Biiyaʼ guiraʼ ni nuu lu sitiu riʼ

guyé lu índice

 CAPÍTULO 16

Bisihuínnibe nuu xpiaanibe, nadxibalube ne gucanebe binni

Bisihuínnibe nuu xpiaanibe, nadxibalube ne gucanebe binni

1-3. 1) Xi biʼniʼ sentir Ester ora zidxiña ranuu trono stiʼ xheelaʼ. 2) Xi biʼniʼ rey que ora biʼyaʼ Ester.

BIAʼ qué guiree si ladxidóʼ Ester ora zidxiña ranuu trono stiʼ rey Asuero. Málasi dxidóʼ biaana ca binni ni nuu ndaaniʼ sala roʼbaʼ stiʼ palaciu ni napa ca persa ndaaniʼ guidxi Susa. Ngue runi, dede cayunadiágabe pasu stibe ne modo zixuubi lari sicarú ni nácube que layú. Ne neca sicarú ca dibuju ni cá lu ca yaga de cedru ni beeda de Líbano que la? qué liica niníʼ íquebe nindísalube para gúʼyabe cani. Ni jma cá íquebe nga guiníʼnebe hombre ni zuba lu trono que, purtiʼ laa si zanda gulá laabe.

2 Biiyadxí rey que laabe ne gundisaʼ vara de oro stiʼ nezalube. Dede gutadxí ladxidoʼbe óraque. Zaqué nga bilá rey que xquendanabani Ester ne bisihuínnibe cutidiláʼdxibe stonda purtiʼ guyé nezalube sin ñaca invitar. Óraque nga maʼ zanda guidxiña Ester ranuu trono que. Cumu cayecheʼ Ester pur ni biʼniʼ rey que la? bisigaanáʼ ne gudaʼnaʼ punta vara de oro stibe (Est. 5:1, 2).

Nabé nayecheʼ guyuu Ester pur biaʼ rey que laa

3 Asuero naca ti rey ni napa stale cosa risaca ne xiroobaʼ ra runi mandar. Caadxi binni ni ruundaʼ de modo bibani ca persa, nacaʼ bisaca gayuaa millón de dólar guiráʼ lari sicarú ni gucuʼ ca rey persa que. Nga rusihuinni nabé risaca rey que, peru pur modo biiyadxibe Ester bisihuínnibe nadxiibe laa. Rey que gudxi laabe: «Xi cayácaluʼ reina Ester, ne xi racaláʼdxiluʼ», ne guníʼ zudii laabe dede galaa ra runi mandar (Est. 5:3).

4. Xi guendanagana bidxagalú Ester.

4 Bisihuinni Ester naguidxi fe stiʼ ne guizáʼ nadxibalú ora guyé nezalú rey que para guiníʼ pur xquidxi, purtiʼ cá ique caadxi binni gunduuxeʼ laacaʼ. Guiráʼ cani maʼ bíʼnibe bireecani biaʼsi, peru zadxagalúrube xcaadxi cosa jma nagana. Chitídxirube rey que pabiáʼ malu Hamán, hombre jma risaca ni rudii conseju rey que, purtiʼ bisiguii hombre riʼ para guʼtaʼ ti ley ra na naquiiñeʼ gatiʼ ca binni xquidxi Ester. Ximodo bicuudxibe rey que ne xi rizíʼdinu de fe ni gúpabe.

 Guniʼbe órapeʼ caquiiñeʼ guiniʼbe

5, 6. 1) Ximodo biʼniʼ Ester ni na Eclesiastés 3:1, 7. 2) Ximodo bisihuinni Ester nuu xpiaaniʼ ora guniʼné xheelaʼ.

5 Ñee caquiiñeʼ gabi Ester rey que xi guiráʼ cazaaca, neca nuu binni raqué la? Pa ñúnibe ni, nusituibe lú rey que ne ñapa Hamán tiempu para nusihuinni cadi jneza cani chiguiniʼbe. Xi guni Ester yaʼ. Gayuaa iza ante gale Ester biquiiñeʼ Dios rey Salomón para gucaa ca diidxaʼ riʼ: «Para guiráʼ cosa nuu tiempu, [...] tiempu para cadi guininu ne tiempu para guininu» (Ecl. 3:1, 7). Nanna dxíchinu, Mardoqueo, ti hombre ni qué nusaana de ñuni ni na Dios, bidii ca conseju riʼ Ester dxi bisiniisi laabe. Ne zadúʼyanu nanna Ester pabiáʼ risaca nga guyubi pora zanda guiníʼ.

6 Ngue runi, gudxi Ester xheelaʼ: «Pa naluʼ la? rey, cayuneʼ invitar lii ne Hamán yannadxí chitoto, purtiʼ bineʼ ti guendaró para lii» (Est. 5:4). Rey que guníʼ zié ne bisendacaa Hamán chiné laa. Maʼ biiyaluʼ pabiáʼ nuu xpiaaniʼ Ester la? Cásica rusisácabe xheelabe zaqueca biyúbibe paraa ne pora zanda gábibe laa cani naguu xizaa laabe (biindaʼ Proverbios 10:19).

7, 8. Xiñee guyuulaʼdxiʼ Asuero primé guendaró ni biʼniʼ Ester, ne xiñee qué ñábibe rey que xi racaláʼdxibe óraque.

 7 Nanna dxíchinu biyubi Ester modo guiree guendaró que nanixe ne biiyaʼ cadi guiaadxaʼ xcaadxi cosa ni riuulaʼdxiʼ rey que. Ne laaca bizuhuaabe vinu chaʼhuiʼ ra chitócabe para chúʼcabe nayecheʼ (Sal. 104:15). Nabé guyuulaʼdxiʼ Asuero modo biʼniʼ tenderbe laa dede gunabadiidxaʼ laabe sti biaje xi racaláʼdxibe. Ñee maʼ ora ngue guiniʼbe xi racaláʼdxibe la?

8 Guníʼ ique Ester cadi óraque diʼ nga naquiiñeʼ guiníʼ. Ngue runi, bíʼnibe sti guendaró sti dxi que ne biʼniʼ invitarbe rey que ne Hamán chitocaʼ (Est. 5:7, 8). Xiñee qué nágabe guiniʼbe xi racaláʼdxibe yaʼ. Cadi guiaandaʼ laanu guiráʼ binni xquidxi Ester nga nuucabe guuticabe pur ley ni gudixhe rey que. Cumu stale binni ngue nuu xquendanabani ra naxoo la? naquiiñeʼ ganna chaahuiʼ Ester pora nga maʼ zanda guiníʼ. Ngue runi, gulézabe ne bíʼnibe sti guendaró para gusihuínnibe pabiáʼ rusisácabe xheelabe.

9. Xiñee galán chinándanu ejemplu stiʼ Ester ra cuézanu dede ora maʼ zanda guininu.

9 Nabé nagana raca para binni cueza dede ora maʼ zanda gaca chaahuiʼ xiixa guendanagana napa, peru nabé risaca guni binni zacá.  Neca nabé cayuubaʼ ladxidóʼ Ester ne maʼ rapa gana gabi rey que ni naguu xizaa laa, guleza dede ora maʼ naquiiñeʼ guiníʼ. Galán chinándanu ejemplu stibe, purtiʼ zándaca guiranu huadúʼyanu nuu xiixa cosa cadi cayaca jneza. Pa cuyúbinu modo gucuudxinu tuuxa binni ni runi mandar para guni chaahuiʼ xiixa guendanagana gápanu la? zándaca naquiiñeʼ gácanu casi Ester ne cuézanu dede ora ganda gaca chaahuiʼ ni. Proverbios 25:15 na: «Ora qué ridxiichi binni nagueenda randa rucaa ti comandante guni xiixa, ne ti ludxi nadóʼ zanda quícheni ti dxita». Pa cuézanu guininu dede ora maʼ zanda ne gúninu ni né diidxaʼ nadóʼ, casi biʼniʼ Ester, zanda gudxíʼlunu cani cucaalú laanu, ne zacá casi ñaca niguíchenu ti dxita. Yanna, ñee guluu Jiobá, Dios stiʼ Ester, ndaayaʼ laa pur guleza guiníʼ dede ora maʼ zanda gúnini ne pur nuu xpiaaniʼ la?

