Biiyaʼ guiraʼ ni nuu lu sitiu riʼ

guyé lu índice

 CAPÍTULO 9

Ñee nabáninu lu ca «últimu dxi» la?

Ñee nabáninu lu ca «últimu dxi» la?
  • Xi guníʼ Biblia zahuinni ca dxi stinu riʼ

  • Casi na Stiidxaʼ Dios, ximodo zaca binni lu ca «últimu dxi»

  • Xi cani galán na Biblia zahuinni lu ca «últimu dxi»

1. Paraa zanda guidxélanu ni chigaca despué.

ORA ruuyaluʼ guiráʼ ni cadiʼdiʼ lu tele, huanabadiidxaluʼ laca lii xi gácaxa de guidxilayú riʼ la? Ca guendananá ca málasi reeda cani, dede nin ti binni qué zanda guiníʼ xi chigaca despué (Santiago 4:14). Peru Jiobá nanna xi chigaca (Isaías 46:10). Maʼ raca stale iza, Stiidxabe, Biblia, cadi guníʼ si ni de ca guendananá ridúʼyanu yanna riʼ, sínuque laaca guníʼ ni guiráʼ cani galán chigaca.

2, 3. Xi gunabadiidxaʼ ca discípulo stiʼ Jesús laa, ne xi bicabi laacabe.

2 Jesucristu guníʼ de Reinu stiʼ Dios, ti gobiernu ni chigunduuxe guiráʼ guendaquéiquiiñeʼ ne chiguni Guidxilayú riʼ ti paraísu (Lucas 4:43). Ca binni bicaadiaga laabe gucaláʼdxicaʼ ñánnacaʼ padxí gueeda Reinu ca. Dede ca discípulo stiʼ Jesús gunabadiidxacaʼ laa: «Xi seña ihuinni dxi mayaca gueedu ne iluxe guidxilayú riʼ» (Mateo 24:3). Laabe gúdxibe laacaʼ Jiobá si nanna padxí guiluxe guidxilayú qué iquiiñeʼ riʼ, o ca binni qué iquiiñeʼ nuu luni (Mateo 24:36). Peru Jesús guníʼ guiráʼ ni zaca lu Guidxilayú riʼ ante guedané Reinu ca guendariuudxi ne gapa ni laanu. Cani guniʼbe que maʼ cayaca cani yanna.

 3 Ante guidúʼyanu pa dxandíʼ nabáninu lu ca dxi ra mayaca «iluxe guidxilayú» riʼ, guidúʼyanu primeru de ti guendaridinde ni qué ñuuyaʼ nin ti binni. Guca ni guibáʼ ra nuu ca espíritu, peru dede né laanu rugaanda ni.

TI GUENDARIDINDE GUCA GUIBÁʼ

4, 5. 1) Xi guca guibáʼ ora bizulú Jesús biʼniʼ mandar. 2) Casi na Apocalipsis 12:12, xi zaca pur guendaridinde guyuu guibáʼ.

4 Lu capítulo 8 bizíʼdinu bizulú Jesucristu cayuni mandar guibáʼ lu iza 1914. Biblia na: «Qué nusaanaʼ de ñuuyaʼ ca visión bihuinni huaxhinni que, ne ¡biiyaʼ! zeeda tuuxa casi xiiñiʼ hombre lade za; ne guyuube ra nuu Binnigola ni maʼ xadxí nabani, ne bichíñacabe laabe gaxha, nezalú. Ne bidiicabe laabe guni mandarbe, bisisácacabe laabe ne gucuaabe reinu, ti guni guiráʼ binni, guiráʼ guidxi ne binni riníʼ gadxé gadxé diidxaʼ ni nabe. Qué ziuu dxi gusaana de guni mandar gobiernu stibe, ne qué zanitilú reinu stibe» (Daniel 7:13, 14). Qué nindaa bizulú bíʼnibe dxiiñaʼ. Sicaríʼ na Biblia: «Oraque udinde cabe ibáʼ. Bicaa lú Miguel [sti lá napa Jesús], tobi de ca xaíque sti ca ángel, ne ca xpinni dxa dragón [Binidxabaʼ]. Laca bicaa lú dragón ne ca xpinni». * Binidxabaʼ ne ca ángel malu stiʼ, ca demonio, biníticaʼ ra gudíndecaʼ ne biábacaʼ lu Guidxilayú riʼ. Ca ángel ruzuubaʼ stiidxaʼ Dios biéchecaʼ purtiʼ maʼ qué ñaana Binidxabaʼ ne ca demonio stiʼ guibáʼ. Peru ca binni nuu lu Guidxilayú qué ziéchecaʼ. Biblia maca guníʼ: «Lagapa gá si laatu cani nuu ndaani guidxilayú [...], purti ma biete binidxaba ra nuu tu ne cayó dí laa ti nanna ma huaxiéʼ dxi napa» (Apocalipsis 12:7, 9, 12).

