Biiyaʼ guiraʼ ni nuu lu sitiu riʼ

guyé lu índice

 CAPÍTULO 19

Cadi guixélenu de Dios ni nadxii laanu

Cadi guixélenu de Dios ni nadxii laanu
  • Xii nga gannaxhiinu Dios

  • Ximodo nga cadi gusaana de gannaxhiinu Dios

  • Ximodo zaguu Jiobá ndaayaʼ cani qué rusaana de gannaxhii laa

Ñee zuyúbiluʼ guilaluʼ ra nuu Jiobá lu ca dxi nagana riʼ la?

1, 2. Paraa zanda guidxélanu ti lugar ra guilanu.

BIXUIʼLÚ bireeluʼ zizaluʼ paxaraa, chaahuidugá zigutaaguʼ caadxi za guibáʼ. Málasi caree jma xpiaaniʼ rayu guibáʼ ne reciu caxidxi cani ne bizulú cayaba dxacha nisaguié. Biree guxooñeluʼ ziyúbiluʼ paraa chuʼluʼ. Neza zeluʼ que biiyaluʼ ti lugar ra zanda chuʼluʼ ti cadi gádxeluʼ purtiʼ nabidxi raqué ne zanda gulá ni lii de nisa que. Ñee cadi dede ñécheluʼ nidxeʼluʼ ti lugar ra nilaluʼ la?

2 Yanna riʼ nabáninu dxi nagana ne nuu stale riesgu guizaacanu xiixa purtiʼ zeʼ dxi jma zinitilú guidxilayú. Peru nuu ti lugar ra zanda guilanu de intiica ni guizaacanu. Paraa ni yaʼ. Biiyaʼ xiná Biblia: «Naa zabeʼ Jiobá: “Lii nga ti lugar ra zanda guilaʼyaʼ, ti lugar nadipaʼ para naa, Dios stinneʼ ni runeʼ cré de guidubi ladxiduáʼ”» (Salmo 91:2).

3. Xi naquiiñeʼ gúninu ti gulá Jiobá laanu.

3 Jiobá, Dios ni jma nandxóʼ ni bizáʼ guidubi naca guibáʼ ne Guidxilayú zanda gulá laanu. Ñee cadi galán nga la? Laabe jma nadípabe  que tutiica binni o xiixa ni zanda guniná laanu. Neca gacananu, zabee Jiobá guiráʼ guendananá stinu. Xi naquiiñeʼ gúninu ti gulá Jiobá laanu yaʼ. Naquiiñeʼ guni crenu laabe de guidubi ladxidoʼno. Biblia laaca cayabi laanu gúninu sicaríʼ: «Cadi ixele tu de Dios ni nadxii laatu» (Judas 21). Cadi naquiiñeʼ guixélenu de Dios ni nadxii laanu o cadi gusaana de gannaxhiinu laa ne chuʼnu gaxha de Bixhózenu ni nuu guibáʼ. Pa gúninu nga la? nanna dxíchinu zulabe laanu. Peru, ximodo zanda guidxíñanu jma gaxha de ni bizáʼ laanu ca casi ti xhamígunu yaʼ.

GUNÍʼ IQUE PABIÁʼ NADXII DIOS LII NE ZAQUECA GUNNAXHII LAA

4, 5. Gunáʼ nga chupa chonna cosa rusihuinni nadxii Dios laanu.

4 Stale modo maʼ bisihuinni Jiobá nadxii laanu. Guidúʼyanu ximodo huayúnibe ni purtiʼ zacané cani laanu cadi guixélenu de Dios ni nadxii laanu. Guníʼ ique xi guiráʼ maʼ bisiidiʼ libru riʼ lii de lu Biblia. Para chuʼnu nayecheʼ la? bizáʼ Dios Guidxilayú riʼ para guibáninu luni. Lu Guidxilayú riʼ zanda guidxélanu ni guidoʼno, nisa ne xcaadxi cosa rudii ni, stale manihuiiniʼ ne ca lugar sicarú napa ni. Laaca maʼ nánnanu Dios nga guníʼ guicá Biblia, luni cá tu labe ne xi guenda nápabe. Stiidxabe cusiene biseendabe Xiiñibe ni nadxiibe lu Guidxilayú riʼ ne bidiibe lugar gacaná ne gatiʼ pur laanu (Juan 3:16). Zacá nga bisigáʼdebe laanu xiixa ni rusihuinni guendanachaʼhuiʼ stibe ne pur laani zanda cuézanu guibáninu jma galán despué.