Biree ca cosa que jneza pur guleza Ester

10, 11. Xi biʼniʼ sentir Hamán primé biaje biʼniʼ invitárcabe laa, xi biʼniʼ sentirbe ora bíʼyabe Mardoqueo, ne xi gudxi xheelabe ne ca xhamígube laabe gúnibe.

10 Bizaaca stale cosa laga cabeza Ester gaca chaahuiʼ guendanagana  stiʼ. Primé biaje yetócabe gueta ra nuube la? nabé nayecheʼ biree Hamán de raqué purtiʼ biʼniʼ invitar rey ne reina que laa ne guníʼ ique jma rusisácacabe laa que xcaadxi. Peru ora bireebe ra puertaʼ palaciu que biiyabe Mardoqueo, hombre ni qué liica náʼ guzuxibi xañeebe. Casi bidúʼyanu lu capítulo ni gudídinu ca, qué náʼ Mardoqueo gúnini purtiʼ zuchiiñaʼ xquendabiaaniʼ laa ne zucheené Jiobá, ne cadi pur qué gapa respetu laabe. Peru «guizáʼ bidxiichi Hamán» ora biʼyaʼ qué nabe gúnibe ni (Est. 5:9).

11 Ora gúdxibe xheelabe ne ca xhamígube qué niná Mardoqueo nuzuxibi xañeebe, gúdxicaʼ laabe guni mandarbe guzuhuaacabe ti yaga naroʼbaʼ, ni nasoo biaʼ 22 metru ne guyúbibe modo gudii rey que derechu laabe para ugaandabe Mardoqueo luni. Hamán guyuulaʼdxiʼ ni gúdxicabe laa, ngue runi oraqueca biyúbibe tu gúnini (Est. 5:12-14).

12. Xiñee gunabaʼ rey que gúʼndacabe ca guiʼchiʼ ra cá guiráʼ ni huazaaca ndaaniʼ guidxi que, ne xi bidiibe cuenta.

12 Biblia na málasi bizaaca xiixa gueelaʼ que. Xi laani yaʼ. Relatu riʼ na: «Qué ganda guicá bacaandaʼ rey que». Ngue runi, gunábabe guiuundaʼ ca guiʼchiʼ ra cá guiráʼ ni huazaaca ndaaniʼ guidxi que. Lade ca guiʼchiʼ ni cayuundacabe que zeeda ra cá gucalaʼdxiʼ caadxi binni ñuuticaʼ laabe, peru gulee Mardoqueo xtaacabe lu Gubidxa. Óraque nga bietenalaʼdxiʼ rey que bigaa ca binni ni gucalaʼdxiʼ ñuuti laa ne biiticabe laacaʼ. Peru xi gucuaa Mardoqueo, hombre ni biluiʼnáʼ ca binni ni gucalaʼdxiʼ ñuuti rey que yaʼ. ¡Sica ni bibani Asuero óraque! ne gunabadiidxaʼ xi bidiicabe hombre que pur ni biʼniʼ, peru gúdxicabe laa gastiʼ qué nicaabe (biindaʼ Ester 6:1-3).

13, 14. 1) Xi ti cosa ni cadi cabeza Hamán bizaaca. 2) Xi gudxi xheelaʼ Hamán ne ca xhamigu laa.

13 Dede cadxaga Asuero canayubi tuuxa de cani runi dxiiñaʼ ndaaniʼ palaciu que para gacané laa guni ni biaandaʼ ñaca pur hombre que. ¡Ne biáʼsipeʼ Hamán nuu lu patiu stiʼ rey que! Zándaca yendabe tempranu purtiʼ racaláʼdxibe gudii rey que laabe derechu para guutibe Mardoqueo. Peru ante gábibe laa xi zebe, gudxi Asuero laabe xi zanda guni para gusisaca tuuxa ni gucané laa. Cumu zácaxa Hamán laa ngue nuube gusisácabe la? ngue runi guníʼ ugácucabe hombre que lari ni racu ca rey ne quibaʼ maniʼ stiʼ rey que ne sané tobi de ca hombre jma risaca ni nuu ra runi mandar rey que laa ne gudiicabe buelta guidxi Susa ne guiníʼ nácabe ti hombre risaca. Guníʼ ique si xi biʼniʼ sentir Hamán ora gunna Mardoqueo nga hombre ni chigusisácacabe que. Ne tu laa rábiluʼ gulí rey que para gusisaca Mardoqueo yaʼ. ¡Hamán peʼ gulibe! (Est. 6:4-10.)

14 Naná gúcani para laabe ne neca cadxiichibe, bíʼnibe ni gunabaʼ rey que laabe. Nabé triste nuube ne oraqueca bibiguétabe ralídxibe. Ne ora yendabe gudxi xheelabe ne ca xhamígube laabe zazaaca xiixa cosa feu pur guiráʼ ni cayaca que ne qué zalabe lu náʼ judíu ni láʼ Mardoqueo que (Est. 6:12, 13).

15. 1) Xi bizaaca pur guleza Ester sti dxi para gabi rey que xi racalaʼdxiʼ. 2) Xiñee naquiiñeʼ cuézanu gaca chaahuiʼ guendanagana stinu.

 15 Cumu guleza Ester sti dxi para gabi rey que xi racalaʼdxiʼ la? biaʼsi gupa Hamán tiempu para biʼniʼ caadxi cosa sin ganna pa laca laa chiguniná, neca cadi zaqué guníʼ ique ñácani. Ne zándaca Jiobá ngue gulee bacaandaʼ lu rey que (Prov. 21:1). Nga runi, qué ridxagayaanu ora ruzeeteʼ Biblia cuézanu gaca chaahuiʼ guendanagana stinu (biindaʼ Miqueas 7:7). Ora gudiʼnu lugar guni chaahuiʼ Jiobá xiixa guendanagana nápanu, zándaca jma jneza modo gúnibe ni que modo niníʼ íquenu ñúninu ni.

Gúcabe nadxibalú ora guniʼbe

16, 17. 1) Pora nga biiyaʼ Ester maʼ zanda guiníʼ. 2) Xiñee maʼ gadxé guca Ester de Vasti.

16 Cumu qué racalaʼdxiʼ Ester guidxiichi xheelaʼ pur qué náʼ ga guiníʼ xi racalaʼdxiʼ la? biʼniʼ invitarbe laa sti dxi que chitó gueta para gábibe ni laa. Peru pora guiniʼbe ni yaʼ. Rey que peʼ gunabadiidxaʼ Ester sti biaje xi racalaʼdxiʼ (Est. 7:2). Yanna nga maʼ bedandá ora guiníʼ Ester.

17 Yanna, xi biʼniʼ Ester ante guicabi rey que yaʼ. Zanda guxuíʼlunu laabe cayuni orarbe Dios ndaaniʼ ladxidoʼbe. De raqué, bisihuínnibe nadxibalube ora guniʼbe: «Pa riuuláʼdxiluʼ cani runeʼ la? rey, ne pa rábiluʼ jneza ni chitidxeʼ lii riʼ la? canabaʼ lii gulaluʼ xhialmaʼ ne xquidxeʼ» (Est. 7:3). Né ca diidxaʼ riʼ bisihuinni Ester zuni ni na rey que. ¡Gadxepeʼ modo guca Ester de Vasti, reina ni guyuu ante que, purtiʼ laapeʼ biyubi gusituí lú xheelaʼ! (Est. 1:10-12.) Laaca qué ñabi Ester laabe cadi jneza bíʼnibe ora biʼniʼ crebe ni gudxi Hamán laabe. Ni bíʼnibe nga gunábabe rey que gulá laabe purtiʼ nuu xquendanabánibe ra naxoo.

18. Ximodo gudxi Ester rey que guendanagana napa.

 18 Nabé bidxagayaa rey que ni guníʼ Ester ne yendá ca diidxaʼ que ndaaniʼ ladxidóʼ. Peru tuu ndiʼ racalaʼdxiʼ guuti reina que yaʼ. Ester gudxi laabe: «Maʼ bitoocabe laadu, naa ne xquidxeʼ, para guuticabe laadu ne gunitilúcabe laadu. Yanna, pa ñaca nutoosícabe laadu para ñácadu esclavu la? qué niniediáʼ gastiʼ. Ne qué ñuubaʼ diʼ ladxiduáʼ pa ñaca cadi né lii ñacanaluʼ rey» (Est. 7:4). Ridúʼyanu gudxi Ester laabe xipeʼ guendanagana napa, peru gudxi laabe qué niníʼ diʼ gastiʼ pa ñaca nidoocabe para ñácacabe esclavu. Peru cumu cá íquecabe gunitilúcabe binni xquídxibe la? gupa xidé guniʼbe, purtiʼ laaca zuniná ni rey que.

19. Xi rizíʼdinu de ejemplu stiʼ Ester ora chitídxinu tuuxa xiixa guendanagana nápanu.

19 Bisihuinni Ester naca ti binni nuu xpiaaniʼ ora bidxagalú guendanagana, biyubi modo guníʼ ne biyubi modo gucuudxi binni. Yanna, xi zanda gacané laanu pa caquiiñeʼ gábinu tuuxa binni ni nadxiinu o tuuxa ni runi mandar xiixa guendanagana nápanu yaʼ. Ni zanda gacané laanu nga cuézanu dede ora maʼ zanda guininu, guni respetarnu binni ne guininu xipeʼ racaláʼdxinu. Zacá zusihuínninu zinándanu ejemplu stiʼ Ester (Prov. 16:21, 23).

20, 21. 1) Ximodo bisihuinni Ester ni racalaʼdxiʼ Hamán guni, ne xi biʼniʼ rey que ora binadiaga ni. 2) Xi biʼniʼ Hamán ora bihuinni naca ti hombre qué iquiiñeʼ.

20 Ora binadiaga Asuero ni guníʼ Ester que, gunabadiidxaʼ: «Tu laabe, ne paraapeʼ nuu hombre ni qué nidxibi ora biʼniʼ nga». Bixuiʼlú culuiʼnáʼ Ester hombre que ne na: «Hombre ni cucaalú laadu ne enemigu ca nga Hamán ni qué iquiiñeʼ riʼ». Dxidóʼ biaanacabe. Óraque guizáʼ bidxibi Hamán. Pur modo biiyadxí rey que laa bidii cuenta guizáʼ cadxiichibe, purtiʼ maʼ gunna hombre peʼ ni jma risaca lade cani rudii conseju laa bicaa laabe guni firmarbe ti ley para gatiʼ xheelabe ni  nadxiibe. Ora bidii Asuero cuenta, biaʼ qué ñati xiana si, biree guxooñeʼ ne guyé ra jardín stiʼ, ti guiete xiana que laa (Est. 7:5-7).

Qué nidxibi Ester ora bisihuinni xi cayuni Hamán, hombre malu que

21 Cumu maʼ bihuinni xii ngue gucalaʼdxiʼ Hamán ñuni ne guizáʼ cadxibi la? ngue runi biaba xañee reina que ne canabaʼ guiabe laa. Ora bibiguetaʼ rey que, biiyaʼ laabe dxíʼbabe ra nexheʼ Ester canábabe gutiidilaʼdxiʼ stóndabe, guizáʼ bidxiichi ne na nuube guilaxoobe reina que ndaaniʼ palaciu stiʼ. ¡Yanna huaxa zati Hamán né ni biʼniʼ riʼ! Guca si ngue bitaagucabe lube ne zinécabe laabe. De raqué, tobi de ca hombre ni runi xhiiñaʼ rey que guníʼ biʼniʼ mandar Hamán guzuhuaacabe ti yaga nasoo para ganda Mardoqueo luni. Oraqueca biʼniʼ mandar Asuero ugaandacabe Hamán lu yaga que (Est. 7:8-10).

22. Xi rizíʼdinu de ejemplu stiʼ Ester ra qué nusaana de ñapa fe o niníʼ ique qué zanda gaca chaahuiʼ guendanagana que.

22 Yanna riʼ, stale binni raca nagana para laa guni cré pa ziuu dxi gaca ni jneza lu guidxilayú. Ñee huaníʼ íqueluʼ zacá la? Ester qué liica ñuu ora niníʼ ique maʼ qué zaca chaahuiʼ guendanagana que, o nusaana de ñapa fe ne nusaana de ñuni cré zanda gacané Jiobá laa. Ora bidxaagalube guendanagana, gúcabe nadxibalú ne gudixhe íquebe gúnibe ni jneza ne bisaanabe xcaadxi cosa que lu náʼ Jiobá. Ngaca nga naquiiñeʼ gúninu. Dios qué huachaa diʼ modo laa. Zándaruʼ gunitilube ca binni malu ne gusábabe laacaʼ lu ca trampa sticaʼ, cásica bíʼnibe né Hamán (biindaʼ Salmo 7:11-16).

Bíʼnibe jma pur Jiobá ne pur xquidxi

23. 1) Xi biʼniʼ rey que pur Mardoqueo ne Ester. 2) Ximodo guca ni na ca diidxaʼ riguixhená ni guníʼ Jacob de Benjamín. (Biiyaʼ cuadru ni láʼ « Guca ni na ti diidxaʼ riguixhená».)

23 Despué gunna rey que cadi bilá si Mardoqueo xquendanabani, sínuque laaca bisiniisi Ester casi xiiñiʼ, ngue runi bíʼnibe laa hombre ni jma risaca lade cani runi xhiiñabe, ne ngue nga puestu ni gupa Hamán. Laaca bidiibe Ester lidxi Hamán ne guiráʼ cosa risaca gupa, ne Ester bisaana guiráʼ cani lu náʼ Mardoqueo para gapa cani (Est. 8:1, 2).

24, 25. 1) Ñee maʼ qué ñuni reina que gastiʼ purtiʼ si maʼ bilá xquendanabani ne xquendanabani Mardoqueo la? 2) Ximodo guluu Ester xquendanabani ra naxoo sti biaje.

24 Ñee maʼ qué zuni reina riʼ gastiʼ purtiʼ si maʼ bilá xquendanabani  ne xquendanabani Mardoqueo la? Qué ñúnibe gastiʼ pa ñaca nicá íquebe para laasibe, peru ley ni gudixhe Hamán ra na naquiiñeʼ gatiʼ guiráʼ ca judíu que mayaca chindá ni dede ra jma zitu ra runi mandar rey que. Hamán biquiiñeʼ espiritismo para ganna padxí nga jma galán gucaalú xquidxi Dios. Biblia na gulee Hamán suerte o Pur casi riníʼcabe ni lu diidxaʼ hebreu (Est. 9:24-26). Cayaadxaruʼ xhupa xhonna beeu para guedandá dxi guinitilú ca binni que, peru nagueenda cadxiña dxi que. Yanna, ñee zanda gaca xiixa para cadi gatiʼ ca binni que la?

25 Cumu biʼniʼ Ester jma pur Jiobá ne pur xquidxi la? ngue runi guluu xquendanabani ra naxoo ora guyé ranuu rey que sti biaje sin ñaca invitar. Yanna huaxa biinabe pur xquídxibe ne gunábabe xheelabe guxhá ley ni gudixhe que. Peru ca ley ni riguixhe ca rey persa qué randa diʼ rixá cani (Dan. 6:12, 15). Ngue runi, rey que bidii derechu Ester ne Mardoqueo para quíxhecaʼ sti ley. Ley ni gudíxhecabe que na guiráʼ judíu zanda gucaalucaʼ ca binni ni chiguuti laacaʼ. Oraqueca gucuaa caadxi hombre maniʼ sticaʼ para chinecaʼ ley ni nacubi gudíxhecabe que guiráʼ lugar ra runi mandar Asuero. Ora gunna ca judíu que ni na ley gudíxhecabe que biéchecaʼ, purtiʼ bidiicaʼ cuenta zanda guilacaʼ (Est. 8:3-16). Yanna, guxuíʼlunu xi cayuni ca judíu ni nabeza lu guidubi naca ra runi mandar rey que, maʼ guirácabe caguucabe listu cani chitindenécabe, ne qué ñanda ñúnicabe ni pa ñaca qué ñuu ley ni nacubi gutaʼ que. Peru nuuruʼ  sti cosa jma risaca, ñee zacané «Jiobá, Dios stiʼ stale binni nanda guiibaʼ», xquidxi la? (1 Sam. 17:45.)

