Biiyaʼ guiraʼ ni nuu lu sitiu riʼ

guyé lu índice

Gápanu fe lu cani maʼ bidii stiidxaʼ Jiobá

Gápanu fe lu cani maʼ bidii stiidxaʼ Jiobá

«Fe nga [...] ca cosa ni runi crenu dxandíʼ zaca neca qué rihuinni cani» (HEBREOS 11:1TNM).

DIIDXAʼ RIUUNDAʼ: 54 NE 43

1. Ximodo naquiiñeʼ guni sentirnu purtiʼ nápanu fe.

CADI guiráʼ diʼ binni nga napa fe (2 Tesalonicenses 3:2). Peru rudii Jiobá fe guiráʼ tu guni adorar laa (Romanos 12:3; Gálatas 5:22). Naquiiñeʼ gudiʼnu xquíxepeʼ laabe purtiʼ racanebe laanu gápanu fe.

2, 3. a) Xi ndaayaʼ zacaanu pur fe ni nápanu. b) Xi guendarinabadiidxaʼ zacábinu lu tema riʼ.

2 Bidii Jiobá Xiiñiʼ ni nadxii para guixá donda stiʼ guiráʼ binni gapa fe Jesús. Pa gápanu fe laabe la? zanda gaca xhamígunu Jiobá ne guibáninu sin gátinu (Juan 6:44, 65; Romanos 6:23). Nabé nachaʼhuiʼ huayaca Jiobá né laanu. Neca nácanu binni ruchee ne runi merecernu gátinu, biiyabe zanda gúninu ni jneza (Salmo 103:10). Nga runi, bisiidibe laanu de Jesús ne de guendaguti stiʼ. Dxi gúpanu fe Jesús ne gúcanu xpínnibe la? bizulú gúpanu esperanza zanda guibáninu sin gátinu (biindaʼ 1 Juan 4:9, 10).

3 Xiruʼ zanda guizíʼdinu de fe ca yaʼ. Pa racaláʼdxinu gápanu  fe, ñee caquiiñeʼ si gánnanu xi maʼ biʼniʼ Dios pur laanu ne ni chigúnibe la? Naquiiñeʼ gúninu sti cosa. Guidúʼyanu xi laani.

GUSIHUÍNNINU FE NI NÁPANU NDAANIʼ LADXIDOʼNO

4. Xi ziuuláʼdxinu gúninu pa nápanu fe.

4 Pa nápanu fe Jiobá ne Jesús, qué ziuʼnu conforme gánnanu xi maʼ bíʼnicabe ne xi chigúnicabe pur laanu. Ziuuláʼdxinu guibáninu modo cusiidicabe laanu ne zacanenu xcaadxi binni gunibiáʼ laacabe. Apóstol Pablu guníʼ: «Pa iníʼ lu Jesús nga xpixuaana irá xixé, ne guni cre lu de idubi ladxidóʼ lo dxandí undisa Dios laabe de lade gueʼtu la? zalá luʼ. Purti ndaani ladxidóʼ cabe runi cre cabe para ixá stonda cabe, ne ra iníʼ cabe ni nezalú binni la? zalá cabe» (Romanos 10:9, 10; 2 Corintios 4:13).

5. a) Xiñee nabé risaca gápanu fe. b) Bisiene né ti ejemplu xi naquiiñeʼ gúninu ti gaca fe stinu naguidxi.

5 Pa racaláʼdxinu guibáninu sin gátinu ndaaniʼ guidxilayú cubi stiʼ Dios, naquiiñeʼ gápanu fe ne guyúbinu modo gaca ni jma naguidxi. Fe ca zeeda gaca ni casi ti yaga. Para chuʼ ti yaga galán ne guiniisi ni jma la? caquiiñeʼ guizee ni gatigá. Pa qué gúninu ni, zaguunduʼ ni ne zabidxi ni. Zacaca nga laanu, naquiiñeʼ chuʼnu seguru dxandíʼ naguidxi fe stinu ne cadi gusaana de guquídxinu ni (Tito 2:2; 2 Tesalonicenses 1:3; Lucas 22:32; Hebreos 3:12).

