Biiyaʼ guiraʼ ni nuu lu sitiu riʼ

guyé lu índice

 CAPÍTULO 8

Xii nga Reinu stiʼ Dios

Xii nga Reinu stiʼ Dios
  • Xi cayabi Biblia laanu de Reinu stiʼ Dios

  • Xi zuni gobiernu ca

  • Padxí guni Reinu ca ni na Dios ndaaniʼ Guidxilayú

1. Xi oración ni nabé runibiáʼ binni chiguidúʼyanu.

NABÉ stale binni runibiáʼ oración stiʼ padrenuestro. Bisiidiʼ Jesús oración ca ti chinándanu ni ne stale ni rusiidiʼ ni laanu. Chiguidúʼyanu xi chonna cosa canábanu lu oración riʼ ne zacá jma zieʼnuʼ xipeʼ ndiʼ cusiidiʼ Biblia.

2. Bizeeteʼ chonna cosa ni bisiidiʼ Jesús guinabaʼ ca discípulo stiʼ ora guni orarcaʼ.

2 Ra bizulú oración que, gudxi Jesús cani cucaadiaga laa: «Laatu la? naquiiñeʼ guni orartu sicaríʼ: “Bixhózedu ni nuu guibáʼ, guisácapeʼ laluʼ. Gueeda Reinu stiluʼ. Gaca ni naluʼ ndaaniʼ guidxilayú, cásica raca ni guibáʼ”» (Mateo 6:9-13TNM). Xi riníʼ guionnaʼ cosa ni rinábanu lu oración riʼ yaʼ.

3. Xi naquiiñeʼ gánnanu de Reinu stiʼ Dios.

3 Maʼ bizíʼdinu stale de lá Dios, Jiobá. Laaca maʼ guninu cani naguixhe íquebe, casi cani maʼ bíʼnibe ne cani chigúnibe para binni guidxilayú. Peru, xi gucalaʼdxiʼ Jesús niníʼ né ca diidxaʼ «gueeda Reinu stiluʼ» yaʼ. Xii nga Reinu stiʼ Dios. Ne ora gueeda Reinu ca, ximodo zusisaca ni lá Dios. Xi dxiiñaʼ chiguni Reinu ca para gaca ni na Dios.

 XII NGA REINU STIʼ DIOS

4. Xii nga Reinu stiʼ Dios, ne tuu nga Rey stini.

4 Reinu stiʼ Dios nga ti gobiernu gudixhestí Jiobá ne maʼ gulí tu gaca Rey stini. Tu laabe yaʼ. Nga nga Jesucristu. Laabe jma dxíʼbabe que guiráʼ tu runi mandar lu guidxilayú; nga runi rábicabe laabe «xaíque sti irá rey ne irá xixé ni runi mandar» (1 Timoteo 6:15). Laabe nápabe poder para gúnibe stale cosa galán que tutiica runi mandar lu Guidxilayú.

5. Dede paraa chichuu Reinu stiʼ Dios para guni mandar.

5 Dede paraa chichuu Reinu stiʼ Dios para guni mandar yaʼ. Guníʼ ique, paraa nuu Jesús nagasi. Casi maʼ biziidiluʼ, biitisicabe laabe lu ti yaga, biásabe zebe guibáʼ (Hechos 2:33). Racá nga nuu Reinu stiʼ Dios: guibáʼ. Nga runi, lu Biblia rieeteʼ ni casi ti Reinu ni nuu guibáʼ (2 Timoteo 4:18). Neca guibáʼ nuu ni, zuni mandar ni lu Guidxilayú riʼ (biindaʼ Apocalipsis 11:15).

6, 7. Xiñee zanda guininu gastiʼ sti Rey casi Jesús.

6 Xiñee zanda guininu gástiruʼ sti Rey casi Jesús. Primé la? purtiʼ qué ziuu dxi gátibe. Biblia na cadi casi ca rey ni nuu lu guidxilayú riʼ laabe, sínuque laabe «qué ziuu dxi gati[be], ne nabé nayaʼni ra nuu[be] dede iruti qué zanda idxiña» (1 Timoteo 6:16). Ne cani galán gúnibe qué ziuu dxi guiluxe cani. Dxandipeʼ zúnibe stale ni galán.

7 Biiyaʼ xi riníʼ Biblia de laabe: «Luguiabe ziuu espíritu stiʼ Jiobá, espíritu stiʼ guendanuuxpiaaniʼ ne guendariene, espíritu stiʼ conseju ne stiʼ poder, espíritu stiʼ guendananna ne stiʼ guendaridxibi Jiobá; Ne ziéchebe purtiʼ ridxíbibe Jiobá. Qué zuni juzgarbe binni pur cani gúʼyasibe, qué zugaanibe donda íquecaʼ pur cani gunadiágasibe. Jneza zuni juzgarbe ca pobre, né jneza zulídxibe binni guidxilayú» (Isaías 11:2-4). Ca diidxaʼ riʼ  culuíʼ cani ora maʼ guni mandar Jesús lu guidxilayú riʼ, zúnibe ni jneza ne ziabe binni. Ñuuláʼdxiluʼ ñápaluʼ ti xaíque zacá la?

8. Tuu nga cani chiguni mandarné Jesús.

8 Guidúʼyanu sti cosa ni rusihuinni xiñee gadxepeʼ Reinu stiʼ Dios: cadi Jesús si chiguni mandar; zuni mandarnebe xcaadxi binni. Gudxi apóstol Pablu Timoteu ca diidxaʼ riʼ: «Ne pa gacaná nu pur laabe la? laca zuni mandar né nu laabe» (2 Timoteo 2:12). Ya, casi Pablu, Timoteu ne xcaadxi binni bizuubaʼ diidxaʼ maʼ gulí Dios laacaʼ para guni mandárnecaʼ Jesús guibáʼ. Panda binni zuni mandarnebe yaʼ.

9. Panda binni zuni mandarné Jesús, ne padxí bizulú Dios cabí laacabe.

9 Casi bidúʼyanu lu capítulo 7 stiʼ libru riʼ, gucuaa apóstol Juan ti visión ra biʼyaʼ «zuhuaa Dendxu huiini [Jesucristu] que lu dani Sion [ra chitibe casi Rey guibáʼ]. Zuhuaa né ti gayuaa cuarenta y cuatro mil binni laabe, ni cá lá be ne lá Bixhoze be lucuá». Tuu nga 144,000 riʼ yaʼ. Laca laabe cusiénebe: «Canananda ca[be] Dendxu huiini que ladu tiica cheʼ. Bilá cabe lade irá binni, casi ñaca nirudóʼ laacabe guʼde cabe Dios ne Dendxu huiini que» (Apocalipsis 14:1, 4). Laacabe nga cani qué lica nusaana de ninanda Jesús ne bibícabe para guni mandarnécabe laa guibáʼ. Despué de gáticabe ne guiásacabe chécabe guibáʼ la? laacabe ne Jesús zuni «mandar[cabe] [...] binni guidxilayú» (Apocalipsis 5:10). Dede dxi bibani ca apóstol que, bizulú Dios cabí cani ruzuubaʼ stiidxaʼ ti guizaa 144,000 binni.

10. Xiñee rábinu nadxii Dios laanu ra gulí Jesús ne 144,000 binni para guni mandar laanu.

10 Ora gulí Jiobá Jesús ne 144,000 binni ti guni mandarcaʼ laanu la? bisihuínnibe nadxiibe laanu. Guca Jesús  binni ne nanna xi yuubaʼ ridídinu. Sicaríʼ guníʼ Pablu de Jesús: «Beda gaca sacerdote gola stinu binni guidxilayú ne udiʼdi irá ni rididi nu. Xi si la? qué nuchee be. Zanda guiá be laanu purti nanna pe be xii nga nagana para laanu, ne zanda acané be laanu ora ma qué ganda sa nu» (Hebreos 4:15; 5:8). Zaqueca cani chiguni mandarnebe laaca maʼ huadíʼdicaʼ lu yuubaʼ ridiʼdiʼ binni. Laaca maʼ huadxiilucaʼ guendaruchee ne huayaca huaracaʼ. Nanna dxíchinu ziénecabe guiráʼ guendanagana ridídinu.