5 Zabáninu jma galán despué purtiʼ nuu sti cosa ni maʼ biʼniʼ Dios. Maʼ guluube ti gobiernu guibáʼ, Reinu stiʼ Cristu. Maʼ cadi candaa zabee Reinu riʼ guiráʼ yuubaʼ stinu ne zuni ni Guidxilayú riʼ ti paraísu. Bixuiʼlú si nga. ¡Oracaruʼ ziuʼnu nayecheʼ ne zabáninu sin qué chuʼ dxi gátinu ne qué ziuu tu guchibi laanu! (Salmo 37:29.) Yanna, laga cabézanu guedandá dxi ca, racané cani rusiidiʼ Biblia laanu guibáninu galán biaʼ gándatiʼ. Laaca nuu sti cosa bisigaʼdeʼ Jiobá laanu:  nga nga oración ne luni zanda gábinu laabe ni racaláʼdxinu. Cani bizéʼtenu riʼ nga chupa chonna cosa rusihuinni nadxii Dios lii ne guiráʼ binni.

6. Xi naquiiñeʼ gúniluʼ para gusihuínniluʼ nadxiiluʼ Dios cásica nadxiibe lii.

6 Yanna la? naquiiñeʼ guinabadiidxaluʼ laca lii: «Cumu nadxii Jiobá naa, xi naquiiñeʼ guneʼ yanna yaʼ». Stale binni zándaca guiníʼ: «Naquiiñeʼ gannaxhieeʼ laabe». Ñee zacaca riníʼ íqueluʼ la? Jesús guníʼ ndiʼ nga mandamientu jma risaca: «Gunaxhii Dios stiuʼ de idubi ladxidóʼ loʼ ne idubi xhialma luʼ ne idubi xquenda biaani luʼ» (Mateo 22:37). Nápaluʼ stale razón para gannaxhiiluʼ Jiobá. Peru, ñee caquiiñeʼ si guni sentirluʼ nadxiiluʼ Dios de guidubi ladxidoʼloʼ ne guidubi xhiálmaluʼ ne guidubi xquendabiaaniluʼ nga laani la?

7. Ñee guinísinu nadxiinu Dios nga maʼ cusihuínninu nadxiinu laabe la? Bisiene ni.

7 Biblia na cadi caquiiñeʼ si guni sentirnu nadxiinu Dios, sínuque nuuruʼ jma ni naquiiñeʼ gúninu. Ya, neca laaca risaca nga guni sentirnu nadxiinu laabe, peru deruʼ nga cuzulú cayannaxhiinu laabe. Para ganda guiénenu ni jma la? chiguchaaganu ni sicaríʼ: pa racaláʼdxiluʼ xiixa cuananaxhi, ñee ñuudxiluʼ pa nudiicabe lii ti biidxiʼ si stini la? Coʼ njaʼ. Dxandíʼ, biidxiʼ ca riquiiñeʼ para guiroobaʼ ti yaga, peru ni racaláʼdxiluʼ nga cuananaxhi stini. Cásica ti biidxiʼ napa xidé guindani para guiroobaʼ ti yaga ne gudii cuananaxhi stiʼ, zacaca nga riquiiñeʼ gaca né ni runi sentirnu pur Jiobá. Ndiʼ nga ni rusiidiʼ Biblia: «Sicarí nga ganaxhii nu Dios: guni nu ni na. Ne cadi nagana ni na be guni nu» (1 Juan 5:3). Dxandíʼ, gannaxhiipenu Dios ca zucaa ni laanu gusihuínninu ni lu cani rúninu ne cani gúninu ca zeeda gaca casi cuananaxhi que (biindaʼ Mateo 7:16-20).

8, 9. Ximodo rusihuínninu nadxiinu Dios ne rudiʼnu xquíxepeʼ laa pur ni maʼ biʼniʼ pur laanu.

