Biiyaʼ guiraʼ ni nuu lu sitiu riʼ

guyé lu índice

 CAPÍTULO 16

Ridagulisaanu para guni adorarnu Dios

Ridagulisaanu para guni adorarnu Dios

XI ZAZÍʼDINU LU CAPÍTULO RIʼ

Modo bizulú bidagulisaanu ne pabiáʼ risaca gúninu ni

1. Xi gucuaa ca discípulo que dxi bidagulisaacaʼ, ne xiñee caquiiñecabe ni.

DESPUÉ de biasa Jesús de lade gueʼtuʼ, bidagulisaa ca discípulo stibe para uguusaacaʼ gana laacaʼ, ne biseegucabe puertaʼ ra nuucabe purtiʼ cadxíbicabe ca xhenemígucabe. Nanna dxíchinu, bisaana de nidxíbicabe dxi bihuinni Jesús ra nuucabe ne gudxi laacabe: «Laicaa Espíritu Santu» (biindaʼ Juan 20:19-22). Despué, ora bibiguetaʼ bidagulisaacabe, bisaba Jiobá espíritu santu luguiácabe, ne ngue gucané laacabe gácacabe nadxibalú para gucheechecabe diidxaʼ, ti dxiiñaʼ ni chiguzulúcabe (Hech. 2:1-7).

2. 1) Ximodo rudii Jiobá stipa laanu, ne xiñee caquiiñenu ni. 2) Xiñee nabé risaca guni adorarnu Jiobá né binnilídxinu (biiyaʼ nota ne cuadru ni láʼ « Guni adorarnu Dios né binnilídxinu», ni zeeda lu yaza 175).

2 Ca dxi stinu riʼ, laaca ridxaagalunu guendanagana casi bidxaagalú ca xpinni Cristu ni bibani lu primé siglu que (1 Ped. 5:9). Zándaca ziuu ora guidxíbinu binni, nga runi caquiiñeʼ gudii Jiobá stipa laanu para cadi gusaana de gucheechenu diidxaʼ (Efes. 6:10). Stipa ca zanda guicaanu ni ora guidagulisaanu. Ca dxi stinu riʼ, ridagulisaanu chupa biaje lu ti semana para: gápanu Guendaridagulisaa para guiráʼ binni, guidúʼndanu revista Torre stiʼ ni rapa ne guendaridagulisaa ni raca ndaaniʼ semana ni láʼ Xhiiñaʼ Dios ne modo nabáninu. * Ne laaca ridagulisaanu tapa biaje lu ti iza para gápanu: ti asamblea regional, chupa asamblea de circuito ne guietenaláʼdxinu Guendaguti stiʼ Cristu. Xiñee nabé risaca chuunu guiráʼ ca guendaridagulisaa riʼ ya. Ximodo bizulú bidagulisaanu. Ne ximodo ridúʼyanu ca guendaridagulisaa stinu.

Xiñee ridagulisaanu

3, 4. Xi biʼniʼ mandar Jiobá guni xquidxi. Bizeeteʼ caadxi ejemplu.

3 Maca dede dxiqué biʼniʼ mandar Jiobá guidagulisaa xquidxi para guni adorar laabe. Casi iza 1513 ante de ca dxi stiʼ Jesús, bidii Jiobá guidxi Israel Ley ra cuzeeteʼ naquiiñeʼ guicaa guiráʼ familia dxi sábadu para guni adorarcaʼ laabe ne guiziidicaʼ Ley stibe (Deut. 5:12; 6:4-9). Ora runi ca israelita que ni na Jiobá riuucaʼ jma gaxha de laabe ne guiráʼ ca familia que riuucaʼ tobi si ne zaqueca riuu guidubi guidxi que. Peru ora qué ruzuubacaʼ diidxaʼ ne rusaana de guidagulisaacaʼ para guni adorarcaʼ Jiobá  qué riguube ndaayaʼ laacaʼ (Lev. 10:11; 26:31-35; 2 Crón. 36:20, 21).

