Biiyaʼ guiraʼ ni nuu lu sitiu riʼ

guyé lu índice

Cadi gudiʼnu lugar guiaba nanu

Cadi gudiʼnu lugar guiaba nanu

«Cadi gudiiluʼ lugar guiaba naluʼ» (SOFONÍAS 3:16).

DIIDXAʼ RIUUNDAʼ: 54 NE 32

1, 2. a) Xi guendanagana rapa stale binni yanna, ne xi zanda guizaaca pur laacani. b) Xi confianza cudii Isaías 41:10, 13 laanu.

TI HERMANA ni naca precursora regular ne bichaganáʼ ti ancianu guníʼ sicaríʼ: «Neca runeʼ guiráʼ ni caquiiñeʼ guneʼ para chuaaʼ gaxha de Jiobá, maʼ ziniáʼ stale iza de riuaaʼ xizaa pur intiica cosa. Pur nga raca nagana para naa gaseʼ, raca huaraʼyaʼ ne cadi guiráʼ ora runeʼ tratar xcaadxi binni galán. Nuu biaje maʼ cadi na ni gudxieeluáʼ guendanagana riʼ».

2 Ñee zanda guiénenu xi runi sentir hermana riʼ la? Triste ni, peru nabáninu lu guidxilayú ra cayuni mandar Binidxabaʼ. Nga runi stale cosa ruchiiñaʼ laanu. Ne nuu biaje ribee cani gana laanu ne rusidxaga cani laanu, ne reeda gácanu casi ti barcu ni qué ganda guiniibi purtiʼ nucueeza ti ancla laa (Proverbios 12:25). Xi ca cosa ndiʼ zanda cuʼ laanu xizaa yaʼ. Zándaca nuunu triste purtiʼ guti tuuxa ni nadxiinu. Zándaca huaranu o canazanándacabe laanu. O zándaca nagana cayaca para laanu gudiʼnu ni iquiiñeʼ binnilídxinu purtiʼ gastiʼ bueltu. Chaahuidugá zabee cani gana laanu ne maʼ qué ziuʼnu nayecheʼ. Peru Stiidxaʼ Dios rudii confianza laanu nuu Jiobá listu para gudii náʼ laanu ne gacané laanu. Biblia na: «Cadi guidxíbiluʼ, purtiʼ nuaaniáʼ lii. Cadi chuʼluʼ xizaa, purtiʼ naa nga Dios stiluʼ. Zudieeʼ stipa lii, ya, zacaniáʼ lii; dxandipeʼ zanaazeʼ dxiicheʼ lii né nayaʼ derechu, ni runeniáʼ ni jneza. Purtiʼ naa, Jiobá Dios stiluʼ, naazeʼ dxiicheʼ naluʼ ladu derechu, Ni cayabi lii: “Cadi guidxíbiluʼ. Naa zacaniáʼ lii”» (Isaías 41:10, 13).

3, 4. a) Xidé ndiʼ riníʼ Biblia ora ruzeeteʼ ni de náʼ binni. b) Xi zanda cuee gana laanu.

 3 Stale biaje riquiiñeʼ Biblia cada ndaa de cuerpu stiʼ binni para gusiene ni ca cualidad napa o cani runi. Gayuaa biaje ruzeeteʼ ni de náʼ binni. Ora ruzeeteʼ Biblia de ti binni ni biquídxicabe náʼ, ni caníʼ ni nga guluucabe gana binni ca o bidiicabe stipa laa, ne maʼ nuube listu para gúnibe xiixa (1 Samuel 23:16; Esdras 1:6). Laaca zanda guiníʼ ni de ti binni ni riníʼ ique puru ni galán ne napa ti esperanza galán.

4 Nuu biaje ruzeeteʼ Biblia rudii tuuxa lugar guiaba náʼ. Ndiʼ riníʼ maʼ biree binni ca gana o maʼ biniti esperanza (2 Crónicas 15:7; Hebreos 12:12). Pa nabé riuʼnu xizaa pur intiica cosa o maʼ bidxáganu, o runi sentirnu maʼ cusaana de gaca xhamígunu Jiobá la? zanda cuee ni gana laanu casi ñaca nusaba nanu. Xi zanda cuʼ gana laanu ne gudii stipa laanu para guni huantarnu ne cadi gusaana de chuʼnu nayecheʼ yaʼ.

«LÁCAXA NACHUCU NÁʼ JIOBÁ PARA CADI GULÁ»

5. a) Ximodo zándaca guni sentirnu ora gápanu guendanagana, peru xi cadi naquiiñeʼ guiaandaʼ laanu. b) Xi zadúʼyanu lu tema riʼ.

