Biiyaʼ guiraʼ ni nuu lu sitiu riʼ

guyé lu índice

 NDAA 10

Qué nusaana Jesús de nuzuubaʼ diidxaʼ

Qué nusaana Jesús de nuzuubaʼ diidxaʼ

Ñee ruzuubaluʼ stiidxaʼ bixhoʼzoʼ ne jñoouʼ guiráʼ biaje la?... Cadi dxandíʼ nuu tiru raca ni nagana para lii la? Peru pa chinándaluʼ ejemplu stiʼ Jesús la? zacané ni lii guzuubaluʼ diidxaʼ. Ñee bizuubabe stiidxaʼ Jiobá ne stiidxaʼ bixhózebe ne jñaabe guiráʼ ora la?... Guidúʼyanu xiruʼ zanda guizíʼdinu de Jesús.

Ante gueeda Jesús lu Guidxilayú, maca bibaniné Bixhoze, Jiobá, guibáʼ. Peru laaca gúpabe bixhózebe ne jñaabe dxi bibánibe lu Guidxilayú. Laacabe nga José ne María. Ñuulaʼdxuʼ ñannuʼ ximodo beeda gácacabe bixhózebe ne jñaabe la?...

Para gunda gule Jesús ndaaniʼ Guidxilayú riʼ, biʼniʼ Jiobá ti milagru. Guluube xquendanabani Jesús, Xiiñibe ni nuu guibáʼ, ndaaniʼ María. Gaʼ beeu guyuu Jesús ndaaniʼ jñaa, cásica guiráʼ baʼduhuiiniʼ ne oraqueruʼ gule. Zaqué nga gupa María baʼduhuiiniʼ riʼ. Laabe ne José, xheelabe, bisiniisicabe Jesús.

Dxi napa Jesús 12 iza, biʼniʼ xiixa ni bisihuinni nabé nadxii Jiobá, Bixhózebe ni nuu guibáʼ. Bizaaca ni dxi biʼniʼ Jesús ne familia stiʼ ti viaje zitu Jerusalén para guni adorarcaʼ Jiobá. Dxi zedabíʼ José ne María bidiicaʼ cuenta cadi zedanecaʼ Jesús. ¡Birá ladu biyúbicabe laabe, peru qué nidxélacabe laabe! Ñee nannuʼ xi biʼniʼ José ne María la?...

Xiñee nuu Jesús ndaaniʼ yuʼduʼ riʼ

Nagueendaca bibiguétacabe ndaaniʼ guidxi Jerusalén ne bizulú biyúbicabe Jesús. Chonna gubidxa biyúbicabe laabe guiráʼ ladu. ¡Guizáʼ maʼ nuucabe xizaa! Dede ra bidxélacabe laabe. Nannuʼ paraa bidxélacabe laabe la?... Nuube ndaaniʼ yuʼduʼ. Xiñee nuube raqué yaʼ. Purtiʼ raqué nga zanda guiziidibe stale cosa de Jiobá. Nadxii Jesús Bixhoze ne riuulaʼdxiʼ guni cani rusiecheʼ laabe. Qué nusaana Jesús de nuzuubaʼ stiidxaʼ Jiobá dede nahuiiniʼ ne dede dxi biniisi. Nuu tiru guca nagana para Jesús nuzuubaʼ diidxaʼ, purtiʼ guyuu binni ni nabé bininá laa. Ñee raʼbuʼ laaca bizuubaʼ Jesús stiidxaʼ José ne María la?... Biblia riníʼ bíʼnibe ni.

Maʼ biiyuʼ qué nusaana Jesús de nuzuubaʼ diidxaʼ la?... Ndiʼ rusiidiʼ laanu ti cosa nabé risaca: neca nuu tiru raca nagana para laanu guzúʼbanu stiidxaʼ bixhózenu ne jñaanu, peru naquiiñeʼ gúninu ni. Lii yaʼ, zuzuubaluʼ diidxaʼ la?...

GUIDÚʼNDANU XINÁ BIBLIA: