Biiyaʼ guiraʼ ni nuu lu sitiu riʼ

guyé lu índice

 NDAA 4

Bisiéchebe Jiobá ne bisiéchebe bixhózebe

Bisiéchebe Jiobá ne bisiéchebe bixhózebe

Xi cudii stiidxaʼ Jefté Jiobá

Biʼniʼ xiiñidxaapaʼ Jefté ni bidii stiidxaʼ bixhoze, neca guca ni nagana para laa

Ñee nannuʼ tu dxaapahuiiniʼ cá lu dibuju riʼ la?... Qué ruzeeteʼ diʼ Biblia tu labe, peru ruzeeteni biree lá bixhózebe Jefté. Nabé bisiéchebe Jiobá ne bisiéchebe Jefté pur ti cosa ni bíʼnibe. Ñuulaʼdxuʼ ñannuʼ jma de Jefté ne xiiñiʼ la?

Nabé nachaʼhuiʼ guca Jefté. Ne laaca gulee stale tiempu para gusiidiʼ dxaapahuiiniʼ stiʼ de Jiobá. Laaca gúcabe ti hombre nadipaʼ ni biʼniʼ xhiiñaʼ jneza casi xaíque guidxi. Ngue runi, gudxi ca israelita laabe: «Ñuuláʼdxiluʼ ñácaluʼ xaíque stidu lu guerra riʼ la?».

Gunabaʼ Jefté Jiobá gacané laacaʼ guni ganarcaʼ guerra que. Bidii stiidxabe Jiobá pa guni ganárcabe zudiibe laa primé binni guidxaagalú laabe ora guibiguétabe ra  lídxibe. Xi riníʼ nga yaʼ. Ni nabe nga zudiibe  binni que chindeza ndaaniʼ tabernáculo stiʼ Dios ne guni dxiiñaʼ raqué biaʼ dxi guibani. Tabernáculo que nga ti lugar ra rié binni para guni adorar Jiobá. Ñee biʼniʼ ganar Jefté guerra que la? Biʼniʼ ganarbe. Yanna, ñee nannuʼ tu bidxaagalú laabe primé ora yendabe ra lídxibe la?...

¡Xiiñidxaapabe! Tobi lucha xiiñiʼ Jefté, peru yanna napa xidé gudiibe laa chindeza ndaaniʼ tabernáculo que. Nabé triste guyuu Jefté. Peru, rietenalaʼdxuʼ bidii stiidxabe Jiobá gúnibe ti cosa la? Ngue runi gudxi xiiñidxaapabe laabe: «Apá, napuʼ xidé guʼnuʼ ni maʼ bidii stiidxaluʼ Jiobá».

Guiráʼ iza riganna ca xhamiga xiiñidxaapaʼ Jefté laa

Laaca guyuu baʼdudxaapaʼ riʼ triste ora gunna ni. Xiñee yaʼ. Purtiʼ nánnabe maʼ qué zachaganabe ne qué zápabe xiiñibe ora chindézabe ndaaniʼ tabernáculo que. Peru racaláʼdxibe gúnibe ni bidii stiidxaʼ bixhózebe. Ne laaca rápabe gana gusiéchebe Jiobá. Nga nga ni jma risaca para laabe que guichaganabe o gápabe xiiñibe. Ngue runi, yendézabe ndaaniʼ tabernáculo que dede dxi gútibe.

Ñee bisiéchebe Jiobá ne Jefté la?... ¡Bisiéchebe pue! Lii laaca zanda guʼnuʼ casi biʼniʼ xiiñidxaapaʼ Jefté. Pa guzuubaluʼ diidxaʼ ne gannaxhiiluʼ Jiobá la? nabé zusiécheluʼ laabe. Ne laaca guizáʼ zusiécheluʼ bixhoʼzoʼ ne jñoouʼ.

GUIDÚʼNDANU XINÁ BIBLIA: