Biiyaʼ guiraʼ ni nuu lu sitiu riʼ

guyé lu índice

 CAPÍTULO 12

Guca organizárcabe para gúnicabe ni na Dios ni riguixhedxí ladxidoʼno

Guca organizárcabe para gúnicabe ni na Dios ni riguixhedxí ladxidoʼno

XI ZAZÍʼDINU LU CAPÍTULO RIʼ

Runi organizar Jiobá xquidxi ra zidiʼdiʼ dxi

1, 2. Xi bidxaa lu revista Watch Tower lu beeu enero iza 1895, ne xi guníʼ caadxi hermanu.

GUIZÁʼ biecheʼ John Bohnet —tobi de ca Binni Ruundaʼ Biblia ni runi xhiiñaʼ Dios né stale gana—, ora biʼyaʼ revista Watch Tower stiʼ beeu enero iza 1895. Napa revista que ti portada cubi ni rusihuinni pabiáʼ nadxibalú ca redactor stini: lu portada que rihuinni zuhuaa ti faro ruaa ti nisadóʼ ni cadiñentaa ne cuzaaniʼ foco stiʼ faro que huaxhinni. Ndaaniʼ revista que zeeda ti anunciu ni caníʼ zeeda gaca diseñu cubi stini casi ora ñacu ni ti traje cubi.

2 Nabé bidxagayaa hermanu Bohnet ora biʼyaʼ portada stiʼ revista que, ngue runi dede bicaa ti carta ra nuu hermanu Russell, ra zeeda ca diidxaʼ riʼ: «Riuuladxeʼ guuyaʼ TORRE riʼ né traje de gala stiʼ. Guizáʼ sicarú rihuinni ni». Yanna guidúʼyanu xi guníʼ John Brown ora biʼyaʼ portada stiʼ revista que, laabe nga stobi de ca Binni Ruundaʼ Biblia ni runi xhiiñaʼ Dios né stale gana. Laabe guniʼbe: «Guizáʼ ridxagayaaʼ ora ruuyaʼ pabiáʼ nadipaʼ zuba base stiʼ torre riʼ ne ximodo qué lica riniibini neca reciu cadxelasaa ca ola stiʼ ti nisadóʼ ni cadiñentaa ni». Diseñu cubi stiʼ revista riʼ nga primé cosa biʼyaʼ ca hermanu stinu bidxaa iza que, peru cadi raqué diʼ biluxe guiráʼ ni. Laaca biiyacabe bidxaa sti cosa nabé risaca lu beeu noviembre, ne laaca zanda guininu guca ni lu ti nisadóʼ ni cadiñentaa.

3, 4. Xi guendanagana bizeeteʼ revista Watch Tower 15 stiʼ noviembre iza 1895 gupa ca xpinni Cristu, ne xi guníʼ revista que chigaca nagueendaca.

3 Biree ti tema lu revista Watch Tower 15 stiʼ noviembre iza 1895 ra cusiene ximodo nuu ca xpinni Cristu: nuu caadxi guendanagana ni zeeda gaca casi ola stiʼ ti nisadóʼ ni cadiñentaa ne nabé cutíndeni ca Binni Ruundaʼ Biblia ni nuu ndaaniʼ organización stiʼ Dios. Nabé cadinde diidxaʼ ca hermanu purtiʼ racaláʼdxicaʼ gánnacaʼ tuu nga naquiiñeʼ guiaana casi xaíque ndaaniʼ cada neza binni ridagulisaa. Yanna, para gacané tema que laacabe gúʼyacabe cadi jneza diʼ chuʼdíndecabe pur ngue la? bichaagani organización stiʼ Dios casi ti barcu. Óraque bisihuinni revista que ti cosa ni cadi cayaca jneza: ca binni ni zaniru lu dxiiñaʼ cayuni organización stiʼ Dios, ni zeeda gaca casi ti barcu, cadi cayacanecaʼ ca xpinni Cristu para ganda gudxiilucaʼ ca guendanagana ni zeeda gaca casi ola stiʼ ti nisadóʼ ni cadiñentaa. Xi naquiiñeʼ gúnicabe yaʼ.

4 Bisihuinni artículo que xi runi ti capitán nuu xpiaaniʼ: ruuyaʼ chuʼ salvavida ndaaniʼ barcu stiʼ ne chuʼ ca binni zeʼ ndaaniʼ ni listu ti ganda guseegucaʼ ca escotilla stini pa gúʼyacaʼ guzulú guiaba nisaguié  ne gundubi bi. Zaqueca nga dxiiñaʼ naquiiñeʼ guni ca binni zaniru ndaaniʼ organización stiʼ Dios: napa xidé gacanécabe guiráʼ neza binni ridagulisaa para chuʼcaʼ listu ti ganda gudxiilucaʼ intiica guendanagana gueeda luguiacaʼ. Ne para ganda gaca ni la? guníʼ revista que maʼ chigaca xiixa ni qué huayuu dxi guʼyaʼ ca hermanu: nagueendaca «naquiiñeʼ guyubi guiráʼ compañía [neza binni ridagulisaa] binnigola ni guʼyaʼ ne gapa ca dendxuhuiiniʼ sti Cristu» (Hech. 20:28).