4 Laaca galán chinándanu ejemplu stiʼ Jesús. Laabe guyebe guiráʼ sábadu ndaaniʼ sinagoga (Luc. 4:16). Despué de gútibe ne biásabe de lade gueʼtuʼ, gatigá bidagulisaa ca discípulo stibe, neca maʼ qué rinándacaʼ ni na ley stiʼ Moisés (Hech. 1:6, 12-14; 2:1-4; Rom. 14:5; Col. 2:13, 14). Ca xpinni Cristu de primé siglu que, biziidicaʼ lu ca guendaridagulisaa que ximodo gúnicaʼ xhiiñacaʼ, gulusaacaʼ gana laacaʼ, ne laaca bisisácacaʼ Dios ora runi orarcaʼ, ora ricábicaʼ ne ora ruundacaʼ (Col. 3:16; Heb. 13:15).

Ca discípulo stiʼ Jesús bidagulisaacaʼ para gudiisaacaʼ stipa laacaʼ ne uguusacaʼ gana laacaʼ

5. Xiñee ridagulisaanu (laaca zanda gúʼyaluʼ cuadru ni láʼ « Guendaridagulisaa raca guiráʼ iza ra riuu xquidxi Dios tobi si» ni zeeda lu yaza 176).

5 Zaqueca rúninu ca dxi riʼ, lu guiráʼ guendaridagulisaa ni rápanu rusihuínninu nuunu pur Reinu stiʼ Dios, ricaanu espíritu santu ne riguʼnu gana xcaadxi ora ricábinu né ca diidxaʼ stinu ni rusihuinni pabiáʼ fe nápanu. Ne ni jma risaca nga lu ca guendaridagulisaa ca zanda guni adorarnu Jiobá ora rúninu oración, ricábinu ne ridúʼndanu. Neca maʼ gadxé modo biʼniʼ ca israelita ne ca xpinni Cristu de primé siglu ca guendaridagulisaa ca la? dede yanna nabé risaca cani cásica dxiqué. Ximodo bizulú gudixhe chaahuicabe ca guendaridagulisaa rápanu yanna.

Ridagulisaanu guiráʼ semana ti «acané saa nu para ganaxhii nu jma»

6, 7. 1) Xi para ridagulisaanu. 2) Ximodo runi cada grupu guendaridagulisaa stiʼ.

6 Dxi bizulú biyubi hermanu Charles Taze Russell guiziidiʼ ni dxandíʼ de Stiidxaʼ Dios, biiyabe naquiiñeʼ guidagulisaanebe xcaadxi binni ni laaca cuyubi ganna ni dxandíʼ. Lu iza 1879 bicaabe: «Bidaguaaʼ xcaadxi binni de Pittsburgh ti  quixhe chaahuidu ca clase ni chigápadu para guʼndaʼ chaahuidu Stiidxaʼ Dios guiráʼ domingu». Revista Watch Tower bizeeteʼ galán guidagulisaa ca xpinni Cristu pur grupu, ne lu iza 1881 mápeca cadagulisaacabe guiráʼ miércoles ne domingu ndaaniʼ guidxi Pittsburgh (Pensilvania, Estados Unidos). Revista Watch Tower ni biree noviembre lu iza 1895 bizeeteʼ ridagulisaacabe para «chuʼnécabe xcaadxi xpinni Cristu tobi si, gannaxhiisaacabe» ne uguucabe gana guiráʼ binni cheʼ (biindaʼ Hebreos 10:24, 25).

7 Stale iza, gadxé gadxé modo runi cada grupu de Binni Ruundaʼ Biblia ca guendaridagulisaa stiʼ ne cada tobi de laacaʼ riguíxhecaʼ panda dxi guidagulisaacaʼ. Ti carta biseendaʼ ti grupu de Estados Unidos ni biree lu revista lu iza 1911 cuzeeteʼ sicaríʼ: «Nuu si tiru ridagulisaadu jma de gaayuʼ biaje lu ti semana». Laacabe bidagulisaacabe lunes, miércoles, viernes ne chupa biaje domingu. Sti carta biseendaʼ ti grupu de África ni biree lu iza 1914 ná sicaríʼ: «Chupa biaje lu ti beeu ridagulisaadu de viernes hasta domingu». Despué maʼ raca ca guendaridagulisaa ca casi rúninu ni yanna. Guzéʼtenu ximodo bizulú bidagulisaanu.

