Biiyaʼ guiraʼ ni nuu lu sitiu riʼ

guyé lu índice

Ñee rusisácanu Dios pur modo rácunu lari la?

Ñee rusisácanu Dios pur modo rácunu lari la?

«Laguni irá ni para usisaca tu Dios» (1 CORINTIOS 10:31).

DIIDXAʼ RIUUNDAʼ: 34 NE 29

1, 2. Xiñee nabé risaca para ca testigu stiʼ Jiobá guzuchaahuicaʼ jneza. (Biiyaʼ foto ni zeeda ra ruzulú tema riʼ).

TI PERIÓDICU holandés bizeeteʼ ximodo nacu caadxi xaíque stiʼ caadxi religión lari dxi gúpacaʼ ti reunión. Bizeeteʼ ni stale de ca xaíque stiʼ ca religión que zinecaʼ lari informal, jmaruʼ si purtiʼ guizáʼ nandáʼ dxi que. Laaca bizeeteʼ periódicu riʼ de ca testigu stiʼ Jiobá dxi guyecaʼ ti asamblea, ne na maʼ gadxé modo gúcucabe lari. Bizeeteʼ ni nacu ca baʼduhuiiniʼ ne ca hombre sacu ne nuu corbata yánnicaʼ. Laaca bizeeteʼ ni bizuchaahuiʼ ca dxaapahuiiniʼ ne ca gunaa que né falda ni nacubi caree, peru nasoo cani biaʼ caquiiñeʼ gaca cani. Nabé runi felicitárcabe ca testigu stiʼ Jiobá pur modo ruzuchaahuicaʼ. Apóstol Pablu gudxi ca xpinni Cristu que naquiiñeʼ gácucaʼ lari jneza ne gusihuínnicaʼ nuu xpiaanicaʼ, purtiʼ zacá nga naquiiñeʼ guni ca xpinni Dios (1 Timoteo 2:9, 10). Neca ca gunaa nga guniʼné Pablu la? ca diidxaʼ guniʼbe riʼ laaca zacané ni ca hombre.

2 Para ca xpinni Dios nabé risaca nga guzuchaahuinu jneza purtiʼ laaca risaca ni para Dios ni cayúninu ni na (Génesis 3:21). Jiobá nga Rey lu universu. Ne Biblia rusiene chaahuiʼ nápabe caadxi ley ni caníʼ ximodo gacu ca xpínnibe lari. Nga runi cadi laasinu nga naquiiñeʼ chuuláʼdxinu  lari ni gácunu. Ni jma risaca nga chuulaʼdxiʼ Jiobá ni, Dios ne Rey stinu.

3. Xi rusiidiʼ ley gucuaa Moisés laanu de modo gácunu lari.

3 Lu Ley gucuaa Moisés que beeda caadxi ley ni bicueeza ca israelita que de gúnicaʼ ca cosa dxabaʼ ni biʼniʼ ca binni de ca guidxi guyuu gaxha de laacaʼ. Ley que bisihuinni nanalaʼdxiʼ Jiobá gacu binni lari ni qué gusihuinni pa hombre o pa gunaa laa. Biblia na: «Cadi naquiiñeʼ gacu ti gunaa xhaba hombre, nin hombre cadi naquiiñeʼ gacu xhaba gunaa. Purtiʼ nanalaʼdxiʼ Jiobá, Dios stiluʼ, tutiica guni zacá» (Deuteronomio 22:5). Ley gucuaa Moisés que rusiidiʼ laanu qué riuulaʼdxiʼ Jiobá gacu ti hombre lari ni gusihuinni gunaa laa, ninca gunaa gacu lari ni gusihuinni hombre laa, nin lari ni qué gusihuinni pa hombre o pa gunaa tuuxa.