5 Biblia na: «Ca dxi que zábicabe Jerusalén: “Cadi guidxíbiluʼ, Sión. Cadi gudiiluʼ lugar guiaba naluʼ. Jiobá Dios stiluʼ nuu galahuiʼ de lii. Casi tobi ni napa stale poder zulá lii. Guizáʼ ziechenebe lii. Zatadxí ladxidoʼbe ora gusihuínnibe nadxiibe lii. Ziechenebe lii dede zúnibe ridxi tantu cayéchebe[”]» (Sofonías 3:16, 17). Ora gápanu guendanagana, cadi naquiiñeʼ guidxíbinu nin guireʼnu gana. Purtiʼ pa gúninu nga casi ñaca nusaba nanu. Cadi guiaandaʼ laanu Jiobá, Bixhózenu ni nadxii laanu, racalaʼdxiʼ gusaananu guiráʼ ni riguu xizaa laanu lu náʼ (1 Pedro 5:7). Ne rápabe laanu cásica gúpabe ca israelita que. Biblia na: «¡Laguuyaʼ! Lácaxa nachucu náʼ Jiobá para cadi gulá». Ndiʼ riníʼ nuube listu ora tiica si para gulabe ca xpínnibe (Isaías 59:1). Lu tema riʼ zadúʼyanu chonna ejemplu ni zeeda lu Biblia nabé sicarú. Zazíʼdinu racalaʼdxiʼ Jiobá guni ca xpinni nadipaʼ para gúnicaʼ ni racaláʼdxibe neca gápacaʼ guendanagana nadipaʼ, ne laasibe zanda gúnibe ni. Laaca zadúʼyanu ximodo rudii ca ejemplu riʼ stipa laanu.

6, 7. Xi zanda guizíʼdinu de dxi biʼniʼ ganar ca israelita que ca amalequita.

6 Cadi xadxí de biree ca israelita que de Egipto, bicaalú ca amalequita laacabe, ca xhenemígucabe. Gudxi Moisés ti hombre nadxibalú láʼ Josué chiné ca israelita que lu guerra. De raqué gudxiʼbané Moisés Aarón ne Hur lu ti dani nuu gaxha de raqué. De lu dani que gunda biiyacabe ra cayaca guerra que. Ñee cuxooñelúcabe purtiʼ cadxíbicabe la? Coʼ.

7 Maca gudixhe Moisés xi guni para gacané ca israelita que guni ganarcaʼ ca amalequita. Gucuaabe vara stiʼ Dios ni dxandíʼ ne gundisanabe luguiáʼ. Ora nuu nabe luguiáʼ que la? racané Jiobá ca israelita para guni ganarcaʼ ca xhenemígucaʼ. Peru ora ridxaga náʼ Moisés ne guindeteʼ náʼ la? runi ganar ca enemigu que. Ngue runi nagueenda ca gucané Aarón ne Hur laabe. Biblia na: «Gucuaacabe ti guié ne gudíxhecabe ni atrá de laabe ne guribe luni. Óraque gundisaʼ Aarón ne Hur nabe, tobi cada ladu, ne zaqué maʼ qué ñaba nabe dede ora biaaziʼ gubidxa». Biʼniʼ ganar ca israelita que purtiʼ bidii náʼ Dios laacaʼ (Éxodo 17:8-13).

8. a) Xi biʼniʼ rey Asá dxi zigucaalú ca etíope guidxi Israel. b) Ximodo zanda chinándanu ejemplu stiʼ Asá.

8 Laaca guyuu Jiobá listu para biquiiñeʼ poder stiʼ para gunda gucané xquidxi ca dxi stiʼ rey Asá. Chitindené rey riʼ Zérah, ti etíope ni napa tobi de ca ejércitu jma naroʼbaʼ ruzeeteʼ Biblia. Ti millón soldadu ni nanna tinde nga nuu lu ejércitu stibe, casi chupa  biaje jma naroʼbaʼ ni que ejércitu stiʼ Asá. Xi biʼniʼ Asá yaʼ. Ñee guyuube xizaa, bireebe gana o bidxíbibe la? Ñee bidiibe lugar guiaba nabe la? Coʼ. Nagueendaca biyúbibe gacané Jiobá laabe. Tutiica soldadu niníʼ nagana guni ganarbe ejércitu stiʼ ca etíope que. Peru Biblia na «para Dios gasti ni nagana» (Mateo 19:26). Biquiiñeʼ Dios poder stiʼ ne «biʼniʼ ganar Jiobá ca etíope nezalú Asá». Biʼniʼ rey riʼ ni na Jiobá de guidubi ladxidóʼ dede dxi gutiʼ (2 Crónicas 14:8-13; 1 Reyes 15:14).

9. a) Xi biʼyaʼ Nehemías ora yendá Jerusalén ne xi biʼniʼ. b) Ximodo bicabi Jiobá oración stiʼ Nehemías.

9 Yanna guidúʼyanu ejemplu stiʼ Nehemías. Dxi guyebe Jerusalén, biiyabe bicueeza caadxi enemigu de xcaadxi guidxi ca judíu que de gucuicaʼ barda stiʼ Jerusalén. Gastiʼ ni nuteeguʼ guidxi que ne maʼ biree ca judíu gana. Xi biʼniʼ sentir Nehemías yaʼ. Ñee bireebe gana ne bisaba nabe la? Coʼ. Cásica Moisés, Asá ne xcaadxi xpinni Dios ni qué nucheené laa, gupa Nehemías confianza Jiobá guiráʼ ora. Nga runi ora bidxaagalube guendanagana riʼ, biʼniʼ orarbe Dios para gacané laabe ne laa bicabi laabe. Ximodo yaʼ. Biquiiñeʼ Jiobá poder stiʼ ne náʼ ni napa stale stipa para gucané ca judíu. Biblia na: «Laacabe nga ca siervu stiluʼ ne xquídxiluʼ, laacabe nga cani bilaluʼ né poder stiluʼ né naluʼ ni nadipaʼ. Peru naa bicabeʼ: “Dios ni nuu guibáʼ nga chigacané laadu gúnidu ni, ne laadu, ca xpínnibe, zuzuludu ne zucuidu ni; ne laatu qué zacanetu ne qué zanda guiniʼtu xiixa ne qué gápatu derechu Jerusalén”. Purtiʼ guirácabe gucaláʼdxicabe nuchíbicabe laadu, ne guníʼcabe: “Zusaana nácabe dxiiñaʼ riʼ, ne maʼ qué zabí ni”. Peru yanna, biʼniʼ nayaʼ naguidxi» (Nehemías 1:10; 2:20; 6:9). Ñee laaca zuni crenu zaquiiñeʼ Jiobá poder stiʼ ne náʼ ni napa stale stipa para gacané laanu guzuhuaʼnu dxiichiʼ la?

ZUDII JIOBÁ STIPA NANU

10, 11. a) Xi runi Binidxabaʼ para cuee gana laanu. b) Ximodo rudii Jiobá stipa laanu. c) Bizeeteʼ ximodo huayacané guiráʼ ni huasiidiʼ Jiobá lii.

10 Nánnanu qué ziuu dxi gusaana Binidxabaʼ de siñe laanu. Qué zusaana de iquiiñebe ca gobiernu, ca xaíque stiʼ ca religión ne ca apóstata para gusiguiicaʼ ne guchíbicaʼ laanu ti gusaananu de gúninu xhiiñaʼ Dios. Xii ndiʼ racaláʼdxibe yaʼ. Maʼ cadi gucheecherunu stiidxaʼ Reinu. Peru zanda gacané Jiobá laanu ne racalaʼdxiʼ guni ni. Rudiibe stipa laanu né espíritu santu stibe (1 Crónicas 29:12). Nabé risaca guinábanu Jiobá espíritu santu stiʼ ti ganda gudxíʼlunu Binidxabaʼ ne ca xpinni (Salmo 18:39; 1 Corintios 10:13). Laaca rudiʼnu xquíxepeʼ Jiobá purtiʼ riquiiñeʼ Stiidxaʼ para gudii stipa laanu. Ne guiníʼ íquenu lu guiráʼ ni rizíʼdinu cada beeu lu ca publicación stinu. Laaca zanda gacané ca diidxaʼ ni guníʼ Zacarías laanu dxi bicuícabe yuʼduʼ stiʼ Jerusalén sti biaje. Biblia na: «Ndiʼ nga ni guníʼ Jiobá stiʼ ca ejércitu: “Naquiiñeʼ gaca natu naguidxi, laatu cani cucaadiaga ca diidxaʼ riʼ de ruaa ca profeta, laca ca diidxaʼ ni bieeteʼ dxi gurí base stiʼ lidxi Jiobá stiʼ ca ejércitu para gurí yuʼduʼ stibe[”]. [“]Ne cásica biʼniʼ maldecir ca guidxi ca laatu, yoo stiʼ Judá ne yoo stiʼ Israel, zacaca zulaʼyaʼ laatu, ne zeeda gácatu ti ndaayaʼ. ¡Cadi guidxíbitu! Laguni natu nadipaʼ”» (Zacarías 8:9, 13).

