Biiyaʼ guiraʼ ni nuu lu sitiu riʼ

guyé lu índice

 CAPÍTULO 15

Modo riuulaʼdxiʼ Dios guni adorárcabe laa

Modo riuulaʼdxiʼ Dios guni adorárcabe laa
  • Ñee jneza ruuyaʼ Dios guiráʼ religión la?

  • Ximodo zanda gánnanu gunáʼ nga religión ni rusiidiʼ ni dxandíʼ

  • Tuu nga cani dxandíʼ cayuni ni na Dios ca dxi stinu riʼ

1. Xi zabeendunu pa guni adorarnu Dios casi racalaʼdxiʼ.

NADXII Jiobá Dios laanu. Nga runi, racaláʼdxibe gacanebe laanu purtiʼ riuuláʼdxibe ni galán para laanu. Pa guni adorarnu laabe casi racaláʼdxibe la? ziuʼnu nayecheʼ ne zalanu de stale yuubaʼ. Laaca zacaanu ndaayaʼ stibe ne zacanebe laanu (Isaías 48:17). Peru yanna riʼ nuu gayuaa religión. Neca guiráʼ na rusiidiʼ de Dios, peru gadxé gadxé ni rusiidicaʼ de laabe ne xi ribézabe gúninu.

2. Ximodo zanda gánnaluʼ modo naquiiñeʼ gaca adorar Jiobá, ne xi zanda guchaaganu ni.

2 Ximodo zanda gánnaluʼ modo naquiiñeʼ gaca adorar Jiobá yaʼ. Cadi caquiiñeʼ gánnaluʼ xi guiráʼ runi cré ca religión ca ne guchaagaluʼ cani. Ni naquiiñeʼ si gúniluʼ nga guiziidiluʼ xipeʼ ndiʼ cusiidiʼ Biblia de modo naquiiñeʼ gaca adorar Dios. Guchaaganu ni né bueltu ni cadi dxandíʼ. Casi lii nánnaluʼ stale guidxi laani nga riguu ni binni ra nagana. Yanna bixuiʼlú gúdxicabe lii cueechuluʼ bueltu ni dxandíʼ de ni cadi dxandíʼ. Ximodo zanda gunibiaʼluʼ cani yaʼ. Naquiiñeʼ gannuʼ ximodo nga bueltu ni cadi dxandíʼ xa. Ñee cadi raʼbuʼ jma jneza gunibiáʼ chaahuiluʼ ximódopeʼ nga bueltu ni dxandíʼ la? Ora gunibiáʼ  chaahuiluʼ cani zánnaluʼ gunáʼ nga bueltu ni cadi dxandíʼ. Zacaca nga zanda gánnanu gunáʼ nga religión ni qué runi ni na Dios ora guizíʼdinu xi runi religión ni rusiidiʼ ni dxandíʼ.

3. Casi bisiene Jesús, xi naquiiñeʼ gúninu ti chuulaʼdxiʼ Dios modo nácanu.

3 Nabé risaca guni adorarnu Jiobá modo racalaʼdxiʼ. Stale binni riníʼ ique riuulaʼdxiʼ Dios guiráʼ religión, peru cadi nga diʼ rusiidiʼ Biblia. Laaca cadi naquiiñeʼ si guininu xpinni Cristu laanu, purtiʼ Jesús guníʼ: «Cadi irá ni gabi naa, Señor, Señor, ziuu ra runi mandar Dios, sínuque cani guni si ni na be». Nga runi, ziuulaʼdxiʼ Dios modo nácanu pa guizíʼdinu cani cayabi laanu ne gúninu cani. Peru binni qué guni ni na Dios la? Jesús na qué rúnicabe ni jneza (Mateo 7:21-23). Ca religión ni qué rusiidiʼ ni dxandíʼ zeeda gaca cani casi bueltu ni cadi dxandíʼ: qué risaca cani. Ne ni jma feu nga nabé runiná cani binni.