4. Xi zacané ca xpinni Cristu cuí chaahuicaʼ xi lari gácucaʼ.

4 Ca principiu zeeda lu Biblia zanda gacané cani laanu cuí chaahuinu xi lari gácunu. Risaca ca principiu riʼ ndaaniʼ intiica guidxi, clima o cultura nápanu. Cadi caquiiñenu ti lista ziuulaʼ ni gabi laanu xi gácunu o xi cadi gácunu. Ni caquiiñesinu nga chinándanu ca principiu zeeda lu Biblia ni zacané laanu gácunu lari ni riuuláʼdxinu. Guidúʼyanu caadxi principiu ni zacané laanu gánnanu «xii nga racalaʼdxi Dios guni [nu], ni nachaʼhui ne ni chuʼlaʼdxiʼ ne ni jneza peʼ» ora cuinu xi gácunu (Romanos 12:1, 2).

«RACALAʼDXI DU USIHUINNI DU XHIIÑA DIOS CAYUNI DU»

5, 6. Xi naquiiñeʼ gucaʼnu binni guni pur modo gácunu lari.

5 Bicaa Jiobá apóstol Pablu gucaa principiu nabé risaca ni zeeda lu 2 Corintios 6:4 (biindaʼ ni). Pur modo rácunu lari zuluinu tu nácanu ne zucaa ni binni guiníʼ ique ximodo laanu (1 Samuel 16:7). Laanu ca xpinni Dios, cadi naquiiñeʼ gácunu xiixa lari purtiʼ si galán runi sentirnu ndaaniʼ ni o purtiʼ si riuuláʼdxinu ni. Ca principiu zeeda lu Biblia naquiiñeʼ gacané cani laanu para cadi gácunu lari ni nabéʼ o ni ruquiichiʼ laanu. Cadi naquiiñeʼ gácunu lari ni gusihuinni xiixa parte de cuerpu stinu ni cadi naquiiñeʼ guihuinni. Cadi naquiiñeʼ guchiiñanu guirutiʼ pur modo nácunu lari dede gucaʼnu laa guyadxí sti ladu.

6 Pa nayá xhábanu, zuchaahuinu galán ne nácunu lari jneza, zándaca jma zapa binni respetu xquidxi Dios ne laaca zapa respetu laanu casi xpinni Jiobá. Zándaca dede ziuuláʼdxicabe guiziidicabe de Dios ni runi adorarnu. Ne jma zanácabe gucaadiágacabe laanu ora chigucheechenu diidxaʼ.

7, 8. Pora nga jma naquiiñeʼ gácunu lari jneza.

7 Cumu nápanu respetu Jiobá, ti Dios ni nayá, ne nápanu respetu ca hermanu ne ca binni ni nuu lu territorio stinu la? naquiiñeʼ gácunu lari ni gusisaca Jiobá ne cani rusíʼdinu (Romanos 13:8-10). Nabé risaca nga gácunu lari jneza, ne jmaruʼ si ora chuunu reunión o chigucheechenu diidxaʼ. Modo gácunu lari naquiiñeʼ gusihuinni ni runi adorarnu Dios (1 Timoteo 2:10). Dxandíʼ, nuu lari ni zanda gácunu ti lugar peru cadi jneza gácunu ni sti lugar. Nga runi, ra tiica nabézanu, laanu ca testigu stiʼ Jiobá naquiiñeʼ gácunu lari ni cadi guchiiñaʼ xcaadxi binni.

Ñee zucaa modo rácunu lari xcaadxi binni guni respetarcaʼ Dios ni runi respetarnu la? (Biiyaʼ párrafo 7 ne 8).

8 (Biindaʼ 1 Corintios 10:31). Ora maʼ ziuunu ca asamblea ca, naquiiñeʼ gácunu lari biáʼsipeʼ para dxi ca ne gusihuinni  ni nácanu binni nuu xpiaaniʼ. Cumu nabé feu modo racu binni lari lu Guidxilayú la? cadi naquiiñeʼ chinándanu modo rácucabe lari. Laaca cadi naquiiñeʼ gácunu lari nabé informal ante ne despué de cada asamblea, nin ora chuʼnu ndaaniʼ hotel nin ora guireʼnu. Pa gúninu zacá la? zadxátipa ladxidoʼno ora guininu nácanu testigu stiʼ Jiobá ne ziuunu listu para guinínenu binni de laabe ora tiisi.

