Biiyaʼ guiraʼ ni nuu lu sitiu riʼ

guyé lu índice

 CAPÍTULO 18

Xiñee jma rannaxhiinu Dios ora chúʼnisanu

Xiñee jma rannaxhiinu Dios ora chúʼnisanu
  • Ximodo riuunisa ti binni para gaca xpinni Cristu

  • Xii nga cani naquiiñeʼ gúniluʼ ti chúʼnisaluʼ

  • Ximodo nga gudiiluʼ lii Dios

  • Xi razón jma risaca nápanu para gacaláʼdxinu chúʼnisanu

1. Xiñee gunabaʼ ti hombre biʼniʼ xhiiñaʼ gobiernu stiʼ Etiopía chúʼnisa.

TI HOMBRE biʼniʼ xhiiñaʼ gobiernu stiʼ Etiopía dxi bibani ca apóstol que gunabadiidxaʼ: «Raríʼ daʼ nisa. Ñee qué zanda chuaa niʼsa la?». Guniʼbe zacá purtiʼ casi biluíʼ  ti xpinni Cristu láʼ Felipe laabe né Stiidxaʼ Dios Jesús nga Mesías ni chigueeda. Guiráʼ ni biziidiʼ hombre riʼ bicaa ni laa guinabaʼ chúʼnisa (Hechos 8:26-36).

2. Xiñee naquiiñeʼ guiníʼ íqueluʼ chúʼnisaluʼ.

2 Pa maʼ biindaʼ chaahuiluʼ xcaadxi capítulo stiʼ libru riʼ né ti testigu stiʼ Jiobá la? zándaca gucaa cani maʼ biziidiluʼ ca lii guinabadiidxaluʼ: «Ñee qué zanda chuaa niʼsa la?». Lii maʼ biziidiluʼ caníʼ Biblia zabani binni ndaaniʼ ti paraísu sin qué chuʼ dxi gatiʼ (Lucas 23:43TNM; Apocalipsis 21:3, 4). Laaca maʼ nánnaluʼ ximódopeʼ nuu ca gueʼtuʼ ne nánnaluʼ ziuu dxi ziásacaʼ (Eclesiastés 9:5; Juan 5:28, 29). Zándaca maʼ nápaluʼ dxi de rieluʼ guendaridagulisaa rapa ca testigu stiʼ Jiobá ne maʼ nánnaluʼ religión stícabe nga ni dxandíʼ (Juan 13:35). Ne ni jma risaca nga zándaca maʼ cadxíñaluʼ gaxha de Jiobá Dios.

3. 1) Xi gudxi Jesús cani zinanda laa que gúnicaʼ. 2) Ximodo riuunisa ti binni para gaca xpinni Cristu.

3 Ximodo zanda gusihuínniluʼ racaláʼdxiluʼ gúniluʼ ni na Dios yaʼ. Gudxi Jesús cani zinanda laa gúnicaʼ sicaríʼ: «Laché irá xixé guidxi, lachiusiidi irá xixé binni sa nanda naa, ne lacuu nisa laaca» (Mateo 28:19). Jesús nga gudixhe gúninu zacá, purtiʼ laaca guyuunisa. Peru qué nurúbacabe nisa íquebe ne qué nundaatecabe ni íquebe (Mateo 3:16). Diidxaʼ riuunisa ca lu diidxaʼ griegu riníʼ ni «guchaazicabe tuuxa ndaaniʼ nisa». Nga runi, ora riuunisa ti xpinni Cristu ruchaazicabe guidubi ndaaniʼ nisa.

4. Xi rusihuínninu ora chúʼnisanu.

4 Guiráʼ cani gacalaʼdxiʼ chuʼ galán né Jiobá naquiiñeʼ chúʼnisacaʼ. Ora riuʼnísanu, rusihuínninu racaláʼdxinu gúninu ni na Dios ne riuuláʼdxinu gúninu ni na (Salmo 40:7, 8). Peru para ganda chúʼnisanu naquiiñeʼ gúninu caadxi cosa.

 CAQUIIÑEʼ GUIZÍʼDINU NE GÁPANU FE

5. 1) Xi naquiiñeʼ gúniluʼ primé para chúʼnisaluʼ. 2) Xiñee nabé risaca guiráʼ guendaridagulisaa.

