Biiyaʼ guiraʼ ni nuu lu sitiu riʼ

guyé lu índice

Carta stiʼ Grupu ni Zaniruʼ

Carta stiʼ Grupu ni Zaniruʼ

Para ca xpinni Cristu ni rucheeche stiidxaʼ Reinu stiʼ Dios:

GUNÍʼ ique nuunu viernes siadóʼ 2 stiʼ octubre iza 1914. Lii nga tobi de ca binni nuu Betel stiʼ Brooklyn (Nueva York) ne maʼ zúbaluʼ ruaa mexaʼ ra ribiluʼ guiráʼ siadóʼ ora maʼ chigueluʼ, cabézaluʼ guedandá hermanu Charles Russell. Málasi bixeleʼ puertaʼ stiʼ comedor que ne bihuinni maʼ zeeda hermanu Russell. Cásica rúnibe guiráʼ dxi, gulezadxibe ti ratu ne dede cuxidxihuiinibe bigapadiúxibe guiráʼ hermanu sicaríʼ: «Padiuxi, bicheʼ ne bizánacaʼ». De raqué, ante cuibe lugar stibe punta mexaʼ (cabecera stini), gudapanabe chupa biaje ne bidiibe anunciu riʼ: «Maʼ biluxe tiempu stiʼ ca gentil; maʼ gudiʼdiʼ tiempu stiʼ ca rey stícabe». Cumu maʼ xadxí cabezuʼ guedandá dxi riʼ la? guizáʼ biécheluʼ ora binadiágaluʼ ni. Ne cásica reciu ne xadxí gudapanáʼ guiráʼ hermanu runi dxiiñaʼ Betel, lii laaca zaqueca gudapanaluʼ.

 Maʼ gudiʼdiʼ jma de ti gayuaa iza dede dxi bidii hermanu Russell anunciu que. Xi guiráʼ maʼ biʼniʼ Reinu stiʼ Dios dede dxiqué yaʼ. ¡Maʼ bíʼnini stale cosa! Maʼ biquiiñeʼ Jiobá Reinu riʼ para guni purificar ne gusiidiʼ ca xpinni. Chupa chonna mil si nga laacabe iza 1914, peru yanna maʼ nuu biaʼ xhono millón. Ximodo huayacané guiráʼ ni maʼ bisiidiʼ Reinu riʼ lii.

Stale biaje runadiáganu riníʼ ca hermanu stinu sicaríʼ: «Guizáʼ reciu zeʼ carru stiʼ Jiobá ni nuu guibáʼ», ne biaʼsi nga ni riníʼcabe. Peru, xi carru riʼ yaʼ. Laani nga ti parte de organización stiʼ Jiobá ni nuu guibáʼ. Ne ora guʼndaʼ chaahuiluʼ libru riʼ, zudiiluʼ cuenta cadi deruʼ yanna nga zeni reciu, sínuque maca reciu zeedani dede 1914. Maʼ huadxela cani rucheeche stiidxaʼ Reinu stale modo para gúnicaʼ dxiiñaʼ riʼ lu guidubi Guidxilayú: guleecabe artículo lu periódicu, bireecabe calle né pancarta, bíʼnicabe presentación audiovisual ne tarjeta de testimonio, biquiiñecabe gramófono, radiu, ne yanna riʼ laaca maʼ riquiiñecabe Internet.

Nabé riuulaʼdxiʼ binni ca publicación stinu, ne cumu caguu Jiobá ndaayaʼ laanu la? randa runi imprimirnu cani lu jma de 670 idioma ne rusaananenu cani binni sin gutoʼno cani. Nuu stale xpinni Cristu riuulaʼdxiʼ gacané ra cabí Yoo stiʼ Reinu, Salón de Asamblea ne yoo Betel, ne cayaca ca dxiiñaʼ riʼ ndaaniʼ ca guidxi roʼ ni napa bueltu ne ndaaniʼ ca guidxi roʼ ra nabé pobre binni. Ne ora gaca ti desastre, nagueendaca rié ca hermanu stinu para gacanecaʼ cani gucaná, zacá nga rusihuínnicabe nuucabe para «gacané[cabe] laanu ora nápanu xiixa guendananá» (Prov. 17:17).

Nuu tiru ridxela ca xaíque yuʼduʼ ne xcaadxi ni rucaalú laanu modo iquiiñecaʼ ti ley para gucueezacaʼ dxiiñaʼ cayúninu. Peru raca fe stinu jma naguidxi ora ridúʼyanu qué rireendú ni racaláʼdxicabe gúnicabe, sínuque «cayacané ni para ireeche [stiidxaʼ Reinu] jma» (Filip. 1:12; Sal. 94:20).

Nadxiidu laatu, hermánucaʼ. Cásica laatu, laadu laaca domésticu laadu ne ti ndaayaʼ naroʼbaʼ nga guninedu laatu dxiiñaʼ. Rinábadu Jiobá ganda gacané libru riʼ laatu ora gúʼndatu ni ti gacaneni laatu gusisácatu herencia ni maʼ bidii Jiobá laatu.

Laganna guizáʼ nadxiidu laatu.

Ca hermanu stitu,

Grupu ni Zaniru’ sti’ ca Testigu sti’ Jiobá