8. Xi bieeteʼ lu ca libana bidii ca xpinni Cristu dxiqué.

8 Guendaridagulisaa para guiráʼ binni. Lu iza 1880, ti iza despué de bizulú biree revista Watch Tower, hermanu Russell yenanda ejemplu gudixhe Jesús ne bizulú bicheeche diidxaʼ ndaaniʼ stale guidxi (Luc. 4:43). Pur modo bíʼnibe ca guendaridagulisaa que lu viaje stibe beeda guiaana Guendaridagulisaa para guiráʼ binni ni rápanu yanna. Ra caníʼ revista Watch Tower de viaje ni chiguni hermanu Russell bizeeteʼ «ñuuláʼdxibe niniʼbe nezalú stale binni de tema “Ni caníʼ de Reinu stiʼ Dios”». Lu iza 1911, despué de maʼ guyuu stale neza binni ridagulisaa ndaaniʼ stale guidxi, bizeetecabe cada neza binni ridagulisaa guseendaʼ ca xpinni Cristu ni nanna gudii libana ra nuu xcaadxi neza binni ridagulisaa ni nuu gaxha de laacaʼ para gudiicaʼ ti libana de xhoopaʼ ndaa ni cuzeeteʼ de juiciu stiʼ Dios ne modo bilá Cristu laanu pur guendaguti stiʼ. Ora guiluxe cada libana ruzeetecabe lá hermanu ni chigudii libana sti semana zeeda que ne xi tema chigutiidiʼ.

9. Ximodo huadxaa Guendaridagulisaa para guiráʼ binni, ne xi rúninu para cheʼ xcaadxi binni.

9 Lu iza 1945, revista The Watchtower bizeeteʼ chiguzulú ti Guendaridagulisaa para guiráʼ binni lu guidubi naca Guidxilayú ne zadiʼdiʼ ti libana de xhono ndaa ni chiguzeeteʼ «xi guiráʼ guendanagana cadxaagalunu ca dxi stinu riʼ». Stale iza biquiiñeʼ ca hermanu que ca tema ni gulee xquidxi Dios para gudiicaʼ libana, peru laaca bidiicabe libana ni guleecabe laacabe. Peru lu iza 1981 gúdxicabe ca xpinni Cristu galán iquiiñecaʼ ca libana ni rudiicabe ca neza binni ridagulisaa. * Hasta lu iza 1990,  nuu de ca libana que ricabi ca binni ni cucaadiaga que lúcani o laaca nécani demostración; peru laaca iza riʼ gudíxhecabe maʼ qué zaca guiráʼ ngue lu ti libana. Dxiqué rudiicabe ca libana riʼ de cuarenta y cinco minutu peru dede lu beeu enero stiʼ iza 2008 maʼ rudiicabe ni de treinta minutu. Neca gadxé modo bidiicabe ca libana ca dxiqué, dede yanna racanécani laanu iguidxi fe stinu lu Stiidxaʼ Dios ne rusiidicani laanu de Reinu stiʼ Dios (1 Tim. 4:13, 16). Ñee runi invitarnu de guidubi ladxidoʼno ca binni ni rigánnanu ne xcaadxi binni ni cadi Testigu chigucaadiágacaʼ ca libana ni caníʼ de Biblia la?

10-12. 1) Ximodo huadxaa modo riuundaʼ revista Torre stiʼ ni rapa. 2) Xi naquiiñeʼ guinabadiidxaʼ cada tobi de laanu.

10 Ridúʼndanu revista Torre stiʼ ni rapa. Dxiqué guyuu caadxi xpinni Cristu ni binibiáʼcabe laacaʼ casi peregrinu, ne ruseendaʼ Sociedad Watch Tower laacabe chigudiicabe libana ra nuu ca neza binni ridagulisaa ne cueecabe grupu para chigucheechecabe diidxaʼ. Laacabe nga guníʼcabe lu iza 1922 galán pa nibee ca xpinni Cristu ti tiempu para gápacaʼ ti guendaridagulisaa ra guiuundaʼ revista Torre stiʼ ni rapa. Ngue runi, bizulú gúpacabe guendaridagulisaa que, ne nuu tu biʼniʼ ni ndaaniʼ semana ne xcaadxi biʼniʼ ni domingu.

Cayuundacabe Torre stiʼ ni rapa (Ghana, 1931)

11 Revista The Watchtower 15 stiʼ junio, iza 1932, bisiene chaahuiʼ ximodo naquiiñeʼ gaca guendaridagulisaa que. Laaca cuzeeteʼ tema que ti hermanu si naquiiñeʼ guni guendaridagulisaa que casi runi familia Betel. Ne chonna hermanu zanda cuiʼ delante ora maʼ cayaca guendaridagulisaa que ne cada tobi de laacaʼ ruundacaʼ ca párrafo stini. Tiempu que la? qué gapa diʼ ca tema que guendarinabadiidxaʼ ngue runi ni cayuni guendaridagulisaa que rinabaʼ cani nuu raqué guinabadiidxacaʼ xiixa de ni cayuundacaʼ, despué rinábabe xcaadxi ni nuu raqué guicábicaʼ  ca guendarinabadiidxaʼ que. Pa caquiiñeʼ gusiene chaahuiʼ hermanu que xiixa la? ruyubi modo gaca ni nayá ne sin gutale diidxaʼ.

12 Primerugá la? cada neza binni ridagulisaa ribicaʼ xi revista racaláʼdxicaʼ gúʼndacaʼ. Peru revista The Watchtower 15 stiʼ abril iza 1933 (lu diidxastiá, La Torre del Vigía agosto iza 1933) bizeeteʼ naquiiñeʼ guʼndaʼ guiráʼ neza binni ridagulisaa revista riree cada beeu. Lu iza 1937, bieeteʼ naquiiñeʼ gúʼndacabe revista que domingu. Despué lu revista The Watchtower 1 stiʼ octubre iza 1942 bieeteʼ maʼ chigaca guendaridagulisaa que casi raca cani yanna. Primé la? bizeeteʼ revista que zeeda caadxi guendarinabadiidxaʼ ñee yaza stini ne laacani nga napa xidé iquiiñecabe. Despué bizeeteʼ ni naquiiñeʼ guindaa ni ti hora. Laaca bizeeteʼ revista que cadi guʼndaʼ ca hermanu que lu párrafo ora guicábicaʼ, sínuque guyúbicaʼ modo gusiénecaʼ ni. Revista Torre stiʼ ni rapa nga ni jma riquiiñeʼ mozo ni nuu xpiaaniʼ para gudii laanu guiráʼ ni caquiiñenu ti chuʼnu gaxha de Jiobá (Mat. 24:45). Cada tobi de laanu galán guinabadiidxaʼ: «Ñee ruundaʼ revista stinneʼ ante chaaʼ guendaridagulisaa ra riuundaʼ revista Torre stiʼ ni rapa la? Ñee runeʼ stipa pur guicabeʼ lu guendaridagulisaa ca pa ganda la?».

13, 14. Xi guiráʼ guca ante para guta chaahuiʼ Guendaridagulisaa ra Riuundaʼ Biblia, ne xiñee riuuláʼdxiluʼ cheluʼ ni.

13 Guendaridagulisaa ra Riuundaʼ Biblia. Biaʼ galaa década stiʼ 1890, despué de biree caadxi tomo stiʼ libru Millennial Dawn (Xpiaaniʼ dxi stiʼ ti mil iza), guníʼ hermanu H. N. Rahn, tobi de ca binni ni Ruundaʼ Biblia ni guleza ndaaniʼ guidxi Baltimore (Maryland, Estados Unidos), galán guidagulisaa caadxi si binni para gúʼndacaʼ Biblia ne bireelácabe Grupuhuiiniʼ stiʼ xpiaaniʼ dxi ni ruundaʼ Biblia. Primeru la? bizulú bidagulisaacabe ra lidxi tuuxa hermanu ti gúʼyacabe pa zadxiña binni. Peru lu beeu septiembre, iza 1895, maʼ guyuu xcaadxi Grupuhuiiniʼ stiʼ xpiaaniʼ dxi ni ruundaʼ Biblia ndaaniʼ stale guidxi stiʼ Estados Unidos. Despué bizeeteʼ revista Watch Tower ni biree lu beeu que naquiiñeʼ guidagulisaa guiráʼ cani caziidiʼ ni dxandíʼ. Ni rutiidiʼ guendaridagulisaa que naquiiñeʼ ganna guʼndaʼ chaahuiʼ. Naquiiñeʼ gúʼndabe ti oración ne cuézabe guiníʼ cani dagulisaa que xiixa de laani; guiluxe gúʼndasibe guiráʼ oración stiʼ párrafo que la? naquiiñeʼ guyúbibe ne gúʼndabe guiráʼ textu stiʼ Biblia ni zeeda luni. Ra riluxe cada capítulo que naquiiñeʼ guiníʼ cada tobi de cani cucaadiaga que xiixa de ni biziidicaʼ luni.