5 Lii maʼ bizulú cayúniluʼ ni naquiiñeʼ gaca primé. Xii nga yaʼ. Maʼ cayuundanécabe lii Biblia ne racá cayunibiaʼluʼ Jiobá ne Jesucristu (biindaʼ Juan 17:3). Peru zanda guiziidiluʼ jma. Ca xpinni Cristu racaláʼdxicaʼ gudii Dios laacaʼ «enda biaani» ti gánnacaʼ «xi racalaʼdxi be» (Colosenses 1:9). Cheluʼ ca guendaridagulisaa rapa ca testigu stiʼ Jiobá zanda gacané cani lii guiziidiluʼ. Nga runi, nabé risaca nga cadi guiaadxaluʼ cani (Hebreos 10:24, 25). Pa qué gusaana de cheluʼ guiráʼ guendaridagulisaa la? zunibiaʼluʼ Dios.

Ti cosa ni naquiiñeʼ gúniluʼ para chúʼnisaluʼ nga guiziidiʼ chaahuiluʼ xiná Stiidxaʼ Dios

6. Pabiáʼ naquiiñeʼ gánnaluʼ de lu Biblia para chúʼnisaluʼ.

6 Para ganda chúʼnisaluʼ cadi caquiiñeʼ gánnaluʼ xiná guidubi naca Biblia. Peru bietenalaʼdxiʼ hombre biʼniʼ xhiiñaʼ gobiernu stiʼ Etiopía que, neca nánnabe caadxi de lu Biblia la? biquiiñebe tuuxa para bisiene laabe xiná ra cadi cayénebe (Hechos 8:30, 31). Zaqueca lii, laaca caquiiñeruʼ guiziidiluʼ jma. Ne qué ziuu dxi guiaanadxiluʼ de guiziidiluʼ de Dios (Eclesiastés 3:11). Peru para ganda chúʼnisaluʼ, naquiiñeʼ gánnaluʼ ne guicaaluʼ cani jma risaca zeeda lu Biblia (Hebreos 5:12). Casi ximodo nuu ca gueʼtuʼ ne pabiáʼ risaca lá Dios ne Reinu stiʼ.

7. Xi naquiiñeʼ gúniluʼ ora maʼ cayuundaluʼ Biblia.

7 Peru cadi caquiiñeʼ siʼ gánnaluʼ de Jiobá nga maʼ guiaanadxiluʼ, purtiʼ «qué zanda guni binni ni riulaʼdxi Dios pa qué runi cre», o pa qué gapa fe (Hebreos 11:6). Biblia ruzeeteʼ xi biʼniʼ caadxi binni guleza ndaaniʼ guidxi Corinto: ora binadiágacaʼ ni cananíʼ ca xpinni Cristu oraqueca biʼniʼ crecaʼ «ne uyuu nisa caʼ» (Hechos 18:8). Zacaca nga naquiiñeʼ gúniluʼ. Ora maʼ cayuundaluʼ Biblia, naquiiñeʼ guni creluʼ laani nga Stiidxaʼ Dios. Laaca naquiiñeʼ guni creluʼ zuni Dios guiráʼ ni maʼ guníʼ  ne zanda gulabe lii pur guendanabani ni maʼ bidii Jesús (Josué 23:14; Hechos 4:12; 2 Timoteo 3:16, 17).

GUNÍʼ CANI DXANDÍʼ RUSIIDIʼ BIBLIA

8. Xi zucaa lii guiniʼluʼ guiráʼ ni caziidiluʼ.

8 Ora maʼ gucuaa xcu fe ca ndaaniʼ ladxidoʼloʼ la? jma nagana zaca para lii guiaanadxiluʼ de guiniʼluʼ cani maʼ biziidiluʼ (Jeremías 20:9). Zuuyaluʼ ximodo zucaa ni lii guiniʼluʼ de Dios ne de cani naguixhe ique guni (biindaʼ 2 Corintios 4:13).

Naquiiñeʼ gucaa fe ca lii guiniʼluʼ cani runi creluʼ

9, 10. 1) Tu guiráʼ nga zanda guzulú guiníʼneluʼ cani maʼ biziidiluʼ de lu Biblia. 2) Xi naquiiñeʼ gúniluʼ pa racaláʼdxiluʼ gucheecheluʼ diidxaʼ casi runi ca testigu stiʼ Jiobá.

9 Zanda guzulú guiníʼneluʼ binnilídxiluʼ, xhamíguluʼ, xpecínuluʼ ne cani runineluʼ dxiiñaʼ de ni caziidiluʼ ne biyubi modo guiníʼneluʼ laacaʼ sin guidxiichicaʼ. Despué zándaca gacaláʼdxiluʼ gucheecheluʼ diidxaʼ casi runi ca testigu stiʼ Jiobá. Ora guidxiña dxi ca la? guniʼné ni rusiidiʼ lii de lu Biblia ca sin guidxíbiluʼ. Pa gúʼyabe maʼ rúniluʼ cani na Jiobá para gucheecheluʼ diidxaʼ la? zuuyabe padxí ne pora zanda guiniʼné chupa binnigola guirópatu.

10 Zacá jma zunibiaʼluʼ ca binnigola xpinni Cristu ni rapa ca dendxuʼ stiʼ Dios (Hechos 20:28; 1 Pedro 5:2, 3). Laacabe zuuyacabe pa maʼ biéneluʼ cani jma risaca zeeda lu Biblia ne pa runi creluʼ cani, pa cayuʼnuʼ modo na Dios ne pa dxandipeʼ racaláʼdxiluʼ gácaluʼ testigu stiʼ Jiobá. Pa zacá ni la? zábicabe lii maʼ zanda gácaluʼ tobi de cani rucheeche diidxaʼ ni caʼruʼ chúʼnisa ne maʼ zanda chigucheecheluʼ diidxaʼ né ca binni ridagulisaaneluʼ ti ganda guiniʼluʼ ca diidxaʼ nacubi ne galán stiʼ Dios.

11. Xii nga cani naquiiñeʼ gusaana binni ante chigucheeche diidxaʼ de yoo pur yoo.

11 Ca binnigola riʼ zándaca gúʼyacaʼ naquiiñeruʼ guchaa binni ca modo nabani para ganda chigucheeche  diidxaʼ de yoo pur yoo. Zándaca naquiiñeʼ gusaanabe xiixa ni huayúnibe nagaʼchiʼ. Nga runi, ante guinábaluʼ gácaluʼ tobi ni rucheeche diidxaʼ la? naquiiñeʼ gusaana de gúniluʼ cosa malu, casi guendariuuné ni cadi xheelaʼ, guendarixudxi ne guendariguʼbaʼ guixi (biindaʼ 1 Corintios 6:9, 10; Gálatas 5:19-21).

GACA ARREPENTIRNU NE GUCHAʼNU MODO LAANU

12. Xiñee naquiiñeʼ gaca arrepentirluʼ.

12 Para chúʼnisaluʼ nuuruʼ ni naquiiñeʼ gúniluʼ. Apóstol Pedru guníʼ: «Lainaba perdón Dios [«lagaca arrepentir», TNM], laudxii lú jneza ti ixá stonda tu» (Hechos 3:19). Ora dxandíʼ gaca arrepentir tuuxa la? riuubaʼ ladxidóʼ pur guiráʼ ni biʼniʼ. Peru cadi ca binni si ni huayuni guendaquéiquiiñeʼ nga napa xidé gaca arrepentir, sínuque laaca né ca binni ni ruluíʼ nabánicaʼ jneza. Xiñee yaʼ. Purtiʼ guiráʼ xixenu binni ruchee laanu ne caquiiñenu guni perdonar Dios laanu (Romanos 3:23; 5:12). Ante gúʼndaluʼ Biblia la? qué gánnaluʼ xi racalaʼdxiʼ Dios. Ngue runi qué nibániluʼ casi modo nabe, cadi dxandíʼ la? Nga runi naquiiñeʼ gaca arrepentirluʼ.

13. Xi riníʼ guchaaluʼ modo lii.

13 Despué de gaca arrepentirluʼ naquiiñeʼ guchaaluʼ modo lii. Ora maʼ guchaaluʼ la? qué ziuubaʼ si ladxidoʼloʼ pur guiráʼ ni bíʼniluʼ, sínuque laaca zusaanaluʼ modo bibániluʼ. Ne de racá maʼ naquiiñeʼ quixhe íqueluʼ gúniluʼ ni jneza. Naquiiñeʼ gúniluʼ chupa cosa ante chúʼnisaluʼ: guchaaluʼ modo lii ne gaca arrepentirluʼ.

BIDII LII DIOS

14. Xi sti cosa naquiiñeʼ gúniluʼ ante chúʼnisaluʼ.

14 Sti cosa ni naquiiñeʼ gúniluʼ ante chúʼnisaluʼ nga: gudiiluʼ lii Jiobá Dios.

Ñee maʼ bíʼniluʼ ti oración para gudiiluʼ lii Dios la?

15, 16. Xi riníʼ gudiʼnu laanu Jiobá, ne xi zucaa laanu gúninu ni.

 15 Para gudiiluʼ lii Jiobá la? naquiiñeʼ gúniluʼ ti oración de guidubi ladxidoʼloʼ ra gábiluʼ laabe chiguni adorarluʼ laasibe (Deuteronomio 6:15). Peru, xiñee ziuulaʼdxiʼ tuuxa gaca esclavu stiʼ Dios yaʼ. Biaa, zeeda gaca ni casi ora gabi ti hombre ti gunaa racalaʼdxiʼ gunibiáʼ laabe. Ra jma gunibiáʼ chaahuibe gunaa riʼ ne gúʼyabe sicarú modo laa la? jma ziuuláʼdxibe chúʼnube laa. Ne zándaca gabi hombre riʼ laabe guichaganácabe. Neca nánnabe zápabe jma dxiiñaʼ ora guichaganabe. Peru cumu nadxiibe gunaa ca la? nga nga zucaa laabe gábibe laa guichaganácabe.

16 Rúninu intiica ni gabi Jiobá laanu purtiʼ maʼ runibiaʼnu ne nadxiinu laa. Binni gacalaʼdxiʼ chinanda Jesucristu Xiiñiʼ Dios, naquiiñeʼ «usiaanda laca laa» (Marcos 8:34). Rusiáʼndanu laca laanu ora rucáʼnanu cani racaláʼdxinu o cani naguixhe íquenu gúninu ti guzúʼbanu Stiidxaʼ Dios. Nga runi, ante chúʼnisaluʼ, naquiiñeʼ quixhe íqueluʼ gúniluʼ ni racalaʼdxiʼ Jiobá primé (biindaʼ 1 Pedro 4:2).

XI GÚNILUʼ TI CADI GUINÍʼ ÍQUELUʼ ZUCHEENELUʼ DIOS

17. Xiñee nuu tu qué riná gudii laa Jiobá.

17 Nuu binni qué riná gudii laa Jiobá purtiʼ ridxibi ne nanna cadi guendariguite ni. Zándaca ni ridxíbibe nga cuidxi Dios cuenta laabe purtiʼ maʼ bidiibe laabe Jiobá casi ti xpinni Cristu. Riníʼ íquebe zándaca gueeda gucheenebe Jiobá ne guninabe ladxidóʼ, nga runi qué nabe gudiibe laabe Dios.

18. Xi zucaa lii gudiiluʼ lii Jiobá.

18 Ra jma gannaxhiiluʼ Jiobá, zanabaʼ ladxidoʼloʼ gudiiluʼ lii laabe ne zúniluʼ stipa pur gúniluʼ ni guniʼluʼ ora bidiiluʼ lii laabe (Eclesiastés 5:4). Despué de gudiiluʼ lii  Jiobá ziuuláʼdxiluʼ «sa [lu] modo naquiiñe sa ca xpinni Señor ne guni [lu] ni jma chuʼlaʼdxiʼ [be]» (Colosenses 1:10). Qué zaca nagana para lii gúniluʼ ni na Jiobá pa nadxiiluʼ laa. Zándaca guiniʼluʼ dxandíʼ ni guníʼ apóstol Juan riʼ: «Sicarí nga ganaxhii nu Dios: guni nu ni na. Ne cadi nagana ni na be guni nu» (1 Juan 5:3).

19. Xiñee cadi naquiiñeʼ guidxíbiluʼ gudiiluʼ lii Dios.

19 Cadi na diʼ Dios qué lica zuchee binni ni gudii laa laabe. Nanna Jiobá xi zanda gúninu ne qué ribeza gúninu jma de ni qué zanda gúninu (Salmo 103:14). Laabe zacanebe lii purtiʼ racaláʼdxibe guibániluʼ galán. Biblia na: «Cadi guidxíbiluʼ, purtiʼ nuaaniáʼ lii. Cadi chuʼluʼ  xizaa, purtiʼ naa nga Dios stiluʼ. Zudieeʼ stipa lii, ya, zacaniáʼ lii; dxandipeʼ naazeʼ dxiicheʼ lii né nayaʼ derechu, ni runeniáʼ ni jneza» (Isaías 41:10). Pa guni creluʼ Jiobá de guidubi ladxidoʼloʼ la? «zúnibe ca neza stiluʼ derechu» (Proverbios 3:5, 6).

BISIHUINNI CUDIILUʼ LII DIOS RA CHÚʼNISALUʼ

20. Xiñee naquiiñeʼ ganna binni maʼ bidiiluʼ lii Jiobá.

20 Ra guiníʼ íqueluʼ ni maʼ bidúʼndanu ca, zándaca gacaláʼdxiluʼ gudiiluʼ lii Jiobá ra gúniluʼ ti oración lii si né  laabe. Peru guiráʼ cani nadxii Jiobá naquiiñeʼ gúnicabe sti cosa: naquiiñeʼ «iníʼ cabe ni nezalú binni» purtiʼ zacá zalácabe (Romanos 10:10). Ximodo nga yaʼ.

Ora riuʼnísanu casi ñaca «ñátinu» o cusaananu modo bibáninu dxiqué ne maʼ chiguibáninu para gúninu ni na Dios

21, 22. Ximodo zanda gusihuínniluʼ fe stiluʼ «nezalú binni».

21 Naquiiñeʼ gábiluʼ coordinador stiʼ ca binnigola maʼ racaláʼdxiluʼ chúʼnisaluʼ. Maʼ laa guyubi chupa chonna binnigola para guinabadiidxacaʼ lii cani jma risaca zeeda lu Biblia. Pa guʼyaʼ ca binnigola riʼ rúniluʼ guiráʼ cani canabaʼ Jiobá para chúʼnisaluʼ la? zábicaʼ lii maʼ zanda chúʼnisaluʼ lu sti asamblea gápatu. * Ora riuunísacabe la? ridiʼdiʼ ti libana ni rusiene xii nga riníʼ chúʼnisa binni. Riluxe si libana ca, hermanu rudii ni ca rinabadiidxaʼ chupa cosa cani chichuunisa ne nadipaʼ ricábicaʼ laabe. Zacá rusihuínnicaʼ fe sticaʼ «nezalú binni».

22 Ora chúʼnisa binni nga rusihuinni maʼ bidii laa Dios ne maʼ testigu stiʼ Jiobá laa. Cani chichuunisa ruchaazicabe laacaʼ ndaaniʼ nisa ti gusihuínnicaʼ nezalú binni maʼ bidiicaʼ laacaʼ Jiobá.

XI ZUSIHUÍNNILUʼ ORA CHÚʼNISALUʼ

23. Xii nga riníʼ chuʼnísacabe lu lá «Dios» ne «Xiiñi ne Espíritu Santu».

23 Guníʼ Jesús ziuunisa ca discípulo stiʼ lu lá «Dios» ne «Xiiñi ne Espíritu Santu» (Mateo 28:19). Nga riníʼ naquiiñeʼ ganna cani chichuunisa ca Jiobá ne Jesús nga ni runi mandar (Salmo 83:18; Mateo 28:18). Laaca naquiiñeʼ gánnacaʼ xii nga runi espíritu santu stiʼ Dios, o stipa stiʼ (Gálatas 5:22, 23; 2 Pedro 1:21).

24, 25. 1) Xi riníʼ ora chúʼnisa binni. 2) Xi chiguicábinu lu sti capítulo ca.

24 Nuu xi riníʼ ora riuunisa binni. Ora guiaaziluʼ ndaaniʼ  nisa casi ñaca «ñátiluʼ» o cusaanaluʼ modo bibániluʼ dxiqué. Ne ora guireeluʼ ndaaniʼ nisa la? cusihuínniluʼ maʼ chiguibániluʼ para gúniluʼ ni na Dios. Qué chuʼ dxi gusiaandaluʼ maʼ bidiiluʼ lii Jiobá, cadi para guʼnuʼ xiixa ni gacané binni, xhiiñaʼ tuuxa grupu o tuuxa binni. Ra gudiiluʼ lii Dios ne chúʼnisaluʼ maʼ zuzulú zaca xhamíguluʼ Dios ne jma zadxíñaluʼ gaxha de laa (Salmo 25:14).

25 Peru cadi purtiʼ si maʼ guyuunisa tuuxa maca bilá. Apóstol Pablu bicaa: «Laucaalaʼdxi guni tu ni jneza, dede dxi ilá chaahui tu. Lagaca nadóʼ ne laidxibi» (Filipenses 2:12). Ora chúʼnisa ti binni la? deruʼ cuzulú. Yanna, xi naquiiñeʼ gúninu ti cadi guixélenu de Dios ne cadi gusaana de gannaxhiinu laa yaʼ. Lu últimu capítulo stiʼ libru riʼ zacábinu guendarinabadiidxaʼ ca.

^ párrafo 21 Riuunisa binni lu ca asamblea rapa ca testigu stiʼ Jiobá guiráʼ iza.