4. Xii nga guiropaʼ neza guníʼ Jesús, ne paraa riné cani binni.

4 Racalaʼdxiʼ Jiobá guibani guiráʼ xixé binni sin qué chuʼ dxi gatiʼ. Peru para ganda guibáninu sin qué chuʼ dxi gátinu ndaaniʼ Paraísu la? naquiiñeʼ guibáninu ne guni adorarnu laabe modo racaláʼdxibe. Peru stale binni qué rinacaʼ gúnicaʼ ni nabe, nga runi guníʼ Jesús: «Laguiuu neza ni napa puerta nabéʼ, purti neza ni xilaga puerta sti la? nga neza ladu rinitilú binni, purti ruluíʼ jma galán neza que, ne stale tu riuu ladu que. Peru neza enda nabani la? jma nabé puerta ne nagana neza stiʼ, ne huaxiéʼ tu ridxela ni» (Mateo 7:13, 14). Casi bidúʼndanu ca, religión ni rusiidiʼ ni dxandíʼ riné ni binni guicaa guendanabani ne religión ni qué rusiidiʼ ni dxandíʼ riné ni binni lu guendaguti, o para guinitilú. Peru qué racalaʼdxiʼ Jiobá guinitilú binni ne pur nga cudii lugar gunibiáʼ guiráʼ xixé binni laa (2 Pedro 3:9). Pur modo guni adorarnu laabe, zanda guicaanu guendanabani o guinitilunu.

 XIMODO ZANDA GÁNNANU GUNÁʼ NGA RELIGIÓN NI RUSIIDIʼ NI DXANDÍʼ

5. Ximodo zanda gánnanu tuu nga cani zinanda religión ni rusiidiʼ ni dxandíʼ.

5 Ximodo zanda guidxélanu «neza [ni riné lu] enda nabani» yaʼ. Jesús guníʼ qué zaca nagana guidxélanu tuu nga cani zinanda religión ni rusiidiʼ ni dxandíʼ pa guidúʼyanu modo nabánicaʼ. Guniʼbe ndiʼ: «Zahuinni lu xhiiña cabe tu laacabe» casi «ti yaga ni nazaaca, zudii cuananaxhi galán» (Mateo 7:16, 17). Ni nuu Jesús niníʼ nga, zahuínnica tuu nga cani zinanda religión ni rusiidiʼ ni dxandíʼ pur cani runi crecaʼ ne cani rúnicaʼ. Neca binni ruchee laacabe, peru guirácabe rúnicabe stipa pur gúnicabe ni na Dios. Guidúʼyanu xhoopaʼ cosa ni zacané laanu gunibiaʼnu laacabe.

6, 7. Ximodo ruuyaʼ ca xpinni Dios Biblia, ne ximodo gudixhe Jesús gúninu ni.

6 Rusiidiʼ ca xpinni Dios ni cá lu Biblia. Stiidxaʼ Dios na: «Irá Xquiʼchi Dios, Espíritu Santu uníʼ xi icá, ne nuu ni para usiidi ni laanu ne para ulidxe ni laanu ne para gabi ni laanu paraa cuchéʼ nu ne para acané ni laanu ibani nu casi na Dios, ti iziidi chaahui ca xpinni Dios para ganda guni irá ni riree ndu» (2 Timoteo 3:16, 17). Sicaríʼ bicaa apóstol Pablu ra nuu ca biʼchiʼ ni zinanda Cristu: «Purti ucuaa tu ca diidxa byuí né du laatu casi stiidxa Dios ne cadi casi stiidxa binni. Ne dxandí stiidxa Dios ni» (1 Tesalonicenses 2:13). Nga runi, guiráʼ ni rusiidiʼ ne ni runi religión ni dxandíʼ la? cadi zeeda cani de ni runi cré binni o de ni maʼ biaa binni guni, sínuque zeeda cani lu Biblia, Stiidxaʼ Dios.