XI ZUNI REINU STIʼ DIOS

11. Xiñee guníʼ Jesús guinabaʼ ca discípulo stiʼ gaca ni na Dios guibáʼ.

11 Dxi bisiidiʼ Jesús ca discípulo stiʼ, qué ñábibe laacaʼ guinábasicaʼ gueeda Reinu stiʼ Dios, sínuque laaca gúdxibe laacaʼ guinábacaʼ gaca ni na Jiobá «ndaaniʼ guidxilayú, cásica raca ni guibáʼ». Guibáʼ, ra nuu Dios, ca ángel ni ruzuubaʼ stiidxabe nabé rúnicaʼ ni nabe. Peru lu capítulo 3 stiʼ libru riʼ bizíʼdinu guyuu ti ángel qué iquiiñeʼ ni maʼ qué niná ñuni ni na Dios ne bicaa Adán ne Eva gucheecaʼ. Lu capítulo 10 zazíʼdinu xiná Biblia de ángel ni rábicabe Binidxabaʼ. Laabe ne xcaadxi espíritu ni yenanda laabe —lacaʼ demonio— biaanacaʼ caadxi dxi guibáʼ. Nga runi, cadi guiráʼ cani guyuu guibáʼ bíʼnicaʼ ni na Dios ca dxi stiʼ Jesús. Peru maʼ gadxé si zaca ni ora guzulú guni mandar Jesucristu lu Reinu stiʼ Dios ne tindené Binidxabaʼ (biindaʼ Apocalipsis 12:7-9).

12. Xi chupa cosa risaca chigaca casi cayeeteʼ lu Apocalipsis 12:10.

12 Ca diidxaʼ riʼ cayabi laanu xi zazaaca: «Oraque bina diaʼga ucuá ti ridxi de ibáʼ: Ma bidxiña dxi ulá Dios stitu laanu. Ma chi usihuinni enda nandxóʼ stiʼ, chi guni mandar, laa ne Cristu stiʼ. Purti ma uladxi be ni uluu  xqueja ca hermanu stinu, dxa ni uluu xqueja ca nezalú be ridxí ne huaxhinni que» (Apocalipsis 12:10). Ñee maʼ biiyaluʼ lu versículo riʼ xi chupa cosa risaca chigaca la? Primé, zuzulú zuni mandar Jesús lu Reinu stiʼ Dios. Guiropa, zaládxicabe Binidxabaʼ guibáʼ ne zusábacabe laa ndaaniʼ Guidxilayú. Despué zazíʼdinu maʼ bizaaca cani guninu riʼ.

13. Xi guca ra guládxicabe Binidxabaʼ guibáʼ.

13 Xi huayaca dede dxi guca ca nga yaʼ. Sicaríʼ cuzeeteʼ Biblia de ni bizaaca guibáʼ: «Laguiecheʼ, cani nuu ibáʼ» (Apocalipsis 12:12). Cayecheʼ ca ángel ni ruzuubaʼ stiidxa Dios, purtiʼ guládxicabe Binidxabaʼ ne ca demonio stiʼ guibáʼ ne biaana cani cayuni si ni na Dios, nuudxidóʼcabe ne nuucabe tobi si. Nga runi, guibáʼ maʼ cayaca ni na Dios.

Beeda stale yuubaʼ ra biaba Binidxabaʼ ne ca demonio stiʼ lu Guidxilayú riʼ. Peru qué zandaa zaluxe cani

14. Xi cazaaca dede dxi biaba Binidxabaʼ lu Guidxilayú.

14 Xi zanda guininu de Guidxilayú riʼ yaʼ. Biblia na: «Lagapa gá si laatu cani nuu ndaani guidxilayú ne ndaani nisadóʼ, purti ma biete binidxaba ra nuu tu ne cayó dí laa ti nanna ma huaxiéʼ dxi napa» (Apocalipsis 12:12). Cadxiichi Binidxabaʼ purtiʼ guládxicabe laa guibáʼ ne nanna huaxiéʼ dxi napa. Cumu cadxiichibe la? cutiidibe binni lu guendanagana. Lu sti capítulo ca zazíʼdinu de ca guendanagana ca. Cumu maʼ biaba Binidxabaʼ lu Guidxilayú ne cutiidiʼ binni lu guendanagana la? rucaa nga laanu guinabadiidxanu, ximodo zuni Reinu ca ni na Dios lu Guidxilayú riʼ.

15. Xi naguixhe ique Dios guni lu Guidxilayú riʼ.

15 Bietenalaʼdxiʼ xi gudixhe ique Dios guni lu Guidxilayú. Casi bizíʼdinu lu capítulo 3, ndaaniʼ jardín stiʼ Edén que bisihuínnibe racaláʼdxibe gaca Guidxilayú riʼ ti paraísu ne ñuu binni runi jneza ndaaniʼ ni sin qué ñuu dxi ñáticaʼ. Dxi bicaa Binidxabaʼ Adán ne Eva gucheecaʼ  la? bidxaa modo cayaca ni na Dios ndaaniʼ Guidxilayú, peru qué nidxaa ni gudixhe ique. Racaláʼdxiruʼ Jiobá gaca ni na ca diidxaʼ riʼ: «Cani runi jneza zudii Dios laacaʼ guidxilayú, ne qué ziuu dxi gusaana de guibánicaʼ lu ni» (Salmo 37:29). Ne nga nga chiguni Reinu stiʼ Dios. Peru ximodo yaʼ.

16, 17. Xi caníʼ Daniel 2:44 de Reinu stiʼ Dios.

16 Lu Daniel 2:44 ridxélanu ca diidxaʼ riʼ: «Ne dxi stiʼ ca rey que, Dios ni nuu guibáʼ zucuí ti reinu ni qué ziuu dxi guinitilú. Ne reinu riʼ qué zadiʼdiʼ ni lu náʼ sti guidxi. Zunidé ni ne zunduuxeʼ ni guiráʼ reinu riʼ, ne laani ziaana ni ne qué ziuu dxi guiluxe ni». Xi cayabi ca diidxaʼ riʼ laanu de Reinu stiʼ Dios yaʼ.

17 Primé la? caníʼ ni ziuu Reinu ca «dxi stiʼ ca rey», o dxi nuuruʼ xcaadxi gobiernu cayuni mandar. Guiropa la? qué ziuu dxi guinitilú Reinu ca. Qué ziuu sti gobiernu ni guni mandar nin stobi ni gusaba ni. Ne guionna la? cuzeeteʼ ni zadinde Reinu stiʼ Dios ne ca reinu stiʼ guidxilayú riʼ, ne Reinu stiʼ Dios nga zuni ganar. Últimu la? laasi ni nga chiguni mandar ni binni guidxilayú ne qué ziuuruʼ stobi jma galán casi laani.

18. Xi láʼ guendaridinde chichuu ora tinde Reinu stiʼ Dios ne ca gobiernu stiʼ Guidxilayú.

18 Stale nga ni cuzeeteʼ Biblia de guendaridinde stiʼ Reinu stiʼ Dios ne ca gobiernu stiʼ guidxilayú riʼ. Laani cuzeeteʼ ni ora maʼ zeeda guidxiña dxi guiluxe modo nabáninu riʼ, guiráʼ demonio zusiguiicaʼ «iráʼ ni runi mandar ndaani guidxilayú». Xi para yaʼ. «Para aca ca tobi si ucaa lú ca Dios ni jma nandxóʼ.» Guiráʼ rey zadxíñacaʼ «ti lugar rabi cabe Armagedón, diidxa hebreu» (Apocalipsis 16:14, 16). Pur ni cayabi guiropaʼ versículo riʼ laanu, Armagedón nga láʼ dxi tinde Reinu stiʼ Dios ne ca gobiernu stiʼ Guidxilayú riʼ.

19, 20. Xi cucueeza de gaca ni na Dios ndaaniʼ Guidxilayú riʼ.

 19 Pur guerra ni láʼ Armagedón, xi zabeendú Reinu stiʼ Dios. Guiníʼ íquenu sti biaje ni gudixhe ique Jiobá guniné Guidxilayú riʼ: gaca ni ti paraísu ne guidxá binni qué gapa donda ndaaniʼ ni, binni guni ni jneza ne guni ni nabe. Xi cucueeza de gaca ni na Dios yanna yaʼ. Primé la? binni ruchee laanu, nga runi raca huaranu ne rátinu. Peru casi bizíʼdinu lu capítulo 5, bidii Jesús xquendanabani pur laanu ti ganda guibáninu sin qué chuʼ dxi gátinu. Zándaca rietenaláʼdxiluʼ ca diidxaʼ bicaa apóstol Juan ra na: «Nadxii xhaata Dios binni guidxilayú ngue runi bidii tobi lucha Xiiñiʼ, ti irá tu guni cre Xiiñi be que la? cadi initilú sínuque gapa enda nabani ni qué zaluxe» (Juan 3:16).

20 Stobi ni cucueeza de gaca ni na Dios nga stale binni qué runi jneza. Rusiguiicaʼ, riguítecaʼ binni ne cadi jneza nabánicaʼ. Qué nacaʼ gúnicaʼ ni na Dios. Peru guiráʼ ni cadi cayuni ni jneza la? zanitilucaʼ lu guendaridinde stiʼ Dios, Armagedón. Biblia na: «Maʼ xcaadxi si tiempu cayaadxaʼ, ne maʼ qué ziuu binni malu; neca guyúbiluʼ laacaʼ maʼ qué zadxeʼluʼ laacaʼ» (Salmo 37:10). Stobi ni cucueeza de gaca ni na Dios ndaaniʼ Guidxilayú riʼ nga ca gobiernu, purtiʼ qué racanecaʼ binni guni ni na Dios. Stale de laacabe qué randa runi chaahuiʼ xquidxi, runinácabe binni o ricaacabe bueltu ti cadi gúnicabe ni jneza. Biblia cayabi laanu: «Biaʼ tiempu huayuni mandar hombre laca laa huayúnicaʼ ni para si gacanacaʼ» (Eclesiastés 8:9).