5 Casi bíʼyaluʼ ca, pur guendaridinde ca zadxiichi Binidxabaʼ ne nagana zúnibe modo guibani binni.  Casi chiguidúʼyanu, yanna nga nabáninu ca dxi nagana ca. Peru qué zandaa cani, sínuque ziuu cani «huaxiéʼ dxi», dede Binidxabaʼ nanna ni. Lu Biblia láʼ ca dxi riʼ «últimu dxi» o dxi «izaa xhi guidxilayú» (2 Timoteo 3:1). ¡Nabé riéchenu gánnanu maʼ cadi candaa zunitilú Dios guiráʼ ni cayuni Binidxabaʼ binni! Guidúʼyanu chupa chonna de cani maca guníʼ Biblia ne maʼ cayaca cani yanna. Cani chiguidúʼyanu riʼ cusihuinni cani maʼ nabáninu lu ca últimu dxi ne maʼ cadi candaa zuni mandar Reinu stiʼ Dios, guiráʼ cani nadxii Jiobá zacaacaʼ stale ndaayaʼ ni qué ziuu dxi guiluxe. Primé la? guidúʼyanu tapa cosa zeeda lu seña bidii Jesús ni zahuinni ca dxi stinu riʼ.

CANI JMA CAHUINNI LU CA ÚLTIMU DXI RIʼ

6, 7. Ca dxi stinu riʼ, ximodo cayaca cani guníʼ Jesús de guendaridinde ne gubiña.

6 «Zucaa lú ti gobiernu sti gobiernu ne zucaa lú ti guidxi sti guidxi.» (Mateo 24:7.) Lu ca últimu ti gayuaa iza riʼ, huayati millón binni pur ca guendaridinde ca. Sicaríʼ guníʼ ti historiador de Gran Bretaña: «Lu siglu 20 jma bixii rini. [...] Nabé guyuu guendaridinde, ti tiempuhuiiniʼ si nga biuudxícabe ne qué nidíndecabe né guiibaʼ nin ti lugar». Ti informe  stiʼ Instituto Worldwatch na: «Lu ca guendaridinde [guca lu siglu 20] guti chonna biaje biaʼ ni maʼ guti lu guiráʼ guendaridinde guyuu dede siglu 1 despué de Cristu hasta iza 1899». Dede iza 1914 maʼ huayati jma de ti gayuaa millón binni pur laacani. Maʼ stale binnilidxi binni huayati lu guendaridinde. Zándaca maʼ huadíʼdiluʼ lu guendananá ca.

7 «Zaca gubiña.» (Mateo 24:7.) Caadxi investigador nacaʼ maʼ bidale ni gó binni ca últimu treinta iza riʼ. Peru stáleruʼ tu qué gapa ni gó purtiʼ qué gápacaʼ ti ndaa layú para gudxiibacaʼ ni gocaʼ, dede nin bueltu qué gápacaʼ para sicaʼ ni. Ndaaniʼ ca guidxi ni deruʼ caroobaʼ, jma de ti mil millón binni ridiʼdiʼ dxi né caadxi nabiuxehuiiniʼ si. Ne stale de laacaʼ jma nga ridíʼdicaʼ dxi sin gocaʼ. Organización Mundial de la Salud guníʼ rati jma de gaayuʼ millón baʼduhuiiniʼ guiráʼ iza purtiʼ qué rizaa ni gocaʼ.

