Biiyaʼ guiraʼ ni nuu lu sitiu riʼ

guyé lu índice

 CAPÍTULO 13

Rié cani rucheeche stiidxaʼ Reinu nezalú justicia

Rié cani rucheeche stiidxaʼ Reinu nezalú justicia

XI ZAZÍʼDINU LU CAPÍTULO RIʼ

Casi guníʼ Jesús que, zuyubi gobiernu modo gucueeza guireeche diidxaʼ

1, 2. 1) Xi biʼniʼ ca xaíque yuʼduʼ para gucueezacaʼ de guireeche diidxaʼ, peru xi biʼniʼ ca apóstol. 2) Xiñee qué nusaana ca apóstol de nucheechecaʼ diidxaʼ.

CADI xadxí de guca saa Pentecostés lu iza 33, ne deruʼ chupa chonna semana de biasastí primé neza binni ridagulisaa ndaaniʼ guidxi Jerusalén. Cumu deruʼ bizulú ni la? biiyaʼ Binidxabaʼ zanda gunduuxeʼ laacabe ante guidálecabe. Nin qué nindaa biquiiñebe ca xaíque yuʼduʼ para gucueezacaʼ guireeche diidxaʼ. Peru ca apóstol que bisihuínnicaʼ nadxibalucaʼ purtiʼ qué nusaana de nucheechecaʼ diidxaʼ ne zaqué bidale «cani runi cre Cristu, cásica hombre zaqueca gunaa» (Hech. 4:18, 33; 5:14).

Biecheʼ ca apóstol que «purti bidii Dios lugar usituí binni lú ca purti xpinni Jesús laacaʼ»

2 Nabé bidxiichi ca xhenemígucabe ora bíʼyacaʼ ni bizaaca que, ngue runi biseguyoocabe ca apóstol. Peru gueelaʼ que gulee ti ángel stiʼ Jiobá laacabe ne siadoʼroʼ bizulú bicheechecabe diidxaʼ. Gunaazeʼ soldadu laacabe sti biaje ne yenecaʼ laacabe nezalú ca xaíque yuʼduʼ, purtiʼ qué nusaana de nucheechecaʼ diidxaʼ casi gúdxicabe laacaʼ. Peru qué nidxibi ca apóstol ora bicábicaʼ laacabe: «Jma naquiiñe uzuʼba du stiidxa Dios que stiidxa binni». Ora binadiaga ca xaíque yuʼduʼ ni guníʼcabe jmaruʼ si bidxiichicaʼ, dede gucaláʼdxicaʼ ñuuticaʼ laacabe. Óraque biasa Gamaliel, ti hombre ni runi ni na ley ne guiráʼ binni rucaadiaga laa, guníʼ: «Cayabe laatu cadi guni tu ca hombre ca gastiʼ. Laudii lugar che cabe». Guirutiʼ niníʼ ique xi zazaaca despué, purtiʼ ca hombre que bicaadiágacaʼ laabe ne bindaacabe ca apóstol que. Xi biʼniʼ ca apóstol que despué yaʼ. Stiidxaʼ Dios na gúcacabe nadxibalú, ngue runi «qué ñaana dxí cabe de ñuiʼ cabe stiidxa Cristu» (Hech. 5:17-21, 27-42; Prov. 21:1, 30).

3, 4. 1) Xi huaquiiñeʼ Binidxabaʼ para gucaalú xquidxi Dios. 2) Xi zadúʼyanu lu capítulo riʼ ne lu xhupa ca.

3 Ni bizaaca lu iza 33 que nga primé biaje yenécabe ca xpinni Dios nezalú cani runi mandar para gucueezacabe laacaʼ de gucheechecaʼ diidxaʼ, peru cadi primé ne últimu biaje zazaaca ngue (Hech. 4:5-8; 16:20; 17:6, 7). Ca dxi nabáninu riʼ, caquiiñeruʼ Binidxabaʼ ca xhenemigu Dios para gucaacaʼ gobiernu gucueeza dxiiñaʼ ni cayúninu. Pur nga, ruyúbicaʼ modo guindísacaʼ falsu luguiáʼ xquidxi Dios. Tobi de cani riníʼcabe nga ruchelaníʼdinu binni. Stobi nga rucaʼnu binni gudxiilú gobiernu ne rizanu lu guidxi rutoʼno. Ora ruuyaʼ xquidxi Dios caquiiñeʼ checaʼ  nezalú justicia la? riecaʼ para gusihuínnicaʼ cadi dxandíʼ ni caníʼ binni. Xi huabeendú xquidxi Dios yaʼ. Ximodo runi sentirluʼ ora gúʼndaluʼ ni huaguixhe justicia gaca lu ca década huadiʼdiʼ ca yaʼ. Guidúʼyanu caadxi ejemplu ra huayacané «justicia» xquidxi Dios para guireeche diidxaʼ (Filip. 1:7).

4 Lu capítulo riʼ zadúʼyanu xi huayuni xquidxi Dios para guireeche diidxaʼ sin gucueezacabe laacaʼ. Lu xhupa capítulo stiʼ libru riʼ zadúʼyanu ximodo huayé xquidxi Dios nezalú justicia para cadi gúninu ni runi binni guidxilayú ne chinándanu ca ley stiʼ Reinu stiʼ Dios.