Ester ne Mardoqueo biseendacaʼ ley ni gudíxhecaʼ ranuu ca judíu ni nabeza ra runi mandar ca persa

26, 27. 1) Ximodo gucané Jiobá xquidxi para biʼniʼ ganar. 2) Xi diidxaʼ riguixhená guca ni na ra biiticabe ca xiiñiʼ Hamán.

26 Ora bedandá dxi nexheʼ gatiʼ ca judíu que mápeca nuucaʼ listu. Ne stale de cani runi xhiiñaʼ rey stiʼ Persia bidaagucaʼ laacabe, purtiʼ maʼ nanna ca binni ni nuu guiráʼ ra runi mandar rey que maʼ Mardoqueo nga hombre ni jma risaca lade cani runi xhiiñaʼ rey. Jiobá gucané xquidxi para biʼniʼ ganar. Ne binitilube guiráʼ ca xhenemígucaʼ para cadi guquíxecaʼ xquídxibe ni bíʼnicaʼ laacabe (Est. 9:1-6). *

27 Para gunda biʼniʼ mandar Mardoqueo guiráʼ ni nuu ndaaniʼ lidxi Hamán sin guidxibi la? gupa xidé biiticabe chii xiiñiʼ hombre que (Est. 9:7-10). Zaqué nga guca ni maca guníʼ Dios: zanitilú guiráʼ ca amalequita, ca xhenemigu xquídxibe (Deut. 25:17-19). Zándaca ca xiiñiʼ Hamán nga ca últimu binni de guidxi Amaleq, ni maca guníʼ Dios zanitilú.

28, 29. 1) Xiñee qué racalaʼdxiʼ Jiobá guinitilú xquidxi. 2) Xiñee galán nga nápanu ejemplu stiʼ Ester.

28 Neca nahuiiniʼ Ester nabé naroʼbaʼ dxiiñaʼ biʼniʼ, purtiʼ gudixhe caadxi ley ni caníʼ zanda gucaalú ca binni xquidxi ne guuticaʼ ca xhenemígucaʼ. Zándaca gúcani nagana para laabe. Peru Jiobá qué racalaʼdxiʼ guinitilú xquidxi, purtiʼ ndaaniʼ guidxi Israel nga chigale Mesías, tobi lucha ni zanda gacané binni guidxilayú (Gén. 22:18). Ca xpinni Dios ni nabani yanna maʼ cadi naquiiñeʼ tíndecaʼ, purtiʼ dxi beeda Jesús lu Guidxilayú riʼ bisiidiʼ ca discípulo stiʼ cadi naquiiñeʼ guinaazecaʼ guiibaʼ (Mat. 26:52).

29 Peru ca dxi stinu riʼ, laanu ca xpinni Cristu cadíndenu ne cucaalunu Binidxabaʼ, purtiʼ yanna nga jma cuyúbibe modo gusaana de gápanu fe Jiobá (biindaʼ 2 Corintios 10:3, 4). Peru zanda guni ganarnu pa chinándanu ejemplu stiʼ Ester. Cásica bíʼnibe, laanu laaca zanda gusihuínninu nápanu fe pa gácanu binni nuu xpiaaniʼ ne cadi guireʼnu gana ora guidxaagalunu xiixa guendanagana. Laaca caquiiñeʼ gácanu nadxibalú ne guizaaláʼdxinu xquidxi Dios ¡Guizáʼ galán nga nápanu ejemplu stiʼ Ester!

^ párrafo 26 Rey que bidii sti dxi ca judíu que para gunitilucaʼ guiráʼ ca xhenemígucaʼ (Est. 9:12-14). Ne dede yanna rúniruʼ ca judíu ti saa para guietenaláʼdxicaʼ dxi biʼniʼ ganarcaʼ ca xhenemígucaʼ ra ziluxe beeu febrero ne ra ruzulú beeu marzo, lu calendariu stícabe rácani lu beeu adar. Ne saa ca lani Purim pur suerte gulee Hamán ora gucalaʼdxiʼ nunitilú guidxi Israel.