:19).

10 Quíxhenu ti ejemplu. Guxuíʼlunu nuu ti hermana ni racalaʼdxiʼ siʼ ti par zapatu. Galán cani, peru guizáʼ caru cani. Neca cadi canazanebe xheelabe, nánnabe xi zaníʼ ique pa gunítibe stale bueltu luguiáʼ cani. Xiñee nánnabe ni yaʼ. Purtiʼ maʼ nápacabe ti tiempu de bichaganácabe ne maʼ nánnabe ximodo riuulaʼdxiʼ xheelabe iquiiñebe bueltu stícabe. Zacaca nga laanu, ora maʼ bizíʼdinu ximodo riníʼ ique Jiobá ne xi maʼ bíʼnibe dxiqué, zacané ni laanu gánnanu xi naquiiñeʼ gúninu cada biaje chigúninu xiixa.

XIMODO ZANDA GÁNNANU XI RINÍʼ IQUE JIOBÁ

11. Xi zanda guinabadiidxanu laca laanu ora maʼ cadúʼndanu o maʼ cayuni estudiarnu Biblia. (Biiyaʼ recuadru «Ora maʼ cayuni estudiarluʼ Biblia, gunabadiidxaʼ laca lii»).

11 Ximodo zanda gánnanu xi riníʼ ique Jiobá yaʼ. Ni jma naquiiñeʼ gúninu nga guidúʼndanu Biblia ne guni estudiarnu ni gatigá. Zanda guiníʼ íquenu sicaríʼ ora maʼ cayúninu ni: «Xi rusiidiʼ ndiʼ naa de Jiobá. Xiñee bíʼnibe ndiʼ sicaríʼ pue». Laaca naquiiñeʼ guinábanu Jiobá gacané laanu gunibiáʼ chaahuinu laa, cásica biʼniʼ David. Laa bicaa: «Biluíʼ naa ca neza stiluʼ Jiobá; bisiidiʼ naa ca neza stiluʼ. Biluíʼ naa ni dxandíʼ ne bisiidiʼ naa, purtiʼ lii nga Dios stinneʼ ni rulá naa. Guidubi dxi lii nga cabezaʼ gacaneluʼ naa» (Salmo 25:4, 5). Ora guizíʼdinu xiixa de Jiobá, galán guiníʼ íquenu paraa zanda iquiiñenu ni bizíʼdinu de laabe. Zanda guinabadiidxanu laca laanu: «Ximodo zanda guneʼ ndiʼ ra lidxeʼ, ra runeʼ dxiiñaʼ, ra scuela ne ora chigucheecheʼ diidxaʼ yaʼ». Pa guiníʼ íquenu paraapeʼ zanda gacané ni cadúʼndanu ca laanu la? qué zaca nagana para gánnanu xi racalaʼdxiʼ Jiobá gúninu.

12. Ximodo zanda gacané ca publicación ne ca reunión stinu laanu.

 12 Xi sti cosa zanda gacané laanu gánnanu xi riníʼ ique Jiobá yaʼ. Gucaadiaga chaahuinu ni rusiidiʼ xquidxi Dios laanu de Biblia. Guzéʼtenu ti ejemplu. Ora chitixhe íquenu gúninu xiixa la? galán iquiiñenu Índice de las publicaciones Watch Tower ne folletu Ca tema ni huabee ca testigu stiʼ Jiobá para gacané cani laanu gánnanu xi riníʼ ique Jiobá. Ca reunión stinu laaca zanda gacané cani laanu gánnanu ximodo riníʼ ique Jiobá. Pa gucaadiaga chaahuinu, gudiʼnu comentariu ne guiníʼ íquenu lu ni cazíʼdinu la? zanda quixhe íquenu gúninu ni riuulaʼdxiʼ Jiobá ne zaguube ndaayaʼ laanu.

GUINÍʼ ÍQUENU XIMODO RUUYAʼ JIOBÁ NI CHIGÚNINU

13. Bizeeteʼ ti ejemplu ni gusihuinni ximodo zanda quixhe íquenu gúninu ni jma jneza pa gunibiaʼnu modo riníʼ ique Jiobá.