5. 1) Xi guleendú ca hermanu dxi bizulú cayaca nombrar ca binnigola. 2) Xi guendarinabadiidxaʼ zacábinu lu tema riʼ.

5 Nabé guleendú ca hermanu stale cosa sicarú dxi bizulú cayaca nombrar ca binnigola, purtiʼ gucaneni para bisaana de chúʼdinde ca neza binni ridagulisaa ne para bizuhuaacaʼ jma nadipaʼ. Gucaneni ca hermanu stinu para gunda bizuubacaʼ stiidxaʼ Dios dxi guca Primera Guerra Mundial, ni zeeda gaca casi ora nididinécabe barcu stícabe lu ti nisadóʼ ni cadiñentaa. Lu xcaadxi década ni gudiʼdiʼ despué, guca chaahuiʼ xcaadxi cosa ndaaniʼ organización stiʼ Dios ne guca cani para gacanécani ca xpinni Dios gúnicaʼ ni na Jiobá. Xi profecía stiʼ Biblia nga bizeeteʼ zaca chaahuiʼ modo cayuni ca xpinni Dios dxiiñaʼ. Gunáʼ nga caadxi de ca cosa ni maʼ biiyaluʼ bidxaa ndaaniʼ organización stiʼ Dios. Ximodo huayacanécani lii.

«Zuneʼ nombrar guendariuudxi para gueeda gaca casi ca superintendente stiluʼ»

6, 7. 1) Ximodo zanda guiénenu textu stiʼ Isaías 60:17. 2) Xi cusiene Jiobá ora bizeeteʼ de «ca superintendente stiluʼ» ne «cani rabi lii xi naquiiñeʼ guʼnuʼ».

6 Lu capítulo 9 stiʼ libru riʼ bidúʼyanu maca guníʼ Isaías zaguu Jiobá ndaayaʼ xquidxi ne zahuínnini ora gaca guidxi riʼ jma naroʼbaʼ (Is. 60:22). Peru guníʼ Jiobá zúniruʼ xcaadxi cosa: «Zedaniáʼ oro ni guiaana lugar stiʼ cobre, ne zedaniáʼ plata ni guiaana lugar stiʼ guiibaʼ, ne zedaniáʼ cobre ni guiaana lugar stiʼ yaga, ne zedaniáʼ guiibaʼ ni guiaana lugar stiʼ guié; ne zuneʼ nombrar guendariuudxi para gueeda gaca casi ca superintendente stiluʼ, ne zuneʼ nombrar guendaruni jneza para gueeda gaca casi cani rabi lii xi naquiiñeʼ guʼnuʼ» (Is. 60:17). Ximodo zanda guiénenu profecía riʼ. Ne ximodo cayaca cumplir profecía riʼ ndaaniʼ xquidxi Dios yanna.

Cadi cadxaa ti material feu pur tobi ni galán, sínuque cadxaa tobi ni galán pur stobi ni jma galán

7 Profecía stiʼ Isaías que na zaree ti material ni maca nuu para chuʼ stobi. Peru, cadi guiaandaʼ ndiʼ laanu: cadi cadxaa diʼ ti material feu pur tobi ni galán, sínuque cadxaa tobi ni galán pur stobi ni jma galán. Guizáʼ galán nga cueecabe cobre ne uguucabe oro, ne laaca galán nga cueecabe ca material ni maca nuu que ne uguucabe xcaadxi. Ejemplu riʼ racaneni laanu guiénenu xiñee guníʼ Jiobá zaca chaahuiʼ modo cayuni xquidxi dxiiñaʼ ra zidiʼdiʼ dxi. Gunáʼ nga ca cosa ni caníʼ profecía que zaca chaahuiʼ yaʼ. Ora bizeeteʼ Jiobá de «ca superintendente stiluʼ» ne «cani rabi lii xi naquiiñeʼ guʼnuʼ», cusihuinni zaca chaahuiʼ modo rapa xquidxi ne laaca zaca chaahuiʼ modo nuu ni organizadu, peru zaca ni ra zidiʼdiʼ dxi.

8. 1) Tuu nga na profecía stiʼ Isaías zacané para gaca chaahuiʼ modo cayuni xquidxi Dios dxiiñaʼ. 2) Xi ribeendunu pur cayaca chaahuiʼ stale cosa ndaaniʼ xquidxi Dios (biiyaʼ recuadru « Bidiibe lugar uguu jnézacabe laabe»).