9, 10. Ximodo naquiiñeʼ gacané Filipenses 2:4 laanu ora cuinu xi lari gácunu.

9 (Biindaʼ Filipenses 2:4). Xiñee naquiiñeʼ guizaaláʼdxinu modo guʼyaʼ ca hermanu stinu laanu ora guzuchaahuinu. Ti razón nga purtiʼ runi ca xpinni Dios stipa pur chinándacaʼ conseju riʼ: «Lagaxha irá ni zeeda de guidxilayú ri ndaani ladxidóʼ to. Nin tobi de laatu cadi chuʼ né ni cadi xheelaʼ, nin guni gasti ni nadxabaʼ. Cadi chi nanda tu ni na ique tu, nin uluiʼlaʼdxi tu guni tu ni cadi jneza» (Colosenses 3:2, 5). Nuu de ca hermanu stinu guyuunecaʼ ni cadi xheelacaʼ ante gácacaʼ testigu stiʼ Jiobá, ne zándaca cudxiilúrucaʼ ca cosa malu ni ruquiinde laacaʼ gúnicaʼ. Pa qué chuʼnu cuidadu modo rácanu lari, zaca nagana para laacabe chinándacabe ca conseju zeeda lu Biblia ne cadi gudxiilúcabe ca cosa malu ni ruquiinde laacabe gúnicabe (1 Corintios 6:9-11). Cadi dxandíʼ qué racaláʼdxinu guizaaca nga la?

10 Ora maʼ nuunenu ca hermanu, rixélenu de ca binni ni rucaa stobi guni cosa dxabaʼ. Modo rácunu lari racané  ni chuʼ guiranu nayá, pa nuunu ra Yoo stiʼ Reinu o pa nuunu sti lugar. Dxandíʼ nga guiranu libre laanu cuinu xi lari gácunu. Peru laaca naquiiñeʼ gácunu lari ni gacané xcaadxi binni guiníʼ ique, guni ne guiníʼ modo riuulaʼdxiʼ Dios ne modo chuʼ nayá nezalú Dios (1 Pedro 1:15, 16). Ora dxandíʼ nadxiiluʼ binni qué zuʼnuʼ xiixa «para guniná lu laa, qué zuyubu para lii siouʼ» (1 Corintios 13:4, 5).

PORA NE PARAA GÁCULUʼ XIIXA LARI

11, 12. Ximodo racané Eclesiastés 3:1, 17 laanu gánnanu xi gúninu.

11 Ora cuinu xi lari gácunu, ca xpinni Dios nánnanu «para guiráʼ cosa nuu tiempu» (Eclesiastés 3:1, 17). Zándaca clima, temporada nuunu o xcaadxi cosa gucaa laanu gácunu xiixa clase lari. Peru cadi guiaandaʼ laanu, ca ley stiʼ Jiobá qué ruchaa cani (Malaquías 3:6).

12 Ndaaniʼ caadxi guidxi ra nabé nandáʼ jma nagana raca para binni cuí lari ni galán gacuʼ ne ni gusihuinni nuu xpiaaniʼ. Ca hermanu stinu runi sentircaʼ galán ora qué rácunu lari ni ruquiichiʼ laanu o lari nahuaahuaʼ ni gusihuinni xiixa parte de xcuérpunu (Job 31:1). Ora maʼ canazanu ra playa o maʼ cayázenu ndaaniʼ alberca, naquiiñeʼ gusihuinni traje de bañu gácunu nuu xpiaaninu (Proverbios 11:2, 20). Stale binni riquiiñeʼ traje de bañu ni rusihuinni parte de cuerpu stiʼ. Peru laanu naquiiñeʼ guʼyaʼ chaahuinu lari ni gácunu ca gusisaca ni Jiobá.