8, 9. Xi rusihuinni maʼ cayaca cani guníʼ Jesús de xu roʼ ne guendahuará.

8 «Zaca stale xu roʼ.» (Lucas 21:11.) Servicio Geológico de Estados Unidos guníʼ zándaca zaca biaʼ diecinueve xu roʼ cada iza. Nabé zuniná cani yoo ne zucaa cani bí Guidxilayú. Guiráʼ iza huayaca xu ni huaxhiá stale yoo roʼ. Nuu caadxi registru ni rusihuinni maʼ  guti jma de chupa millón binni pur ca xu huayaca dede iza 1900. Sicaríʼ guníʼ ti libru: «Ca aparatu nacubi caree ca huaxiéʼ huayacané cani guilá binni».

9 Ziuu «enda huará» (Lucas 21:11). Neca maʼ nuu stale remediu yanna la? qué ganda guiree guendahuará, cásica cani maca maʼ xadxí nuu ne zaqueca cani nacubi cahuinni. Ti noticia guníʼ lu ca últimu iza riʼ jma maʼ cahuinni gande guendahuará ni maca runibiáʼ binni —casi guendahuará bidxi, paludismu ne cólera—, ne xcaadxi huayaca nagana guiándacaʼ neca nuu remediu. Laaca cahuinni biaʼ sti treinta guendahuará cubi. Chupa chonna de laacani ruuti cani binni ne dede yanna qué gapa cani remediu.

CA BINNI NABANI LU CA ÚLTIMU DXI RIʼ

10. Casi na 2 Timoteo 3:1-5, ximodo zaca binni ca dxi stinu riʼ.

10 Biblia cadi caníʼ si de ni cayaca lu Guidxilayú riʼ, sínuque laaca caníʼ ni zuchaa binni modo laa. Apóstol Pablu guníʼ ximodo zaca stale binni. Laabe bizeetebe: «Nagana zaca ni ora mayaca izaa xhi guidxilayú» (biindaʼ 2 Timoteo 3:1-5). Pablu guníʼ ximodo zaca binni ne ndiʼ nga chupa chonna de laacani:

  •   zuyubi binni para laa si

  • nisi bidxichi zacá íquecaʼ

  • maʼ qué zuzuubacaʼ stiidxaʼ jñaacaʼ ne bixhózecaʼ

  • zudxiidéchecaʼ Dios

  • qué zannaxhiicaʼ binni

  • qué zanda gucueezacaʼ laca laacaʼ

  • zuninacaʼ binni

  • zuyúbicaʼ ni chuuláʼdxicaʼ lugar de guyúbicaʼ Dios

  • zaniʼcaʼ runi crecaʼ Dios, peru pur modo nabánicaʼ zahuinni cadi dxandíʼ ni

11. Casi na Salmo 92:7, xi zaca ca binni malu.

11 Ñee maʼ zacá ca binni nuu neza liʼdxuʼ la? Zándaca maʼ. Guiráʼ ladu ridúʼyanu binni zacá. Nga rusihuinni maʼ chiguni Dios xiixa, purtiʼ Biblia na: «Ora guidale binni qué iquiiñeʼ casi rindani guixi malu ne ora guidale binni malu, óraca nga guinitilucaʼ ne maʼ qué ziuuruʼ dxi chuʼcaʼ» (Salmo 92:7).

CANI GALÁN CHIGUIZAACA

12, 13. Xiñee rábinu maʼ cadale guendananna lu ca últimu dxi riʼ.

12 Lu ca últimu dxi riʼ, nanna dxíchinu nuu stale guendanagana, casi  maca cá lu Biblia zaca cani. Peru lade ca xpinni Dios cayaca caadxi cosa sicarú.

13 «Guendananna ni dxandíʼ zadale ni», zacá cá lu libru stiʼ Daniel zaca ni. Padxí gaca ni na ca diidxaʼ ca yaʼ. Dxi gueeda fin (Daniel 12:4). Dede iza 1914 cayacané Jiobá cani riuulaʼdxiʼ guni ni nabe guiénecaʼ Biblia jma jneza. Ca binni racalaʼdxiʼ guni ni nabe nga cayénecaʼ guiráʼ ni risaca rusiidiʼ Biblia. Casi xi riníʼ lá Dios ne xi naguixhe ique guni, xiñee guti Jesús para gulá laanu, nánnacabe ximodo nuu ca gueʼtuʼ ne ziuu dxi ziásacaʼ. Cani cayuni ni na Jiobá laaca huaziidicaʼ guibánicaʼ modo cueenducaʼ ni galán ne modo gusisácacaʼ Dios. Jma maʼ biénecabe xii nga Reinu stiʼ Dios ne ximodo chiguni chaahuiʼ ni cani cayaca lu Guidxilayú. Xi rúnicabe né ni maʼ nánnacabe ca yaʼ. Pur ni canabadiidxanu ca naquiiñeʼ guininu de sti cosa zeeda lu Biblia ni maʼ cayaca lu ca últimu dxi riʼ.

«Zuiʼ cabe stiidxa Dios de idubi naca guidxilayú.» (Mateo 24:​14)

14. Dede pa guidubi careeche ca diidxaʼ nacubi ne galán stiʼ Reinu, ne tuu nga cani cayuni dxiiñaʼ riʼ.

14 «Zuiʼ cabe stiidxa Dios de idubi naca guidxilayú», zacá guníʼ Jesús zaca dxi mayaca «iluxe guidxilayú» stiʼ Binidxabaʼ (biindaʼ Mateo 24:3, 14). Lu guidubi naca Guidxilayú careeche ca diidxaʼ nacubi ne galán stiʼ Reinu stiʼ Dios, caníʼcabe xii nga Reinu ca, xi chiguni ni ne ximodo zanda guicaanu ca ndaayaʼ guedané ni. Ca diidxaʼ nacubi riʼ careeche cani ndaaniʼ jma de chupa gayuaa treinta guidxi ne lu gayuaa diidxaʼ. Millón de ca testigu stiʼ Jiobá riʼ nácacaʼ de guiráʼ ladu, guiráʼ guidxi ne guiráʼ diidxaʼ, laacaʼ nga cucheechecaʼ ca diidxaʼ nacubi ne galán stiʼ Reinu (Apocalipsis 7:9). Laaca qué riáxacabe pur gusiidicabe tuuxa binni gacalaʼdxiʼ guiziidiʼ de Biblia. Dxandipeʼ nga ridxagayaanu ora ridúʼyanu modo cayaca cani maca cá lu Biblia, jmaruʼ si pa guietenaláʼdxinu guníʼ Jesús zaca nanaláʼdxicabe guiráʼ binni ni dxandíʼ zinanda laa (Lucas 21:17).

 XI GUʼNUʼ YAʼ

15. 1) Ñee raʼbuʼ nabáninu lu ca últimu dxi la? xiñee yaʼ. 2) Xii nga riníʼ «iluxe guidxilayú» para cani cucaalú Jiobá ne para cani racalaʼdxiʼ guibani dxi guni mandar Reinu stiʼ Dios.

15 Cumu maʼ cayaca stale ni zeeda lu Biblia, ñee cadi raʼbuʼ maʼ nabáninu lu ca últimu dxi la? Ca diidxaʼ nacubi riʼ zareeche cani dede ra náʼ Jiobá, oraqueruʼ «iluxe guidxilayú» (Mateo 24:14). Ora rieeteʼ diidxaʼ «iluxe guidxilayú» caníʼ ni dxi gunduuxeʼ Dios guiráʼ guendaquéiquiiñeʼ nuu ndaaniʼ ni. Zaquiiñebe Jesús ne ca ángel para gunduuxecaʼ guiráʼ binni ni cadi cusaana de gucaalú laabe (2 Tesalonicenses 1:6-9). Maʼ qué zaguíteruʼ Binidxabaʼ ne ca demonio stiʼ binni. Gaca si nga la? zedané Reinu stiʼ Dios stale ndaayaʼ para cani chinanda ley stini, ley ni racané gaca ni jneza (Apocalipsis 20:1-3; 21:3-5).