 8 Rusihuínninu nadxiinu Dios ora rúninu ni na ca mandamientu stiʼ ne rinándanu ca conseju stiʼ. Zanda gúninu cani purtiʼ cadi nagana ca ley stiʼ Jiobá, sínuque gucuá cani para guibáninu nayecheʼ ne galán (Isaías 48:17, 18). Ora ribáninu modo na Jiobá rusihuínninu cudiʼnu xquíxepeʼ laa pur guiráʼ ni maʼ biʼniʼ pur laanu. Ni jma triste nga huaxiéʼ si binni rudii xquíxepeʼ Dios. Qué racaláʼdxinu gácanu casi guca caadxi binni bibani dxi guyuu Jesús lu Guidxilayú riʼ. Ti dxi, bisiándabe chii binni huará de lepra, peru tobi si bibiguetaʼ bidii xquíxepeʼ laabe (Lucas 17:12-17). Laanu racaláʼdxinu gácanu casi hombre bibiguetaʼ bidii xquíxepeʼ laabe que ne cadi casi xcaadxi ni qué ñetenalaʼdxiʼ nudii xquíxepeʼ laabe.

9 Yanna, gunáʼ nga mandamientu stiʼ Jiobá ni naquiiñeʼ chinándanu yaʼ. Caadxi de laacani maʼ bisiene libru riʼ. Peru guietenaláʼdxinu chupa chonna de laacani, purtiʼ pa gúninu ni na ca mandamientu stiʼ Dios la? qué zácapeʼ nagana para laanu gannaxhiinu laabe.

 BIDXIÑA JMA GAXHA DE JIOBÁ GUIRÁʼ DXI

10. Xiñee nabé risaca gánnanu jma de Jiobá Dios.

10 Gunibiaʼnu Jiobá nga ni jma risaca para guidxíñanu jma gaxha de laa. Qué chuʼ dxi gusaana de guyúbinu gunibiaʼnu laabe. Bixuiʼlú nuuluʼ ndaaniʼ guiʼxhiʼ ti gueelaʼ guizáʼ nananda ne maʼ bíʼniluʼ ti guí para guchaa lii. Ñee nudiiluʼ lugar nizuíʼ ni la? Coʼ njaʼ. Ni ñúniluʼ nga nuguuluʼ jma yaga luni ti cadi nizuíʼ ni, purtiʼ pa qué ñúniluʼ ni la? ñándaca ñuuti nanda lii. Cásica ti guí qué zazuíʼ pa uguucabe yaga lu la? laanu pa gánnanu jma de Dios qué lica zusaana de gannaxhiinu laa (Proverbios 2:1-5).

Guendarannaxhii nápanu Jiobá ca naca ni casi ti guí: naquiiñeʼ cuʼnu yaga luni ti cadi guizuíʼ ni

11. Xi biʼniʼ sentir ca discípulo stiʼ Jesús pur cani bisiidibe laacaʼ.

11 Ni racalaʼdxiʼ Jesús nga cadi gusaana ca xpinni de gannaxhii Jiobá ne de gannaxhii Stiidxaʼ Dios ni rusiidiʼ laanu ni dxandíʼ. Biásasibe lade gueʼtuʼ, bisiénebe ca discípulo stibe chupa chonna cosa bíʼnibe, ni gucuá lu diidxaʼ hebreu. Xi biʼniʼ sentírcabe pur ngue yaʼ. Laacabe guníʼcabe despué: «Ñee cadi de biniibi dxacha ladxidóʼ no ra zedané be laanu neza ziupa nu, ne ra bisiene be laanu xi na Xquiʼchi Dios la?» (Lucas 24:32).

12, 13. 1) Yanna riʼ, xi cayaca né guendarannaxhii napa binni Dios ne Biblia. 2) Xi zanda gúninu ti cadi guirá guendarannaxhii stinu.

12 Dxi bizulú caziidiluʼ cani dxandíʼ rusiidiʼ Biblia, ñee cadi laaca biniibi ni ladxidoʼloʼ, bisiecheʼ ni ne bicaa ni lii guiziidiluʼ jma ne gannaxhiiluʼ Dios la? Stale tu huayaca zacá. Ni naquiiñeʼ gúninu yanna nga cadi gudiʼnu lugar guirá guendarannaxhii nápanu Dios ne gúninu stipa pur gannaxhiinu laa jma. Qué racaláʼdxinu gácanu casi ca binni bizeeteʼ Jesús ziuu yanna riʼ: «Casi irá binni zusaana de ganaxhii saa» (Mateo 24:12). Xi zanda gúniluʼ ti cadi gusaana de gannaxhiiluʼ Dios ne cani dxandíʼ rusiidiʼ Biblia yaʼ.