8 Tuu nga gacané para gaca chaahuiʼ modo cayuni organización stiʼ Dios dxiiñaʼ yaʼ. Guidúʼyanu xi guníʼ Jiobá: «Zedaniáʼ oro, [...] zedaniáʼ plata, ne [...] zuneʼ nombrar guendariuudxi». Textu riʼ racané laanu guiénenu xiixa: cadi pur racalaʼdxiʼ binni guidxilayú nga cayaca chaahuiʼ stale cosa ndaaniʼ xquidxi Dios, sínuque Jiobá peʼ nga cayuni ni. Ne dede dxi guca Jesús rey nga caquiiñeʼ Jiobá laa para guni  chaahuiʼ stale cosa ndaaniʼ xquidxi. Xi ribeendunu pur guiráʼ ni cayaca riʼ yaʼ. Laaca textu que cayabi laanu zápanu «guendariuudxi» ne «guendaruni jneza» ora maʼ gaca chaahuiʼ cani. Ora rudiʼnu lugar gabi Dios laanu xi naquiiñeʼ gúninu ne chinándanu ni cayábibe laanu la? rápanu guendariuudxi; ne cumu laaca riuuláʼdxinu guibáninu jneza la? rucaani laanu gúninu ni na Jiobá, laabe nga na apóstol Pablu Dios ni «[ri]guixhe dxí» ladxidoʼno (Filip. 4:9).

9. Gunáʼ nga base ni riquiiñeʼ para gata chaahuiʼ dxiiñaʼ runi guiráʼ ca neza binni ridagulisaa, ne xiñee.

9 Guidúʼyanu xi guníʼ Pablu de Jiobá: «Dios la? naca ti Dios ni rudii guendariuudxi ne riguixhe chaahuiʼ guiráʼ ni runi» (1 Cor. 14:33TNM). Cadi caníʼ diʼ textu riʼ ximodo nuu ca cosa ni nexheʼ chaahuiʼ ne ca cosa ni cadi nexheʼ chaahuiʼ, sínuque caniʼni gadxé nga ora nexheʼ chaahuiʼ ti cosa ne gadxé nga ora nuu guendariuudxi. Xiñee yaʼ. Purtiʼ cadi guiráʼ diʼ biaje gata chaahuiʼ modo gaca xiixa nga ziuu guendariuudxi. Quíxhenu ejemplu stiʼ ti ejércitu para guiénenu ni. Neca maʼ nexheʼ chaahuiʼ modo naquiiñeʼ cheʼ ca soldadu riʼ lu ti guerra, peru, ora maʼ yendácabe ra chitíndecabe la? qué riuu diʼ guendariuudxi, purtiʼ lu guerra nga zécabe. Nga runi, naquiiñeʼ guietenaláʼdxinu ti cosa nabé risaca: neca gata chaahuiʼ modo chigaca xiixa, peru, pa qué gaca ni para chuʼ guendariuudxi la? zadxiña dxi guibiá ni. Peru, guendariuudxi ni rudii Dios la? racaneni para qué chuʼ dxi guibiá xiixa ni gata chaahuiʼ. Nga runi, rudiʼnu xquixe Dios ni «riguixhe dxí ladxidóʼ[no]», purtiʼ laa nga cayabi organización stinu xi naquiiñeʼ guni ne cayuni refinar laacabe (Rom. 15:33). Guendariuudxi ni rudii Dios nga zeeda gaca base ni riquiiñeʼ para gata chaahuiʼ dxiiñaʼ runi guiráʼ neza binni ridagulisaa nuu lu guidubi Guidxilayú ne laaca laani nga riquiiñeni para gacaneni laanu chuʼnu tobi si. Cadi dxandíʼ rusisácanu ndaayaʼ riʼ la? (Sal. 29:11.)

10. 1) Gunáʼ nga caadxi de ca cosa ni bidxaa ndaaniʼ organización stinu dxi nacubi bizulú ni (biiyaʼ recuadru « Bidxaa modo raca nombrar ca binnigola»). 2) Xi guendarinabadiidxaʼ zacábinu.

10 Recuadru ni láʼ « Bidxaa modo raca nombrar ca binnigola», racaneni laanu gánnanu gunáʼ nga caadxi de ca cosa ni bidxaa ndaaniʼ organización stinu dxi nacubi bizulú ni, ximodo guta chaahuiʼ guiráʼ ni raca ndaaniʼ ni ne xi ribeendunu pur laacani. Peru, ximodo biquiiñeʼ Jiobá Rey stinu para cuee «cobre» ni maca nuu que ne uguu «oro» lugar stini ca dxi riʼ yaʼ. Ximodo gupa ca neza binni ridagulisaa guendariuudxi ne ximodo guyuucaʼ tobi si dxi maʼ bidxaa modo ribícabe ca superintendente yaʼ. Ximodo racanécani lii para ganda gúniluʼ ni na Dios ni «riguixhe dxí ladxidóʼ[no]».

