Biiyaʼ guiraʼ ni nuu lu sitiu riʼ

guyé lu índice

 CAPÍTULO 8

Qué nireebe gana neca bidxaagalube guendanagana

Qué nireebe gana neca bidxaagalube guendanagana

1. Xiñee naná nuu ladxidóʼ ca binni de Siló.

NABÉ naná nuu ladxidóʼ ca binni xquidxi Samuel. Nuucabe zacá purtiʼ gudinde ca israelita né ca filisteu. Ne lu guendaridinde riʼ guti 30,000 israelita. Ne cadi xadxí maca guti 4,000 de laacaʼ lu sti guendaridinde. Ngue runi, stale xcuidi ne gunaa guizáʼ cayuunacaʼ purtiʼ guti binnilídxicaʼ: bixhózecaʼ, xheelacaʼ, bizáʼnacaʼ ne xiiñicaʼ (1 Sam. 4:1, 2, 10).

2, 3. Xi guiráʼ desgracia bizaaca ra biniti Siló guendarisaca stiʼ.

2 Ndiʼ nga tobi de ca desgracia ni huazaaca ndaaniʼ guidxi riʼ pur ti cosa ni biʼniʼ ca xiiñiʼ Elí, sacerdote gola que. Hofní ne Finehás, ca hombre malu riʼ, guleecaʼ guiña stiʼ pactu que Siló ne yenecaʼ ni ra cadinde guidxi que. Cumu guiña stiʼ pactu que rusihuinni nuuné Jiobá xquidxi la? ca israelita que riníʼ íquecaʼ zuni ganarcaʼ pa chinecaʼ ni ora tíndecaʼ. Peru guiña, ni riaapaʼ ndaaniʼ lugar ra jma nandxóʼ stiʼ tabernáculo que, cadi ti amuletu diʼ ni. Yanna, xi bizaacaʼ yaʼ. Ca filisteu que biʼniʼ ganarcaʼ ca israelita, gucuaacaʼ guiña stiʼ pactu que ne biiticaʼ ca xiiñiʼ Elí (1 Sam. 4:3-11).

3 Stale iza biiyaʼ binni guidxi Siló casi ti lugar nabé risaca, purtiʼ raqué guyuu guiña stiʼ pactu. Ngue runi, ora gunna Elí gucuaa ca filisteu guiña que, biabasá de ra zuba ne guti dxi napa 98 iza. Ne xuaalídxibe ni biaana viuda dxi que, laaca guti ra cayapa baʼduʼ. Últimu ni guniʼbe nga: «Maʼ zinécabe guendarisaca stiʼ Israel». Ne dxandíʼ ni guniʼbe ca, purtiʼ ra zinécabe guiña que maʼ qué nisaca guidxi Siló (1 Sam. 4:12-22).

4. Xi zazíʼdinu lu capítulo riʼ.

4 Nabé biuubaʼ ladxidóʼ Samuel pur guiráʼ ni cazaaca que. Peru ñee zacané fe stibe laabe para gudxiilube ca guendanagana que ne gacanebe ca binni guidxi que chuʼcaʼ galán nezalú Jiobá sti biaje ne gapa Dios laacaʼ la? Yanna, cumu laaca zándaca chuʼ xiixa ni cuee gana laanu ne xiixa ni gucaa laanu gusihuínninu pa naguidxi fe stinu la? guidúʼyanu xiruʼ zanda guizíʼdinu de ejemplu stiʼ Samuel.

 Biiyabe gaca ni jneza

5, 6. Biaʼ ra nuunu lu historia riʼ, xii nga ni jma rieeteʼ lu relatu stiʼ Samuel, ne xi bíʼnibe tiempu ca.

5 Biaʼ ra nuunu lu historia stiʼ Samuel riʼ, jma nga rieeteʼ ra guca castigar ca filisteu pur gucuaacaʼ guiña stiʼ pactu que, ne laaca ruzeeteʼ ni xi bizaaca para bidxiguétacabe guiña que. Gudiʼdiʼ si gande iza, maʼ rieeteʼ de profeta riʼ sti biaje (1 Sam. 7:2). Yanna, xi bíʼnibe tiempu ca yaʼ. Guidúʼyanu xiná Biblia.

Ximodo gucané Samuel ca israelita que gatadxí ladxidoʼcaʼ ora gutiʼ binnilídxicaʼ

6 Biblia cayabi laanu, ante gaca guendaridinde que, «yendaruʼ stiidxaʼ Samuel guidubi guidxi Israel». Racá rihuinni qué nusaana Samuel de nusiidiʼ guidxi que (1 Sam. 4:1). Ne relatu riʼ laaca ruzeeteʼ xi biʼniʼ Samuel gudiʼdiʼ si gande iza que. Biblia na rigánnabe guionnaʼ guidxi stiʼ Israel guiráʼ iza, casi maca biaabe gúnibe ni, para guni chaahuibe ca guendanagana gápacaʼ ne gusiénebe laacaʼ xi naquiiñeʼ gúnicaʼ. De raqué, ribiguétabe Ramá, xquídxibe (1 Sam. 7:15-17). Rihuinni dxíchica, nabé guyuu xhiiñaʼ Samuel gande iza gudiʼdiʼ ca.

Neca qué ruzeeteʼ Biblia xi biʼniʼ Samuel gande iza, peru nánnanu bíʼnibe xhiiñaʼ Jiobá

7, 8. 1) Xi gudxi Samuel ca israelita que despué de gande iza de bíʼnibe stipa pur gacanebe laacaʼ chuʼcaʼ gaxha de Jiobá. 2) Xi biʼniʼ ca binni que guniʼné si Samuel laacaʼ.

7 Pur modo biquiichináʼ guiropaʼ xiiñiʼ Elí ca binni guidxi que ne pur ca cosa dxabaʼ ni bíʼnicaʼ, maʼ qué ñaca fe stiʼ ca binni que naguidxi. Pur ngue, stale binni biʼniʼ adorar bidóʼ. Despué de gande iza de biʼniʼ Samuel stipa pur gucané guidxi que chuʼ gaxha de Jiobá, gudxi laacabe: «Pa de guidubi ladxidoʼto cabiguétatu ra nuu Jiobá, lacuee ca dios ni runi adorar ca binni de sti guidxi ládetu ne zaqueca ca bidóʼ stiʼ Astoret, ne laguyubi Jiobá de guidubi ladxidoʼto ne ni násibe laguni, ne laabe zulabe laatu de lu náʼ ca filisteu» (1 Sam. 7:3).

8 Ne dxandipeʼ nuu ca binni guidxi que «lu náʼ ca filisteu» ne cuquiichinaʼcaʼ laacabe. Cumu maʼ biiti ca filisteu casi guiráʼ ca soldadu stiʼ guidxi Israel la? guníʼ íquecaʼ zanda gúnicaʼ laacabe ni gápacaʼ gana ne guirutiʼ zucaalú laacaʼ. Peru Samuel gudxi ca israelita guibiguétacaʼ ra nuu Jiobá ti gulabe laacaʼ lu náʼ ca xhenemígucaʼ. Peru ñee bíʼnicaʼ ni gudxi Samuel laacaʼ la? Bíʼnicaʼ ni, purtiʼ bisáʼbicaʼ ca bidóʼ sticaʼ ne «bizulú bíʼnicaʼ ni na si Jiobá». Guizáʼ biecheʼ profeta que pur ni biʼniʼ guidxi que, ngue runi, bitagulisaa laacabe Mizpá, ti guidxi ni riaana lade dani ne nuuni ladu guiaʼ de Jerusalén. Ne ora bidagulisaacabe raqué biaanacabe sin gócabe ne gunábacabe gutiidilaʼdxiʼ Jiobá stóndacabe pur biʼniʼ adorárcabe ca bidóʼ que (biindaʼ 1 Samuel 7:4-6).

Ora bidagulisaa ca israelita ni guca arrepentir ndaaniʼ guidxi Mizpá, guníʼ ique ca filisteu zanda gucaalucaʼ laacabe

9. Xi guníʼ ique ca filisteu que ñúnicaʼ, ne xi biʼniʼ sentir ca israelita que ora gúnnacaʼ zeeda ca xhenemígucaʼ.

 9 Peru ora gunna ca filisteu que dagulisaacabe raqué la? guníʼ íquecaʼ nguepeʼ nga cabézacaʼ para gunitilucaʼ ca xpinni Jiobá. Ora gunna ca binni de Israel zeeda ca xhenemígucaʼ, bidxibi daatacaʼ ne gunábacaʼ Samuel guiniʼné Dios para gacané laacaʼ. Biʼniʼ profeta que ni gunabaʼ guidxi que laa, biʼniʼ orarbe ne laacaʼ bidiibe Dios ti ofrenda. Nin caʼruʼ guiluxe gudiibe ofrenda que ora bicaalú ca filisteu que guidxi que. Peru Dios biʼniʼ ni gunabaʼ Samuel que, Biblia na: «Guizáʼ reciu bixhidxi Jiobá rayu [...] luguiáʼ ca filisteu». Zaqué nga bisihuínnibe pabiáʼ cadxiichinebe laacaʼ (1 Sam. 7:7-10).

10, 11. 1) Xiñee nabé bidxibi ca xhenemigu ca israelita ora binadiágacaʼ guxidxi guibáʼ. 2) Xi guca ca filisteu dxi bicaalucaʼ ca israelita ndaaniʼ guidxi Mizpá.

10 Dede nin nidxela ca filisteu xi ñúnicaʼ, ngue runi, biree guxooñecaʼ de raqué. Xiñee nabé bidxíbicabe yaʼ. Laandácabe nánnacabe tíndecabe, purtiʼ huayécabe lu stale guendaridinde ra nabé huayati binni. Ca hombre riʼ cadi casi xcuidi laacaʼ, ti xcuidi ora gunadiaga xhidxi rayu maca ziguxooñeʼ guirenda suudi jñaa. Peru ca soldadu riʼ bidxíbicaʼ, zándaca pur modo guxidxi laa rayu que o purtiʼ «guizáʼ reciu» guxidxi lade ca dani nuu gaxha. O zándaca purtiʼ nayaʼniʼ nuu guibáʼ ora guxidxi. Qué gánnanu xiñee nabé bidxíbicabe, peru ni nánnanu nga ni binadiágacabe que bicaani laacabe guxooñecabe de raqué, ne lugar de nuchíbicabe ca israelita, laga laacabe bidxíbicabe. Ca israelita que bireecaʼ de Mizpá ne guzanándacaʼ ca filisteu, guizáʼ zitu guzanándacaʼ laacabe dede yendácabe ladu gueteʼ de Jerusalén (1 Sam. 7:11).

11 Ne dede dxi biʼniʼ ganar ca israelita ca filisteu bichaa xquendanabánicaʼ. Biaʼ tiempu guyuu Samuel de juez ndaaniʼ guidxi que, ca binni de Israel, biʼniʼ ganarcaʼ xcaadxi guidxi ne gúxhacaʼ ca filisteu cada tobi de ca layú sticaʼ (1 Sam. 7:13, 14).

12. Xiñee rieeteʼ Samuel lade cani biʼniʼ ni jneza, ne xi gucané laa para gunda biʼniʼ zacá.

12 Gudiʼdiʼ si guyuaa iza, apóstol Pablu bizeeteʼ de Samuel lade ca juez ne profeta ni biʼniʼ ni jneza (Heb. 11:32, 33). Nabé binibiáʼ binni Samuel purtiʼ biʼniʼ ni jneza nezalú Jiobá, peru laaca binibiáʼcabe laabe purtiʼ gucanebe xcaadxi binni guni cásica bíʼnibe. Yanna, xi gucané laabe para cadi gusaana de gúnibe xhiiñabe yaʼ. Primé la? gulézabe guni chaahuiʼ Jiobá ca guendanagana que. Ne laaca bidiibe xquíxepeʼ Jiobá pur gucané ca binni guidxi que, purtiʼ ora biʼniʼ ganar ca israelita que ra gudíndecaʼ Mizpá, bíʼnibe ti monumentu para guietenalaʼdxiʼ ca binni de Israel modo bilá Dios laacaʼ (1 Sam. 7:12).

13. 1) Gunáʼ nga ca guenda ni naquiiñeʼ gápanu para gúninu cásica biʼniʼ Samuel. 2) Dede padxí nga naquiiñeʼ gúninu stipa pur gápanu ca guenda ni gupa Samuel.

 13 Pa racaláʼdxinu gúninu ni jneza nezalú Jiobá la? naquiiñeʼ cuézanu dede ora maʼ guni chaahuibe ca guendanagana stinu, gudiʼnu xquíxepeʼ laabe ne cadi gudxíʼbanu laca laanu, cásica biʼniʼ Samuel (biindaʼ 1 Pedro 5:6). Cadi dxandíʼ guiranu nga naquiiñeʼ gápanu ca guenda riʼ la? Cumu dede nahuiiniʼ Samuel gupa ca guenda riʼ la? gucané cani laa para gunda bidxiilú ca guendanagana ni jma bininá laa ne ni jma guluu laa triste dxi maʼ nagola. Ne ngapeʼ nga cani chiguidúʼyanu.

«Qué huazá ca xiiñiluʼ lu ca neza stiluʼ»

14, 15. 1) Xii nga ni jma bininá Samuel dxi maʼ nagola. 2) Xiñee zanda guininu gadxé gadxé modo bisiniisi Samuel ne Elí ca xiiñiʼ.

14 Ora rieeteʼ de Samuel sti biaje lu relatu riʼ, maʼ nagola. Ngue runi, bíʼnibe ca xiiñibe, Joel ne Abías, juez para gacanecaʼ laabe guni chaahuicabe ca guendanagana napa guidxi que. Peru ca hombre riʼ qué ñúnicaʼ casi guníʼ ique bixhózecaʼ. Lugar de ñacanécabe binni ne ñúnicabe ni jneza, laga bíʼnicabe stale cosa malu ne rinábacabe gudii binni laacabe xiixa para gacanécabe laacaʼ, ne guníʼ íquecabe zanda gúnicabe guiráʼ ni gacaláʼdxicabe purtiʼ laacabe ngue juez stiʼ guidxi que (1 Sam. 8:1-3).

15 Ti dxi, ca binnigola stiʼ Israel guluucaʼ xqueja ca xiiñiʼ Samuel  nezalube ne gúdxicaʼ laabe: «Qué huazá ca xiiñiluʼ lu ca neza stiluʼ» (1 Sam. 8:4, 5). Ñee nanna Samuel xi runi ca xiiñiʼ la? Qué rieeteʼ diʼ ni lu Biblia. Peru laabe nanna dxíchibe bisabanáʼ Dios Elí, purtiʼ qué nulidxe ca xiiñiʼ ne purtiʼ bisisaca ca xiiñiʼ jma que Dios, ngue runi, nanna dxíchinu bíʼnibe stipa pur gusiniisibe ca xiiñibe jneza (1 Sam. 2:27-29). Ne qué ñuu dxi ñuuyaʼ Jiobá ñúnibe xiixa cosa malu.

Xi gucané Samuel gudxiilú guendanagana ni gupa ora biʼniʼ ca xiiñiʼ ni cadi jneza

16. Ximodo runi sentir binni ora qué ruzuubaʼ xiiñiʼ diidxaʼ, ne ximodo zanda gacané ejemplu stiʼ Samuel laacabe para gatadxí ladxidóʼcabe ne gánnacabe xi gúnicabe.

16 Lu relatu riʼ laaca qué rieeteʼ xi biʼniʼ sentir Samuel ora gunna cadi jneza canazá ca xiiñiʼ. Peru stale binni ni napa xiiñiʼ nánnacaʼ pabiáʼ rituilú binni, riuu triste ne racaná ladxidóʼ ora qué runi xiiñiʼ ni jneza. Ca dxi stinu riʼ, stale hombrehuiiniʼ ne dxaapahuiiniʼ maʼ qué ruzuubacaʼ stiidxaʼ jñaacaʼ ne bixhózecaʼ. Zanda guininu, zeeda gácani casi ti guendaguidxa, purtiʼ maʼ stale binni qué ruzuubaʼ diidxaʼ ne qué runi respetar bixhoze ne jñaa (biindaʼ 2 Timoteo 3:1-5). Ñee naná nuu ladxidoʼloʼ, purtiʼ nápaluʼ ti xiiñiluʼ ni qué rucaadiaga lii ora uguu jnézaluʼ laa ne qué rinanda ca conseju ni rudiiluʼ laa la? Pa zacá ni, nabé zatadxí ladxidoʼloʼ ne zánnaluʼ xi gúniluʼ ra gúʼndaluʼ xi biʼniʼ Samuel ora gupa guendanagana riʼ. Neca qué ñuni ca xiiñibe ni jneza, qué nusaanabe de ñúnibe xhiiñaʼ Dios. Cadi guiaandaʼ lii: ni gábiluʼ ca xiiñiluʼ zanda gacané ni laacaʼ, peru ni jma zanda gacané laacaʼ nga ejemplu stiluʼ. Nga runi, qué chuʼ dxi guiníʼ íqueluʼ qué zanda gacaneluʼ ca xiiñiluʼ ora gúʼyacaʼ cayúniluʼ ni na Dios. Ne Jiobá, Bixhózeluʼ ni nuu guibáʼ, guizáʼ ziechené lii pa qué chuʼ dxi gusaanaluʼ laa, cásica biʼniʼ Samuel.

«Gulí ti rey para [...] laadu»

17. Xi gunabaʼ ca binnigola de Israel Samuel, ne xi biʼniʼ sentirbe.

17 Qué liica niníʼ ique ca xiiñiʼ Samuel pabiáʼ zuninacaʼ ca binni guidxi que pur modo laacaʼ, purtiʼ nisi ruyúbicaʼ para laacaʼ ne ruyúbicaʼ gápacaʼ stale cosa risaca. Despué de guluu ca binnigola que xqueja ca xiiñiʼ Samuel, gúdxicaʼ profeta riʼ: «Gulí ti rey para guni juzgar laadu, ya, cásica napa guiráʼ guidxi». Xi biʼniʼ sentir Samuel ora binadiaga ni guníʼ ca binnigola que yaʼ. Ñee bidxiichibe o biʼniʼ sentirbe cucaanáʼcabe laabe la? Laandabe maʼ zinebe stale iza de cayuni juzgarbe guidxi que casi ora Jiobá peʼ ñúnini. Peru ca binni que nuucaʼ guni mandar ti rey laacaʼ, ne cadi ti profeta casi Samuel, purtiʼ laasicaʼ lade guiráʼ guidxi qué gápacaʼ ti rey. Yanna, ximodo biiyaʼ Samuel ni canabaʼ ca binni que laa yaʼ. Relatu riʼ na: «Cadi jneza biiyabe ni» (1 Sam. 8:5, 6).

18. Xi gudxi Jiobá Samuel pur ni canabaʼ ca binni que laa guni.

18 Yanna, guidúʼyanu xi bicabi Jiobá ora gudxi Samuel laa xi racalaʼdxiʼ ca binni guidxi que. Jiobá gudxi laabe: «Bicaadiaga guiráʼ ni guiníʼ guídxicaʼ purtiʼ cadi lii diʼ nga cudxiidéchecabe, sínuque naa nga cudxiidéchecabe casi rey stícabe». Né ca diidxaʼ riʼ, Jiobá bisiene laabe  qué gápabe nin ti razón para guidxiichibe, purtiʼ cadi de laadibe nga caníʼcabe mal, sínuque caníʼcabe mal de Jiobá, Dios ni napa stale poder. ¡Qué liica ñapa ca binni riʼ respetu Dios! Ngue runi, biquiiñeʼ Jiobá Samuel para gabi laacabe xi guiráʼ guendanagana zápacabe pur ni canábacabe que, peru ca binni guidxi que guniʼcaʼ: «Coʼ, sínuque ti rey nga canábadu guni mandar laadu». Pur ni gunabaʼ ca binni riʼ, gulí Jiobá tu laa zanda gaca rey stícabe, ne cumu nabé ruzuubaʼ Samuel stiidxabe la? guyé ra biseendabe laa ne bindaateʼ aceite ique ni gueeda gaca rey que (1 Sam. 8:7-19).