16. Xii nga jma jneza gúniluʼ.

16 Cumu maʼ cadxiña dxi guinitilú guidxilayú stiʼ Binidxabaʼ la? naquiiñeʼ guinabadiidxanu laca laanu: «Xi naquiiñeʼ guneʼ yanna yaʼ». Ni jma jneza gúninu nga guizíʼdirunu de Jiobá ne de ni cabézabe gúninu (Juan 17:3). Biindaʼ chaahuiʼ Biblia. Bisiaa lii cheluʼ ca guendaridagulisaa rapa cani cayuni stipa pur guni ni na Jiobá (biindaʼ Hebreos 10:24, 25). Binibiáʼ Jiobá ra guni estudiarluʼ Stiidxaʼ ne ra naquiiñeʼ guchaaluʼ bichaa ti chuuláʼdxibe modo lii (Santiago 4:8).

17. Xiñee nin qué zanna ca binni malu ca dxi guinitilucaʼ.

17 Maca guníʼ Jesús qué zulabi stale binni guiráʼ ni cusihuinni maʼ nabáninu lu ca últimu dxi. Málasi gueeda dxi guinitilú ca binni malu, dxipeʼ guirutiʼ tu cabeza ni ne nuu tu qué zanna zeeda ni, casi ora chindanaʼ ti gubaanaʼ huaxhinni (biindaʼ 1 Tesalonicenses 5:2). Caguixhená Jesús laanu né ca diidxaʼ riʼ: «Dxi ibigueta Hombre Biseenda Dios la? zaca ni casi dxi bibani Noé. Purti ante gaca fisiu que la? cayó ca binni que ne cayéʼ caʼ, cachaganá  caʼ ne cucheela caʼ, dede dxi biuu Noé ndaani arca que. Ne caʼru guiene ca xi chi gaca dede ora beeda nisa que, ziné irá caʼ. Zacaca nga zaca ni dxi gueeda Hombre Biseenda Dios que» (Mateo 24:37-39).

18. Xii nga ca diidxaʼ guníʼ Jesús ni cadi naquiiñeʼ guidúʼyanu casi guendariguite.

18 Nga runi maca guníʼ Jesús: «Laguuya gá laatu cadi ma canazá tu canaxudxi tu ne nisi icá ique tu ni ricá ique binni ni qué runibiáʼ Dios. Pacaa zaguidxi ladxidóʼ to, ne nin ganna tu mala zanaaze dxi que laatu. Purti ziaba ni luguiá irá binni guidxilayú casi ti trampa. Nga runi lagataná. Cadi guiaana dxí tu de iníʼ né tu Dios para ganda ilá tu de irá ni chi gaca ca, ne zacá zanda uzuhuaa tu nezalú Hombre Biseenda Dios» (Lucas 21:34-36). Cadi guidúʼyanu ca diidxaʼ guníʼ Jesús riʼ casi guendariguite. Xiñee yaʼ. Purtiʼ cani zanda guilá dxi guiluxe guidxilayú stiʼ Binidxabaʼ nga ca binni nabani modo riuulaʼdxiʼ Jiobá Dios ne modo riuulaʼdxiʼ Jesucristu, «Hombre Biseenda Dios». Ne zanda guibánicaʼ sin qué chuʼ dxi gáticaʼ ndaaniʼ guidxilayú cubi ni maʼ nuu gaxha ca (Juan 3:16; 2 Pedro 3:13).

^ párrafo 4 Lu apéndice «Tuu nga Miguel, ángel ni jma nandxóʼ» caníʼ Miguel nga sti lá napa Jesucristu.