13 Pa gánnanu ximodo riníʼ ique Jiobá ne guiníʼ íquenu de laani la? zacané ni laanu gánnanu xii nga ni jma jneza gúninu. Ximodo nga yaʼ. Guidúʼyanu ejemplu riʼ. Guxuíʼlunu racaláʼdxinu gácanu precursor. Zándaca maʼ bichaʼnu modo nabáninu ti gápanu jma tiempu para gucheechenu diidxaʼ. Peru dede yanna caníʼ íquenu pa ziúʼrunu nayecheʼ né huaxiéʼ bueltu ne pa gápanu caadxi cosa si. Dxandíʼ qué riníʼ diʼ Biblia naquiiñeʼ gácanu precursor para gúninu ni na Jiobá. Zanda gúninu ni riuuláʼdxibe pa gácanu ti publicador si. Peru Jesús bisiidiʼ riguu Jiobá ndaayaʼ cani runi sacrificiu pur Reinu (biindaʼ Lucas 18:29, 30). Ne laaca cayabi Biblia laanu riuulaʼdxiʼ Jiobá gúninu biaʼ gándatiʼ para gusisácanu laa. Laabe racaláʼdxibe chuʼnu nayecheʼ ora gúninu ni nabe (Salmo 119:108; 2 Corintios 9:7). Pa guni orarnu ne guiníʼ íquenu lu cani bizéʼtenu riʼ, zanda quixhe íquenu gúninu xiixa ni jma zacané laanu ne zaguu Jiobá ndaayaʼ laanu.

14. Ximodo zanda gánnanu pa riuulaʼdxiʼ Jiobá modo rácanu lari.

14 Guidúʼyanu sti ejemplu. Guxuíʼlunu nabé riuuláʼdxinu lari de ti estilu si. Peru nánnanu qué ziuulaʼdxiʼ caadxi hermanu de congregación stinu pa gácunu ni. Biblia cadi cuzeeteʼ diʼ xiixa de estilu ca. Yanna, ximodo zanda gánnanu xi riníʼ ique Jiobá de laani yaʼ. Biblia cudii conseju riʼ laanu: «Ne ca hermana la? cadi gacu ca lari ni cadi jneza gacu xpinni Cristu, nin uyubi ca chuʼlaʼdxi binni laaca pur modo guni ca ique caʼ o gaze ca oro o perla o gacu ca lari nabé risaca, sínuque  uyubi ca chuʼlaʼdxi binni laaca purti nachaʼhui ca ne runi ca jneza casi naquiiñe guni ca xpinni Dios» (1 Timoteo 2:9, 10). Naquiiñeʼ gánnanu gucuá conseju riʼ para guiráʼ xixenu, dede né para ca hermanu. Pa qué rudxíʼbanu laca laanu la? zaníʼ íquenu ximodo guʼyaʼ xcaadxi laanu né estilu ni racaláʼdxinu gácunu. Ne pa nadxiinu ca hermanu stinu la? zúninu stipa para cadi guchiichinu laacaʼ (1 Corintios 10:23, 24; Filipenses 3:17). Pa guiníʼ íquenu ni rusiidiʼ Biblia ne ni riníʼ ique Jiobá, zanda quixhe íquenu gúninu ni riuuláʼdxibe.

15, 16. a) Ximodo runi sentir Jiobá ora qué rusaana de guiníʼ íquenu cosa malu. b) Xi zacané laanu gánnanu pa riuulaʼdxiʼ Jiobá cani ridúʼyanu. c) Xi naquiiñeʼ gúninu ante quixhe íquenu gúninu xiixa ni jma risaca.