19, 20. 1) Ñee gudicheruaa Samuel ora gudxi Jiobá laa cheʼ ra nuu Saúl ne guni laabe rey la? 2) Ximodo gucané Samuel ca israelita.

19 Peru ñee gudicheruaa Samuel ora biʼniʼ ni gudxi Dios laa la? Ñee bidaabe xiana pur ni canabaʼ ca binni que la? Pa ñaca sti binni la? nidaa xiana, peru Samuel qué ñuni sentir zacá. Cumu nánnabe Dios ngue guníʼ gaca Saúl rey stiʼ guidxi que la? ngue runi, bindaatebe aceite que ique ne dede bidiibe ti bixiduʼ laa, ne zaqué bisihuínnibe cayéchebe gulí Jiobá Saúl para gaca rey ne bisihuínnibe zúnibe ni na. Ne laaca gúdxibe ca israelita: «Maʼ biiyatu tu gulí Jiobá la? Gástiruʼ stobi casi laabe lade guiráʼ binni guidxi riʼ» (1 Sam. 10:1, 24).

20 Guníʼ ique Samuel zanda guni mandar Saúl guidxi que jneza. Lugar de ñuuyabe ra cuchee si hombre ni gulí Dios riʼ, biiyabe ca guenda ni napa. Ne qué nidaabe xiana pur bicaanáʼ ca binni ni qué ruzuubaʼ diidxaʼ que laabe, sínuque gudixhe íquebe gúnibe xhiiñaʼ Dios, casi maca huayúnibe (1 Sam. 12:1-4). Ne bíʼnirube dxiiñaʼ ni bidii Dios laabe, purtiʼ gudixhenárube ca israelita de ca cosa ni zanda gucaa laacaʼ guixélecaʼ de Jiobá ne guluube gana laacaʼ para cadi gusaanacaʼ Dios. Ne ca binni riʼ bidiicaʼ cuenta maʼ bicheenecaʼ Dios, ngue runi, gunábacaʼ laabe guni orarbe pur laacaʼ. Óraque gudxi Samuel laacabe: «Qué liica ridiʼdiʼ ndaaniʼ iqueʼ gucheeniáʼ Jiobá ra gusaana de guneʼ orar pur laatu; ne napa xidé gusiideʼ laatu satu lu neza galán ne ni jneza» (1 Sam. 12:21-24).

Ejemplu stiʼ Samuel rusiidiʼ ni laanu cadi gápanu envidia binni ne cadi gápanu xiana

21. Ximodo zanda gacané ejemplu stiʼ Samuel laanu pa nuunu triste pur bidiicabe sti binni xiixa dxiiñaʼ ni cabézanu guicaanu.

21 Ñee huayuu dxi gudiicabe sti binni xiixa dxiiñaʼ ni cabézaluʼ guicaaluʼ la? Ñee guyuuluʼ triste óraque la? Pa gúninu cásica biʼniʼ Samuel, qué ziuu dxi gudiʼnu lugar chuʼ xiana ndaaniʼ ladxidoʼno ne qué zápanu envidia laacabe (biindaʼ Proverbios 14:30). Cadi guiaandaʼ laanu: ndaaniʼ xquidxi Jiobá nuu stale dxiiñaʼ ni zanda guni ca xpínnibe ni qué guixeleʼ de laabe.

 «Dede padxí nga gusaana de chuʼluʼ triste pur Saúl pue»

22. Gunáʼ nga ca guenda sicarú ni biʼyaʼ Samuel napa Saúl.

22 Biiyaʼ Samuel napa Saúl stale guenda sicarú. Dxandíʼ, gástiruʼ stobi casi laabe. Gúcabe ti hombre nadxibalú ne nabé nuu xpiaaniʼ, ne dede ridxagayaa binni ora ruuyaʼ laabe. Ne dxi nacubi gúcabe rey, qué nudxiibabe laca laabe ne qué nuyúbibe nusisaca binni laabe (1 Sam. 10:22, 23, 27). Ne cásica guiráʼ binni, laabe laacaʼ nápabe derechu de cuibe o quixhe íquebe xi gúnibe lu xquendanabánibe (Deut. 30:19). Yanna, ñee zaguixhe íquebe gúnibe ni jneza la?

23. Xi guenda maʼ qué ñapa Saúl, ne ximodo bisihuínnibe bidxiibabe laca laabe.

23 Triste guininu ni, peru stale biaje nabé feu raca xpiaʼ binni ora gudiicabe laa guni mandar, ne primé ni rúnicaʼ nga ruchacaʼ bi yánnicaʼ. Ne ngapeʼ nga bizaaca Saúl. Qué nindaa de gúcabe rey bidxiibabe laca laabe ne maʼ qué rulábibe ora rabi Samuel laabe xi racalaʼdxiʼ Jiobá gúnibe. Ti dxi, cumu caʼruʼ guedandá Samuel para gudii ti ofrenda Dios la? bireebe gana ne maʼ laabe bíʼnibe ni, neca dxiiñaʼ riʼ ti profeta nga naquiiñeʼ gúnini. Pur ni bíʼnibe que, gudindené Samuel laabe ne gudxi laabe nin ti xiiñibe qué zaca rey. Peru qué nuzuubaʼ Saúl diidxaʼ, laga bíʼniruʼ xcaadxi cosa ni jma feu (1 Sam. 13:8, 9, 13, 14).

24. 1) Ximodo bisihuinni Saúl qué nuzuubaʼ stiidxaʼ Jiobá ora bicaalú ca amalequita. 2) Xi biʼniʼ Saúl ora bilidxe Samuel laa, ne xi guníʼ Jiobá zuni.

24 Ti dxi, biseendaʼ Jiobá Samuel ra nuu Saúl para gábibe laa gucaalú ca amalequita, gunitilú guiráʼ ni nápacaʼ ne guuti Agag, rey malu stiʼ guidxi que. Peru Saúl qué ñuuti rey que ne biaanané ca cosa galán ni gúxhacaʼ ca binni que. Ora bilidxe Samuel laabe, bidii cuenta pabiáʼ maʼ bichaabe. Lugar de nucaadiágabe conseju stiʼ profeta riʼ, laga bicabiruaabe laa ne gucaláʼdxibe nusihuínnibe jneza ngue ni bíʼnibe ne cadi naxoopeʼ ni. ¡Dede bigaanibe donda ique guidxi que! Tobi de cani guniʼbe nga gucuaabe ca cosa que para gudiibe ti ofrenda Jiobá. Óraque gudxi Samuel laabe: «Jma galán nga guzuubaʼ binni diidxaʼ que guuti maniʼ». Qué nidxíbibe ora gúdxibe rey que xi zuni Dios laa pur ni biʼniʼ: maʼ qué zácabe rey ne ziuu sti binni lugar stibe (1 Sam. 15:1-33). *

25, 26. 1) Xiñee nabé biinaʼ Samuel pur Saúl, ne xi biʼniʼ Jiobá para bichaabe modo guníʼ íquebe que. 2) Xi biziidiʼ Samuel ora guyé ralidxi Jesé.

 25 Nabé triste guyuu Samuel pur ca cosa ni cadi jneza biʼniʼ Saúl, ngue runi, guidubi ti gueelaʼ biinaʼ ne bicaa ridxi Jiobá. Biblia na guyuu yuubaʼ ladxidoʼbe dede biʼniʼ sentirbe casi ora maʼ guti Saúl. ¡Nanna pabiáʼ triste guyuube ora bíʼyabe ruchá rey riʼ bi yanni ne maʼ qué rulabi ca Ley stiʼ Dios yaʼ! Dxi ndaʼ binibiaʼbe laa rihuinni zanda guni stale cosa galán. Dede dxi que maʼ qué ñacaláʼdxibe ñuuyabe laa. Ora biʼyaʼ Jiobá nabé nuube xizaa pur ni cayuni Saúl que, né diidxaʼ nadóʼ gudxi laabe: «Dede padxí nga gusaana de chuʼluʼ triste pur Saúl pue, purtiʼ naa maʼ gulee laabe de guni mandarbe guidxi Israel. Bichá cachu stiluʼ de aceite ne guyé. Chiguseendaʼ lii ra nuu Jesé, betlemita que, purtiʼ de lade ca xiiñiʼ maʼ guliéʼ ti rey» (1 Sam. 15:34, 35; 16:1).

26 Qué rusaana Jiobá de guni ni na, neca gucheené binni guidxilayú laa. Nga runi, pa tuuxa qué náʼ guni ni na Jiobá, zanda cuibe stobi ni guzuubaʼ diidxaʼ ne guni ni racaláʼdxibe. Pur ngue, profeta gola riʼ bisaana de guʼnaʼ pur Saúl ne biʼniʼ ni gudxi Dios laa: guyebe Belén, ralidxi Jesé, para cuibe sti binni gaca rey. Ne biiyaʼ Samuel napa Jesé chupa chonna xiiñiʼ nabé sicarú rihuínnicaʼ ne guníʼ ique zanda cuí tobi de laacabe, purtiʼ guirácabe ñanda ñácacabe rey. Peru Jiobá gudxi laabe cadi nagueendaca cuibe tobi de laacaʼ purtiʼ si sicarú rihuínnicaʼ (biindaʼ 1 Samuel 16:7). De últimu beedanécabe David, ni jma nahuiiniʼ lade ca xiiñiʼ Jesé, ne laa nga bibí para gaca rey.

Biiyaʼ Samuel dxandíʼ racané Jiobá binni ora nuu xiixa ni naguu laa triste ne ora guidxaagalú xiixa guendanagana, ne dede riguube ndaayaʼ laacaʼ

27. 1) Xi gucané Samuel para guca fe stiʼ naguidxi dxi mayaca gatiʼ. 2) Ximodo ruuyaluʼ ejemplu stiʼ Samuel.

27 Xhupa xhonna iza ante gatiʼ Samuel, gunda biiyaʼ pabiáʼ jneza ngue ni gudxi Jiobá laa: cuí David para chuʼ xlugar Saúl. Yanna, xi biʼniʼ Saúl yaʼ. Gúpabe envidia David, gucananaláʼdxibe laa ne birá si ni bíʼnibe para ñuutibe laa, ne despué bidxiidéchebe Dios. Peru David gupa stale guenda sicarú: guca nadxibalú, bizuubaʼ diidxaʼ, gupa fe ne qué ñuu dxi nusaana Dios. Nabé naguidxi guca fe stiʼ Samuel ra mayaca gatiʼ. Ne laapebe biiyabe dxandíʼ racané Jiobá binni ora nuu xiixa ni naguu laa triste ne ora guidxaagalú xiixa guendanagana, ne dede riguube ndaayaʼ laacaʼ. Guidubi naca guidxi que biinaʼ ora gutiʼ Samuel. Naná guyuu ladxidóʼ ca binni que, purtiʼ biaʼ ti gayuaa iza bíʼnibe xhiiñaʼ Jiobá, ne qué ñuu dxi nucheenebe laa. Nga runi, laanu, ca xpinni Jiobá, galán guiníʼ íquenu: «Ñee zaca fe stinneʼ naguidxi casi guca fe stiʼ Samuel la?».

^ párrafo 24 Samuel peʼ biiti Agag, rey malu que, purtiʼ cadi naquiiñeʼ guiácabe laa ne binnilidxi. Gayuaa iza despué, Hamán, ti hombre ni zándaca zá de Agag, gucalaʼdxiʼ nunitilú xquidxi Dios (Est. 8:3; zadxélaluʼ ni cusiene jma de laani lu capítulo 15 ne 16 stiʼ libru riʼ).