13 Cadi gusaana de guiziidiluʼ de Jiobá Dios ne de Jesucristu (Juan 17:3). Guníʼ ique chaahuiʼ ni gúʼndaluʼ lu Stiidxaʼ Dios ne gunabadiidxaʼ: «Xi cusiidiʼ ndiʼ naa de Jiobá yaʼ. Ñee laaca cayacané ndiʼ naa gannaxhieeʼ Jiobá jma de guidubi  ladxiduáʼ, xquendabiaaneʼ ne guidubi xhialmaʼ la?» (biindaʼ 1 Timoteo 4:15). Pa guiníʼ íqueluʼ zacá, qué ziuu dxi gusaana de gannaxhiiluʼ Jiobá.

14. Ximodo racané oración ca laanu para cadi gusaana de gannaxhiinu Dios.

14 Sti modo para cadi gusaana de gannaxhiinu Dios nga guinínenu laa guiráʼ ora (1 Tesalonicenses 5:17). Lu capítulo 17 bizíʼdinu oración ca nga ti regalu nabé risaca bidii Dios laanu. Cásica ziuʼnu jma gaxha de ca xhamígunu pa guinínenu laacaʼ guiráʼ ora ne gúninu ni de guidubi ladxidoʼno la? zacaca ziuʼnu jma gaxha de Jiobá pa qué gusaana de guinínenu laa. Naquiiñeʼ gúninu stipa pur guiníʼ íquenu xi gábinu laabe ne qué zaninu ngueca ca ngueca. Naquiiñeʼ guinínenu Jiobá cásica riniʼné ti baʼduhuiiniʼ bixhoze. Dxandíʼ nga né respetu racaláʼdxinu guinínenu laabe, peru naquiiñeʼ gábinu laabe guiráʼ ni racaláʼdxipenu ne guiree cani de ladxidoʼno (Salmo 62:8). Para guni adorarnu Jiobá naquiiñeʼ guidúʼndanu Biblia laasinu ne guni orarnu laabe de guidubi ladxidoʼno. Zacá qué ziuu dxi gusaana de gannaxhiinu Dios.

ZIUʼNU NAYECHEʼ PA GUNI ADORARNU DIOS

15, 16. Xiñee naquiiñeʼ guidúʼyanu dxiiñaʼ de guireeche diidxaʼ casi ti dxiiñaʼ sicarú ne casi ti cosa jma risaca.

15 Ora ridúʼndanu Biblia ne guni orarnu stúbinu la? laaca cayuni adorarnu Dios nga. Yanna, guzéʼtenu ni rúninu ora nuunu ra nuu xcaadxi binni: rininu de ni runi crenu. Ñee maʼ huaníʼneluʼ tuuxa de cani rusiidiʼ Biblia la? Pa maʼ bíʼniluʼ ni la? maʼ biiyaluʼ pabiáʼ sicarú nga gusiidiluʼ binni de lu Biblia (Lucas 1:74). Ora rininu ni maʼ bizíʼdinu de Jiobá Dios la? cayúninu ti dxiiñaʼ guizáʼ risaca gucuaa guiráʼ cani dxandíʼ xpinni Cristu: rucheechenu ca diidxaʼ nacubi ne galán stiʼ Reinu stiʼ Dios (biindaʼ Mateo 24:14; 28:19, 20).

16 Nabé bisisaca apóstol Pablu dxiiñaʼ de gucheeche diidxaʼ ne guníʼ nabé risaca ni (2 Corintios 4:7). Dxiiñaʼ ni jma galán nuu nga guininu de Jiobá ne de cani chiguni.  Tobi la? purtiʼ rúninu ni para gúninu ni na Xpixuaananu ni jma nachaʼhuiʼ, ne stobi nga purtiʼ ribeendunu ni galán. Ora rucheechenu diidxaʼ, racanenu binni guidxiña ra nuu bixhózenu ni nuu guibáʼ ne racanenu chuʼcaʼ lu neza stiʼ guendanabani ni qué zaluxe. Ñee raʼbuʼ nuu sti dxiiñaʼ  ni jma zusiecheʼ laanu la? Ne ora guininu de Jiobá ne de Stiidxaʼ, jma riguidxi fe stinu ne jma rannaxhiinu Dios. Ne rusisaca Jiobá stipa rúninu (Hebreos 6:10). Casi ridúʼyanu ca, zannaxhiinu Dios jma ra qué gusaana de gúninu xhiiñaʼ (biindaʼ 1 Corintios 15:58).