Ruchelaníʼdinu binni la? o qué rusaana de guininu de Reinu stiʼ Dios

5. Ra ziluxe década stiʼ iza 1930, xiñee biseguyoocabe cani rucheeche stiidxaʼ Reinu ne xi biʼniʼ cani zaniruʼ ndaaniʼ xquidxi Dios.

5 Ra ziluxe década stiʼ iza 1930, guidubi guidxi Estados Unidos, gucalaʼdxiʼ ca gobiernu municipal ne estatal nucaacaʼ ca testigu stiʼ Jiobá nibeecaʼ ti licencia o permisu para gucheechecaʼ diidxaʼ. Peru qué ñuni ca xpinni Cristu ngue, purtiʼ pa cueecabe licencia la? zanda guiaaxhacabe ni. Ne laaca nanna dxíchicabe nin ti gobiernu qué gapa derechu gucueeza laacabe de gúnicabe dxiiñaʼ bisaanané Jesús ca discípulo stiʼ (Mar. 13:10). Cumu qué ñuni ca xpinni Cristu ni na gobiernu la? biseguyoocabe stale de laacaʼ. Xi biʼniʼ cani zaniruʼ ndaaniʼ xquidxi Dios óraque yaʼ. Guníʼcabe chécabe nezalú justicia para gusihuínnicabe cadi jneza cayuni ca binni que, purtiʼ cucueezacaʼ ca Testigu de chinándacaʼ ni runi religión sticaʼ. Peru nabé risaca ni bizaaca lu iza 1938. Xiñee yaʼ.

6, 7. Xi bizaaca familia Cantwell.

6 Martes siadóʼ 26 stiʼ abril de iza 1938, familia Cantwell ni naca precursor especial guníʼ stiidxacaʼ gucheechecaʼ diidxaʼ guidubi dxi ndaaniʼ guidxi New Haven (Connecticut). Xaíque familia riʼ nga Newton, de 60 iza, ne xheelabe Esther, ne Henry, Russell ne Jesse guionnaʼ xiiñicabe. Ne dede ora bireecabe maca guníʼ íquecabe qué zabiguétacabe. Xiñee yaʼ. Purtiʼ maca huaseguyoo puliciá laacabe stale biaje, ngue runi maca nánnacabe ora tiica zanda igaacabe. Neca zaqué, zigucheechecabe diidxaʼ né stale gana. Siadóʼ que yendácabe New Haven ndaaniʼ chupa carru. Newton, xaíque familia que ziné ti carru ra dxaʼ stale libru, revista ne ti gramófono portátil, ne Henry, de 22 iza, ziné sti carru ni napa ti equipu de sonidu. Ne casi guníʼ íquecabe que, despué de chupa chonna hora beeda puliciá ne bicueeza laacabe.

7 Primeru gunaazecabe Russell, de 18 iza, despué Newton ne Esther. Dede zitu biiyaʼ Jesse, de 16 iza, ximodo ziné puliciá bixhoze, jñaa ne biʼchiʼ. Cumu cucheeche Henry diidxaʼ sti ladu la? biaana Jesse stubi. Lugar de nidxíbibe, gucuaabe gramófono stibe ne bicheecherube diidxaʼ. Bidii chupa hombre católicu lugar guxhídxibe ti libana stiʼ hermanu Rutherford ni láʼ «Enemigos»,  peru ora binadiágacaʼ ni guizáʼ bidxiichicaʼ ne gucaláʼdxicaʼ niguíñecaʼ Jesse. Ni bíʼnitiʼ Jesse la? bitopa ca stiʼ ne biree zeʼ; nin qué nindaa gunaazeʼ ti puliciá laabe ne biseguyoo laabe. Ca puliciá que guniʼcaʼ qué guzaabiʼ hermana Cantwell gastiʼ, ngue runi bindaacaʼ laabe, peru qué nundaacabe xheelabe ne ca xiiñibe. Ne para gunda bireecabe dxi queca, gupa xidé gudíxecabe fianza.

8. Xiñee guníʼ justicia cuchelaniʼdiʼ Jesse binni.

8 Despué de chupa chonna beeu, lu septiembre, iza 1938, guyé familia Cantwell nezalú justicia ni nuu New Haven. Ca binni que guniʼcaʼ napa xidé guieguyoo Newton, Russell ne Jesse, purtiʼ qué gápacaʼ licencia para guinábacaʼ cooperación. Ne neca guyécabe nezalú ca juez stiʼ guidxi Connecticut, guníʼcabe caquiiñeʼ guieguyoo Jesse, purtiʼ nácabe cucheelaníʼdibe binni. Xiñee yaʼ. Purtiʼ guníʼ guiropaʼ hombre católicu ni bicaadiaga grabación que caníʼ libana que mal de religión sticaʼ, ngue runi bichiichi ni laacaʼ. Ca abogadu stiʼ ca hermanu que gunábacaʼ checaʼ nezalú Tribunal Supremo stiʼ Estados Unidos, ra nuu ca juez jma risaca.

9, 10. 1) Xi biʼniʼ Tribunal Supremo stiʼ Estados Unidos ora binadiaga ni bizaaca familia Cantwell. 2) Ximodo cayacané ni guníʼ ca juez que laanu.