14 Stale biaje bidxaa lá guendaridagulisaa riʼ. Biree lani Grupuhuiiniʼ bereanu ni ruundaʼ Biblia pur ca binni de Berea ni biindaʼ chaahuicaʼ Stiidxaʼ Dios lu primé siglu (Hech. 17:11). Despué biree lani Grupu ni Ruundaʼ Libru stiʼ ca Binni Ridagulisaa. Yanna lani Guendaridagulisaa ra Riuundaʼ Biblia, ne  guiráʼ xpinni Cristu rápacaʼ ni ndaaniʼ Yoo stiʼ Reinu lugar de gúnicaʼ ni pur grupuhuiiniʼ. Dede dxi gutastí gaca ni huayuundacabe gadxé gadxé libru, folletu ne dede tema ni huaree lu revista Torre stiʼ ni rapa. Dede dxi bizulú cayaca ni runi invitárcabe guicabi guiráʼ binni ni rié. Guendaridagulisaa ca racaneni laanu guizíʼdinu jma de lu Biblia. Nga runi, ñee ruʼnuʼ stipa pur gúʼndaluʼ dede ante ne guicábiluʼ biaʼ gándatiʼ lu guendaridagulisaa ca la?

15. Xi para guca Scuela stiʼ cani Rucheeche Diidxaʼ.

15 Scuela stiʼ cani Rucheeche Diidxaʼ. Carey Barber, ti xpinni Cristu ni biʼniʼ dxiiñaʼ Betel de Brooklyn (Nueva York), guníʼ sicaríʼ: «Ti lunes huaxhinni 16 stiʼ febrero iza 1942, guca invitar guiráʼ ca hombre ni nuu Betel de Brooklyn gucaacaʼ lacaʼ lu Scuela stiʼ cani Rucheeche Diidxaʼ ni runibiaʼnu yanna». Hermanu Barber, ni guyuu lu Grupu ni Zaniruʼ, guníʼ «scuela que nga tobi de cani jma risaca ni riquiiñeʼ Jiobá para gacané xquidxi ca  dxi stinu riʼ». Cumu nabé gucané cursu que ca xpinni Cristu para gánnacaʼ gucheechecaʼ diidxaʼ jma galán ne gusiidicaʼ binni jma jneza la? lu iza 1943, guiráʼ guendaridagulisaa ni nuu lu guidubi naca Guidxilayú gucuaacaʼ folletu Curso en el Ministerio Teocrático. Revista La Atalaya 15 stiʼ octubre, iza 1943, bizeeteʼ cayaca Scuela stiʼ cani Rucheeche Diidxaʼ para gacaneni xquidxi Dios gucheeche stiidxaʼ Reinu jma jneza (2 Tim. 2:15).

16, 17. Ñee para gudii si ca xpinni Cristu libana nga guca Scuela stiʼ cani Rucheeche Diidxaʼ la? Bisiene ni.

16 Primerugá que nabé bidxíbidu guinidu nezalú binni. Clayton Woodworth, Jr., ni biseguyoocabe bixhoze né hermanu Rutherford ne xcaadxi xpinni Cristu lu iza 1918 sin guzaabicaʼ gastiʼ, bietenalaʼdxiʼ ximodo biʼniʼ sentir dxi gucuá lá lu scuela lu iza 1943: «Guizáʼ nagana guca para naa gudieeʼ libana. Dede runeʼ sentir casi ora rigaa ludxeʼ, ribidxi ndaaniʼ ruaaʼ ne dede rilaa stidxeʼ». Cumu zeʼ dxi jma galán rudii Clayton libana la? gúdxicabe laabe chigudiibe libana xcaadxi lugar. Scuela que  gucané laabe gánnabe ximodo gudiibe libana, peru laaca gucaneni laabe cadi guchabe bi yánnibe ne gánnabe Jiobá si nga zanda gacané laabe. Sicaríʼ bisiénebe: «Bidieeʼ cuenta cadi binni ni rudii libana ca nga ni risaca, sínuque guʼndaʼ chaahuiʼ ne guni cré Jiobá si zanda gacané laa. Pa guni ca xpinni Cristu zacá, ziuulaʼdxiʼ binni gucaadiaga laacaʼ ne jma zaziidicabe».

