Biiyaʼ guiraʼ ni nuu lu sitiu riʼ

guyé lu índice

 CAPÍTULO 14

Rúninu ni na gobiernu si stiʼ Dios

Rúninu ni na gobiernu si stiʼ Dios

XI ZAZÍʼDINU LU CAPÍTULO RIʼ

Pur Reinu stiʼ Dios qué rinándanu ni runi binni guidxilayú

1, 2. 1) Xi principiu huayacané ca xpinni Cristu ca dxi stinu riʼ. 2) Ximodo huayubi ca xhenemigu Dios gunduuxecaʼ xquídxibe ne xi huabeenducaʼ.

ORA guyuu Jesús nezalú Pilatu, xaíque ni jma risaca napa ca judíu, guníʼ ti principiu ni cayacané cani dxandíʼ xpínnibe ca dxi stinu riʼ: «Cadi beda aca diaʼ rey ndaani guidxilayú riʼ, purti pa ñaca beda aca rey rarí la? ñasa ca xpinneʼ, nucaa lú para cadi ninaaze ca judíu naa. Peru cadi rarí di nga zeda aca rey» (Juan 18:36). Ruluíʼ si biʼniʼ ganar ca xhenemigu Jesús ora biʼniʼ mandar Pilatu gátibe, peru nin qué nindaa biásabe de lade gueʼtuʼ. Cani runi mandar Imperio romano que gucaláʼdxicaʼ nunduuxecaʼ ca xpinni Cristu peru qué ñanda ñúnicaʼ gastiʼ purtiʼ gunda bicheeche de discípulo que diidxaʼ ra nuu guiráʼ xixé binni bibani tiempu que (Col. 1:23).

2 Dede dxi bizulú cayuni mandar Reinu stiʼ Dios guibáʼ lu iza 1914, chupa chonna de ca grupu militar jma nadipaʼ ni huayuu lu Guidxilayú riʼ huayúbicaʼ modo gunduuxecaʼ xquidxi Dios. Peru nin tobi de laacaʼ qué huayanda gúnicaʼ ni. Stale gobiernu ne grupu políticu huayúbicaʼ modo guidéʼgunu laacaʼ para chuʼnu ra cadíndecaʼ. Ne laaca nin tobi de laacaʼ qué huandaasaacaʼ laanu. Neca ndaaniʼ gadxé gadxé guidxi nuu ca xpinni Reinu la? tobi si nuucaʼ ne dxandíʼ nadxiisaacaʼ casi ti familia ne qué lica riuucaʼ lade ca políticu ni nuu lu Guidxilayú riʼ. Pur modo nadxiisaanu rihuinni dxichi cayuni mandar Reinu stiʼ Dios ne laaca rihuinni ximodo culuíʼ Jesucristu, Rey stinu, laanu xi gúninu, cayápabe laanu ne cuxhélebe laanu de ni runi binni guidxilayú. Ximodo huayúnibe nga yaʼ. Zaguidxi fe stinu ora gánnanu ni. Guidúʼyanu chupa chonna juiciu ni huayacané Rey stinu laanu guni ganarnu purtiʼ cadi zinándanu ni runi binni guidxilayú (Juan 17:14).

Bihuinni dxichi qué riuucabe lu política

3, 4. 1) Xi bizaaca despué de bizulú cayuni mandar Reinu stiʼ Dios. 2) Ñee maca huayene chaahuiʼ xquidxi Dios cadi lica naquiiñeʼ chuʼcaʼ lu política la? Bisiene ni guicábiluʼ.

3 Bizulú si Reinu stiʼ Dios cayuni mandar, guca ti guerra guibáʼ ne despué bisábacabe Binidxabaʼ lu Guidxilayú (biindaʼ Apocalipsis 12:7-10, 12). Lu Guidxilayú riʼ laaca guca ti guerra ni bicaa ca xpinni Dios gusihuinni pa zuzuubacaʼ stiidxabe.  Laacabe maca gudixhe íquecabe chinándacabe ejemplu stiʼ Jesús ne cadi chinándacabe ni runi binni guidxilayú. Peru primerugá qué ñene chaahuicabe xi guiráʼ nga cadi naquiiñeʼ gúnicabe para cadi lica chúʼcabe lu política.

4 Guzéʼtenu ti ejemplu. Lu tomo VI stiʼ obra ni láʼ Millennial Dawn (Xpiaaniʼ dxi stiʼ ti mil iza), * ni biree lu iza 1904, bizeeteʼ cadi naquiiñeʼ cheʼ ca xpinni Cristu lu guerra. Peru laaca bizeeteni pa cuídxicabe tuuxa cheʼ lu guerra la? naquiiñeʼ guyubi modo gudiicabe laa gadxé dxiiñaʼ para cadi chitinde. Peru pa qué gudiicabe laa sti dxiiñaʼ ne guseendacabe laa lu guerra la? naquiiñeʼ guni stipa cadi guutiʼ guirutiʼ. Herbert Senior, ti xpinni Cristu de Gran Bretaña ni guyuunisa lu iza 1905, guníʼ ximodo guyuucabe tiempu que: «Qué ñanna ca hermanu que xi gúnicaʼ ne gastiʼ xiixa ni nusiene laadu pa jneza chuʼdu lu ejercitu para gúnidu xiixa dxiiñaʼ sin guseendacaʼ laadu lu guerra».

5. Ximodo gucané revista Watch Tower 1 stiʼ septiembre, iza 1915, ca xpinni Dios.

5 Revista Watch Tower 1 stiʼ septiembre, iza 1915, gucané laadu guchaʼdu modo guníʼ íquedu dxiqué ne guníʼ de ni bizeeteʼ Studies in the Scriptures (Ni rusiene Stiidxaʼ Dios) sicaríʼ: «Nanna pa cucheʼnu nga gúninu zacá yaʼ». Peru pa gábicabe ti xpinni Cristu zuni fusilárcabe laa pur qué naʼ gacuʼ uniforme ne gudii serviciu militar yaʼ. Tema que cusiene: «Gunáʼ ni jma feu: guuticabe laanu de ti balasu purtiʼ bíninu ni na Príncipe ni rudii Guendariuudxi ne bizúʼbanu stiidxaʼ Dios la? o guuticabe laanu purtiʼ bíninu ni na ca gobiernu nuu yanna ne gucaʼnu binni guiníʼ ique cuchéʼnenu cani rusiidiʼ Rey stinu ni nuu guibáʼ. Pa ñábicabe laanu nibinu tobi de cani bizéʼtenu riʼ, cadi dxandíʼ nininu zaa ñuuticabe laanu pur cayúninu ni na Rey stinu ni nuu guibáʼ la?». Neca cusihuinni ca diidxaʼ ca xipeʼ naquiiñeʼ guni ca xpinni Cristu, sicaríʼ biluxe tema que: «Cadi cayábidu laatu caquiiñepeʼ gúnitu sicaríʼ, sínuque maʼ laatu gúʼyatu pa gúnitu ni».

6. Xi rusiidiʼ ejemplu stiʼ hermanu Herbert Senior laanu.

6 Chupa chonna hermanu gunna dxíchicaʼ xi naquiiñeʼ gúnicaʼ, neca guidxaagalucaʼ stale guendanagana. Herbert Senior, xpinni Cristu ni maca bizéʼtenu que guníʼ: «Para naa la? ngueca nga guindeteʼ bala lu ti barcu [ti dxiiñaʼ para cadi cheʼ tuuxa lu guerra] ne cuaaʼ cani ndaaniʼ ti guiibaʼ para ucuaaguaʼ» (Luc. 16:10). Biseguyoocabe Herbert purtiʼ qué niná nudii serviciu militar, pur cani maʼ biziidiʼ lu Stiidxaʼ Dios. Laabe ne xtapa hermanu guyuucabe lade ti grupu de binni de gadxé gadxé religión ni qué niná ñé lu guerra ne binibiáʼcabe laacaʼ casi «ca 16 de Richmond»; raqué biseguyoocabe laacaʼ ti tiempu ndaaniʼ lidxi guiibaʼ nuu Richmond (Gran Bretaña). Bedandá ora, nin nudii Herbert cuenta biseendacabe laa ne xcaadxi para checaʼ Francia ra cadinde ca soldadu que. Yendásicabe raqué  gudxi ca binni que laacabe chigaca fusilárcabe. Laabe ne xhupa xhonna bizuhuaacabe nezalú ca soldadu que para gaca fusilárcabe, peru lugar de ñuuticaʼ laacabe, guniʼcaʼ guieguyoocabe chii iza.

«Bieneʼ naquiiñeʼ chuʼ guiráʼ xpinni Dios tobi si ne guiráʼ xixé binni nuu lu guidubi Guidxilayú, neca nabánicaʼ tiempu cayaca guerra.» Simon Kraker (Biiyaʼ párrafo 7)

7. Xii nga biene xquidxi Jiobá dxi bizulú Segunda Guerra Mundial.

7 Ra bizulú Segunda Guerra Mundial biene chaahuiʼ xquidxi Jiobá cadi lica naquiiñeʼ chuʼcaʼ lu política ne xi naquiiñeʼ gúnicaʼ para chinándacaʼ ejemplu stiʼ Jesús (Mat. 26:51-53; Juan 17:14-16; 1 Ped. 2:21). Guidúʼyanu ti ejemplu. Lu revista La Atalaya beeu marzo, iza 1940, biree tema «Cadi lica chuʼnu lu política» ni bizeeteʼ ca diidxaʼ riʼ: «Ndiʼ nga nexheʼ guni ca xpinni Jiobá [ni biʼniʼ ti pactu né laabe]: cadi lica chuʼcaʼ ra cadinde ca guidxi ca». Simon Kraker, ti hermanu ni biʼniʼ dxiiñaʼ ndaaniʼ Betel stiʼ guidxi Brooklyn (Nueva York, Estados Unidos), guníʼ de tema que: «Bieneʼ naquiiñeʼ chuʼ guiráʼ xpinni Dios tobi si ne guiráʼ xixé binni nuu lu guidubi Guidxilayú, neca nabánicaʼ tiempu cayaca guerra». Biáʼsipeʼ ora bedandá tema cusiene revista que, ne gucaneni para chuʼ xquidxi Dios listu purtiʼ chiguidxagalucaʼ ti guendanagana nabé nadipaʼ ra naquiiñeʼ gusihuínnicaʼ qué zusaana de gúnicaʼ ni na Reinu.

 Nabé guzanándacabe ca xpinni Cristu

8, 9. Ximodo guca ni na ca diidxaʼ bicaa apóstol Juan.

8 Lu profecía bicaa apóstol Juan rihuinni, despué de guzulú guni mandar Reinu stiʼ Dios lu iza 1914, zundaa Binidxabaʼ, ni naca dragón que, «nisa ndaani ruaa» purtiʼ racalaʼdxiʼ gunitilú ca xpinni Reinu (biindaʼ Apocalipsis 12:9, 15). * Dede lu iza 1920 bizulú guzanándacabe xquidxi Dios. Hermanu Kraker biseguyoocabe laa purtiʼ qué niná nudxiideche Reinu stiʼ Dios, ne zaqueca bizaaca né ca Testigu de Norteamérica dxi guca Segunda Guerra Mundial. Tiempu guca guerra que, biseguyoocabe stale binni ndaaniʼ ca lidxi guiibaʼ stiʼ Estados Unidos purtiʼ qué ninacaʼ ñecaʼ lu guerra pur religión sticaʼ, ne stale de laacaʼ nácacaʼ testigu stiʼ Jiobá.

9 Gudixhe ique Binidxabaʼ ne ca xpinni gucaacaʼ guiráʼ xpinni Reinu ni nuu guiráʼ ladu gucheecaʼ. Yenecaʼ ca hermanu riʼ África, Estados Unidos ne Europa para guchíñacaʼ laacabe nezalú justicia ne nezalú caadxi grupu ni gudxi laacabe xi naquiiñeʼ gúnicabe ti gundaacaʼ laacabe. Cumu gudixhe íquecabe cadi gucheenécabe Rey stícabe la? biseguyoo binni laacabe, gudíñecaʼ laacabe ne bigácabe xcuérpucaʼ. Ndaaniʼ guidxi Alemania, nabé bininácabe ca xpinni Cristu purtiʼ qué ninacaʼ niniʼcaʼ «Heil Hitler» ne pur qué ninacaʼ nitíndecaʼ lu guerra. Biaʼ xhoopa mil Testigu biseguyoocabe tiempu stiʼ ca nazi, ne jma de ti mil xhoopa gayuaa alemán ne binni de xcaadxi guidxi biiti ca xhenemígucaʼ laacaʼ. Peru qué lica ñanda nunduuxeʼ Binidxabaʼ xquidxi Dios (Mar. 8:34, 35).

«Güeʼ [guidxilayú] nisa que»

10. Tuu nga zeeda gaca «guidxilayú», ne ximodo huayacanécabe xquidxi Dios.

10 Ti profecía bicaa apóstol Juan na zacané ca juez chaʼhuiʼ ni zeeda gaca «guidxilayú» xquidxi Dios ora sananda binni laacaʼ, cani zeeda gaca «guiigu». Ximodo huayaca ni ná profecía ca yaʼ. Despué de Segunda Guerra Mundial, huayacané ca juez chaʼhuiʼ cani qué huadxiideche Reinu (biindaʼ Apocalipsis 12:16). Stale tribunal ni nadipaʼ stiidxaʼ huayacané ca Testigu pur derechu ni nápacaʼ para cadi gudiicaʼ serviciu militar ne ora qué nacaʼ guni saludarcaʼ bandera. Guidúʼyanu ximodo huayacané Jiobá xquidxi para biʼniʼ ganar caadxi juiciu pur qué ninacaʼ nudiicaʼ serviciu militar (Sal. 68:20).

11, 12. Xi guendanagana bidxaagalú hermanu Sicurella ne Thlimmenos, ne xi guleendúcabe.

11 Estados Unidos. Anthony Sicurella bisiniisi bixhoze ne jñaa laa ne Testigu laacaʼ. Dxi bisaabe 15 iza guyuunísabe, ne dxi bisaabe 21 iza yegucaabe labe ra nuu ca militar nácabe testigu stiʼ Jiobá. Chupa iza despué, lu iza 1950 guluube ti guiʼchiʼ ra canábabe guchaacabe laabe de grupu ti chuʼbe lade ca binni ni qué zanda gudii serviciu militar, purtiʼ zinándabe ni rusiidiʼ Stiidxaʼ Dios. Neca bizeeteʼ FBI zanda guidxaabe de grupu, Departamento de Justicia qué niná nidxaabe. Guyuube lu stale  juiciu, peru ora bidxíñabe nezalú Tribunal Supremo de Estados Unidos biʼniʼ ganarbe juiciu que ne Tribunal que bixhiá ni guníʼ Departamento de Justicia. Ni gudíxhecabe dxi que, dede yanna huayacanécani xcaadxi binni de Estados Unidos ora qué nacaʼ gudiicaʼ serviciu militar pur religión sticaʼ.

12 Grecia. Lu iza 1983, guníʼcabe rebelde Iakovos Thlimmenos purtiʼ qué niná ñacu uniforme militar, ngue runi biseguyoocabe laa. Bireesibe, yenábabe dxiiñaʼ ndaaniʼ ti despacho de contabilidad, peru qué ninácabe ñúnibe dxiiñaʼ raqué purtiʼ nuu guiʼchiʼ ni cusihuinni maʼ bieguyoobe. Guyebe nezalú justicia, peru cumu qué ñuni ganarbe ndaaniʼ xquídxibe la? gunábabe chebe nezalú Tribunal Europeo de Derechos Humanos. Lu iza 2000, guyebe nezalú Gran Sala del Tribunal de 17 juez, ne laacaʼ guyuucaʼ pur laabe ne dede yanna huayacaneni xcaadxi binni para cadi guquiichinácabe laa pur ni runi cré. Ante guizaaca ngue, nuu biaʼ chonna mil gaayuʼ gayuaa hermanu ni maʼ napa guiʼchiʼ ni cusihuinni maʼ bieguyoocaʼ purtiʼ qué ninacaʼ nudiicaʼ serviciu militar. Despué, gulee Grecia ti ley ni gucané guixiá guiráʼ donda bigaanicabe ique ca hermanu que. Ne ora cuyúbicabe xiná Constitución stiʼ Grecia, bidxélacabe ti ley ni biree chupa chonna iza ante ni cudii derechu ca binni de Grecia gúnicaʼ sti dxiiñaʼ lugar de gudiicaʼ serviciu militar, ngue runi guníʼcabe iquiiñeʼ ley que sti biaje.

«Ante chuaaʼ ndaaniʼ sala que, guizáʼ bineʼ orar Jiobá, ne biiyaʼ modo gudixhedxibe ladxiduáʼ.» Ivailo Stefanov (Biiyaʼ párrafo 13)

13, 14. Xi zanda guiziidiluʼ de ni bizaaca Ivailo Stefanov ne Vahan Bayatyan.

13 Bulgaria. Bisendacaacabe Ivailo Stefanov chuʼ lade ejércitu lu iza 1994 dxi napa 19 iza, peru qué niná ñaca soldadu o ñuni xcaadxi dxiiñaʼ lu ejércitu para cadi tinde. Ngue runi, gudíxhecabe guieguyoobe dieciocho beeu, peru cumu nápabe derechu gúnibe ni na xquendabiaanibe la? gunábabe chebe nezalú Tribunal Europeo de Derechos Humanos, ne gunacaʼ gúʼyacaʼ casu stibe. Lu iza 2001, ante chécabe nezalú Tribunal que, biyubi gobiernu stiʼ Bulgaria modo guiaanacabe ti acuerdu né hermanu Stefanov. Pur ni biaanacabe que biasa castigu luguiáʼ hermanu Stefanov ne luguiáʼ guiráʼ binni de Bulgaria ni gucalaʼdxiʼ gudii serviciu civil lugar de gudiicaʼ serviciu militar. *

14 Armenia. Lu iza 2001, bisaa Vahan Bayatyan iza para gudii serviciu militar. * Neca guniʼbe qué zudiibe ni purtiʼ ruchiiñaʼ xquendabiaanibe laabe pur cani maʼ biziidibe la? binítibe guiráʼ juiciu guyebe ndaaniʼ xquídxibe. Lu beeu septiembre, iza 2002, biseguyoocabe laabe ne gudíxhecabe guieguyoobe chupa iza arondaʼ, peru chii beeu arondaʼ si guyuube raqué. Ngue runi, gunábabe chebe nezalú Tribunal Europeo de Derechos Humanos, ne gunacaʼ gúʼyacaʼ casu stibe. Tribunal riʼ laaca guníʼ nápabe donda ne bizaaca ndiʼ 27 stiʼ octubre, iza 2009. Ni guníʼ ca juez que bisihuinni ni laaca ngueca zazaaca guiráʼ ca hermanu de Armenia ni cadiʼdiʼ lu guendanagana que. Peru  Gran Sala del Tribunal biiyaʼ casu que sti biaje, ne 7 stiʼ julio, iza 2011, guníʼcabe biʼniʼ ganar Vahan Bayatyan. Ndiʼ nga primé biaje guníʼ Tribunal que naquiiñeʼ gaca respetar binni ora qué naʼ gudii serviciu militar pur derechu ni nuu para cuí binni xi guni cré, xi religión gapa ne guiníʼ ique ni gacalaʼdxiʼ. Ni gudixhe ca juez que racaneni ca testigu stiʼ Jiobá ne zaqueca millón de binni ni nabeza ndaaniʼ ca guidxi ni nuu lu Conseju stiʼ Europa. *

Nuu ca hermanu de Armenia nayecheʼ pur ni guníʼ Tribunal Europeo de Derechos Humanos, purtiʼ racaneni cani qué naʼ gudii serviciu militar gúnicaʼ ni na xquendabiaanicaʼ pur ni maʼ biziidicaʼ lu Biblia

Ni bizaaca ca Testigu pur qué ñuni saludarcaʼ bandera

15. Xiñee qué runi saludar xquidxi Jiobá bandera.

15 Xquidxi Jiobá huasihuinni qué rusaana de guni ni na Reinu stiʼ Dios ora qué rinacaʼ gudiicaʼ serviciu militar, ne zaqueca ora qué rinacaʼ guni saludarcaʼ bandera. Ne dede dxi guca Segunda Guerra Mundial jma bizulú binni lu guidubi naca Guidxilayú bicaalú pur xquidxi. Ndaaniʼ stale guidxi gunábacabe binni gudii stiidxaʼ qué zudxiideche xquidxi ra guiníʼ ti juramentu, guʼndaʼ himno o guni saludar bandera. Peru laanu, ca  Testigu, qué rúninu zacá purtiʼ Jiobá si runi adorarnu (Éx. 20:4, 5). Nga runi, nabé huazanándacabe laanu. Guidúʼyanu ximodo huaquiiñeʼ Jiobá Cristu para guni ganar xquidxi caadxi juiciu pur qué ninacaʼ ñuni saludarcaʼ bandera (Sal. 3:8).

16, 17. Xi guendanagana bidxaagalú Lillian ne William Gobitas, ne xi zanda guiziidiluʼ de ni bizaacacabe riʼ.

16 Estados Unidos. Lu iza 1940, biniti ca testigu stiʼ Jiobá nezalú Tribunal Supremo stiʼ Estados Unidos, purtiʼ lade gaʼ voto tobi si guyuu pur laacabe, ne bizaaca nga dxi bíʼyacabe casu stiʼ Gobitis ne Distrito escolar de Minersville. Lillian Gobitas * de 12 iza ne bizáʼnabe William de 10 iza, qué ninacaʼ ñuni saludarcaʼ bandera ne niniʼcaʼ juramentu stiʼ xquídxicaʼ purtiʼ qué racaláʼdxicaʼ gucheenecaʼ Jiobá. Ngue runi, guca expulsarcaʼ ra scuela. Ca juez stiʼ Tribunal Supremo biiyacaʼ ni bizaacacabe que ne guniʼcaʼ ni cayuni scuela que zeeda ni lu Constitución, purtiʼ zaqué nga nácabe ziuu guidxi que tobi si. Pur ni guníʼ ca juez que jma guzanándacabe xquidxi Dios. Xiñee yaʼ. Purtiʼ biʼniʼ expulsárcabe jma baʼduhuiiniʼ ra scuela, cani huaniisi biníticaʼ xhiiñacaʼ ne stale binni ni cadxiichi gudíñecaʼ ca xpinni Cristu. Sicaríʼ guníʼ ti libru bizaaca tiempu que: «Guzanándacabe ca Testigu dede iza 1941 hasta 1943 ne dxi ca nga jma guzanándacabe laacaʼ pur religión sticaʼ ndaaniʼ guidxi Estados Unidos lu siglu XX» (The Lustre of Our Country).

17 Peru nin qué nindaa biniti ca xhenemigu Dios. Lu iza 1943, laaca Tribunal Supremo que biʼyaʼ sti casu cásica stiʼ Gobitis, ne laani nga La Junta de Educación de West Virginia ne Barnette. Biaje riʼ biʼniʼ ganar ca testigu stiʼ Jiobá. Ndiʼ nga primé biaje lu historia stiʼ Estados Unidos guxhiá Tribunal Supremo que ti ley ni nacubi gudixhe. Despué de juiciu que, stale tu bisaana de nizananda xquidxi Jiobá. Ne laaca lu juiciu que gudíxhecabe naquiiñeʼ gaca respetar derechu ni napa guiráʼ ca binni de Estados Unidos ne guirutiʼ naquiiñeʼ guchaa ni.