Ximodo cayuni mandar Cristu ca neza binni ridagulisaa

11. 1) Xi biene ca hermanu ora biʼniʼ investigar chaahuicaʼ Stiidxaʼ Dios. 2) Xi gudixhe ique ca hermanu ni nuu lu grupu ni zaniruʼ guni.

11 Lu ca iza ni gudiʼdiʼ dede 1964 hasta 1971, gudixhe grupu ni zaniruʼ gaca ti dxiiñaʼ guizáʼ naroʼbaʼ. Xi laani yaʼ. Gaca investigar chaahuiʼ caadxi tema zeeda lu Biblia, tobi de laacani nga ximodo biʼniʼ ca cristianu dxiiñaʼ lu primé siglu. * Lu dxiiñaʼ ni cayúnicabe que biénecabe ti cosa nabé risaca: cadi ti binnigola o ti superintendente si nga guzániru ndaaniʼ cada neza binni ridagulisaa ni guyuu lu primé siglu, sínuque guyuu ti grupu de binnigola o ti cuerpu de ancianu (biindaʼ Filipenses 1:1 ne 1 Timoteo 4:14). Ora biene chaahuiʼ grupu ni zaniruʼ ni bizéʼtenu riʼ la? bidii cuenta cayacané Jesús laa para ganna caquiiñeʼ guchaa modo cayaca caadxi dxiiñaʼ ndaaniʼ organización  stiʼ Dios. Guníʼ ca hermanu que zúnicaʼ guiráʼ ni cayabi Rey sticaʼ laacaʼ, ngue runi, nagueendaca bichaacaʼ modo cayaca stale cosa ti ganda chinanda organización stiʼ Dios principiu stiʼ Biblia ra na ximodo naquiiñeʼ gaca nombrar ca binnigola. Gunáʼ nga caadxi de ca cosa ni bidxaa ra bizulú década stiʼ 1970 yaʼ.

12. 1) Xi bidxaa lu grupu ni zaniruʼ. 2) Bisiene ximodo runi Grupu ni Zaniruʼ dxiiñaʼ (biiyaʼ recuadru « Rapa Grupu ni Zaniruʼ guiráʼ ni napa Reinu», ni zeeda lu yaza 130).

12 Primeca grupu ni zaniruʼ nga bichaa modo cayuni dxiiñaʼ. Dxiqué la? gadxe si hermanu ungidu nga nuu lu grupu ni láʼ junta de director stiʼ Watch Tower Bible and Tract Society of Pennsylvania. Peru lu iza 1971, guyuu stapa binni lu grupu ni zaniruʼ para bizaacabe 11 ne maʼ qué niree lácabe junta de director. Nin tobi de ca binni nuu lu grupu riʼ qué niníʼ ique jma risaca que stobi ne laaca gudíxhecabe gaca cada tobi de laacabe presidente stini cada iza ne gaca ni en orden alfabéticu.

13. 1) Ximodo guca dxiiñaʼ ndaaniʼ xquidxi Dios pur cuarenta iza. 2) Xi biʼniʼ Grupu ni Zaniruʼ iza 1972.

13 Sti cosa ni bidxaa que bihuínnini ndaaniʼ guiráʼ neza binni ridagulisaa. Ximodo yaʼ. Lu ca iza ni gudiʼdiʼ dede 1932 hasta 1972, guca nombrar ti hermanu si ndaaniʼ cada neza binni ridagulisaa para guni dxiiñaʼ casi superintendente. Binibiáʼcabe hermanu riʼ casi director de serviciu dede 1932 hasta 1936. Despué maʼ biree labe siervu de compañía, de raqué maʼ siervu stiʼ ti neza binni ridagulisaa, ne últimu la? biree labe superintendente stiʼ ti neza binni ridagulisaa. Nabé biʼniʼ ca hermanu riʼ dxiiñaʼ né stale gana para gucanecaʼ ca xpinni Dios chuʼ nazaaca en sentidu espiritual. Stale biaje, stubi si superintendente stiʼ  ti neza binni ridagulisaa nga riguixhe xi naquiiñeʼ gaca ne qué rinabadiidxabe xcaadxi binnigola nuu raqué. Peru lu iza 1972, gudixhe Grupu ni Zaniruʼ gaca sti cosa ne dede nagasi cabeendú xquidxi Dios stale cosa galán pur laani. Xi guníʼ grupu que gaca yaʼ.

14. 1) Xi nga bizulú cayaca 1 stiʼ octubre iza 1972. 2) Ximodo rinanda cada coordinador stiʼ ti cuerpu de ancianu conseju ni zeeda lu Filipenses 2:3.

14 Cadi guiaandaʼ lii ti hermanu si nga nuu casi superintendente ndaaniʼ cada neza binni ridagulisaa dxiqué. Peru yanna maʼ chigaca sti cosa: ca hermanu ni gusaa ca requisitu ni rinabaʼ Biblia la? zuni nombrar xquidxi Dios laacaʼ binnigola, ne zaca guirácabe ti cuerpu de ancianu ni chiguiaana para guʼyaʼ dxiiñaʼ stiʼ cada neza binni ridagulisaa. Bizulú ni bizéʼtenu riʼ 1 stiʼ octubre iza 1972. Yanna riʼ la? maʼ ti coordinador nga nuu lu cada grupu de binnigola, peru qué riníʼ ique hermanu riʼ jma risaca que xcaadxi binnigola, sínuque ruuyabe laabe casi tobi «ni jma huaxiéʼ risaca» (Luc. 9:48). Cumu qué rudxiibaʼ ca binnigola riʼ laca laacaʼ la? reeda gácacaʼ ti ndaayaʼ para guiráʼ hermanu ni nuu lu guidubi Guidxilayú (Filip. 2:3).

Ridúʼyanu pabiáʼ nuu xpiaaniʼ Rey stinu, purtiʼ maʼ bisaana pastor ni guʼyaʼ ca xpinni órapeʼ caquiiñeʼ gaca ni

15. 1) Xi ndaayaʼ huayapa guiráʼ neza binni ridagulisaa dede dxi bizulú cayuni ca cuerpu de ancianu dxiiñaʼ. 2) Xiñee rininu nuu xpiaaniʼ Rey stinu.

15 Nabé guca chaahuiʼ stale cosa ora bireeche dxiiñaʼ raca ndaaniʼ ti neza binni ridagulisaa lu náʼ ti cuerpu de ancianu. Guzéʼtenu chonna de laacani: primé ne ni jma risaca nga gucaneni guiráʼ binnigola —neca nabé risaca dxiiñaʼ stiʼ— ganna Jesús nga Xaíque stiʼ guiráʼ xpinni (Efes. 5:23). Guiropa la? rudiicabe cuenta dxandíʼ ni na Proverbios 15:22: «Ra nuu stale tu gudii conseju la? [rireendú dxiiñaʼ ni chigaca]». Ora maʼ chitixhe ca binnigola gaca xiixa la? naquiiñeʼ gúʼyacaʼ  gacaneni guiráʼ ca hermanu sticaʼ. Pa guinabadiidxacabe cada binnigola ne gucaadiágacabe ora guiníʼ cada tobi de laacabe ximodo zanda gaca xiixa la? jma nagueenda zadxélacabe modo gaca ni casi na ca principiu stiʼ Biblia (Prov. 27:17). Riguu Jiobá ndaayaʼ guiráʼ ni riguixhe íquecabe ne ribeendúcabe stale cosa galán. Ne guionna, cumu maʼ napa organización stiʼ Dios stale binnigola la? randa ridxélacabe binni ni zanda guʼyaʼ ne gapa guiráʼ ca dendxuʼ stiʼ Dios (Is. 60:3-5). Guníʼ ique ni chiguzéʼtenu riʼ: iza 1971 que nuu 27,000 neza binni ridagulisaa lu guidubi Guidxilayú, peru iza 2013 bihuinni maʼ bidale cani ne maʼ nuu jma de 113,000. Racá ridúʼyanu pabiáʼ nuu xpiaaniʼ Rey stinu, purtiʼ maʼ bisaana pastor ni guʼyaʼ ca xpinni órapeʼ caquiiñeʼ gaca ni (Miq. 5:5).

«Lasá jneza ti guʼya cabe ximodo ibani cabe»

16. 1) Xi dxiiñaʼ risaca napa ca binnigola. 2) Ximodo biene ca Binni Ruundaʼ Biblia conseju stiʼ Jesús ora guníʼ gápacabe ca dendxuhuiiniʼ stiʼ.

16 Maca dede dxi bizulú ca Binni Ruundaʼ Biblia nga biene ca binnigola nápacaʼ ti dxiiñaʼ nabé risaca: gacanecaʼ guiráʼ hermanu ti cadi guixeleʼ nin tobi de Dios (biindaʼ Gálatas 6:10). Lu iza 1908 biree ti artículo lu revista Watch Tower ni cusiene ca diidxaʼ guníʼ Jesús riʼ: «Gupa ca dendxu stinneʼ» (Juan 21:15-17). Guidúʼyanu xi conseju bidii revista que para ca binnigola: «Maʼ bidii Xpixuaananu laanu ti dxiiñaʼ, laani nga gúʼyanu ne gápanu ca xpinni, ne naquiiñeʼ gusisácanu dxiiñaʼ riʼ de guidubi ladxidoʼno, naquiiñeʼ guiénenu ti privilegiu nga guni tendernu ne gudiʼnu ni gó ca xpinni Señor». Lu iza 1925 bisietenalaʼdxiʼ revista Watch Tower ca binnigola pabiáʼ risaca gápacaʼ ca xpinni Cristu. Sicaríʼ guníʼ revista que: «Dios nga xpixuaanaʼ yuʼduʼ stiʼ [...], ne laca laa nga cuidxi cuenta guiráʼ cani maʼ gucuaa privilegiu para guʼyaʼ ne gapa ca hermanu stiʼ».

17. Ximodo huayacanécabe ca binnigola para gánnacaʼ ximodo jma jneza gápacaʼ ca xpinni Dios.

17 Ximodo caquiiñeʼ Jiobá organización stiʼ para gacané ca binnigola gánnacaʼ ximodo jma jneza gápacaʼ ca xpinni Dios, ni zeeda gaca casi ora nibeebe «guiibaʼ» ne niguube «plata» yaʼ. Rúnibe ni ora rusiidibe  laacaʼ. Iza 1959 nga guca primé Scuela stiʼ Xhiiñaʼ Reinu para ca superintendente. Lu tobi de ca clase stiʼ scuela que biuundaʼ ti tema ni láʼ «Ximodo gacanenu cada xpinni Cristu» ne laaca gúdxicabe ca binnigola «gúnicaʼ ti programa para chigánnacaʼ guiráʼ cani rucheeche diidxaʼ ne checaʼ dede ra lídxicabe». Ne laaca gúdxicabe laacaʼ xi guiráʼ zanda gúnicaʼ ne xi zanda guiniʼcaʼ ti ganda gacanecaʼ ca binni ridagulisaa. Peru guyuu xcaadxi cosa nacubi lu Scuela stiʼ Xhiiñaʼ Reinu iza 1966. Tobi de ca tema ni biuundaʼ raqué nga «Nabé risaca ca visita de pastoreu». Xii nga ni jma bisiidicabe lu tema riʼ yaʼ. Bisiidicabe ti cosa ni nabé risaca: cani napa ti puestu casi superintendente o binnigola la? «naquiiñeʼ gápacaʼ ca xpinni Dios, cásica runi ti pastor ni nadxii ca dendxuʼ stiʼ, peru laaca cadi naquiiñeʼ gusiaandacabe familia stícabe ne cadi gusaana de gucheechecabe diidxaʼ». Lu ca últimu iza riʼ maʼ gúcaruʼ stale scuela para ca binnigola. Xi cabeendú ca xpinni Cristu purtiʼ nabé racané organización stiʼ Jiobá ca binnigola yaʼ. Yanna riʼ maʼ napa xquidxi Dios stale pastor espiritual.

Scuela stiʼ Xhiiñaʼ Reinu ni guca Filipinas (1966)

18. 1) Xi dxiiñaʼ risaca maʼ gucuaa ca binnigola. 2) Xiñee nadxii Jiobá ne Jesús ca binnigola ni runi xhiiñaʼ jneza.

18 Riquiiñeʼ Jiobá Jesús, Rey stinu, para guni nombrar ca hermanu ni zanda gaca binnigola ti gúnicaʼ ti dxiiñaʼ nabé risaca. Xi dxiiñaʼ riʼ yaʼ. Gacanécabe ca dendxuhuiiniʼ stiʼ Dios tiempu nagana cadídidu yanna (Efes. 4:11, 12; 2 Tim. 3:1). Nabé nadxii Jiobá ne Jesús ca binnigola ni runi xhiiñaʼ jneza, purtiʼ zinándacaʼ conseju riʼ: «Lagapa ca xpinni Dios, cani bisaana be lu ná tu. Laguni ni de idubi ladxidóʼ to casi racalaʼdxi Dios [ne] lasá jneza ti guʼya cabe ximodo ibani cabe» (1 Ped. 5:2, 3). Guidúʼyanu chupa modo ra rihuinni naca ca pastor ti ejemplu para ca dendxuhuiiniʼ stiʼ Dios ne ximodo racané dxiiñaʼ stícabe para chuʼ ca binni ridagulisaa nayecheʼ ne gápacaʼ guendariuudxi.

Ximodo rapa ca pastor ca dendxuʼ stiʼ Dios

19. Ximodo ridúʼyanu ca binnigola ora riucheechenecaʼ laanu diidxaʼ.

19 Primé la? rúnicabe ni ora rucheechecabe diidxaʼ né cada binni ridagulisaa. Guidúʼyanu xi guníʼ evangelista Lucas de Jesús: «Biree  Jesús, canazá ca guidxi roʼ ne guidxi huiiniʼ, canayuíʼ né binni modo runi mandar Dios. Ne doce apóstol stibe que canazá né laabe» (Luc. 8:1). Cásica bicheechené Jesús ca apóstol stiʼ diidxaʼ la? ca binnigola ni rinanda ejemplu stibe, laaca rucheechenecaʼ ca hermanu sticaʼ diidxaʼ. Ora rúnicabe zacá, rudiicabe cuenta pabiáʼ racanécabe chuʼ ca binni ridagulisaa tobi si. Yanna, ximodo ruuyaʼ ca hermanu dxiiñaʼ runi ca binnigola riʼ yaʼ. Guidúʼyanu xi guníʼ Jeannine, ti hermana ni napa biaʼ 90 iza: «Ora chigucheecheniáʼ ti binnigola diidxaʼ, randa rueniáʼ laabe diidxaʼ ne racaneni naa para gunebiaʼyaʼ laabe jma». Yanna guidúʼyanu xi guníʼ Steven, laa napa biaʼ treinta iza: «Ora guireeniáʼ ti binnigola para chigucheechedu diidxaʼ de yoo pur yoo la? rudieeʼ cuenta rápabe gana gacanebe naa. Ne riecheʼ ora racanebe naa».

Cásica riyubi ti pastor dendxuhuiiniʼ stiʼ, zacaca runi ca binnigola stipa para guyúbicaʼ guiráʼ xpinni Cristu ni maʼ bixeleʼ de ca binni ridagulisaa

20, 21. Ximodo zanda chinanda ca binnigola ejemplu stiʼ pastor ni bizeeteʼ Jesús lu parábola stiʼ. Bizeeteʼ ti ejemplu (biiyaʼ recuadru « Ximodo racané ca visita ni runi ca binnigola guiráʼ semana»).

20 Guiropa la? rusiidiʼ organización stiʼ Jiobá ca binnigola gánnacaʼ xi zanda gúnicaʼ ti gusihuínnicaʼ dxandíʼ rizaaláʼdxicaʼ ca hermanu ni maʼ bixeleʼ de ca binni ridagulisaa (Heb. 12:12). Xiñee naquiiñeʼ gacané ca binnigola ca xpinni Cristu ni huará en sentidu espiritual ne ximodo zanda gúnicabe ni. Ti biaje guníʼ Jesús ti parábola ne raqué bizeeteʼ de ti pastor ni biniti ti dendxuʼ stiʼ. Yanna guidúʼyanu ximodo racaneni laanu guicábinu cani gunabadiidxanu (biindaʼ Lucas 15:4-7). Ora bidii pastor que cuenta cayaadxaʼ ti dendxuʼ stiʼ la? oraqueca biree ziyubi laame, casi ñaca laasime napa. Ximodo rinanda ca binnigola ejemplu riʼ yaʼ. Para laacabe la? nabé risaca ca binni ni maʼ bixeleʼ de xquidxi Dios, cásica risaca xa dendxuhuiiniʼ biniti pastor que. Ruuyacabe binni riʼ casi ti dendxuʼ ni cananiti, cadi casi tuuxa ni maʼ binitilú. Ne cásica yeyubi pastor que dendxuhuiiniʼ stiʼ «dede ra [b]idxela [...] laame» la? zacaca runi ca binnigola stipa para guyúbicaʼ guiráʼ xpinni Cristu ni maʼ bixeleʼ de Dios ne gacanecaʼ laacabe.

21 Peru, xi biʼniʼ pastor ni bizeeteʼ Jesús lu parábola que ora bidxela dendxuʼ stiʼ yaʼ. Gundisaʼ pastor que laame né stale cuidadu, «[bi]dxiiba be laame xiʼque be» ne yenebe laame ndaaniʼ currá ra nuu xcaadxi dendxuʼ stibe. Ngaca nga runi ti binnigola. Ora guiníʼnebe ti hermanu ni huará en sentidu espiritual ne gusihuínnibe dxandíʼ rizaaláʼdxibe laa la? riguu stiidxabe gana hermanu que ne racanécani laa guibiguetaʼ lade ca binni ridagulisaa. Ngapeʼ nga ni bizaaca Victor, ti hermanu de África ni bisaana de guidagulisaané ca xpinni Cristu. Guidúʼyanu xi guniʼbe: «Neca gucaʼ inactivu xhono iza, peru nabé biyubi ca binnigola modo gacanecaʼ naa». Yanna, xipeʼ nga gucané laabe para bibiguétabe yaʼ. Laabe cusiénebe: «Ti dxi beeda ganna John naa, ti binnigola ni yeniáʼ scuela stiʼ ca precursor, ne biluiʼbe naa caadxi foto ni bireʼdu dxi guca cursu que. Beeda stale cosa sicarú ndaaniʼ iqueʼ ora biiyaʼ cani ne bietenaladxeʼ pabiáʼ nayecheʼ guyuaaʼ dxi bineʼ ni na Jiobá». Bibiguetaʼ Victor lade ca binni ridagulisaa gudiʼdiʼ si dxi de yeganna John laa ne yanna riʼ maʼ precursor laa sti biaje. Xi rusiidiʼ ejemplu riʼ laanu yaʼ. Racaneni laanu gudiʼnu cuenta pabiáʼ racané ca binnigola chuʼ guiráʼ xpinni Cristu nayecheʼ. Cadi dxandíʼ la? (2 Cor. 1:24.) *