9 Bidxíñacabe nezalú justicia 29 stiʼ beeu marzo, iza 1940. Raqué bicaadiaga Charles Evans Hughes, ni naca presidente stiʼ Tribunal que, ne xi xhono juez ni guníʼ Hayden Covington,  abogadu stiʼ ca Testigu. * Ora gucalaʼdxiʼ fiscal, o abogadu, stiʼ estadu Connecticut nusihuinni ruchelaniʼdiʼ ca Testigu binni, gunabadiidxaʼ tobi de ca juez que laa: «Cadi dxandíʼ stale binni qué ñuulaʼdxiʼ ca diidxaʼ guníʼ Jesús ca dxi bibani la?». Óraque bicabi fiscal que: «Dxandíʼ nouʼ, ne laaca cuzeeteʼ Biblia xi biʼniʼ binni Jesús pur ca diidxaʼ ni guníʼ que». Laca laabe guluube doo yánnibe pur ca diidxaʼ guniʼbe que, purtiʼ bichaagabe ca Testigu né Jesús ne bichaagabe estadu que né ca xhenemigu. Ngue runi, 20 stiʼ mayo, iza 1940, guiráʼ ca juez que guyuucaʼ pur ca Testigu.

Hayden Covington (delante, ni nuu galahuiʼ), Glen How (ladu bigaʼ) ne xcaadxi xpinni Cristu despué de biʼniʼ ganarcaʼ ti juiciu

10 Xi bizaaca pur cani guníʼ ca juez que yaʼ. Guiráʼ binni zanda chinanda ni runi religión stiʼ ne nin ti justicia federal, estatal o municipal zanda quixhe ti ley para gucueeza laacaʼ. Ne qué nidxela ca juez que xiixa prueba ni nusihuinni «bichelaniʼdiʼ Jesse binni». Ni guníʼ ca juez que bisihuinni qué ruchelaniʼdiʼ ca testigu stiʼ Jiobá binni. Juiciu biʼniʼ ganárcabe que gucaneni guiráʼ ca xpinni Dios. Yanna, ñee cayacanérucani laanu la? Guidúʼyanu xi guníʼ ti Testigu ni naca abogadu: «Nápanu derechu chinándanu ni runi religión stinu ne maʼ guirutiʼ zanda gucueeza laanu de gucheechenu diidxaʼ para quixhedxinu ladxidóʼ binni ni nabeza neza ra lídxinu».

Rucaʼnu binni gudxiilú gobiernu la? o rusíʼdinu ni dxandíʼ

Tratadu gudiizicabe Canadá

11. Xi gudiiziʼ ca xpinni Cristu de Canadá, ne xiñee.

11 Lu década stiʼ iza 1940, nabé bicaalúcabe ca testigu stiʼ Jiobá de guidxi Canadá. Ngue runi, para ganna guiráʼ binni cadi cudii guidxi que lugar guni adorar binni Dios stiʼ la? lu iza 1946 gulee ca xpinni Cristu de Canadá ti tratadu ni láʼ: «Cusaana Quebec mal Canadá, purtiʼ cucueeza binni guni ni racalaʼdxiʼ ne nanalaʼdxiʼ Dios ne Cristu» (lu diidxaʼ inglés), ne gudiizicabe ni dieciséis dxi. Tapa si yaza napa tratadu que, ne raqué rieeteʼ ximodo runiibi ca xaíque cristiandad ca puliciá para guninacaʼ ca testigu stiʼ Jiobá ne ximodo rucaalú binni laacabe ndaaniʼ guidxi Quebec. Sicaríʼ na tratadu que: «Dede yanna canaazecabe ca Testigu, neca gastiʼ guzaabicaʼ. Nuu biaʼ 800 demanda sticaʼ ndaaniʼ guixi Gran Montreal ni caʼruʼ lica gúʼyacabe».

12. 1) Xi biʼniʼ ca xhenemigu ca Testigu ora gúnnacaʼ xiná tratadu que. 2) Xi guníʼcabe nezalú justicia cayuni ca Testigu (laaca zanda gúʼyaluʼ nota).

12 Cásica primé ministru de guidxi Quebec, Maurice Duplessis, ne zaqueca cardenal católicu Villeneuve, bidxiichicaʼ pur ni cuzeeteʼ tratadu que, ngue runi dede qué ñacaʼ ora guzanándacaʼ ca Testigu. Nin qué nindaa 800 demanda ni maca nuu que beeda gácani 1,600. Sicaríʼ guníʼ ti precursora: «Cumu stale biaje biseguyoo puliciá laadu la? dede maʼ nin ñánnadu panda biaje biseguyoocabe laadu». Ora gúʼyacabe ti Testigu caguiiziʼ tratadu que la? rinaazecabe laa, purtiʼ nácabe cucaa binni gudxiilú gobiernu. *

13. Tuu nga ca primé Testigu ni guyé nezalú justicia purtiʼ nácabe cucaacaʼ binni gucaalú gobiernu, ne xi gudixhe juez que gácacabe.

