Biiyaʼ guiraʼ ni nuu lu sitiu riʼ

guyé lu índice

 LAACABE GUNDA BICHAACABE

Ricardo ne Andrés

Ricardo ne Andrés

Educación ni rudii Biblia napa ni capacidad para gacané ni binni guchaa xquendanabani. Guidúʼyanu ximodo gucané ni Ricardo ne Andrés.

RICARDO. Dxi napaʼ 15 iza, guyuaaʼ lade ti pandilla. Cumu nahuiineruaʼ la? cani deruʼ guca xhamiguaʼ que bichaacaʼ modo riníʼ ique. Ne ni jma gucuá iqueʼ nga chuaaʼ chii iza ndaaniʼ cárcel. Zándaca ruluíʼ ti guendahuati ni, peru ndaaniʼ barriu ra nabezaʼ que nabé runi respetárcabe ne rusisácacabe cani huadeguyoo. Ne naa rapaʼ gana gacaʼ casi cani huadeguyoo que.

Gupaʼ ti vida inmoral, gucaʼ drogar ne nabé gudindeniáʼ binni. Ti gueelaʼ gudindenedu sti pandilla de balazu. Naa rabeʼ ñuuticabe naa raqué, peru gunda bixooñeʼ. Óraque guníʼ iqueʼ chaahueʼ de xquendanabaneʼ ne de cani cá iqueʼ guneʼ. Gudixheʼ iqueʼ guchaaʼ, peru ¿ximodo guneʼ ni yaʼ? ¿Tu gacané naa yaʼ?

Stale de ca familia stinneʼ nápacaʼ stale guendanagana ne cadi nabánicaʼ nayecheʼ, peru familia stiʼ tobi de ca stiuaʼ maʼ gadxé laacaʼ. Nannaʼ nacháʼhuicabe ne rúnicabe ni ná Biblia lu xquendanabánicabe. Maca gúdxicabe naa Jiobá nga láʼ Dios. Ngue runi, cadi xadxí de gudíndedu de balazu que, bineʼ orar Jiobá ne guniéʼ labe ne gunabaʼ laabe gacanebe naa. Sti dxi que bixhidxináʼ ti testigu stiʼ Jiobá ra puertaʼ lidxeʼ, qué guirá guidxagayaaʼ. Ne bizulú biʼniʼ estudiárnebe naa Biblia.

Qué nindaa bidxaagaluáʼ ti guendanagana naroʼbaʼ. Cani guca xhamiguaʼ, riníʼnecaʼ naa pur teléfono para guibiguetaʼ ra nuucaʼ. Neca nagana guca para naa, peru gudxeʼ laacabe coʼ. Maʼ gudixheʼ iqueʼ cadi gusaanaʼ de guneʼ estudiar Biblia, ne riecheʼ purtiʼ gunda bineʼ ni. Bichaa guidubi naca xquendanabaneʼ ne yanna nga dxandíʼ nuaaʼ nayecheʼ.

Guyuaaʼ dispuestu chuaaʼ chii iza ndaaniʼ cárcel para guneʼ ganar respetu stiʼ ti pandilla. Ngue runi gunabaʼ Dios gudii lugar iquiiñeʼ chii iza de xquendanabaneʼ para gacaniáʼ xcaadxi binni guiziidicaʼ de Biblia, cásica gucanécabe naa. Bicabi Dios oración stinneʼ, purtiʼ maʼ ziniáʼ diecisiete iza de cayuneʼ ni. Ne nánnatu xi la? qué ñuu dxi ñuaaʼ ndaaniʼ cárcel.

Stale de cani guca xhamiguaʼ que dede yanna nuurucaʼ ndaaniʼ cárcel purtiʼ bíʼnicaʼ cosa malu, ne xcaadxi de laacaʼ maʼ guti. Rudieeʼ xquixe ca familia stinneʼ ni naca Testigu, purtiʼ guyuucaʼ dispuestu gusihuínnicaʼ maʼ gadxé laacaʼ ne guibánicaʼ casi rusiidiʼ Biblia. Yanna, jma napaʼ respetu laacabe que respetu ni gupaʼ pur tutiica pandilleru. Peru jma nga rudieeʼ xquixe Dios purtiʼ bisiidiʼ naa ximodo nga jma jneza guibani binni.