13. Xiñee naquiiñeʼ guieteláʼdxinu conseju ni zeeda lu 1 Corintios 10:32, 33 ora cuinu xi lari gácunu.

13 Nuu sti principiu risaca ni naquiiñeʼ chinándanu ora cuinu xi lari gácunu. Naquiiñeʼ gápanu cuidadu cadi guchiiñanu xconciencia xcaadxi binni (biindaʼ 1 Corintios 10:32, 33). Deber stinu nga cadi gácunu lari ni guchiiñaʼ ca hermanu ne hermana stinu o cani qué runi ni na Jiobá. Sicaríʼ bicaa apóstol Pablu: «Guni nu ni chuʼlaʼdxi stobi, ti acané nu laa uzuhuaa chaahuiʼ». Peru laaca guniʼbe xi pur: «Nin Cristu qué ñuni di ni gucalaʼdxi laa si» (Romanos 15:2, 3). Para Jesús, gúnibe ni na Dios ne gacanebe xcaadxi binni nga ni jma risaca que gúnibe cani riuuláʼdxibe. Zacaca nga naquiiñeʼ gúninu. Nga runi qué chuʼ dxi gácunu lari ni chuuláʼdxinu peru ni gucueeza binni de gucaadiaga ca diidxaʼ ni zinenu ra nuu.

14. Ximodo zanda gusiidiʼ ca xpinni Cristu xiiñiʼ gusisácacaʼ Dios pur modo gácucaʼ lari.

14 Deber stiʼ ca xpinni Cristu ni napa xiiñiʼ nga gusiidicaʼ laacabe chinándacabe ca principiu ni zeeda lu Biblia. Nga riníʼ laacabe ne xiiñicabe naquiiñeʼ guzuchaahuicabe ne gácucabe lari jneza ni gusiecheʼ Jiobá (Proverbios 22:6; 27:11). Ximodo zanda gusiidiʼ binni xiiñiʼ guni respetarcaʼ Dios ne ca ley stiʼ yaʼ. Quíxhecabe ti ejemplu galán para laacaʼ ne gusiidicabe laacaʼ né guendarannaxhii ximodo ne paraa zadxélacaʼ lari biáʼsipeʼ para laacaʼ. Laaca naquiiñeʼ gusiidicabe xiiñicabe jma risaca nga cuicaʼ lari ni gusisaca Jiobá, Dios ni runi adorarcaʼ, lugar de cuísicaʼ ni chuuláʼdxicaʼ.

IQUIIÑENU LIBERTAD STINU NÉ GUENDABIAANIʼ

15. Xi naquiiñeʼ gacané laanu cuinu lari ni gusihuinni nuu xpiaaninu.

15 Racané Biblia laanu quixhe íquenu gusisácanu Dios lu guiráʼ ni gúninu. Peru lari ni riuuláʼdxinu nga rácunu.  Zándaca gadxé tipu lari ni riuuláʼdxinu ne ni rizinu de cani riuulaʼdxiʼ ne rizíʼ xcaadxi binni. Peru lari stinu naquiiñeʼ gaca ni nayá ne galán, ne gusihuinni ni nuu xpiaaninu, gaca ni biáʼsipeʼ para lugar ra nuunu ne ni ruuyaʼ binni galán neza ra nabézanu.