13 Lu iza 1947, gunaazecabe hermanu Aimé Boucher ne ca xiiñidxaapaʼ: Gisèle, de 18 iza, ne Lucille, de 11 iza, laacabe nga  ca primé Testigu ni guyé nezalú justicia purtiʼ nácabe cucaacaʼ binni gucaalú gobiernu. Nécaxa gudiizicabe tratadu que gaxha de ra lídxicabe, peru guirutiʼ zanda guiníʼ ruchelaníʼdicabe binni. Xiñee yaʼ. Purtiʼ bixhoze ca baʼdudxaapaʼ que nabé nachaʼhuiʼ ne nadóʼ. Ne cumu napa bixhózecabe ti ranchuhuiiniʼ lu ca dani ni nuu ladu gueteʼ de guidxi Quebec la? ngue runi nuu si tiru riétebe guidxi ndaaniʼ carretón stibe. Peru huadxaagalú familia que ca guendanagana cuzeeteʼ tratadu que. Juez ni nuu ndaaniʼ guidxi que nanalaʼdxiʼ ca Testigu, ngue runi qué niná nicaa ca prueba ni cusihuinni gastiʼ nuzaabiʼ familia Boucher, sínuque biʼniʼ cré ni guníʼ fiscal que, purtiʼ fiscal que na rucaa tratadu que binni gacananalaʼdxiʼ gobiernu ne pur ngue napa familia Boucher donda. Cumu qué niná juez que nicaa ca prueba que la? casi ñaca niniʼbe malu nga guiníʼ binni ni dxandíʼ. Ngue runi, biseguyoocabe Aimé ne Gisèle pur cucaacaʼ binni gucaalú gobiernu, dede Lucille gudiʼdiʼ chupa dxi ndaaniʼ lidxi guiibaʼ, nahuiiniʼ ndaʼ. Ca xpinni Cristu que gunábacaʼ checaʼ nezalú Tribunal Supremo stiʼ guidxi Canadá, ra nuu ca juez jma risaca stiʼ guidxi que, ne gunacaʼ guni tendercaʼ laacabe.

14. Xi biʼniʼ ca xpinni Cristu de Quebec ca iza guzanándacabe laacaʼ.

14 Neca qué nusaana de ñuninácabe ca xpinni Cristu de Quebec, jmaruʼ si bicheechecaʼ stiidxaʼ Reinu ne stale biaje guleenducaʼ ni galán. Lu iza 1946 biree tratadu que, ne tapa iza despué bidale ca Testigu ndaaniʼ guidxi Quebec. Primeru gúcacabe 300 despué gúcacabe 1,000. *

15, 16. 1) Xi biʼniʼ Tribunal Supremo stiʼ Canadá ora biʼyaʼ ni cazaaca familia Boucher. 2) Xi bisihuinni ni guníʼ ca juez que.

15 Lu beeu junio, iza 1950, gaʼ juez ni nuu lu Tribunal Supremo stiʼ guidxi Canadá gunacaʼ guni tendercaʼ casu stiʼ Aimé Boucher. Xhoopaʼ beeu despué, 18 stiʼ diciembre, iza 1950, guníʼcabe cadi jneza ni cazaaca ca Testigu ne guyuucabe pur laacaʼ. Xiñee yaʼ. Hermanu Glen How, abogadu stiʼ ca Testigu, guníʼ biaʼsi biʼyaʼ ca juez que ca razón bidii, purtiʼ bisiene pa ñaca nucaalucaʼ gobiernu la? dede nucaacaʼ binni nidinde. Peru cadi lica cuzeeteʼ tratadu que gastiʼ de ni ná ca binni que, sínuque ni caniʼni nga cadi jneza guiráʼ ni cayúnicabe ca Testigu. Ne laaca guniʼbe: «Biiyaʼ dxicheʼ ximodo gucané Jiobá laadu». *

16 Ni guníʼ ca juez stiʼ Tribunal Supremo que bisihuinni biʼniʼ ganar Reinu stiʼ Dios, purtiʼ maʼ gastiʼ nin ti prueba para guiníʼcabe cucuaalú ca Testigu de guidxi Quebec gobiernu, ngue runi maʼ qué nisaca sti gayuaa veintidós queja ni nápacabe para gucaalúcabe laacaʼ. Ne guiráʼ binni de Canadá ne xcaadxi guidxi ni nuu lu Comunidad Británica de Naciones (Commonwealth) maʼ nápacaʼ derechu guiniʼcaʼ ora gúʼyacaʼ cadi jneza ni guni gobiernu laacaʼ. Ne maʼ qué zanda gucueeza ca xaíque yuʼduʼ ne gobiernu de guidxi Quebec ca testigu stiʼ Jiobá de gucheechecaʼ diidxaʼ. *

 Rizanu lu guidxi para gutoʼno la? o ruinu de Reinu stiʼ Dios né stale gana

17. Xi huayuni caadxi gobiernu para gucueezacaʼ de guireeche diidxaʼ.

17 Ca xpinni Cristu de primé siglu guniʼcaʼ: «Cadi canayuí du stiidxa Dios para guni ganar du [bueltu]», ne laanu laaca qué rutoʼno stiidxaʼ Dios (biindaʼ 2 Corintios 2:17). Neca zacá, riquiiñeʼ caadxi gobiernu ca ley nexheʼ para ca binni runi negocio ti gucueezacaʼ laanu. Guidúʼyanu chupa ejemplu ra bihuinni pa rizanu lu guidxi para gutoʼno o para gucheechenu stiidxaʼ Reinu.

