Biiyaʼ guiraʼ ni nuu lu sitiu riʼ

guyé lu índice

 PREGUNTA 2

Xiñee riuaaʼ xizaa pur modo rihuinneʼ

Xiñee riuaaʼ xizaa pur modo rihuinneʼ

XIÑEE RISACA NI

Nuu cosa jma risaca que cani ruuyuʼ lu speju.

LII, XI ÑUʼNUʼ

Bixuiʼlú ndiʼ: ora ruuyaʼ Julia laa lu speju la? ruuyaʼ laa guizáʼ gorda. Ne riníʼ ique: «Caquiiñeʼ guieteʼ». Maʼ ndaʼ gudxi bixhózebe, jñaabe ne ca xhamígube laabe guizáʼ nalásebe, cásipeʼ ti ubaguí.

Maʼ napa dxi de caníʼ ique Julia guni intiica cosa ti ganda guiete «neca» chupa kilu. Ni caquiiñeʼ gúnibe nga gutizibe laabe chupa chonna gubidxa ne...

Pa ñuni sentirluʼ ni cayuni sentir Julia, xi ñuʼnuʼ.

GULEZA NE GUNÍʼ IQUE

Zándaca lii si nga ruuyuʼ huaxiéʼ galán rihuínniluʼ.

Cadi malu diʼ chuʼluʼ xizaa pur modo rihuínniluʼ. Dede Biblia ruzeeteʼ de caadxi binni guizáʼ sicarú, casi Sara, Raquel, José, David ne Abigail. Guzéʼtenu ejemplu stiʼ Abisag, Biblia na gúcabe ti gunaa «guizáʼ sicarú», ni qué gapa ra idiñeyú (1 Reyes 1:4).

Peru stale joven, nabé riuu xizaa pur modo rihuinni. Ne zándaca dede gueeda gápacaʼ guendanagana. Guníʼ ique ndiʼ:

  • Lu ti encuesta guca, 58% de ca dxaapahuiiniʼ que guniʼcaʼ dxíʼbacaʼ de pesu, peru 17% si de laacabe nga bihuinni dxandíʼ ni.

  • Lu sti encuesta bíʼnicabe caadxi gunaa nalaseʼ, bihuinni 45% de laacaʼ riníʼ íquecaʼ gorda laacaʼ.

  • Xcaadxi joven dede rápacaʼ anorexia purtiʼ racaláʼdxicaʼ guiétecaʼ de pesu. Anorexia nga ti guendahuará ni riguu xquendanabani binni ra naxoo ne maʼ qué rinacaʼ gocaʼ.

 Pa ruluíʼ maʼ napuʼ anorexia o riníʼ íqueluʼ cadi naquiiñeʼ goloʼ la? biyubi tu gacané lii. Gudxi ni bixhoʼzoʼ ne jñoouʼ o ti binni napuʼ confianza. Biblia ná: «Ni dxandíʼ xhamígunu la? guiráʼ ora nadxii laanu, ne zeeda gácabe [tuuxa] ni nuuca para gacané laanu ora nápanu xiixa guendananá» (Proverbios 17:17).

NI JMA JNEZA GUʼNUʼ

Ca cualidad sicarú nápanu nga cani rucaa binni chuulaʼdxiʼ laanu. Biiyaʼ xi riníʼ Biblia de Absalón, xiiñiʼ rey David:

«Gástiruʼ stiʼ hombre ni guiníʼcabe jma sicarú laa ndaaniʼ guidubi guidxi Israel que laabe. Dede ndaaniʼ batañeebe hasta galaa íquebe qué gápabe nin ti defectu» (2 Samuel 14:25).

Peru gúcabe ti hombre nabé orgulloso, ambicioso ne traidor. Nga runi, qué riníʼ diʼ Biblia galán de laabe; jma ruzeeteʼ Biblia laabe casi ti hombre ni qué ñuni ni guníʼ ne casi tobi ni ruuti binni purtiʼ nanalaʼdxiʼ laacabe.

Nga runi, cudii Biblia conseju riʼ laanu:

«Ma bichaa Dios laatu, ne ze dxi jma rusi ziuchaa laatu» (Colosenses 3:10).

«Cadi ucaa ique tu enda ruzuchaahui de luguiá si, casi modo guni tu ique tu [...], sínuque laucaa ique gaca tu nachaʼhui ne binni» (1 Pedro 3:3, 4).

Cadi malu diʼ nga gacaláʼdxiluʼ guihuínniluʼ galán, peru jma risaca personalidad stiuʼ que laani. Ra tiidiʼ tiempu, jma ziuulaʼdxiʼ binni ca cualidad stiuʼ que modo rihuínniluʼ. Sicaríʼ guníʼ, Phylicia: «Pa galán lii la? nagueenda ziuulaʼdxiʼ binni lii. Peru ni jma zucaa binni guietenalaʼdxiʼ lii nga ca cualidad stiuʼ».

BIIYAʼ MODO RIHUÍNNILUʼ

Riuulaʼdxuʼ modo rihuinnuʼ la?

Ñee huayuu dxi guiníʼ íqueluʼ gácaluʼ ti cirugía estética o gutiziluʼ lii purtiʼ si nuuluʼ guihuínniluʼ jma galán la?

Xi ñuuláʼdxiluʼ nuchaaluʼ de lii. (Gulí cani).

  • ESTATURA

  • PESU

  • GUICHA ÍQUELUʼ

  • XCUÉRPULUʼ

  • LULUʼ

  • CUTIS

Pa biʼniʼ marcarluʼ «coʼ» ne «huaníʼ iqueʼ» lu primé ne guiropa pregunta ca, ne biʼniʼ marcarluʼ jma de chonna opción lu guionna pregunta ca la? guníʼ ique ndiʼ: zándaca lii si nga qué riuuláʼdxiluʼ modo rihuínniluʼ. Cadi guiaandaʼ lii fácil nga guni exagerar binni ne chuʼ xizaa pur modo rihuinni (1 Samuel 16:7).