11 Laaca rudii Jiobá stipa laanu né cani rizíʼdinu lu ca reunión, lu ca asamblea ne lu ca scuela ni napa xquidxi Dios. Ni rizíʼdinu lúcani racané cani laanu gúninu xhiiñabe de ladxidoʼno, quixhe íquenu ugaandanu xiixa ndaaniʼ xquídxibe ne gúninu ca dxiiñaʼ guicaanu (Salmo 119:32). Ñee ruyúbinu gudii cani rusiidiʼ Jiobá stipa laanu la?

12. Xi naquiiñeʼ gúninu para chuʼnu naguidxi.

12 Casi maʼ bidúʼyanu, gucané Jiobá ca xpinni guni ganarcaʼ ca amalequita ne ca etíope. Laaca bidiibe stipa Nehemías ne  ca judíu que para gucuicaʼ barda stiʼ Jerusalén. Zacaca zudii Dios stipa laanu para cadi gusaana de gucheechenu diidxaʼ neca nápanu guendanagana ne cucaalúcabe laanu o qué náʼ binni gucaadiaga laanu (1 Pedro 5:10). Dxandíʼ qué zuni diʼ Jiobá ti milagru para cuee ca guendanagana stinu. Naquiiñeʼ gúninu stipa pur gúninu xiixa pa racaláʼdxinu chuʼnu naguidxi. Xi naquiiñeʼ gúninu yaʼ. Guidúʼndanu Biblia guiráʼ dxi, gaca prepararnu para ca reunión ne cadi guiaadxanu cani, guni estudiarnu stúbinu ne gúninu adoración en familia, ne guni orarnu Jiobá. Cadi gudiʼnu lugar gucueeza xiixa laanu de guicaanu cani rudii Jiobá para gudii stipa laanu ne cuʼ gana laanu. Pa gudiʼnu cuenta maʼ cadi cayúninu tobi de cani bizéʼtenu riʼ, guinábanu Dios gacané laanu. Zadúʼyanu ximodo zacané espíritu stibe laanu ne zucaa laanu chuuláʼdxinu gúninu ni nabe ne zudii laanu stipa para gúninu ni (Filipenses 2:13). Yanna, ñee laaca zanda guquídxinu náʼ sti binni la?

LACUUSAA STIPA NATU

13, 14. a) Xi gucané ti hermanu para guyuu naguidxi dxi gutiʼ xheelaʼ. b) Xi zanda gúninu para gacanenu xcaadxi chuʼcaʼ naguidxi.

13 Lu guidubi Guidxilayú riʼ rudii Jiobá laanu millón de hermanu ni rizaalaʼdxiʼ laanu ne zanda cuʼ gana laanu. Sicaríʼ guníʼ apóstol Pablu: «Lacuu stipa ná tu ne ñee tu, ne lasá jneza sin iree chu tu» (Hebreos 12:12, 13). Stale de ca primé xpinni Cristu laaca gucané ca hermanu laacaʼ. Zacaca rizaaca yanna. Guidúʼyanu ejemplu stiʼ ti hermanu ni gutiʼ xheelaʼ ne gudiʼdiʼ lu xcaadxi guendanagana. Laabe guniʼbe: «Biziideʼ qué zanda cuinu xi guendanagana gápanu, padxí gápanu cani ne cada pabiáʼ tiempu gápanu cani. Cani huayacané naa nga oración ne guneʼ estudiar stubeʼ, zeeda gaca cani casi ti chalecu de salvavida ni qué rudii lugar guiaazeʼ. Sti cosa ni riguixhedxí ladxiduáʼ nga modo racané ca hermanu stinneʼ naa. Maʼ bidieeʼ cuenta nabé risaca nga chuaaʼ galán né Jiobá ante gueeda ca guendanagana ca».

Guiráʼ ca hermanu zanda cúʼsaacaʼ gana laacaʼ. (Biiyaʼ párrafo 14).

14 Dxi gudindené ca israelita que ca amalequita, gundisaʼ Aarón ne Hur náʼ Moisés para gapa stipa. Laanu laaca zanda guyúbinu modo gudiʼnu stipa xcaadxi binni ne cuʼnu gana laacaʼ. Paraa zanda gúninu nga yaʼ. Ora gacanenu ca hermanu ni maʼ nagola, cani huará, cani rucaalú xfamilia laa, cani nuu stubi o guti tuuxa binni ni nadxii. Laaca zanda gacanenu cani nahuiiniʼ gapa stipa, purtiʼ gatigá rucaacabe laacaʼ gúnicaʼ cosa malu o gácacaʼ tuuxa lu Guidxilayú riʼ (1 Tesalonicenses 3:1-3; 5:11, 14). Guyúbinu modo guizaaláʼdxinu de guidubi ladxidoʼno xcaadxi hermanu ora maʼ nuunu ra Yoo stiʼ Reinu, ora maʼ zigucheechenu diidxaʼ, ora maʼ cadóʼnenu laacaʼ gueta o guinínenu laacaʼ pur teléfono.