15 Xi zacané laanu gánnanu ximodo ruuyaʼ Jiobá ca cosa ni riníʼ íquenu yaʼ. Biblia rusiidiʼ riuu Jiobá triste ne racaná ladxidóʼ ora runi binni cosa malu ne ora riníʼ ique ni. Biblia na: «Biiyaʼ Jiobá bidale guendaquéiquiiñeʼ ni cayuni binni ndaaniʼ guidxilayú riʼ, ne guiráʼ ni rucaa ladxidóʼcabe laacabe guiníʼ íquecabe, puru cosa malu cani guiráʼ ora. Ne guyuu Jiobá triste pur bizáʼ binni guidxilayú, ne gucaná ladxidoʼbe» (Génesis 6:5, 6). Rihuinni dxíchica qué racaláʼdxibe guxuíʼlunu nuunenu tuuxa ni cadi xheelanu. Pa guiníʼ íquenu xiixa casi nga la? zándaca gueeda gúninu ni. Nga runi racalaʼdxiʼ Jiobá guiníʼ íquenu cosa sicarú ne galán. Discípulo Santiagu bicaa ximodo riníʼ ique ti binni ni maʼ bisiene Jiobá laa: «Qué lica zucaa ique ni nadxabaʼ, qué zuyubi diidxaʼ, ne qué zucaa lú, sínuque zaca nadóʼ ne ziuu razón. Ziá binni ne zuni stale enda nachaʼhui de idubi ladxidó, ne cadi para udxiiba binni laa» (Santiago 3:17). Racá ridúʼyanu rusiidiʼ Biblia cadi lica naquiiñeʼ guidúʼyanu xiixa ni gucaa laanu guxuíʼlunu o chuuláʼdxinu gúninu xiixa cosa dxabaʼ o cosa malu. Pa nanna dxíchinu gunáʼ nga ca cosa ni riuulaʼdxiʼ Jiobá ne gunáʼ nga cani nanaláʼdxibe la? qué zanabadiidxanu ca hermanu xi libru gúʼndanu, xi película gúʼyanu o xi juegu zanda quítenu. Stúbisinu zudiʼnu cuenta xi zanda gúninu.

16 Ora maʼ chitixhe íquenu gúninu xiixa, zanda guidxélanu stale modo gúninu ni ne ziuulaʼdxiʼ Jiobá ni. Peru pa chitixhe íquenu gúninu xiixa ni jma risaca la? zanda guinábanu conseju ti ancianu, ti hermanu o ti hermana ni napa stale experiencia (Tito 2:3-5; Santiago 5:13-15). Ni qué ziuu dxi guinábanu laacabe nga gábicabe laanu xi gúninu. Apóstol Pablu guníʼ: «Cada tobi zuaʼ donda stiʼ» (Gálatas 6:5). Ni gúninu nga guiníʼ ique chaahuinu xi rusiidiʼ Biblia de racá maʼ quíxhenu xi gúninu (Hebreos 5:14).

17. Xi zabeendunu pa quixhe íquenu gúninu ni riuulaʼdxiʼ Jiobá.

17 Ora riguixhe íquenu gúninu ni riuulaʼdxiʼ Jiobá la? jma raca xhamígunu laabe, riuuláʼdxibe modo runi adorarnu laabe ne riguube ndaayaʼ laanu (Santiago 4:8). Zacané ndiʼ para gaca fe stinu jma naguidxi. Nga runi, guiníʼ íquenu ni rusiidiʼ Biblia ti guiénenu ximodo riníʼ ique Jiobá. Xi si la? qué ziuu dxi gusaana de guizíʼdinu xiixa cosa nacubi de laabe (Job 26:14). Peru, pa gúninu stipa pur gunibiaʼnu laabe jma la? zácanu binni nuu xpiaaniʼ ne zaguixhe íquenu gúninu ni jneza (Proverbios 2:1-5). Binni guidxilayú nabé ruchaa modo riníʼ ique ne ni racalaʼdxiʼ guni, peru Jiobá qué lica ruchaa. Tobi de ca hombre ni bicaa Biblia na qué ziuu dxi guchaa cani riguixhe ique Jiobá guni ne cani riníʼ ique (Salmo 33:11). Pa guizíʼdinu guiníʼ íquenu cásica riníʼ ique Jiobá ne gúninu ni riuuláʼdxibe la? zaguixhe íquenu gúninu ni jneza.