18, 19. Xi biʼniʼ gobiernu stiʼ Dinamarca para gucueeza de guireeche diidxaʼ.

18 Dinamarca. Gobiernu de guidxi riʼ gudixhe ti ley 1 stiʼ octubre, iza 1932 ra na qué zanda zaʼ binni lu guidxi para gutoo libru ne revista sin gapa licencia. Peru ca Testigu qué nibeecaʼ licencia. Sti dxi que gaayuʼ xpinni Cristu bicheechecaʼ diidxaʼ Roskilde, ti guidxihuiiniʼ ni riaana 30 kilómetru neza oeste stiʼ capital Copenhague. Despué de bicheechecabe diidxaʼ guidubi dxi biiyacabe cayaadxaʼ tobi de laacabe, August Lehmann. Biseguyoocabe laa, purtiʼ qué gapa licencia.

19 Gupa xidé guyé August Lehmann nezalú justicia 19 stiʼ diciembre de 1932. Guniʼbe dxandíʼ guzabe lu guidxi para gudiibe binni libru ne revista, peru laaca guniʼbe cadi dxandíʼ diʼ canagutoobe cani. Ngue runi, justicia ni nuu ndaaniʼ guidxi Roskilde guyuu pur laabe ne na: «Hombre cayaca demandar riʼ [...] zanda guni dxiiñaʼ para gapa ni gó. Ne cadi cayáxabe pur dxiiñaʼ cayúnibe riʼ ne qué racaláʼdxibe guiáxabe, sínuque laga caree gunítibe». Guyuu justicia pur ca Testigu ora bisiene qué zanda guchaagacabe ni runi hermanu Lehmann «né ti negocio». Peru ca xhenemigu Dios maca naguixhe íquecaʼ gucueezacaʼ guiráʼ Testigu de gucheechecaʼ diidxaʼ ndaaniʼ guidxi que (Sal. 94:20). Qué ñuulaʼdxiʼ fiscal ni guníʼ justicia que, ngue runi gunábabe chécabe nezalú Tribunal Supremo stiʼ Dinamarca. Xi biʼniʼ ca xpinni Cristu que yaʼ.

20. Xi gudixhe Tribunal Supremo stiʼ Dinamarca gaca, ne ximodo bisihuinni ca hermanu que cayéchecaʼ.

20 Semana chécabe nezalú Tribunal Supremo que, jmaruʼ si bicheeche guiráʼ xpinni Cristu de Dinamarca diidxaʼ. Martes 3 stiʼ octubre, guníʼ Tribunal Supremo que biaʼsi ni guníʼ tribunal ni nuu ndaaniʼ guidxi Roskilde ne bisiénecabe qué nucheené August Lehmann nin ti ley. Né ni guníʼ Tribunal que bisihuinni zanda gucheeche ca Testigu diidxaʼ sin gucueezacabe laacaʼ. Para guluíʼ ca Testigu que cudiicaʼ xquíxepeʼ Jiobá, jmaruʼ si bicheechecaʼ diidxaʼ. Dede dxi guníʼ Tribunal que pur ca Testigu, maʼ randa rucheeche ca xpinni Cristu de Dinamarca diidxaʼ sin gucueeza gobiernu laacaʼ.

Ca Testigu de Dinamarca ni gúcacaʼ nadxibalú lu década 1930

21, 22. Xi guníʼ Tribunal Supremo stiʼ Estados Unidos ora bíʼyacaʼ casu stiʼ hermanu Murdock.

21 Estados Unidos. Domingu 25 stiʼ febrero, iza 1940, gunaazecabe Robert Murdock, Jr., ti precursor regular, ne xcadxe Testigu laga canagucheechecaʼ diidxaʼ ndaaniʼ guidxi Jeannette, ti guidxi ni riaana gaxha de Pittsburgh, estadu stiʼ Pensilvania.  Bigaacabe purtiʼ ná puliciá qué gápacabe licencia para quíʼzicabe libru ne revista. Ngue runi, gunábacabe chécabe nezalú Tribunal Supremo stiʼ Estados Unidos, ne gunacaʼ guni tendercaʼ laacabe.

22 Bedandá dxi guníʼ Tribunal Supremo stiʼ Estados Unidos biʼniʼ ganar ca Testigu, bizaaca ni 3 stiʼ mayo, iza 1943. Raqué guníʼ ca juez cadi naquiiñeʼ cuee ca Testigu licencia, pa coʼ «napa xidé quíxecaʼ para ganda gudii Constitución Federal laacaʼ derechu». Ngue runi, bixhiá ca juez que ley gudixhe guidxi Jeannette, purtiʼ «rucueeza ni binni de guni imprimir libru ne revista ne chinanda ni runi religión stiʼ». Juez William Orville Douglas guníʼ casi guirácabe guyuucabe pur ca Testigu ne bisiénebe «cadi rucheeche si [ca testigu stiʼ Jiobá] diidxaʼ, sínuque laaca riguiizicaʼ libru ne revista stiʼ religión sticaʼ». Ne laaca guniʼbe: «Ni runi religión riʼ laaca naquiiñeʼ guisaca ni cásica risaca ni rúnicabe ndaaniʼ ca yuʼduʼ ca ne ora maʼ cusiidicabe dede lu púlpito».

23. Xiñee nabé risaca para laanu ca juiciu guca ganar lu iza 1943.

23 Bihuinni biʼniʼ ganar xquidxi Dios pur ni guníʼ ca juez stiʼ Tribunal Supremo que. Xiñee yaʼ. Purtiʼ guníʼcabe xhiiñaʼ Cristu rúninu ne qué rizanu lu guidxi para gutoʼno. Laaca dxi queca, 3 stiʼ mayo, iza 1943, biʼniʼ ganar ca testigu stiʼ Jiobá 12 de ca  13 juiciu guca, dede né casu stiʼ Murdock guca ganar. Ca juiciu guca ganar que, dede yanna huayacanécani laanu ora gacalaʼdxiʼ ca xhenemígunu gucueezacaʼ laanu de gucheechenu diidxaʼ ra nuu stale binni ne de yoo pur yoo.

«Jma naquiiñe [guzúʼbanu] stiidxa Dios que stiidxa binni»

24. Xi rúninu ora gucueeza gobiernu laanu de gucheechenu diidxaʼ.

24 Laanu, ca testigu stiʼ Jiobá, rusihuínninu rudiʼnu xquíxepeʼ gobiernu purtiʼ rudii derechu laanu gucheechenu stiidxaʼ Reinu sin chuʼ tu gucueeza laanu. Peru ora rucueezacabe laanu la? ruyúbinu xcaadxi modo gúninu xhiiñanu. Ne cásica ca apóstol, laanu laaca «jma naquiiñe [guzúʼbanu] stiidxa Dios que stiidxa binni» (Hech. 5:29; Mat. 28:19, 20). Ne laaca ridxíñanu nezalú justicia para gudiicaʼ permisu laanu sti biaje ti ganda gucheechenu diidxaʼ. Guzéʼtenu chupa ejemplu.

25, 26. Xi guca ndaaniʼ guidxi Nicaragua para guinabaʼ ca Testigu checaʼ nezalú Corte Suprema de Justicia stiʼ guidxi que, ne xi guleenducaʼ.

25 Nicaragua. Lu iza 1952, 19 stiʼ noviembre, guyé Donovan Munsterman, ni naca misioneru ne ruuyaʼ dxiiñaʼ raca Betel, ra Departamento de Inmigración ni nuu Managua, capital stiʼ Nicaragua. Gúdxicabe laabe chebe ra nuu capitán Arnoldo García, xaíque stiʼ Departamentu que. Capitán que gudxi Donovan maʼ qué gapa ca testigu stiʼ Jiobá permisu para «gusiidicaʼ ni runi crecaʼ ne de gúnicaʼ cani rúnicaʼ lu religión sticaʼ» ndaaniʼ guidubi guidxi Nicaragua. Ora gunabadiidxabe capitán que xiñee la? na qué gapa ca Testigu permisu ni rudii ministru stiʼ gobiernu para ganda gucheechecaʼ diidxaʼ ne na comunista laacabe. Tu biʼniʼ demandar laacabe yaʼ. Ca xaíque yuʼduʼ.

Dxi guzanándacabe ca xpinni Cristu de Nicaragua

26 Nagueendaca gunabaʼ hermanu Munsterman cheʼ nezalú Ministerio de Gobierno y Religiones, ne zaqueca chebe ra nuu presidente Anastasio Somoza García, peru qué nucaadiágacabe  laabe. Ngue runi, biseegucabe Yoo stiʼ Reinu, ne bidagulisaacabe pur grupuhuiiniʼ ne maʼ qué nucheechecabe diidxaʼ lu calle. Peru qué nusaana de nucheechecabe stiidxaʼ Reinu. Ne laaca guyécabe nezalú Corte Suprema de Justicia stiʼ guidxi Nicaragua para guinábacabe cadi gucueeza ca binni que laacabe de gucheechecabe diidxaʼ. Nabé bizeeteʼ periódicu modo cucaalúcabe ca Testigu ne xi canábacaʼ guni gobiernu, ne guná Corte Suprema guʼyaʼ casu stícabe. Xi bizaaca yaʼ. Dxi gunda 19 stiʼ junio, iza 1953, guníʼ Corte Suprema que napa ca Testigu razón pur ni canábacaʼ. Ca juez que guniʼcaʼ cadi jneza ngue bicueezacabe ca Testigu, purtiʼ cadi ngue diʼ nga na ley stiʼ Nicaragua. Ley que na zanda guiníʼ binni xi riníʼ ique, xi runi cré ne gusiidiʼ cani. Ne laaca biʼniʼ mandar ca juez que gobiernu stiʼ Nicaragua cadi chuʼdindenecaʼ ca Testigu.

27. Xiñee nabé bidxagayaa binni pur ni bizaaca lu Corte Suprema que, ne xi guníʼ ique ca hermanu que.

27 Guizáʼ bidxagayaa ca binni de Nicaragua guyuu Corte Suprema que pur ca Testigu. Qué huayuu dxi guizaaca ngue, purtiʼ jma nga riuucabe pur ca xaíque yuʼduʼ ti cadi chuʼdindenécabe laacaʼ. Ne cumu laaca nadipaʼ stiidxaʼ ca xpinni gobiernu la? nuu si ora riníʼ ca juez que cadi jneza ni rúnicaʼ. Ca hermanu stinu nanna dxíchicaʼ biʼniʼ ganarcaʼ purtiʼ cayapa Rey sticaʼ laacaʼ ne qué nusaanacaʼ de nucheechecaʼ diidxaʼ (Hech. 1:8).

28, 29. Xi bizaaca ca Testigu de guidxi Zaire biaʼ galaa década stiʼ iza 1980.

28 Zaire. Biaʼ galaa década stiʼ iza 1980 maʼ nuu biaʼ 35,000 Testigu ndaaniʼ guidxi Zaire, laani nga República Democrática del Congo. Cumu zidale xhiiñaʼ Reinu ndaaniʼ guidxi que la? bicuícabe xcaadxi yoo Betel. Lu beeu diciembre, iza 1985 guca ti guendaridagulisaa ra guyé 32,000 binni de gadxé gadxé guidxi ne guca ni ndaaniʼ estadiu ni nuu capital Kinsasa. Peru despué bichaa modo nabani ca xpinni Jiobá. Xi bizaaca yaʼ.

29 Hermanu Marcel Filteau —ti misioneru de Quebec (Canadá) ni guzanándacabe tiempu biʼniʼ mandar Duplessis— cucheeche diidxaʼ ndaaniʼ guidxi Zaire ca dxi que. Laabe guniʼbe xi bizaacaʼ: «Ca xpinni Cristu ni zaniruʼ ndaaniʼ guidxi que gucuaacaʼ ti carta 12 stiʼ marzo, iza 1986 ni na qué gapa religión stiʼ ca testigu stiʼ Jiobá derechu para chuʼ ndaaniʼ guidxi Zaire». Ne Mobutu Sese Seko, presidente stiʼ guidxi que, biʼniʼ firmar carta que.

30. Xi gudixhe ique Comité de Sucursal guni.

30 Sti dxi que, bieeteʼ lu radiu nacional: «Maʼ qué ziuuruʼ dxi gunadiáganu de ca testigu stiʼ Jiobá ndaaniʼ guidxi [Zaire]». Nin qué nindaa bizulú guzanándacabe ca xpinni Cristu. Binidé binni ca Yoo stiʼ Reinu ne guláʼnacabe ca xcosa ca hermanu que, gunaazecabe laacaʼ, biseguyoocabe ne gudíñecabe laacaʼ. Dede ca baʼduhuiiniʼ naca Testigu biseguyoocabe. Dxi gunda 12 stiʼ octubre, iza 1988, bitaagunáʼ gobiernu de guidxi que guiráʼ ni napa xquidxi Dios ne ti grupu de soldadu de Guardia Civil gucuaacaʼ yoo Betel. Ca xpinni Cristu ni cayuuyaʼ cayaca dxiiñaʼ raqué  gunábacaʼ checaʼ nezalú presidente Mobutu, peru qué niná ca binni que. Ngue runi, Comité de Sucursal stiʼ guidxi que gupa xidé guníʼ ique chaahuicaʼ pa zanábacaʼ checaʼ nezalú Tribunal Supremo o pa zabézacaʼ. Timothy Holmes, ti misioneru ni naca coordinador stiʼ Comité de Sucursal, guníʼ sicaríʼ: «Gunábadu Jiobá gudii guendabiaaniʼ laadu ne guluíʼ laadu xi naquiiñeʼ gúnidu». Despué de biʼniʼ orar ca hermanu de comité que para gúʼyacaʼ xi naquiiñeʼ gúnicaʼ, bidiicaʼ cuenta jma galán gápacaʼ ca hermanu de guidxi que ne gacanecaʼ laacabe ne guyúbicaʼ modo gucheechecabe diidxaʼ ne ora gúʼyacaʼ maʼ zanda la? guinábacaʼ checaʼ nezalú justicia.

«Lu juiciu que bidúʼyadu ximodo zanda guchaa Jiobá ca cosa ca»

31, 32. Xi gudixhe Tribunal Supremo de guidxi Zaire gaca, ne ximodo gucaneni ca hermanu que.

31 Despué de stale iza, maʼ huaxiéʼ guzananda binni ca Testigu ne jma maʼ biʼniʼ respetar binni ca ley napa derechos humanos ndaaniʼ guidxi que. Ngue runi, Comité de Sucursal stiʼ guidxi que biiyaʼ maʼ ora guinábacaʼ checaʼ nezalú Tribunal Supremo de Justicia stiʼ guidxi Zaire para guinábacaʼ guiasa ley gudixhe presidente stiʼ guidxi que. Guizáʼ bidxagayaacabe ora gúnnacabe guná Tribunal que guʼyaʼ casu stícabe. Pur ngue, 8 stiʼ enero, iza 1993, gadxe iza despué de bicueeza presidente dxiiñaʼ stiʼ ca Testigu, biiyaʼ Tribunal que cadi jneza ni biʼniʼ gobiernu, ngue runi bixhiá ley que. ¡Guníʼ ique pabiáʼ naxoo ngue! Bixhiá ca juez que ti ley ni gudixhe presidente. Sicaríʼ guníʼ hermanu Holmes: «Lu juiciu que bidúʼyadu ximodo zanda guchaa Jiobá ca cosa ca» (Dan. 2:21). Ni bizaaca que gucaneni ca xpinni Cristu iguidxi fe sticaʼ, purtiʼ biiyacaʼ ximodo gucané Jesús, Rey sticaʼ, laacaʼ gánnacaʼ xi gúnicaʼ ne padxí.