XIMODO RUSIENE BIBLIA XII NGA FE

6. Xi chupa modo rusiene Biblia fe ni rieeteʼ lu Hebreos 11:1.

6 Chupa modo nga rusiene Biblia xii nga fe. Sicaríʼ nani: «Fe nga chuʼnu seguru de ca cosa ni cabézanu ne laani nga ca cosa ni runi crenu dxandíʼ zaca neca qué rihuinni cani» (Hebreos 11:1TNM). Primé la? nani fe nga «chuʼnu seguru de ca cosa ni cabézanu». Ca cosa ni cabézanu nga cani maʼ bidii stiidxaʼ Dios chiguni. Nuunu seguru zabeebe guiráʼ ca cosa malu ca ne ziuu ti guidxilayú cubi. Ne guiropa, Biblia na fe nga «ca cosa ni runi crenu dxandíʼ zaca neca qué rihuinni cani». Caadxi de cani dxandíʼ nuu peru qué ridúʼyanu nga Jiobá, Jesucristu, ca ángel ne Reinu ni nuu guibáʼ (Hebreos 11:3). Ximodo rusihuínninu dxandíʼ nápanu fe lu cani maʼ bidii stiidxaʼ Dios ne lu ca cosa ni qué ridúʼyanu yaʼ. Rusihuínninu ni pur modo nabáninu ne pur ni rininu ne pur cani rúninu.

7. Ximodo racané ejemplu stiʼ Noé laanu para guiénenu xi riníʼ gápanu fe. (Biiyaʼ dibuju ni zeeda ra ruzulú tema riʼ).

7 Ejemplu stiʼ Noé racané laanu guiénenu xi riníʼ gápanu fe. Apóstol Pablu guníʼ, gudxi si Dios Noé xi chi guizaaca biʼniʼ crebe ni «neca caʼru guʼya be ni». Cumu racaláʼdxibe gusiéchebe Dios la? «bizáʼ be arca ra bilá né be binni lidxi be» (Hebreos 11:7). Gupa Noé fe lu cani gudxi Jiobá laa, ngue runi bíʼnibe arca naroʼbaʼ que. Zándaca gunabadiidxaʼ ca xpecínube laabe xiñee cuzaʼbe arca que. Zanda chuʼnu seguru guniʼné Noé ca binni que, purtiʼ Biblia na gúdxibe «laaca nusaana ca irá enda ruchee sticaʼ» (2 Pedro 2:5). Gúdxibe laacaʼ zedané Dios ti nisaguié naroʼbaʼ para gunduuxeʼ guiráʼ guendaquéiquiiñeʼ que. Zándaca gúdxibe laacaʼ nipeʼ gudxi Jiobá laabe: «Maʼ gudixheʼ iqueʼ guniteluáʼ guiráʼ binni, purtiʼ maʼ dxaʼ tipa guidxilayú riʼ de guendaridinde».  Jiobá laaca gudxi Noé: «Chigusabaʼ ti nisaguié naroʼbaʼ lu guidxilayú para guniteluáʼ guiráʼ guendanabani ni ricaa bi lu guidxilayú. Zanitilú guiráʼ ni nuu lu guidxilayú». Despué, zándaca gudxi Noé ca binni que xi naquiiñeʼ gúnicaʼ para guilacaʼ. Jiobá gudxi laabe: «Napa xidé chuʼluʼ ndaaniʼ arca ca» (Génesis 6:13, 17, 18).

8. Xi guníʼ Santiagu de fe.

8 Laaca bicaa discípulo Santiagu de fe. Zándaca bíʼnibe ni despué de bicaa Pablu carta ra nuu ca xpinni Cristu ni riníʼ hebreu. Santiagu guníʼ: «Ximodo zanda ganna pa dxandí runi cre lu [o napuʼ fe], pa qué ruʼnu jneza. Naa zanda ulué lii dxandí rune cre [o napaʼ fe] purti rune jneza» (Santiago 2:18). Laabe caniʼbe, para gápanu fe la? cadi naquiiñeʼ si guni crenu Dios, sínuque caquiiñeʼ gúninu sti cosa. Ca demonio runi crecaʼ Dios peru qué gápacaʼ fe laabe. Ni rúnicaʼ nga rucaalucaʼ laabe né stale stipa (Santiago 2:19, 20). Ndiʼ nga laani: ca binni ni napa fe Dios racaláʼdxicaʼ gusiéchecaʼ laabe ora gúnicaʼ ni jneza. Nga nga ni biʼniʼ Abrahán. Sicaríʼ bicaa Santiagu: «Xi pur bixhá Dios stonda  Abraham, bixhoze gola nu yaʼ. Purti jneza biʼni be ra bidii be xiiñi be ñati para nusigaʼde be laa. Bihuinni bini cre be [o gúpabe fe] purti biʼni be jneza. Nga runi bisaca fe stibe nezalú Dios». Despué guníʼ Santiagu qué iquiiñeʼ fe stinu pa qué rúninu ni jneza. Laabe guniʼbe: «Cásica qué iquiiñe xcuerpu nu sin espíritu stinu la? zaqueca nga qué iquiiñe modo runi cre nu [o fe stinu] pa qué guni nu jneza» (Santiago 2:21-23, 26).