18, 19. Xi gucané Pablo Barros para qué nucheené Jiobá. Ximodo zanda chinanda xcaadxi xpinni Dios ejemplu stibe.

18 Argentina. Pablo ne Hugo Barros, de xhono ne de gadxe iza, biʼniʼ expulsárcabe laacaʼ ra scuela lu iza 1976 purtiʼ qué ninacaʼ nindísacaʼ bandera. Ti biaje bilaanaʼ directora stiʼ scuela que Pablo ne gudápabe ique. Ne para gucaabe laacaʼ guni saludarcaʼ bandera bisaanabe laacaʼ ti hora despué de biluxe clase. Sicaríʼ guníʼ Pablo modo bidxaagalú ca guendanagana riʼ: «Gucané Jiobá naa para qué nucheeniáʼ laa, ngue runi gunda bineʼ huantar ca guendanagana gudideʼ».

19 Ora bidxíñacabe nezalú justicia, guníʼ juez jneza ni biʼniʼ scuela que Pablo ne Hugo. Peru laacabe gunábacabe chécabe nezalú Corte Suprema de Justicia stiʼ guidxi Argentina, ne lu iza 1979, biʼniʼ ganárcabe casu que purtiʼ bixhiá Corte ni guníʼ juez que. Ndiʼ nga razón bidii Corte que: «Ra [guleecabe ca baʼduhuiiniʼ que de scuela] cucheenécabe ni zeeda lu Constitución ra na guiráʼ binni napa derechu guiziidiʼ (art. 14) ne guʼyaʼ Estadu  saʼ binni scuela biaʼ iza gudixhe gobiernu (art. 5)». Ni bizaaca que gucaneni jma de ti mil baʼduhuiiniʼ Testigu. Cani maʼ nuu para gaca expulsar, maʼ qué nibeecabe laacaʼ ne cani maʼ guca expulsar, casi Pablo ne Hugo, bidxiguétacabe laacaʼ ra scuela stiʼ gobiernu.

Stale hombrehuiiniʼ Testigu rusihuínnicaʼ qué lica zucheenecaʼ Jiobá

20, 21. Ximodo racané ejemplu stiʼ Roel ne Emily Embralinag lii iguidxi fe stiluʼ.

20 Filipinas. Lu iza 1990, Roel Embralinag, * de 9 iza, ne bizáʼnabe Emily, de 10 iza, ne jma de sesenta y cinco baʼduscuela Testigu, biʼniʼ expulsárcabe laacaʼ ra scuela purtiʼ qué ninacaʼ ñuni saludarcaʼ bandera. Leonardo, bixhoze Roel ne Emily, gucalaʼdxiʼ nusiene cani naca xaíque ra scuela xiñee qué runi saludar ca xiiñibe bandera, peru gastiʼ nibeendube. Cumu jma ziroobaʼ guendanagana que la? gunabaʼ Leonardo cheʼ nezalú Tribunal Supremo. Peru qué lica gápabe bidxichi ne nin ti abogadu guiníʼ pur laabe. Ngue runi, bizulú familia que biʼniʼ orar Jiobá de guidubi ladxidóʼ para guluíʼ laacabe xi gúnicabe. Peru nabé runi búrlacabe ca hombrehuiiniʼ que ra scuela ne  qué nusaana de niziñe ca xcompañérucaʼ laacaʼ. Cumu qué lica ganna Leonardo gastiʼ de asuntu legal guníʼ ique qué lica zanda guni ganar casu que.