7 Laaca lu Stiidxaʼ Dios gulee Jesús guiráʼ ni bisiidiʼ ne nga nga gudixhe chinándanu. Ti dxi cayuni orarbe Bixhózebe guniʼbe: «Dxandíʼ stiidxa luʼ» (Juan 17:17). Biʼniʼ cré Jesús Stiidxaʼ Dios ne guiráʼ ni bisiidiʼ biree ni lu Biblia. Gatigá guniʼbe: «Maca cá lu Xquiʼchi Dios» ne despué guniʼbe ti textu (Mateo 4:4, 7, 10). Zacaca ca xpinni Dios ni nabani ca  dxi stinu riʼ, qué rusiidicaʼ ni na íquecaʼ, sínuque runi crecaʼ Biblia nga Stiidxaʼ Dios ne rusiidicaʼ ni cá luni.

8. Xiruʼ nga caquiiñeʼ gaca para guni adorárcabe Jiobá.

8 Ca binni zinanda religión ni rusiidiʼ ni dxandíʼ runi adorarcaʼ Jiobá si ne rusiidicaʼ labe. Jesús guníʼ: «Dios si nga naquiiñe usisaca cabe ne guni cabe ni na» (Mateo 4:10). Nga runi, Jiobá si nga runi adorar ca xpinni Dios, guirútiruʼ. Ne ora gusiidicabe labe ne ca guenda stibe, laaca cayuni adorárcabe laabe zacá. Sicaríʼ na Salmo 83:18: «Lii, ni laluʼ Jiobá, lii si nga ni nuu jma luguiáʼ lu guidubi naca guidxilayú». Rúnicabe casi biʼniʼ Jesús ora gacanécabe binni gunibiáʼ Dios. Ora biʼniʼ orarbe Bixhózebe gúdxibe laa: «Maʼ bisiideʼ laluʼ ca binni ni bidiiluʼ naa ndaaniʼ guidxilayú riʼ» (Juan 17:6TNM). Zacaca runi ca xpinni Dios yanna, rusiidicaʼ binni xi chiguni Dios ne gunáʼ nga ca guenda stiʼ.

9, 10. Ximodo rusihuinni cani dxandíʼ xpinni Cristu nadxiisaacaʼ.

9 Dxandipeʼ nadxiisaa ca xpinni Dios ne cadi pur cá lucaʼ xiixa. Jesús guníʼ: «Pa ganaxhii saa tu zacá la? zanna binni xpinne laatu» (Juan 13:35). Zacá gunnaxhiisaa ca primé xpinni Cristu. Ca xpinni Dios nadxiicaʼ binni casi modo na Biblia gúnicaʼ ni ne nga racané laacaʼ cadi gaca nanaláʼdxicaʼ binni de sti raza, binni ni napa ne ni qué gapa bueltu o purtiʼ de sti guidxi laa ne runi ni laacaʼ tobi si (biindaʼ Colosenses 3:14). Cani nuu ndaaniʼ religión ni qué rusiidiʼ ni dxandíʼ, qué rannaxhiicabe zacá. Pa ñannaxhiisaacabe qué ñuutisaacabe laacabe purtiʼ si de sti guidxi o de sti raza laacabe. Cani dxandíʼ xpinni Cristu qué rinaazecaʼ guiibaʼ para chiguuticaʼ bíʼchicaʼ o guuticaʼ sti binni. Biblia rusiidiʼ: «Sicarí nga rihuinni uná xiiñi Dios ne uná xiiñi binidxabaʼ: tutiica qué guni jneza ne cadi nadxii stobi la? cadi xiiñi Dios laa [...;] naquiiñe ganaxhii saa nu. Cadi gaca nu casi Caín, purti laa xpinni binidxaba laa. Biiti biʼchi» (1 Juan 3:10-12; 4:20, 21).

10 Cumu de guidubi ladxidóʼcabe nadxiicabe binni la?  nga rucueeza laacabe cadi guuticabe binni, peru cadi nga si runi guendarannaxhii ca. Cani dxandíʼ xpinni Cristu riquiiñecaʼ tiempu sticaʼ, stipa sticaʼ ne ni nápacaʼ para gacanésaacaʼ (Hebreos 10:24, 25). Racanésaacabe ora cadíʼdicabe ra nagana, qué ribáʼnacabe ne qué rusiguiicabe binni. Ruzuubacabe Stiidxaʼ Dios ra na «acané nu binni» (Gálatas 6:10).