 ANDRÉS. Guleʼ ne biniiseʼ ndaaniʼ ti barriu nabé pobre, nuu droga lugar que, ruuticabe binni, runi extorsionárcabe binni ne nuu prostitución. Bixhozeʼ guca alcohólico ne gupa viciu stiʼ cocaína. Laabe ne jñaaʼ siempre maʼ cadinde diidxacabe ne maʼ caguusaacabe golpe laacabe.

Nahuiineruaʼ dxi bizuluáʼ guxudxeʼ ne gucaʼ drogar. Casi puru lu calle rizayaʼ, ribanaʼ stiʼ binni ne rutuaaʼ ni ribanaʼ. Gudiʼdiʼ iza, gucalaʼdxiʼ bixhozeʼ ñaca xhamigu naa peru cadi jneza modo bíʼnibe ni, purtiʼ bisiidibe naa cuaaʼ droga ne xcaadxi mercancía ilegal ndaaniʼ país stidu ne despué gutoʼdo cani. Qué nindaa maʼ bineʼ ganar stale bueltu. Ti dxi bedandá puliciá ra lidxeʼ. Gunaazecabe ne biʼniʼ sentenciárcabe naa chuaaʼ gaayuʼ iza ndaaniʼ cárcel purtiʼ gucalaʼdxeʼ ñuuteʼ binni.

Ti siadóʼ biʼniʼ invitárcabe guiráʼ cani deguyoo chigucaadiágacaʼ ti plática ni chigudii ca testigu stiʼ Jiobá, guyaaʼ yegucaadiagaʼ. Jneza guiráʼ ni guníʼcabe, ngue runi, rabeʼ zaa guicaaʼ ti cursu de lu Biblia. Ca Testigu que bisiacaʼ diidxaʼ ora bisiidicaʼ naa de ca norma moral stiʼ Dios ni zeeda lu Biblia.

Nagueendaca bidieeʼ cuenta caquiiñeʼ gacanécabe naa para ganda guchaaʼ, ne jmaruʼ si ora biiyaʼ bizulú biʼniʼ amenazar xcaadxi ni deguyoo que naa purtiʼ qué riuuláʼdxicaʼ guneʼ estudiar Biblia. Gunabaʼ Jiobá gudii stipa ne guendabiaaniʼ naa. Ngue gucané naa para gunda bidxieeluáʼ ca amenaza stícabe ne gunda gunieniáʼ laacabe de ni caziideʼ.

Guizáʼ nuaaʼ nervioso dxi bireeʼ de ndaaniʼ cárcel que, pa ñanda si ñaanaʼ xcaadxi tiempu ndaaniʼ ni. Ora zireeʼ que, chupa chonna de cani deguyoo que cuzabinacaʼ luáʼ para gábicaʼ naa adiós. Dede nuu tu laa gudxi naa né cariñu: «Sicarú cheluʼ, vangeliuhuiiniʼ».

Ridxibeʼ ora guiníʼ iqueʼ xi ñaca xa de xquendanabaneʼ pa ñaca qué nudieeʼ lugar nusiidiʼ Dios naa. Rudieeʼ xquixe Dios pur guendarannaxhii ni runi sentir pur naa ne purtiʼ qué ñuuyaʼ naa casi ti binni ni maʼ qué zaca chaahuiʼ. *

^ párrafo 15 Lu zadxélaluʼ experiencia stiʼ xcaadxi binni ni gunda bichaa purtiʼ gucané Biblia laa. Guyé ra ná CANI RUSIIDIʼ BIBLIA > GUENDANAYECHEʼ NE GUENDARIUUDXI.