17 Lu iza 1959, biʼniʼ invitárcabe ca hermana guicá lacaʼ lu scuela que. Hermana Edna Bauer na rietenalaʼdxiʼ ni bizaaca dxi bieeteʼ ni lu ti guendaridagulisaa roʼ ni guyé: «Guizáʼ biecheʼ guiráʼ ca hermana ora binadiágacaʼ ni bieeteʼ que. Yanna maʼ zanda gudiicaʼ libana». Ra zidiʼdiʼ iza, stale hombre ne gunaa maʼ gucuá lacaʼ lu Scuela stiʼ cani Rucheeche Diidxaʼ para gusiidiʼ Jiobá laacaʼ. Yanna riʼ, caziidirúcabe gúnicabe ni lu reunión ni rápanu ndaaniʼ semana. (Biindaʼ Isaías 54:13.)

18, 19. 1) Ximodo rizíʼdinu gucheechenu diidxaʼ ca dxi riʼ. 2) Xiñee ridúʼndanu ora ridagulisaanu (biiyaʼ cuadru ni láʼ « Diidxaʼ riuundaʼ ni caníʼ dxandíʼ de Dios»).

18 Guendaridagulisaa stiʼ Dxiiñaʼ Stinu. Maca dede iza 1919 raca guendaridagulisaa para quixhe chaahuicabe modo guireeche diidxaʼ. Peru cani riguiiziʼ si libru ne revista guyecaʼ dxiqué. Dede iza 1923 bíʼnicabe Guendaridagulisaa stiʼ Dxiiñaʼ Stinu ti biaje lu ti beeu ne raca invitar guiráʼ ca binni ni rié lade neza binni ridagulisaa. Lu iza 1928 guníʼ xquidxi Dios gaca ni cada semana, ne lu iza 1935 revista The Watchtower bizeeteʼ iquiiñeʼ guiráʼ ca neza binni ridagulisaa Director (despué biree lani Informador ne de raqué maʼ biree lani Xhiiñaʼ Reinu ni Rúninu) ora gápacaʼ Guendaridagulisaa stiʼ Dxiiñaʼ Stinu. Nin qué nindaa, maʼ né laani raca ora guidagulisaacabe.

19 Yanna riʼ cazíʼdinu ximodo gucheechenu diidxaʼ lu reunión ni rápanu ndaaniʼ semana (Mat. 10:5-13). Pa maʼ rudiicabe lii guiʼchiʼ ni chigaca lu reunión Xhiiñaʼ Dios ne modo nabáninu, ñee ruundaʼ chaahuiluʼ ni ne rinándaluʼ ni nani ora rucheecheluʼ diidxaʼ la?

Guendaridagulisaa ni jma risaca rúninu cada iza

Guiráʼ iza ridagulisaa ca Testigu para guietenaláʼdxicaʼ guendaguti stiʼ Cristu, cásica guca ni lu primé siglu (Biiyaʼ párrafo 20)

20-22. 1) Xiñee rietenaláʼdxinu Guendaguti stiʼ Jesús. 2) Xi ribeenduluʼ ora rieluʼ dxi ca.

20 Ca xpinni Cristu ni bibani dxiqué gunábacabe laacaʼ guietenaláʼdxicaʼ guendaguti stiʼ Jesús dede ora guedandá. Cásica guca saa Pascua ti biaje lu ti iza, zaqueca rúninu ora rietenaláʼdxinu guendaguti stiʼ Cristu (1 Cor. 11:23-26). Guiráʼ iza ridagulisaa millón de binni ora raca ni. Rusietenaláʼdxini cani bibí pur espíritu santu chiguni mandarcaʼ lu Reinu stiʼ Dios (Rom. 8:17). Ne cani naca «xcaadxi dendxu» rucaani laacaʼ guni respetarcaʼ Rey stiʼ Reinu stiʼ Dios ne cadi gusaana de gúnicaʼ ni nabe (Juan 10:16).