11. Xiñee naquiiñeʼ guidúʼyanu Jesús casi tobi ni caquiiñeʼ Dios para gulá laanu.

11 Nanna cani dxandíʼ xpinni Dios Jesucristu nga caquiiñeʼ Jiobá para gulá laacaʼ. Biblia na: «Laasi be zanda ulá be laanu, purti iruti ru stobi ndaani guidxilayú ni huaguixhe Dios ulá binni, sínuque laasi be» (Hechos 4:12). Casi bizíʼdinu lu capítulo 5, bidii Jesús xquendanabani para gulá ca binni guzuubaʼ diidxaʼ (Mateo 20:28). Laaca maʼ biʼniʼ Jiobá laabe Rey guibáʼ para guni mandarbe Guidxilayú riʼ. Nga runi, ribeza Dios guzúʼbanu stiidxaʼ Jesús ne chinándanu cani rusiidiʼ. Zacatiʼ zanda guibáninu sin qué chuʼ dxi gátinu. Nga runi Biblia na: «Tu runi cre Xiiñi be la? napa enda nabani ni qué zaluxe, peru tu qué uzuuba stiidxa Xiiñi be, qué zapa di enda nabani» (Juan 3:36).

12. Xii nga ni qué runi ca xpinni Dios neca nuucaʼ ndaaniʼ guidxilayú.

12 Qué runi cani dxandíʼ xpinni Dios ni runi binni guidxilayú. Sicaríʼ gudxi Jesús Pilatu, gobernador stiʼ Roma, ora cayuni juzgar laabe: «Cadi beda aca diaʼ rey ndaani guidxilayú riʼ» (Juan 18:36). Intiica guidxi cueza cani dxandíʼ xpinni Cristu, ruzuubacaʼ stiidxaʼ Reinu stiʼ Dios. Nga runi, qué riuucaʼ lu política ne qué ridíndecaʼ pur guiráʼ ni raca lu guidxilayú ne qué riuucaʼ pur tobi nin pur stobi. Peru pa racalaʼdxiʼ xcaadxi binni chuʼ lu política, o gacalaʼdxiʼ gaca tuuxa lu política o chiguni votar la? qué riguuruaacabe lu ni guni ca binni ca. Neca qué riuucabe lu política, peru rúnicabe ni na ley stiʼ gobiernu. Xiñee yaʼ. Purtiʼ Stiidxaʼ Dios cayabi ca xpinni Cristu «naquiiñe uzuuba irá binni stiidxa cani runi mandar ndaani xquidxi» ne nga nga ca gobiernu (Romanos 13:1). Peru ora guinabaʼ gobiernu gúnicabe xiixa ni na Dios  cadi jneza la? cani dxandíʼ xpinni Cristu rúnicaʼ casi biʼniʼ ca apóstol que dxiqué, laacaʼ guniʼcaʼ: «Naquiiñe uzuʼba du stiidxa Dios que stiidxa binni» (Hechos 5:29; Marcos 12:17).

13. Xi runi cré cani dxandíʼ xpinni Cristu zuni Reinu stiʼ Dios, ne xi rúnicaʼ.

13 Rusiidiʼ cani dxandíʼ xpinni Jesús Reinu si stiʼ Dios nga zacané binni. Jesús guníʼ xi zaca: «Ne zuiʼ cabe stiidxa Dios de idubi naca guidxilayú para ganna irá xixé guidxi modo runi mandar, ne dxi que ru nga iluxe guidxilayú riʼ» (Mateo  24:14). Cani dxandíʼ zinanda Jesucristu qué rábicaʼ binni zabee ca gobiernu stiʼ guidxilayú riʼ ca guendanagana nuu yanna, sínuque rábicaʼ binni Reinu si stiʼ Dios nga zacané binni guidxilayú (Salmo 146:3). Bisiidiʼ Jesús laanu guinábanu lu oración guedandá dxi guni mandar gobiernu stiʼ Dios, laabe guniʼbe: «Gueeda Reinu stiluʼ. Gaca ni naluʼ ndaaniʼ guidxilayú, cásica raca ni guibáʼ» (Mateo 6:10TNM). Stiidxaʼ Dios na Reinu riʼ «zunduuxeʼ ni guiráʼ reinu [nuu yanna] riʼ, ne laani ziaana ni ne qué ziuu dxi guiluxe ni» (Daniel 2:44; Apocalipsis 16:14; 19:19-21).