9, 10. Xi naquiiñeʼ gúninu pa racaláʼdxinu gápanu fe Xiiñiʼ Dios.

9 Jma de 30 iza de bicaa Santiagu de fe, bicaa Juan Evangeliu stiʼ ne chonna carta. Cásica xcaadxi hombre bicaa Biblia, laaca biene Juan xii nga fe. Stale biaje biquiiñebe ti diidxaʼ griegu ni zanda gutiixhinu laa diidxazá casi «gápanu fe».

10 Juan guníʼ sicaríʼ: «Tu runi cre [o gapa fe] Xiiñi be la? napa enda nabani ni qué zaluxe, peru tu qué uzuuba stiidxa Xiiñi be, qué zapa di enda nabani, sínuque xiana stibe nuu luguiáʼ» (Juan 3:36). Para gápanu fe Xiiñiʼ Dios la? naquiiñeʼ guzúʼbanu stiidxaʼ. Ora ridúʼndanu guiráʼ ni bicaa Juan, ridúʼyanu gatigá bisiidiʼ Jesús caquiiñeʼ gápanu fe laa ne Bixhoze para guicaanu guendanabani ni qué zaluxe (Juan 3:16; 6:29, 40; 11:25, 26; 14:1, 12).

11. Ximodo rusihuínninu rudiʼnu xquíxepeʼ Jiobá pur rusiidiʼ laanu ni dxandíʼ.

11 Biquiiñeʼ Jiobá espíritu santu stiʼ para gacané laanu guiénenu ni dxandíʼ de laa ne de Xiiñiʼ, ne para gacané laanu gápanu fe laacaʼ (biindaʼ Lucas 10:21). Ximodo rusihuínninu rudiʼnu xquíxepeʼ Jiobá pur ni maʼ biʼniʼ yaʼ. Cadi gusaana de gudiʼnu xquíxepeʼ laabe purtiʼ caquiiñebe Jesús para gudiibe lugar gaca xhamígunu laabe, «purti nirudóʼ laa uzá lu neza udixhe Dios sa cani runi cre [o napa fe] laa» (Hebreos 12:2). Laaca cadi naquiiñeʼ gusaana de guquídxinu fe stinu. Ximodo yaʼ. Guni orarnu ne cadi gusaana de guidúʼndanu Biblia (Efesios 6:18; 1 Pedro 2:2).

Cada biaje ganda gúninu ni, guinínenu binni de Reinu stiʼ Dios para gusihuínninu nápanu fe. (Biiyaʼ párrafo 12).

12. Xi zúninu pa nápanu fe.

12 Pa nápanu fe lu cani maʼ bidii stiidxaʼ Jiobá, zusihuínninu ni né cani gúninu. Qué zusaana de guinínenu binni de Reinu stiʼ Dios ne zacanenu laacabe chinándacabe Jesús. Laaca qué zusaana de gacanenu binni «peru jma pe naquiiñe guni nu ni lade ca hermanu» (Gálatas 6:10). Ne zúnirunu stipa pur gusaananu guiráʼ ni bíninu dxiqué, purtiʼ qué racaláʼdxinu gúninu xiixa ni guxheleʼ laanu de Jiobá (Colosenses 3:5, 8-10).

GÁPANU FE DIOS NGA BASE STINU

13. a) Xiñee nabé risaca gápanu fe Dios. b) Xi riníʼ Biblia de fe, ne xiñee.

13 Biblia na qué zanda gusiéchenu Dios pa qué gápanu fe, «purti para idxiña cabe laabe la? napa cabe xidé guni cre cabe nuu be ne rulabi be cani uyubi laabe» (Hebreos 11:6). Laaca ruzeeteʼ Biblia zeeda gaca fe ca casi base stinu. Xiñee yaʼ. Purtiʼ fe ca nga tobi de ca primé cualidad ni naquiiñeʼ gapa ti xpinni Cristu (Hebreos 6:1). Peru aparte de fe ca caquiiñenu xcaadxi cualidad nabé risaca ni zacané laanu chuʼnu jma gaxha de Dios (biindaʼ 2 Pedro 1:5-7; Judas 20, 21).

14, 15. Xiñee jma risaca gannaxhiinu que gápanu fe.

14 Ca hombre ni bicaa Biblia jma nga ruzeetecaʼ de fe que de xcaadxi cualidad. Ñee riníʼ nga jma risaca  gapa ti xpinni Cristu fe que xcaadxi cualidad la? Guidúʼyanu.