 Riuu xquidxi Dios tobi si purtiʼ maʼ nexheʼ chaahuiʼ dxiiñaʼ runi ca binnigola

22. Ximodo racané guendaruni jneza ne guendariuudxi para chuʼ ti neza binni ridagulisaa nadipaʼ (laaca zanda gúʼyaluʼ recuadru « Nabé bidxagayaadu»).

22 Casi bizéʼtenu ra bizulú tema riʼ, maca guníʼ Jiobá zadale guendaruni jneza ne guendariuudxi stiʼ xquidxi Dios (Is. 60:17). Guiropaʼ guenda riʼ racanécani para chuʼ guiráʼ hermanu tobi si. Ximodo nga yaʼ. Ora riete naquiiñeʼ gúninu ni jneza la? qué riaandaʼ ndiʼ laanu: «Jiobá Dios stinu laasibe nga Jiobá» (Deut. 6:4). Qué gápadibe caadxi norma para ti neza binni ridagulisaa ni nuu ti guidxi ne xcaadxi norma para cani nuu sti guidxi. Coʼ, sínuque ti clase si norma nga nápabe ni rabi laanu xii nga jneza ne xii nga cadi jneza ne laani nga zinanda «irá [...] ca xpinni Cristu» (1 Cor. 14:33). Nga runi, para ganda guireendú guiráʼ dxiiñaʼ runi ti neza binni ridagulisaa la? naquiiñeʼ chinanda ca norma stiʼ Dios. Qué racalaʼdxiʼ si Rey stinu gápanu guendariuudxi, sínuque laaca racaláʼdxibe gácanu binni ni «riguixhe dxí enda ridínde» (Mat. 5:9). Nga runi, naquiiñeʼ «sa nanda nu ni guni laanu tobi si», o ni gacané laanu gápanu guendariuudxi. Pa málasi gueeda gápanu ti guendanagana la? naquiiñeʼ guyúbinu ximodo gaca chaahuiʼ ni nagueendaca (Rom. 14:19). Zacá zacanenu gapa ca binni ridagulisaa guendariuudxi ne ziuʼnu tobi si (Is. 60:18).

23. Xi rusiecheʼ ca xpinni Jiobá yanna.

23 Lu beeu noviembre stiʼ iza 1895 nga primé biaje guníʼ revista Watch Tower maʼ chichuu xpinni Cristu ni gaca binnigola. Ca hermanu ni zaniru lu dxiiñaʼ cayuni xquidxi Dios laaca bisihuínnicaʼ dxandíʼ racaláʼdxicaʼ gaca ti cosa: uguu Jiobá ndaayaʼ ni chigúnicabe ne gacaneni xquidxi gaca «tobi si lu ni runi cre». Nuunu nayecheʼ purtiʼ maʼ bidúʼndanu guiráʼ ni maʼ biʼniʼ Jiobá ndaaniʼ xquidxi lu ca década ni maʼ gudiʼdiʼ ca: biquiiñebe Rey stinu para gudixhe chaahuibe dxiiñaʼ runi ca superintendente ne maʼ gucané ni bíʼnibe riʼ laanu para ganda guni adorarnu laabe ti modo si, purtiʼ zacá nga riuuláʼdxibe gúninu ni (Sal. 99:4). Xi cabeendunu yanna pur ni biʼniʼ Jiobá yaʼ. Racaneni guiranu chuʼnu «tobi si», gúninu «dxiiña de idubi ladxidóʼ [no]» ne guni adorarnu Dios ni «riguixhe dxí ladxidóʼ[no]» (2 Cor. 12:18; biindaʼ Sofonías 3:9).

^ párrafo 11 Guiráʼ ni biénecabe dxi guca investigación que biree cani lu ti libru ni láʼ Ayuda para entender la Biblia.

^ párrafo 21 Biiyaʼ tema ni láʼ «Racané ca binnigola para chuʼnu nayecheʼ», ni biree lu revista Torre stiʼ ni rapa 15 stiʼ enero iza 2013, yaza 27 dede 31.