16. Xiñee risaca nga gúninu stipa pur guzuchaahuinu galán.

16 Cadi guiráʼ ora zadxélanu lari nipeʼ caquiiñenu. Stale tienda rutoo puru si ni caree de moda. Nga runi, zándaca iquiiñenu jma tiempu ne guyubi chaahuinu para guidxélanu xiixa falda, blusa ne vestidu ni gusihuinni nuu xpiaaninu, o para guidxélanu traje ne pantalón ni cadi uquiichipeʼ laanu. Peru zabeendunu ni galán pa gúninu zacá. Xiñee yaʼ. Primé la? purtiʼ zuuyaʼ ca hermanu laanu ne ziéchecaʼ gúʼyacaʼ cayúninu stipa pur guzuchaahuinu galán. Ne guiropa, zusisácanu Bixhózenu ni nuu guibáʼ. Intiica sacrificiu gúninu pur guzuchaahuinu galán zuchátipa ni ladxidoʼno purtiʼ zusisácanu Jiobá.

17. Xi naquiiñeʼ ganna ti hermanu pa caníʼ ique gapa guicha ruaa.

17 Ñee jneza nga gapa ca hermanu guicha ruaacaʼ la? Ley ni gucuaa Moisés que na zaa gapa hombre guicha ruaa. Peru laanu ca xpinni Cristu maʼ cadi nuunu xaʼnaʼ Ley ne cadi caquiiñeʼ gúninu ni na ni (Levítico 19:27; 21:5; Gálatas 3:24, 25). Nuu cultura ra rudiicabe lugar gapa binni guicha ruaa ne rugacaʼ ni biaʼ guihuinni ni galán, ne cadi feu diʼ ruuyaʼ binni ni ora guiniʼnécabe laa de stiidxaʼ Dios. Lu ca cultura ca nuu hermanu ni naca ancianu nápacaʼ guicha ruaacaʼ. Neca zacá, nuu hermanu de ca lugar ca qué rinacaʼ gápacaʼ guicha ruaacaʼ (1 Corintios 8:9, 13; 10:32). Nuu cultura ra qué gapa ca hombre ca costumbre igaa guicha ruaacaʼ, ne cadi jneza ruuyacabe igaa guicha ruaa ca xpinni Cristu. Pa ti hermanu de racá gudii lugar igaa guicha ruaa la? zándaca maʼ que zusisácabe Dios ne zaníʼ binni laabe (Romanos 15:1-3; 1 Timoteo 3:2, 7).

18, 19. Ximodo racané Miqueas 6:8 laanu.

18 Galán nga qué nudii Jiobá laanu ti lista ziuulaʼ ra cá ximodo zanda gácunu lari ne guzuchaahuinu. Laabe bidiibe laanu ca principiu zeeda lu Biblia para gacané laanu cuinu xii nga ni jma jneza gúninu. Nga runi, dede ora cuinu xi gácunu ne ximodo guzuchaahuinu zanda gusihuínninu nuu xpiaaninu ora gúninu ni na Dios stinu, casi na Miqueas 6:8.

19 Naquiiñeʼ gánnanu naca Jiobá ti Dios nayá, ne ca ley stibe nga cani jma jneza para laanu. Pa racaláʼdxinu gácanu binni nuu xpiaaniʼ ne qué rudxiibaʼ laca laa la? zúninu ni na ca ley stibe. Pa guzuchaahuinu jneza zuni respetarnu xcaadxi binni ne modo riníʼ íquecaʼ.

20. Pur modo rácunu lari ne modo ruzuchaahuinu, xi naquiiñeʼ gucaa ni sti binni guni.

20 Naquiiñeʼ gudii binni cuenta nácanu xpinni Jiobá pur modo rácunu lari. Ca ley stiʼ Jiobá nabé jneza cani, ne rinándanu cani purtiʼ riale de laanu gúninu ni. Riquiiñeʼ gábinu ca hermanu ne ca hermana jneza modo rihuínnicaʼ ne galán modo nácacaʼ. Laacabe racanécabe chuulaʼdxiʼ binni guiziidiʼ jma de Biblia ne gusisácacaʼ Dios ne guendanayecheʼ. Pa quixhe íquenu gúninu ni jneza la? zusisácanu Dios ni zuchaahuiʼ né guendanandxóʼ (Salmo 104;1, 2).