Biiyaʼ guiraʼ ni nuu lu sitiu riʼ

guyé lu índice

Para ganda gusianda ti remediu binni, caquiiñeʼ guni atacar ni dede ra biale guendahuará ca ne cadi ca síntoma si stini.

 NI RACA NAGANA

¿Ximodo guidxélanu ra biale guendanagana ca?

¿Ximodo guidxélanu ra biale guendanagana ca?

¿Ñee raʼbuʼ zedandá dxi zuni chaahuiʼ binni ca guendanagana ni rucueeza de gápanu guendariuudxi ne cani zanda gucueeza de guibáninu galán lu futuro la? Para ganda gusianda ti remediu binni, caquiiñeʼ guni atacar ni dede ra biale guendanagana ca ne cadi ca síntoma si stini.

Quíxhenu ti ejemplu. Ti hombre láʼ Tom guca huará ne despué guti. ¿Xiñee gútibe yaʼ? Doctor ni nuu ra hospital yegataʼ Tom que bicaa ca diidxaʼ riʼ, ante gatiʼ Tom: «Ora bihuinni ca primé síntoma que, guirutiʼ tu ñuni investigar xi biʼniʼ causar cani». Zándaca cani biʼniʼ tender laabe dede ora bizulú guendahuará que, bidiicaʼ laabe medicina para tiidiʼ si yuubaʼ que.

¿Ñee zacaca cayaca né ca guendanagana ni napa binni la? Guzéʼtenu ti ejemplu, para ganda gucueeza ca gobiernu delincuencia, riguíxhecaʼ stale ley, riguucaʼ stale cámara de vigilancia ne riguucaʼ jma puliciá para gapa. Neca racané ca cosa riʼ laanu, peru qué runi atacar cani ra biale guendanagana ca, casi ca deseu stiʼ binni, actitud sticaʼ ne ni runi crecaʼ. Purtiʼ ca ndiʼ nga ni rucaa binni guni xiixa.

Daniel, ti hombre nabeza ndaaniʼ ti país stiʼ Sudamérica ni ziyaana economía stiʼ lu guendapobre, guníʼ: «Ante la? zanda guinidu bibánidu galán. Qué nidxíbidu pa nibáʼnacabe ca cosa stidu, peru yanna maʼ nin ti ladu qué zanda guibani binni né guendariuudxi. Pur guendanagana naroʼbaʼ cadiʼdiʼ guidxi riʼ, maʼ bisihuinni ni, stale binni riuulaʼdxiʼ gapa cosa risaca para laasi ne qué runi respetarcaʼ xquendanabani binni nin ca cosa risaca sticaʼ».

Ti hombre ni gupa xidé bixooñelú de guendaridinde ni cayaca neza Oriente Medio ne despué biʼniʼ estudiar Biblia, guníʼ: «Ndaaniʼ xquidxeʼ, ca familia, sistema políticu ne religioso rucaacaʼ ca joven cheʼ lu guerra ne zacá gácacaʼ ti héroe. Né cani cucaalú laacabe que laaca ngaca canábacaʼ laacabe. Bidieeʼ cuenta pur gana si nga gapa binni confianza ca gobiernu stiʼ guidxilayú».

Biiyaʼ pabiáʼ galán ca conseju zeeda lu Biblia:

  • «Ladxidóʼ hombre puru cosa malu rinabaʼ guni dede ora nahuiiniʼ» (Génesis 8:21).

  • «Ladxidóʼ binni nga ni jma riguite laa que intiica si cosa, ne qué ridxela ni xi guni ni. Tu zanda gunibiáʼ ni yaʼ» (Jeremías 17:9).

  • «Purtiʼ de ndaaniʼ ladxidóʼ binni reeda cosa malu ni riníʼ ique, guuti, [...] guni cometer pecadu sexual, cuanaʼ, falsu testimonio, cuʼ dí» (Mateo 15:19TNM).

Laanu, ca binni guidxilayú, qué huayanda diʼ gápanu capacidad para gundúʼxenu ca cosa malu ni maʼ biaʼnu gúninu. Ni dxandíʼ nga jmaruʼ si ziyaca empeorar ca cosa malu ni runi binni, pur ca guendanagana ni bizéʼtenu lu artículo gudídinu que (2 Timoteo 3:1-5). Ne rizaaca nga yanna neca nuu stale información, ne nuu stale forma para gaca comunicar binni jma que ante. Yanna, ¿xiñee qué zanda gacanenu gaca Guidxilayú riʼ ti lugar ra chuʼ guendariuudxi ne ra chuʼnu seguru yaʼ? ¿Ñee cadi cayuni exigirnu laanu stálepeʼ né ni nuunu gúninu ca la? ¿Ñee nuunu gúninu xiixa ni qué zanda gaca la?

¿ÑEE NUUNU GÚNINU XIIXA NI QUÉ ZANDA GACA LA?

Neca ñaca ti milagru ne ñanda nibeenu ca cosa malu ni maʼ biaa binni guni, qué zanda diʼ gaca  Guidxilayú riʼ ti lugar seguru. ¿Xiñee yaʼ? Purtiʼ nuu stale cosa ni qué randa runi binni.

Ni dxandíʼ nga: «Cadi lu náʼ diʼ binni nuu neza stiʼ» ne nin qué zanda «guni mandar ra guzuhuaa ñee» (Jeremías 10:23). Zacá ni, cadi bizáʼ diʼ Dios laanu para guni mandarnu laca laanu. Qué gápanu capacidad de guni mandarnu laca laanu, cásica qué gápanu capacidad de guibáninu ndaaniʼ nisa, o lu espaciu.

Qué gápanu capacidad de guni mandarnu laca laanu, cásica qué gápanu capacidad de guibáninu ndaaniʼ nisa, o lu espaciu.

Guníʼ ique ndiʼ, ¿ñee riuulaʼdxiʼ binni gábicabe laa ximodo guibani o xi ca norma moral chinanda lu xquendanabani la? ¿O gábicabe laa ximodo naquiiñeʼ guʼyaʼ aborto, pena de muerte o xi educación gudii xiiñiʼ la? Ndiʼ nga chupa chonna cosa ni runi dividir binni. Neca gaca nagana para laanu guni crenu ni, peru dxandíʼ ni ruzeeteʼ Biblia. Nga rusiidiʼ laanu, qué gápanu capacidad nin derechu de guni mandarnu laca laanu. Yanna, ¿tu laa zanda gacané laanu yaʼ?

Dios si nga zanda gacané laanu. Laasibe zanda gúnibe ni, purtiʼ laabe bizaʼbe laanu. Neca gadxé ni riníʼ ique stale binni, peru laabe qué rusiaandabe laanu. Ne ca conseju galán ni zeeda lu Biblia, rusihuinni cani pabiáʼ rizaaláʼdxibe laanu. Ora guiénenu xi ná libru sicarú riʼ, racané ni laanu guiene chaahuinu nuu cosa ni qué zanda gúninu ne guiénenu xiñee nabé triste modo huabani binni. Casi guníʼ ti filósofo alemán: «Qué lica huaziidiʼ ca nación ne ca gobiernu ca de guiráʼ ca cosa maʼ bizaaca binni, ne qué huayúnicabe gastiʼ para guni chaahuicabe ca cosa ni huazaacacabe».

RAPA CA CONSEJU STIʼ BIBLIA LAANU

Ti biaje guníʼ Jesús, Xiiñiʼ Dios, «rihuinni nuu xpiaaniʼ binni pur ni runi» (Lucas 7:35TNM). Guidúʼyanu ti ejemplu. Salmo 146:3 ná: «Cadi gápatu confianza ca príncipe, nin ca xiiñiʼ binni guidxilayú, ni qué zanda gulá laatu». Conseju galán riʼ zanda gacané ni laanu cadi cuézanu guizaaca ti cosa ni qué ziuu dxi gaca. Kenneth, ti hombre nabeza ndaaniʼ ti guidxi de Norteamérica ra nuu stale delincuencia, guníʼ: «Guiráʼ ca políticu runi prometercaʼ zuni chaahuicaʼ stale cosa, peru qué randa rúnicaʼ ni. Ca fracasu huayápacabe rusietenalaʼdxiʼ ni laanu pabiáʼ jneza ni ná Biblia».

Daniel, xa hombre ni bizéʼtenu que, bicaa: «Zeʼ dxi jma cayuuyaʼ dxiicheʼ nin ti binni guidxilayú qué zanda guni mandar jneza. Gapa ti binni bueltu ndaaniʼ bancu o gapa ti pención galán, qué riníʼ diʼ nga zabánibe galán dxi maʼ guiniisibe. Runebiaʼyaʼ stale binni ni nabé guyuu triste purtiʼ guca desilusionarcaʼ».

Cadi rabi si Biblia laanu cadi cuézanu guizaaca ti cosa ni qué ziuu dxi gaca, laaca rudii ni laanu esperanza, casi zadúʼyanu jma delante.