14. Lii xi raʼbuʼ, gunáʼ nga grupu ni rihuinni runi guiráʼ ni naquiiñeʼ guni religión ni rusiidiʼ ni dxandíʼ.

14 Guníʼ ique ni maʼ bieeteʼ ca ne gunabadiidxaʼ laca lii: «Xi religión rusiidiʼ ni na Biblia ne rusiidiʼ lá Dios nga Jiobá yaʼ. Xi grupu rusihuinni dxandíʼ nadxiisaa casi biʼniʼ Cristu, napa fe Jesús, qué runi ni runi binni guidxilayú ne rusiidiʼ binni Reinu si stiʼ Dios nga zacané binni yaʼ. Lade guiráʼ religión nuu lu Guidxilayú riʼ, gunáʼ nga tobi lucha religión runi guiráʼ ni maʼ bizéʼtenu riʼ yaʼ». Ca testigu stiʼ Jiobá, laacaʼ nga rihuinni rúnicaʼ guiráʼ ni. Biblia na: «Laatu nga ca testigu stinneʼ —na Jiobá—, xpinneʼ ni maʼ gulieeʼ, ti gunibiaʼtu ne gápatu fe naa, ne para guiénetu qué huachaaʼ modo naa. Ante de naa qué ñaʼ diʼ sti Dios, ne despué de naa qué huayuu diʼ stobi» (Isaías 43:10).

XI GÚNILUʼ YAʼ

15. Xi ribeza Dios gúninu neca runi crenu nuube.

15 Para chuulaʼdxiʼ Dios ni rúninu la? cadi caquiiñeʼ si guni crenu laa. Purtiʼ Biblia na dede ca demonio runi crecaʼ nuu Dios (Santiago 2:19). Peru rihuínnica qué rúnicabe ni na Jiobá ne qué riuuláʼdxibe ni rúnicaʼ. Para chuulaʼdxiʼ Dios ni rúninu cadi caquiiñeʼ si guni crenu nuube, sínuque naquiiñeʼ gúninu ni nabe. Laaca naquiiñeʼ guireʼnu lade religión ni qué rusiidiʼ ni dxandíʼ ne guinaaze dxiichinu religión ni rusiidiʼ ni dxandíʼ.

16. Xi naquiiñeʼ gúninu ti cadi gácanu de religión ni qué rusiidiʼ ni dxandíʼ.

 16 Bisihuinni apóstol Pablu cadi naquiiñeʼ guni adorarnu Dios casi runi adorar religión ni qué rusiidiʼ ni dxandíʼ. Laabe bicaabe ca diidxaʼ guníʼ Jiobá riʼ: «Lairee de lade cabe ne laixele de laacabe, ne cadi cana tu ni cadi nayá para naa, ti icaa laatu» (2 Corintios 6:17; Isaías 52:11). Nga runi, cani dxandíʼ xpinni Cristu rucaanacaʼ guiráʼ ni zeeda de religión ni qué rusiidiʼ ni dxandíʼ.

17, 18. Xii nga «Babilonia, guidxi roʼ» yanna riʼ, ne xiñee yánnaca nga naquiiñeʼ guireʼnu ndaaniʼ ni.

17 Guiráʼ religión ni qué rusiidiʼ ni dxandíʼ na Biblia naca cani «Babilonia, guidxi roʼ» (Apocalipsis 17:5). * Lá guidxi Babilonia ca rusietenalaʼdxiʼ ni laanu guidxi guyuu dxiqué, ra biasastí religión ni qué rusiidiʼ ni dxandíʼ gudiʼdiʼ si Nisaguié naroʼbaʼ biaba dxi bibani Noé. Stale de cani rusiidiʼ ne ni runi religión ni qué rusiidiʼ ni dxandíʼ biasastí cani Babilonia. Casi ca binni guyuu Babilonia que biʼniʼ adorarcaʼ bidóʼ ni naca chonna dios, ne ca dxi stinu riʼ, ngapeʼ nga ni jma rusiidiʼ stale religión ne rábicabe ni Trinidad. Peru maʼ gadxé ni cusiidiʼ Biblia, nayaguieʼ modo cusiidiʼ ni laanu ti Dios si ni dxandíʼ nga nuu, laabe nga Jiobá ne Jesucristu nga Xiiñibe (Juan 17:3). Ca binni de Babilonia laaca biʼniʼ crecaʼ napa binni ti alma ni qué rati, nacaʼ ribániruʼ ni despué de gatiʼ ladi binni ne rié ni ti lugar ra gacaná ni. Yanna riʼ, stale religión rusiidiʼ nápanu ti alma o ti espíritu ni qué rati ne zanda gacaná ni ndaaniʼ infiernu.

18 Guiráʼ ni biʼniʼ religión guyuu Babilonia que bireeche cani lu guidubi naca Guidxilayú. Nga runi, zanda guininu Babilonia guidxi roʼ nuu yanna nga guiráʼ xixé religión ni qué rusiidiʼ ni dxandíʼ ni nuu lu guidubi naca Guidxilayú. Ne Dios maca guníʼ málasi zedandá dxi guinitilú Babilonia.  Riéneluʼ xiñee nga nabé risaca guixélepenu de Babilonia guidxi roʼ la? Jiobá Dios racalaʼdxiʼ guireeluʼ ndaaniʼ guidxi ca sin guindaaluʼ, laga zándaruʼ (biindaʼ Apocalipsis 18:4, 8).

Jma stale ni zabeenduluʼ que ni gunítiluʼ pa guidaaguluʼ xquidxi Jiobá para gúniluʼ ni na

19. Xi zabeenduluʼ ora gúniluʼ ni na Jiobá.

19 Ora maʼ quixhe íqueluʼ gusaanaluʼ religión ni qué rusiidiʼ ni dxandíʼ, zándaca chuʼ tu maʼ qué zaná guidxaaga lii. Peru ora guʼnuʼ ni na Jiobá ne guidaaguluʼ xquidxi la? jma stale ni zabeenduluʼ que ni gunítiluʼ. Zazaacaluʼ ni bizaaca ca primé discípulo stiʼ Jesús, laacaʼ bisaanacaʼ xcaadxi cosa para yenándacaʼ laabe: zápaluʼ stale bíʼchiluʼ ne bizáʼnaluʼ ni zinanda Dios. Binnilídxiluʼ zeeda gaca guiráʼ xpinni Cristu nuu lu guidubi naca Guidxilayú ne zusihuínnicabe dxandíʼ nadxiicabe lii. Zacaaluʼ «ti enda nabani ni qué zaluxe dxi usulú guidxilayú cubi» (biindaʼ Marcos 10:28-30). Ne zándaca ca binni bixeleʼ de lii purtiʼ maʼ gadxé cani runi creluʼ, chaahuidugá guiziidicaʼ ni rusiidiʼ Biblia ne gúnicaʼ ni na Jiobá.

20. Xi cabeza cani cayuni adorar Dios jneza.

20 Biblia cusiidiʼ laanu maʼ cadi candaa zunduuxe Dios guiráʼ binni malu ne zusaanabe binni nachaʼhuiʼ si ne zuni mandar Reinu stiʼ Dios laacaʼ (2 Pedro 3:9, 13). ¡Guizáʼ sicarú zaca guidxilayú cubi ca! Ti religión si ziuu luni ne zuni adorarcaʼ Dios jneza. Ñee cadi raʼbuʼ dede yanna nga maʼ naquiiñeʼ gúʼyaluʼ xi gúniluʼ ti ganda guidaaguluʼ cani dxandíʼ cayuni ni na Dios la?

^ párrafo 17 Lu apéndice «Xii nga “Babilonia guidxi roʼ”» cusiene xiñee Babilonia guidxi roʼ nga zeeda gaca yanna riʼ guiráʼ religión ni qué rusiidiʼ ni dxandíʼ.