Biiyaʼ guiraʼ ni nuu lu sitiu riʼ

guyé lu índice

 GAAYUʼ

Bisiidiʼ xiiñiluʼ: Ganna risaca nga gacané binni huaniisi laa

Bisiidiʼ xiiñiluʼ: Ganna risaca nga gacané binni huaniisi laa

¿TUU NGA ZANDA GACANÉ CA XIIÑILUʼ?

Caquiiñeʼ ca xcuidi gacané ne gudii ca binni huaniisi conseju laacaʼ, ne ca padre ca nga jma naquiiñeʼ gúnicaʼ ni purtiʼ nga nga deber sticaʼ. Peru nuu xcaadxi binni huaniisi zanda gacané ne gudii conseju ca xiiñiluʼ.

¿XIÑEE NABÉ RISACA NI?

Ndaaniʼ stale guidxi, maʼ huaxiéʼ si ruyubi ca joven güínecaʼ ca binni huaniisi diidxaʼ. Guníʼ ique ndiʼ:

  • Casi idubi dxi riuu ca xcuidi ra scuela, ra nuu jma baʼduscuela qué maestru o xcaadxi binni huaniisi.

  • Ora ribiguetaʼ ca xcuidi de ra scuela, nuu tiru guirutiʼ nuu ra yoo purtiʼ bixhózebe ne jñaabe cayúnicaʼ dxiiñaʼ.

  • Ti estudiu ni guca, bisiene, ndaaniʼ guidxi Estados Unidos ca xcuidi ni napa biaʼ xhono ne doce iza riuucaʼ biaʼ xhoopaʼ hora maʼ caguítecaʼ né ca aparatu electrónicu. *

Ti libru ni láʼ Hold On to Your Kids (Aférrese a sus hijos) ná: «Maʼ qué rinanda ca joven ejemplu stiʼ bixhózecaʼ, ca maestru sticaʼ ninca stiʼ xcaadxi binni huaniisi ne qué rinábacaʼ conseju laacabe, yanna ruyúbicaʼ [...] xcaadxi joven biaʼca laacaʼ».

¿XIMODO GACANELUʼ LAACABE?

Gulee tiempu para ca xiiñiluʼ

CONSEJU ZEEDA LU BIBLIA: «Bisiidiʼ xiiñiluʼ neza ra naquiiñeʼ saʼ; neca guióʼxhobe qué zareechube de neza ca» (Proverbios 22:6).

Normal nga guinabaʼ ca xcuidi gacané bixhózecaʼ laacaʼ. Dede caadxi especialista ruzeetecaʼ, ora rindá ca xcuidi ca lu etapa de adolescencia, jma rusisácacabe ca conseju stiʼ bixhózecabe ne jñaacabe qué conseju ni gudii ca xhamígucabe laacabe. Ti profesor de Psicología ni láʼ Laurence Steinberg bicaa lu libru stiʼ You and Your Adolescent (Su hijo adolescente y usted): «Lu adolescencia ne lu ca primé iza de gudíʼdicabe lu etapa riʼ, ruuyarucabe modo naca bixhózecabe ne jñaacabe ne rinándacabe ejemplu sticaʼ». Autor riʼ laaca bicaa: «Rusisaca xiiñiluʼ ni naca joven modo riníʼ íqueluʼ, neca cadi guiráʼ biaje runi reconocerbe ni, ne rucaadiágabe ni gábiluʼ laabe, neca nuu biaje qué chuuláʼdxibe ni».

Ca xiiñiluʼ ruuyacaʼ nácaluʼ ti ejemplu para laacaʼ nga runi biʼniʼ aprovechar ni, ne gulee tiempu para laacabe. Zanda gábiluʼ laacabe ximodo runi sentirluʼ, ne xi riníʼ íqueluʼ de xiixa cosa, xi ca cosa nga risaca para lii ne gudxi laacabe xi guiráʼ cosa huaziidiluʼ lu xquendanabániluʼ.

 Gunabaʼ ti binni huaniisi ni naca responsable gacané lii

CONSEJU ZEEDA LU BIBLIA: «Tu canazané binni nuu xpiaaniʼ la? zaca binni nuu xpiaaniʼ» (Proverbios 13:20).

¿Ñee nuu binni huaniisi ni zanda gaca ti ejemplu galán para xiiñiluʼ ni naca joven la? ¿Zanda gúniluʼ xiixa para ganda chuʼ xiiñiluʼ gaxha de ca binni ca la? Peru qué riníʼ diʼ nga maʼ qué zácaluʼ responsable de xiiñiluʼ. Pa gudiiluʼ lugar gacané ca binni huaniisi ne ni nápaluʼ confianza, ne ni nánnaluʼ qué zuniná xiiñiluʼ, zanda gudiicabe xcaadxi conseju xiiñiluʼ ni zanda gacané laa. Biblia ruzeeteʼ de ti joven biree láʼ Timoteo, ni guleendú stale cosa galán purtiʼ gucané ti binni huaniisi biree láʼ apóstol Pablo laa, ne gucaneruʼ Pablo laabe neca maʼ huaniisibe. Pablo laaca guleendú cosa galán ra biuu gaxha de Timoteo (Filipenses 2:20, 22).

Tiempu nabáninu riʼ, stale familia cadi nuucaʼ tobi si purtiʼ gadxé ra nabeza ca bixhozebiidaʼ, ca stiuʼ ne xcaadxi de familia sticaʼ. Pa nabézaluʼ zitu de ca familia stiluʼ, biʼniʼ stipa guiziidiʼ xiiñiluʼ ni naca joven de xcaadxi binni huaniisi ni napa cualidad o guenda ni lii ñuuláʼdxiluʼ ñapa xiiñiluʼ.

^ párrafo 9 Estudiu que laaca bizeeteʼ, ca joven ca riquiiñecaʼ biaʼ gaʼ hora ca aparatu electrónicu guiráʼ dxi, sin nigaba ca hora ni riquiiñeʼ ca joven ne ca xcuidi Internet ora nuucaʼ ra scuela o cayúnicaʼ tarea sticaʼ.