17. Xiñee nagueendaca naquiiñeʼ gucheechenu diidxaʼ.

17 Ni naquiiñeʼ gánnanu nga napa xidé gucheechenu stiidxaʼ Reinu nagueendaca. Biblia na: «Güi lu stiidxa be. Byuíʼ ni ora tiisi [«yánnaca», TNM]» (2 Timoteo 4:2). Xiñee yánnaca naquiiñeʼ gaca dxiiñaʼ riʼ yaʼ. Pur ni cayabi Stiidxaʼ Dios laanu: «¡Maʼ gaxha nuu dxi stiʼ Jiobá! ¡Maʼ gaxha nuuni ne nagueenda zeeda guidxiña ni!» (Sofonías 1:14). Ya, nagueenda cadxiña dxi gunduuxeʼ Jiobá guiráʼ cosa malu nuu yanna riʼ. ¡Naquiiñeʼ ganna binni ni! Riquiiñeʼ guiene binni yanna nga naquiiñeʼ guzuubaʼ stiidxaʼ Jiobá casi Señor ni jma nandxóʼ stiʼ, purtiʼ qué zandaa zeeda dxi ca (Habacuc 2:3).

18. Xiñee naquiiñeʼ guni adorarnu Jiobá nezalú xcaadxi binni ra guidagulisaanenu ca xpinni Cristu.

18 Racalaʼdxiʼ Jiobá guni adorarnu laa nezalú xcaadxi binni ra guidagulisaanenu cani dxandíʼ xpinni Cristu. Nga runi Stiidxabe na: «Naquiiñe ucáʼ ique nu acané saa nu para ganaxhii nu jma, ne guni nu ni nachaʼhuiʼ. Ne cadi guni nu casi cani rusaana de che cultu [o guendaridagulisaa], sínuque cada tobi acané stobi para indisa ique, ne jma rusi yanna purti caduʼya nu ma zeda dxiña dxi gueeda Jesucristu Señor stícanu» (Hebreos 10:24, 25). Ora guidagulisaanenu ca bíʼchinu ne ca bizáʼnanu xpinni Cristu nga zanda gusisácanu ne guni adorarnu Dios stinu ni nadxiinu. Ne laaca riguidxi fe stinu ne racanésaanu laanu.

19. Xi zanda gúninu ti gannaxhiinu jma ca binni ridagulisaanenu.

19 Ora ridagulisaanenu xcaadxi binni ni cayuni ni na Jiobá la? jma rannaxhiinu ne raca xhamígunu laacabe. Nabé risaca nga guidúʼyanu ca cosa galán runi binni, casi runi Jiobá né laanu. Gunna binni ruchee nga ca bíʼchiluʼ ne ca bizáʼnaluʼ ni naca xpinni Jiobá. Bietenalaʼdxiʼ guiranu rucheʼnu ne nuu  tu jma nagueenda riniisi lu Stiidxaʼ Dios ne nuu tu coʼ (biindaʼ Colosenses 3:13). Biyubi guidxaagaluʼ cani dxandíʼ nadxii Jiobá né guiráʼ stipa sticaʼ ne zuuyaluʼ pabiáʼ zaniisiluʼ lu Stiidxaʼ Dios. Pa guni adorarneluʼ ca bíʼchiluʼ ne ca bizáʼnaluʼ Jiobá la? qué zaca nagana para lii gannaxhiiluʼ Dios jma. Yanna chiguidúʼyanu ximodo riguu Jiobá ndaayaʼ cani qué rusaana de guni adorar ne gannaxhii laabe.

CADI GUNDAALUʼ «GUENDANABANI NI DXANDÍʼ CA»

20, 21. Xii nga «guendanabani ni dxandíʼ ca», ne xiñee guizáʼ galán gápanu ni.