Nayecheʼ nuu ca Testigu de República Democrática del Congo purtiʼ randa runi adorarcaʼ Jiobá

 32 Bixiá si ley que, maʼ gunda gunabaʼ Betel stiʼ guidxi que permisu para chuʼ misioneru, gucuicaʼ xcaadxi yoo Betel ne guseendacaacaʼ libru ne revista de sti guidxi. * ¡Guizáʼ rieche guiráʼ ca xpinni Cristu ni nuu lu guidubi Guidxilayú gúʼyacaʼ modo rapa Jiobá ca xpinni! (Is. 52:10.)

Racané Jiobá laanu

33. Xi rihuinni lu ca juiciu biʼniʼ ganar xquidxi Dios.

33 Guiráʼ juiciu biʼniʼ ganar xquidxi Dios casi bidúʼndanu lu capítulo riʼ, huasihuínnicani runi Jesús ni maʼ guníʼ: «Zudiee diidxa laatu ne enda biaani para useegu tu ruaa tutiica ucaa lú laatu» (biindaʼ Lucas 21:12-15). Huahuinni dxichi, nuu tiru riquiiñeʼ Jiobá ti binni casi Gamaliel ca dxi stinu riʼ para gapa xquidxi o rucaabe ti juez o ti abogadu gaca nadxibalú para guyubi gaca ni jneza. Jiobá rucueeza «intiicaʼ guiibaʼ» gulaa ca xhenemígunu luguianu (biindaʼ Isaías 54:17). Nga rusihuinni guirutiʼ zanda gucueeza xhiiñaʼ Dios.

34. Xiñee ridxagayaanu biʼniʼ ganarnu ca juiciu riʼ, ne xi rusihuínnicani (laaca zanda gúʼyaluʼ cuadru ni láʼ « Cayacané Tribunal Supremo guireeche stiidxaʼ Reinu»).

34 Guizáʼ ridxagayaanu guidúʼyanu biʼniʼ ganarnu ca juiciu riʼ. Xiñee yaʼ. Purtiʼ laanu, ca testigu stiʼ Jiobá, cadi binni risaca laanu. Qué runi votarnu, qué rinándanu ca políticu ne qué ruyúbinu uganu laacaʼ. Ne stale de ca xpinni Cristu ni huanécabe nezalú justicia «huaxiéʼ napa ca scuela ne iruti naca ca» (Hech. 4:13). Nga rusihuinni gastiʼ nin ti razón para ñacané justicia laanu ne nucaalucaʼ ca xhenemígunu de sti religión ne cani nuu lu política. Peru huayacanécabe laanu stale biaje. Pur nga, guiráʼ juiciu huayuni ganarnu rusihuínnicani cayúninu «casi nexhe guni ca xpinni Cristu» ne Dios cayacané laanu (2 Cor. 2:17). Nga runi, guiranu rininu cásica guníʼ apóstol Pablu: «Racané Señor [Jiobá] naa. Nga runi qué zadxibe ni guni binni naa» (Heb. 13:6).

^ párrafo 9 Primé biaje guyé hermanu Hayden Covington nezalú Tribunal Supremo stiʼ Estados Unidos nga dxi bíʼyabe casu stiʼ Cantwell, despué biiyarube sti 42 casu nezalú Tribunal que. Hermanu Covington guti lu iza 1978. Xheelabe Dorothy, napa 90 iza ne dede yanna precursora laa.

^ párrafo 12 Bíʼnicabe zaqué pur ni na ti ley biree lu iza 1606. Ley que na naquiiñeʼ gaca juzgar ti binni pa caníʼ xiixa ni cucaa binni gucaalú gobiernu, neca dxandíʼ ni caníʼ.

^ párrafo 14 Lu iza 1950 guyé 63 misioneru ndaaniʼ guidxi Quebec, neca nánnacaʼ zucaalú binni laacaʼ raqué, ne laaca guyuu sti 101 xpinni Cristu ni nácacaʼ precursor ne viajante.

^ párrafo 15 Dede iza 1943 hasta 2003, guca hermanu Glen How ti abogadu nabé nadxibalú para gucané ca testigu stiʼ Jiobá ndaaniʼ guidxi Canadá ne laaca biiyabe gayuaa casu ndaaniʼ xcaadxi guidxi.

^ párrafo 16 Laaca zeeda xcaadxi cosa ni bizaaca raqué lu tema «La batalla no es de ustedes, sino de Dios» ni biree lu, revista ¡Despertad! 22 stiʼ abril 2000, yaza 18 dede 24.

^ párrafo 32 Neca despué biree ca soldadu que ndaaniʼ yoo Betel, bicuícabe stobi gadxé ladu.