21 Hermanu Russell ne ca xpinni gúnnacaʼ nabé risaca guietenaláʼdxicaʼ Guendaroxhi stiʼ Señor ne naquiiñeʼ gúnicaʼ ni ti biaje si lu ti iza. Sicaríʼ bizeeteʼ revista Watch Tower stiʼ abril, iza 1880: «Ndaaniʼ guidxi Pittsburgh maʼ napa stale iza qué huasaana stale de laanu [...] de guni Pascua [guendaguti stiʼ Cristu]  ne ridoʼno pan ni zeeda gaca xcuerpu Jesús ne rideʼnu vinu ni zeeda gaca rini stiʼ Señor». Nuu biaje dxica cayaca ti guendaridagulisaa roʼ bietenaláʼdxicabe guendaguti stiʼ Cristu. Neca huayácaruʼ ni zacá, lu iza 1889 nga primé biaje bicaacabe guyé 225 binni ne guyuunisa 22 binni.

22 Ca dxi stinu riʼ maʼ qué rietenaláʼdxinu guendaguti stiʼ Cristu ora rápanu ti guendaridagulisaa roʼ, peru ra tiica nabézanu runi invitarnu ca vecinu stinu guidagulisaanecaʼ laanu ndaaniʼ Yoo stiʼ Reinu o ti lugar ni ruquíxecabe laanu. Lu iza 2013, jma de 19 millón de binni bietenalaʼdxinecaʼ laanu guendaguti stiʼ Cristu. Ti ndaayaʼ nga guietenaláʼdxinu guendaguti stiʼ Jesús ne uguʼnu gana xcaadxi binni cheʼ gueelaʼ ni jma risaca para laanu. Ñee rúninu stipa cada iza pur guni invitarnu guiráʼ binni guidagulisaanecaʼ laanu dxi ca la?

Modo ridúʼyanu ca guendaridagulisaa stinu

23. Ximodo ruuyaluʼ ca guendaridagulisaa ca.

23 Guiráʼ cani ruzúʼbanu stiidxaʼ Jiobá guizáʼ riéchenu ora ridagulisaanu (Heb. 10:24, 25; 1 Juan 5:3). Casi rey David, guyuulaʼdxiʼ cheʼ ndaaniʼ yuʼduʼ stiʼ Jiobá para guni adorar laabe, jmaruʼ si purtiʼ gunna zadagulisaané xcaadxi binni ni nadxii Dios (Sal. 27:4; 35:18). Ne laaca guzéʼtenu ejemplu stiʼ Jesús. Dede nahuiinibe guizáʼ guyuuláʼdxibe chuʼbe ra lidxi Bixhózebe para guni adorarbe laa (Luc. 2:41-49).

Ora riuuláʼdxinu guidagulisaanu rusihuínninu dxandíʼ Reinu stiʼ Dios para cada tobi de laanu

24. Xi rusihuínninu ora riuunu ca guendaridagulisaa rápanu.

24 Ora ridagulisaanu, rusihuínninu nadxiinu Jiobá ne riuuláʼdxinu gacanenu xcaadxi xpinni Cristu. Ne laaca rusihuínninu dxandíʼ racaláʼdxinu guizíʼdinu modo naquiiñeʼ guibani ca xpinni Reinu stiʼ Dios, purtiʼ nga nga ni rizíʼdinu lu guiráʼ guendaridagulisaa ni rápanu. Laaca rudiicani stipa ne rusiidicani laanu cadi guireʼnu gana de gúninu dxiiñaʼ jma risaca ni cayuni Reinu stiʼ Dios ca dxi stinu riʼ: gacanenu binni gaca discípulo stiʼ Rey stinu, Jesucristu (biindaʼ Mateo 28:19, 20). Ora riuuláʼdxinu guidagulisaanu rusihuínninu dxandíʼ Reinu stiʼ Dios para cada tobi de laanu. ¡Qué chuʼ dxi gusaana de gusisácanu ca guendaridagulisaa stinu!

^ párrafo 2 Neca riuunu ca guendaridagulisaa ca guiráʼ semana, laaca galán cueenu tiempu guidúʼndanu stúbinu ne guni adorarnu Dios né binnilídxinu.

^ párrafo 9 Lu iza 2013, maʼ nuu jma de 180 libana para tiidiʼ ndaaniʼ neza binni ridagulisaa.