15 Pablu bichaaga fe ca ne guendarannaxhii. Laabe guniʼbe: «[Pa] ñapa stale fe dede nutuuba dani de ra zuba, peru qué ñanaxhiee binni la? gasti nga naa» (1 Corintios 13:2). Ne Jesús guníʼ gannaxhii binni Dios nga «mandamientu ni jma risaca lade idubi ley» (Mateo 22:35-40). Ora rannaxhiinu, racané ni laanu gápanu stale cualidad ni riuulaʼdxiʼ Dios. Biblia na, ora nadxiinu runi crenu stale cosa. Nga runi, guendarannaxhii ca racané ni laanu guni crenu o gápanu fe guiráʼ ni rabi Dios laanu lu Biblia (1 Corintios 13:4, 7).

16, 17. a) Ximodo rusihuinni Biblia naca fe ne guendarannaxhii cualidad nabé risaca. b) Gunáʼ nga ni jma risaca lu guiropaʼ cualidad riʼ, ne xiñee laani nga ni jma risaca.

16 Biblia na fe ne guendarannaxhii nga ca cualidad nabé risaca. Nga runi, ca hombre bicaa Biblia stale biaje bizeetecaʼ guiropaʼ cani juntu. Casi Pablu la? guluube gana ca xpinni Cristu cadi gusaanacaʼ fe sticaʼ ninca cadi gusaanacaʼ de gannaxhiicaʼ (1 Tesalonicenses 5:8). Sicaríʼ guníʼ Pedru de Jesús: «Qué huayuuya tu laabe peru nadxii tu laabe. Ne neca qué ruuya tu laabe, peru runi cre tu [o nápatu fe] laabe» (1 Pedro 1:8). Santiagu gudxi ca biʼchiʼ ni bibí sicaríʼ: «Gulí Dios ca pobre ndaani guidxilayú ri ti isaca ca ra guni cre ca [o gápacaʼ fe] laa, ne icaa ca irá ni naguixhe chaahui be ra runi mandar be para icaa cani nadxii laabe» (Santiago 2:5). Ne Juan guníʼ cayuni mandar Dios laanu «guni cre nu [o gápanu fe] Jesucristu Xiiñi be, ne ganaxhii saa nu» (1 Juan 3:23).

17 Peru laaca bizeeteʼ Pablu, ca dxi stinu riʼ «ziaana chonna cosa ni jma risaca: guni cre nu Dios, ne icá lú nu laa, ne ganaxhii saa nu. Peru ni jma risaca lade guionna nga la? nga enda ranaxhii» (1 Corintios 13:13). Xiñee guníʼ Pablu guendarannaxhii ca nga ni jma risaca lade guionnaʼ cualidad riʼ yaʼ. Purtiʼ despué maʼ qué zaquiiñeʼ diʼ gápanu fe lu cani maʼ bidii stiidxaʼ Dios de ti guidxilayú cubi. Maʼ zabáninu nayecheʼ casi ruzeeteʼ Biblia. Peru caquiiñenu guendarannaxhii ca purtiʼ zacá zanda gannaxhiinu Dios ne binni. Ne qué zusaana de guiniisi guendarannaxhii stinu pur laacabe.

MAʼ GULUU JIOBÁ NDAAYAʼ FE STIʼ XQUIDXI

18, 19. Xi cabeendú ca xpinni Dios de tiempu riʼ pur nápacaʼ fe, ne tuu nga gusisácanu pur cani maʼ guca riʼ.

18 Ca xpinni Dios de tiempu riʼ rudiicaʼ lugar gabi espíritu santu laacaʼ xi gúnicaʼ lu xquendanabánicaʼ. Nga runi nápacaʼ fe Reinu stiʼ Dios ne riuucabe pur laa. Ne laaca rannaxhiisaacabe (Gálatas 5:22, 23). Ne pur nga, lu guidubi Guidxilayú nuu jma de xhono millón de hermanu ni nuudxí ne nuucaʼ tobi si ndaaniʼ ca congregación ca. Casi maʼ bidúʼyanu, fe ne guendarannaxhii nga ca cualidad ni risaca.

19 Pur cayacané Jiobá ca xpinni nga nuucaʼ tobi si. Runi merecerbe gusisácanu laabe pur ni cayúnibe riʼ (Isaías 55:13). Rudiʼnu xquíxepeʼ Jiobá pur cudii laanu ti modo ganda guilanu pur fe ni gápanu (Efesios 2:8). Zacaneruʼ Jiobá stale binni para gápacaʼ fe laabe. Ne ziuu dxi, guidubi naca Guidxilayú ziuu binni sin donda, ni runi ni jneza ne nayecheʼ, ne qué zusaanacaʼ de gusisácacaʼ Jiobá.