15. Ximodo zanda gacané ca diidxaʼ galán ni guininu ca hermanu stinu.

15 Biʼniʼ ganar si Asá ejércitu stiʼ ca etíope que, guluu profeta Azarías gana laabe ne guidxi que sicaríʼ: «Peru laatu la? lagaca nadipaʼ ne cadi guireetu gana, purtiʼ nuu ti premiu para laatu pur dxiiñaʼ cayúnitu» (2 Crónicas 15:7). Pur modo guluu Azarías gana laacabe, bichaa Asá stale cosa para biʼniʼ adorar guidxi que Jiobá jneza. Cásica biʼniʼ Azarías, ca diidxaʼ ni gábinu xcaadxi zanda gacané ni laacaʼ para cadi gusaanacaʼ de gúnicaʼ ni na Jiobá (Proverbios 15:23). Ne cadi guiaandaʼ laanu ora guicábinu lu ca reunión ca zanda cuʼnu gana ca hermanu stinu.

16. a) Ximodo zanda guni ca ancianu cásica biʼniʼ Nehemías. b) Bizeeteʼ ximodo huayacané xcaadxi hermanu lii.

16 Pur modo gucané Jiobá Nehemías ne ca judíu que, gunda guluusaacaʼ gana laacaʼ o biquídxicaʼ nacaʼ para gúnicaʼ dxiiñaʼ gucuaacaʼ. Bicuícabe barda stiʼ Jerusalén que 52 si dxi (Nehemías 2:18; 6:15, 16). Peru cadi gudiidxináʼ si Nehemías ne biiyadxí si laga cayuni xcaadxi que dxiiñaʼ. Laapebe bíʼnibe dxiiñaʼ  (Nehemías 5:16). Ca dxi riʼ, stale ancianu rinándacaʼ ejemplu stiʼ Nehemías ne racanecaʼ ra cabí Yoo stiʼ Reinu, rusiacaʼ cani ne ruuyacaʼ chuʼ cani galán. Pur nadxii ca ancianu riʼ ca hermanu sticaʼ, rigánnacaʼ laacabe ora maʼ cadíʼdicabe lu xiixa guendanagana para cuʼcaʼ gana laacabe o rucheechenecaʼ laacabe diidxaʼ. Biblia na: «Laguquidxi natu, ne laguquidxi xíbitu ni cayaca diti. Lagabi cani cadi nexhedxí ladxidóʼ: “Lagaca nadipaʼ. Cadi guidxíbitu. ¡Laguuyaʼ! Zeeda Dios para guquixe guiráʼ ni bíʼnicabe laatu, zuni castigar Dios laacabe. Zeedabe ne zulabe laatu”» (Isaías 35:3, 4).

«CADI GUDIILUʼ LUGAR GUIABA NALUʼ»

17, 18. Ora gápanu guendanagana, xidé naquiiñeʼ chuʼnu seguru.

17 Ora gúninu dxiiñaʼ né ca hermanu racané ni para chuʼnu tobi si ne guidxélanu binni ni dxandíʼ xhamígunu. Laaca racané ni laanu gápanu confianza maʼ cadi candaa zedané Reinu stiʼ Dios stale ndaayaʼ. Ora guquídxinu náʼ xcaadxi binni, o cuʼnu gana laacaʼ, racanenu laacaʼ guni huantarcaʼ ca guendanagana sticaʼ ne gúʼyacaʼ zeeda dxi ra zabáninu jma galán. Ora gúninu zacá laaca riguʼnu gana laca laanu ne racané ni para cadi gusaana de guiníʼ íquenu ni cabézanu guicaanu.

18 Ora guiníʼ íquenu ximodo gucané Jiobá ca xpinni ni qué nusaana laa ne modo gúpabe laacaʼ, raca fe stinu jma naguidxi ne jma zápanu confianza laabe. Nga runi, ora gápanu guendanagana ne qué guidxélanu xi gúninu la? cadi gudiʼnu lugar guiaba nanu, o cuee cani gana laanu. Pa guinábanu Jiobá gacané laanu zanda chuʼnu seguru zudiibe stipa laanu purtiʼ nadipaʼ nabe ne maʼ cadi candaa zudiibe laanu ca ndaayaʼ ni guedané Reinu stibe (Salmo 73:23, 24).