21. Xi chiguni Reinu riʼ para gaca ni na Dios lu Guidxilayú.

21 Peru despué de Armagedón, guiráʼ binni ziuucaʼ xananáʼ ti gobiernu si, nga nga Reinu stiʼ Dios. Zuni Reinu riʼ ni na Dios ne zedané ni stale ndaayaʼ. Caadxi de ca ndaayaʼ ca nga zanitilú Binidxabaʼ ne ca demonio stiʼ  (Apocalipsis 20:1-3). Zaquiiñeʼ Reinu ca rini bixhii Jesús para maʼ cadi gaca huará nin gatiʼ binni guzuubaʼ stiidxaʼ Dios ne guibani sin qué chuʼ dxi gatiʼ (biindaʼ Apocalipsis 22:1-3). Laaca zuni ni Guidxilayú riʼ ti paraísu. Zacá nga chiguni Reinu riʼ ni na Dios ne laaca zusisaca ni labe. Xi riníʼ nga yaʼ. Riníʼ ni ora maʼ guni mandar Reinu ca, guiráʼ binni zapa respetu ne zusisaca lá Jiobá.

PADXÍ GUNI REINU CA NI NA DIOS

22. Ximodo nánnanu qué ñeeda Reinu stiʼ Dios dxi beeda Jesús lu Guidxilayú riʼ ne nin dxi biasa lade gueʼtuʼ.

22 Dxi gudxi Jesús ca discípulo stiʼ guinábacaʼ gueeda Reinu stiʼ Dios, caʼruʼ diʼ guzulú ni dxiqué. Ñee beeda Reinu ca ora biasa Jesús zeʼ guibáʼ la? Coʼ, purtiʼ Pedru ne Pablu guniʼcaʼ guca ni na Salmo 110:1 biasa si Jesús lade gueʼtuʼ ra na: «Na Jiobá rabi Señor stinneʼ: “Gurí ladu derechu stinneʼ dede ora quixhedxieʼ ca xhenemíguluʼ xañeeluʼ”» (Hechos 2:32-34; Hebreos 10:12, 13). Nga runi, naquiiñeʼ cueza Jesús ti tiempu.

Zuni Reinu ca ni na Dios lu Guidxilayú riʼ, cásica raca ni guibáʼ

23. 1) Padxí bizulú cayuni mandar Reinu stiʼ Dios. 2) Xi chiguieeteʼ lu sti capítulo ca.

23 Pabiáʼ naquiiñeʼ cuézabe yaʼ. Lu siglu 19 ne 20, caadxi binni ni dxandíʼ ruundacaʼ Biblia gudíxhecaʼ zaluxe tiempu cabeza Jesús que lu iza 1914. (Pa racaláʼdxiluʼ gánnaluʼ jma de iza riʼ la? biiyaʼ apéndice «1914: iza nabé risaca ni zeeda lade ca diidxaʼ ni na Biblia chigaca»).  Guiráʼ ni huayaca lu guidxilayú riʼ dede iza 1914 cusihuinni cani biaʼsi nga ni guníʼ ca binni ruundaʼ Biblia que. Ra cayaca ni na Biblia ca rusihuinni cani iza 1914 nga biʼniʼ Jiobá Jesús Rey stiʼ Reinu stiʼ Dios ni nuu guibáʼ ne maʼ cayuni mandarbe yanna. Nga runi, maʼ nabáninu lu «huaxiéʼ dxi napa» Binidxabaʼ (Apocalipsis 12:12; Salmo 110:2). Laaca zanda guininu maʼ cadi candaa zuzulú Reinu ca guni ni na Dios lu Guidxilayú riʼ. Ñee cadi galán nga gánnanu ca diidxaʼ riʼ la? Ñee raʼbuʼ dxandíʼ zaca cani la? Sti capítulo chiguidúʼndanu ca zabi lii xipeʼ ndiʼ cusiidiʼ Biblia de laacani.