21 Peru bichaa ca cosa que dxi binibiáʼcabe ti abogadu ni láʼ Felino Ganal. Laabe bíʼnibe dxiiñaʼ lade ti grupu de abogadu nabé risaca ndaaniʼ guidxi Filipinas, ne laa guníʼ pur familia que nezalú ca juez que. Tiempu que maʼ qué runinebe ca abogadu que dxiiñaʼ ne maʼ nácabe testigu stiʼ Jiobá. Ora biʼyaʼ Tribunal Supremo casu que, guiráʼ ca juez que guyuucaʼ pur ca Testigu, ne cumu maca gudíxhecabe gaca expulsar ca baʼduhuiiniʼ ra scuela la? bixhiá ca juez ni gudíxhecabe que. Guiráʼ ca xhenemigu Dios qué huayanda gucaacaʼ xquidxi Dios guchee.

Nuucaʼ tobi si purtiʼ qué lica riuucaʼ lu política

22, 23. 1) Xiñee huayuni ganarnu stale juiciu. 2) Cumu qué huandaasaa Binidxabaʼ laanu, xi rusihuinni nga.

22 Xiñee huayuni ganar ca testigu stiʼ Jiobá stale juiciu ra huayecaʼ yaʼ. Neca qué ruyúbinu gacané ca políticu laanu para guni ganarnu, huayuu juez ni huayacané laanu para gusaana de sananda ca xhenemígunu laanu, ne zaqueca rizaaca ndaaniʼ stale guidxi. Ne huaguíxhecabe lu ca juiciu ca ley ni riquiiñecabe para guni juzgárcabe xcaadxi binni despué. Rihuinni dxichi huayacané Cristu laanu guni ganarnu ca juiciu ca (biindaʼ Apocalipsis 6:2). Xiñee riuunu nezalú justicia yaʼ. Riuunu cadi para guchaʼnu ca ley ni maʼ nápacaʼ, sínuque ni ruyúbinu nga gudiicabe lugar gúninu ni na Rey stinu, Jesucristu (Hech. 4:29).

23 Binni guidxilayú maʼ cadi nabani tobi si, purtiʼ nabé ridinde ca políticu ne nanaláʼdxisaacaʼ. Peru Jesucristu, Rey stinu, huaguu ndaayaʼ ca xpinni pur stipa ni cayúnicaʼ para cadi chinándacaʼ ni runi binni guidxilayú. Qué huayanda guni ganar Binidxabaʼ ne qué huandaasaabe laacaʼ. Guiráʼ ca binni ni qué riná cheʼ lu guerra maʼ gucané Reinu riʼ laacaʼ chuʼcaʼ tobi si, neca nabánicaʼ lu guidubi naca Guidxilayú. Modo nabánicabe ca zeeda gaca ni ti milagru ne rusihuínnini maʼ cayuni mandar Reinu stiʼ Dios yanna (Is. 2:4).

^ párrafo 4 Laaca runibiáʼcabe tomo riʼ casi The New Creation (Ni deruʼ guyáʼ). Despué, ca tomo stiʼ Millennial Dawn (Xpiaaniʼ dxi stiʼ ti mil iza) bireelácani Studies in the Scriptures (Ni rusiene Stiidxaʼ Dios).

^ párrafo 8 Para guiene chaahuiluʼ profecía ca, biiyaʼ libru Apocalipsis... ¡se acerca su magnífica culminación!, capítulo 27, yaza 184 dede 186.

^ párrafo 13 Acuerdu ni biaanacabe que na guiráʼ cani qué naʼ gudii serviciu militar zudii gobiernu stiʼ Bulgaria lugar laacabe gudiicabe serviciu civil xananaʼ ti xpinni gobiernu.

^ párrafo 14 Zadxélaluʼ relatu stiʼ hermanu riʼ lu revista La Atalaya 1 stiʼ noviembre 2012, yaza 29 dede 31.

^ párrafo 14 Biaʼ gande iza biseguyoo gobiernu de Armenia jma de 450 Testigu ni nahuiiniʼ. Lu beeu noviembre 2013, biree ca últimu ni bieguyoo.

^ párrafo 16 Cadi jneza modo gucuá apellidu stiʼ familia riʼ lu ca guiʼchiʼ stiʼ tribunal.

^ párrafo 20 Cadi jneza modo gucuá apellidu stiʼ familia riʼ (Ebralinag) lu ca guiʼchiʼ stiʼ tribunal.