20 Ndaayaʼ rudii Jiobá ca xpinni ni ruzuubaʼ stiidxaʼ nga guendanabani. Peru, xi clase guendanabani yaʼ. Stale tu zaníʼ maʼ nabáninu, purtiʼ ricaanu bi, ridoʼno ne rideʼnu. Ne ora nuunu nayecheʼ zándaca guininu: «Ndiʼ nga guendanabani». Peru Biblia culuíʼ nin tobi de laanu cadi dxandíʼ nabáninu yanna.

Racalaʼdxiʼ Jiobá guicaaluʼ «guendanabani ni dxandíʼ ca». Lii yaʼ, zanda guicaaluʼ ni la?

21 Biblia cayabi laanu cadi gundaʼnu «endanabani ni qué zaluxe», o casi na Nuevo Testamento stiʼ José María Valverde, «guicaanu guendanabani ni dxandíʼ ca» (1 Timoteo 6:19). Ni riníʼ ca diidxaʼ «guendanabani ni dxandíʼ ca» nga ti clase guendanabani ni cabézanu guicaanu. Ora maʼ gácanu binni qué ruchee la? zabáninu cásipeʼ na ca diidxaʼ ca, purtiʼ chiguibáninu cásipeʼ gucalaʼdxiʼ Dios dede primé que. Dxi maʼ guiuʼnu ndaaniʼ Paraísu chigaca lu Guidxilayú riʼ, zácanu binni nazaaca, ziuʼnu nayecheʼ ne guirutiʼ tu zuchibi laanu, dxi ca nga zápanu «guendanabani ni dxandíʼ ca», nga nga guendanabani ni qué zaluxe (1 Timoteo 6:12). Ñee cadi dxandíʼ guizáʼ sicarú ni cabézanu ca la?

22. Ximodo zanda guicaaluʼ «guendanabani ni dxandíʼ ca».

22 Ximodo zanda guicaa tuuxa «guendanabani ni dxandíʼ ca» yaʼ. Ante guiníʼ Pablu ca diidxaʼ ca la? cayábibe ca xpinni Cristu gácacaʼ nachaʼhuiʼ ne gacanecaʼ binni de guidubi ladxidoʼcaʼ (1 Timoteo 6:18). Nga runi, zacaanu guendanabani ca  pa gúninu guiráʼ ni cazíʼdinu lu Biblia. Peru, ñee guníʼ Pablu zuni ganarnu «guendanabani ni dxandíʼ ca» pa gúninu ni galán la? Coʼ, purtiʼ ni cabézanu ca zacaanu ni pur «endanachaʼhuiʼ stiʼ» Dios (Romanos 5:15). Peru riuuláʼdxipeʼ Jiobá gusigaʼdeʼ xiixa cani ruzuubaʼ stiidxaʼ. Laabe racaláʼdxibe gápaluʼ «guendanabani ni dxandíʼ ca», ti guendanabani ni qué zaluxe, ra ziuuluʼ nayecheʼ ne sin guendaridxibi. Nga nga guendanabani chiguicaa guiráʼ cani qué gusaana de gannaxhii Dios.

23. Xiñee nabé risaca nga cadi gusaana de gannaxhiinu Dios.

23 Galán nga guinabadiidxanu cada tobi de laanu: «Ñee cayuneʼ adorar Dios modo cayábibe naa lu Stiidxabe la?». Pa gúninu stipa pur guininu cayúninu ni guiráʼ dxi la? jneza modo ziuunu. Zanda guni crenu zulá Jiobá laanu. Laabe zápabe laanu lu ca últimu dxi nagana stiʼ guiráʼ cosa malu riʼ. Ne zaguube laanu lu guidxilayú cubi ca ne maʼ cadi candaa zaca ni. ¡Nabé sicarú zaca ni! ¡Guizáʼ riéchenu purtiʼ gulinu gúninu ni galán lu ca últimu dxi riʼ! Pa quixhe íqueluʼ gúniluʼ ni galán yanna la? qué ziuu dxi gusaanaluʼ «guendanabani ni dxandíʼ ca», guendanabani ni maca racalaʼdxiʼ Jiobá Dios gápanu.