Biiyaʼ guiraʼ ni nuu lu sitiu riʼ

guyé lu índice

 CAPÍTULO 10

Bisihuínnibe Jiobá si nga naquiiñeʼ gaca adorar

Bisihuínnibe Jiobá si nga naquiiñeʼ gaca adorar

1, 2. 1) Xi guendanagana cadiʼdiʼ ca israelita. 2) Turuʼ yendá lu dani Carmelo.

TI DXI cayuuyaʼ Elías de apena ziguiʼbaʼ ca israelita cueʼ dani Carmelo. Neca deruʼ zeedayaba xpiaaniʼ dxi, biiyaʼ dxíchibe nabé pobre ca binni que ne qué gápacaʼ ni gocaʼ. Nuucabe zaqué purtiʼ maʼ chonna iza arondaʼ de cadi cayaba nisaguié ra nuucabe.

2 Lade ca binni nuu raqué zidiʼdiʼ 450 profeta stiʼ Baal, dede ziguchacaʼ bi yánnicaʼ. Ne rihuinni dxíchica guizáʼ nanaláʼdxicaʼ Elías, ne pa ñanda si ñuuticaʼ laabe. Ca dxi que, neca maʼ biiti reina Jezabel stale xpinni Dios, peru Elías qué liica náʼ guni adorar Baal. Peru pabiaʼruʼ zuni huantarbe yaʼ. Zándaca guníʼ ique ca profeta riʼ qué zanda diʼ gucaalú ti hombre si laacaʼ, purtiʼ stálecaʼ (1 Rey. 18:4, 19, 20). Raqué nuucabe bedandá rey Acab lu carru stiʼ, ne hombre riʼ laaca nanalaʼdxiʼ Elías.

3, 4. 1) Xiñee zándaca bidxibi Elías. 2) Xi guendarinabadiidxaʼ zacábinu.

3 Dxi riʼ chiguizaaca xiixa ni qué huayuu dxi guʼyaʼ Elías lu guidubi naca xquendanabani. Zuuyaʼ dxíchibe tuu nga ni jma napa poder, pa Dios stibe la? o dios stiʼ ca profeta que. Yanna, ximodo cayuni sentirbe laga cadxiña ora guihuínnini yaʼ. Nánnanu laaca bidxíbibe, purtiʼ Biblia na «binni guidxilayú casi laanu» laabe (biindaʼ Santiago 5:17). Ne zanda guininu biʼniʼ sentir Elías stubi lucha nuu nezalú guidubi guidxi ni maʼ bicheené Jiobá que, nezalú ti rey ni maʼ bidxiideche Dios, ne nezalú ca profeta ni nuu guuti laabe (1 Rey. 18:22).

4 Peru xi bicaa guidxi Israel gudxiideche Dios, ne xi zanda guizíʼdinu de relatu riʼ yaʼ. Guidúʼyanu ximodo zanda gápanu fe casi gupa Elías, ni riguixhená que, ne laaca zadúʼyanu ximodo zanda gacané fe stinu laanu ca dxi riʼ.

Ra biluxe ti guendanagana ni guyuu maʼ xadxí

5, 6. 1) Xi guendanagana nuu ndaaniʼ guidxi Israel maʼ xadxí. 2) Ximodo bichiichi rey Acab Jiobá.

5 Biaʼ dxi bibani Elías, biiyabe ximodo bisaana ca binni de guidxi Israel de guni adorarcaʼ Jiobá, ngue ndaʼ nga ni jma naquiiñeʼ nusisaca guidxi riʼ, ne gastiʼ qué ñanda ñúnibe para cadi nudxiideche ca binni  que Dios. Maca xadxí, stale de ca israelita que bisaanacaʼ de guni adorarcaʼ Jiobá Dios para guni adorarcaʼ ca dios stiʼ ca guidxi ni dxaagacaʼ. Peru ca dxi stiʼ Elías maʼ gudidisú ca binni riʼ né ni cayúnicaʼ.

6 Guizáʼ bichiichi rey Acab Jiobá. Rey riʼ bichaganáʼ Jezabel, xiiñiʼ ti rey de Sidón. Gunaa riʼ gudixhe ique gucaa guiráʼ binni de Israel gusaana de guni adorarcaʼ Jiobá ne guni adorarcaʼ Baal. Ne Acab nagueendaca biʼniʼ guiráʼ ni na Jezabel ne bicuí ti yuʼduʼ ne ti altar para Baal. Ne laabe nga tobi de cani bizuxibi xañee dios que primé ne ca binni que laaca bíʼnicaʼ cásica bíʼnibe (1 Rey. 16:30-33).

7. 1) Xiñee nabé feu ca cosa ni biʼniʼ binni dxi biʼniʼ adorarcaʼ Baal. 2) Xiñee nanna dxíchinu cadi gadxé gadxé ni riníʼ Biblia ora ruzeeteʼ panda iza qué ñaba nisaguié ca dxi bibani Elías. (Biiyaʼ  cuadru ca.)

7 Xiñee nabé feu ca cosa ni biʼniʼ binni dxi biʼniʼ adorarcaʼ Baal yaʼ. Primé la? purtiʼ bixhéleni binni de guni adorar Dios ni dxandíʼ. Ndaaniʼ religión riʼ gucaná stale binni ne guca stale cosa dxabaʼ, purtiʼ lu ca saa ni rúnicabe ratanécabe tutiica binni ne nuu caadxi hombre ne gunaa ni ratané tutiica binni nezalú dios sticaʼ ne dede bizaaquicaʼ xiiñicaʼ lu gui para ca dios sticaʼ. Pur ni cayuni ca binni riʼ, biseendaʼ Jiobá Elías para gabi Acab qué ziaba diʼ nisaguié, ne dede ora maʼ guiníʼ profeta riʼ nga guiaba nisaguié sti biaje (1 Rey. 17:1). Gudiʼdiʼ chupa chonna iza para bibiguetaʼ Elías ra nuu rey Acab, ne ora guyebe nezalú gúdxibe laa gutagulisaa guidxi que ne ca profeta stiʼ Baal lu dani Carmelo. *

Ca dxi stinu riʼ, stale de ca cosa ni runi binni rusihuínnicani modo biʼniʼ adorárcabe Baal dxiqué

8. Xiñee naquiiñeʼ gánnanu modo biʼniʼ adorar binni Baal dxiqué.

8 Peru xi zanda guizíʼdinu de ni bizaaca riʼ yaʼ. Zándaca nuu binni riníʼ ique maʼ qué risaca gánnanu ximodo biʼniʼ adorar binni Baal dxiqué, pa maʼ gastiʼ ca yuʼduʼ ra biʼniʼ adorárcabe dios riʼ ne maʼ gastiʼ ca altar biquiiñecabe que. Neca zacá, naquiiñeʼ gánnanu de laani yanna (Rom. 15:4). Diidxaʼ baal riniʼni «xpixuaanaʼ», ngue runi Jiobá gunabaʼ xquidxi cuiʼcaʼ laabe para gácabe xpixuaanacaʼ (Is. 54:5). Cadi dxandíʼ ca dxi riʼ laaca napa binni stale cosa ni zeeda gaca casi xpixuaanaʼ lugar de Dios ni jma napa poder la? Zacá ni, binni qué runi adorar diʼ Jiobá, sínuque ruyúbicaʼ sti cosa gaca xpixuaanacaʼ, ne nisi ricá íquecaʼ gápacaʼ bidxichi, gápacaʼ ti dxiiñaʼ risaca, chizacaʼ ne chúʼnecaʼ ni cadi xheelacaʼ o gúnicaʼ xcaadxi cosa ni runi binni ni zeeda gaca casi dios sticaʼ (Mat. 6:24; biindaʼ Romanos 6:16). Ca dxi stinu riʼ, stale cosa ni runi binni rusihuinni modo biʼniʼ adorárcabe Baal dxiqué. Yanna,  chiguidúʼyanu lu historia riʼ pa Jiobá o Baal nga Dios ni dxandíʼ, ne zacaneni laanu gánnanu tu nga naquiiñeʼ guni adorarnu.

Qué guidxélacabe tupeʼ gúnicabe ni na

9. 1) Xiñee biáʼsipeʼ lu dani Carmelo nga ti lugar para guihuinni cadi jneza guni adorárcabe Baal. (Laaca zanda gúʼyaluʼ ni cá ñee yaza.) 2) Xi gudxi Elías guidxi que.

9 Dede ique dani Carmelo, zanda guʼyaʼ binni nisadóʼ Roʼbaʼ (Mediterráneo) ne valle ra ridiʼdiʼ nisa ni nuu Cisón, ne ladu guiaʼ de laani nuu ca dani stiʼ Líbano. * Peru ra ziree Gubidxa dxi nabé risaca riʼ, rihuinni nabé nabidxi nuu lu ca layú ni nuu gaxha de dani que, dxi ndaʼ bidii Jiobá ca layú riʼ ca xiiñiʼ Abrahán nabé rudiicani, peru yanna maʼ gastiʼ nuu lu ca layú riʼ pur guendahuati stiʼ xquidxi Dios. Ora  yendá Elías ranuu ca israelita que gúdxibe laacaʼ: «Dede padxí nga qué guidxélatu tupeʼ nga gúnitu ni na pue. Pa Jiobá nga Dios ni dxandíʼ la? lachinanda laabe; peru pa Baal nácani la? lachinanda laa» (1 Rey. 18:21).

10. Xiñee qué guidxela ca israelita que tupeʼ nga gúnicaʼ ni na, ne xi cosa nabé risaca biaandaʼ laacabe.

10 Xii nga gucalaʼdxiʼ Elías niníʼ ora gudxi laacabe qué guidxélacabe tupeʼ nga gúnicabe ni na yaʼ. Ca binni que caʼruʼ diʼ gudiicaʼ cuenta caquiiñeʼ cuicaʼ tu guni adorarcaʼ, Jiobá la? o Baal. Laacabe bíʼnicabe stale cosa dxabaʼ para cadi guidxiichiné Baal laacabe ne laaca gunábacabe Jiobá gapa laacabe. Zándaca guníʼ íquecabe zaguu Baal ndaayaʼ ca cosecha ne ca maniʼ stícabe, ne «Jiobá, Dios stiʼ stale binni nanda guiibaʼ» zacané laacabe ora maʼ cadindenécabe sti guidxi (1 Sam. 17:45). Peru biaandaʼ laacabe ti cosa nabé risaca, ti cosa ni riaandaʼ stale binni yanna: Jiobá qué riuulaʼdxiʼ diʼ guni adorárcabe sti dios ora maʼ cayuni adorárcabe laa. Dios ni bizáʼ laanu rinabaʼ guni adorarnu laa si. Nga runi, ora guni adorarnu laabe ne laaca guni adorarnu sti dios la? qué riuuláʼdxibe ni ne dede ruchiichini laabe (biindaʼ Éxodo 20:5).

11. Xi rucaa cani guníʼ Elías lu dani Carmelo que laanu gúninu.

11 Ca israelita qué gánnadicaʼ tupeʼ nga gúnicaʼ ni na, casi ora ñacalaʼdxiʼ tuuxa nizá lu chupa neza tobi si tiru. Ca dxi stinu riʼ, stale binni zacaca rúnicaʼ, purtiʼ runi adorarcaʼ stale dios ni zeeda gaca casi Baal ne chaahuiʼ chaahuiʼ rusaanacaʼ de guni adorarcaʼ Dios. Ca diidxaʼ gudxi Elías ca israelita que rucaacani laanu guiníʼ íquenu xii nga ni jma cusisácanu lu xquendanabáninu ne zacanécani laanu guidúʼyanu ximodo cayuni adorarnu Jiobá.

Chiguihuinni tuu nga Dios ni dxandíʼ

12, 13. 1) Xi gunabaʼ Elías cani ruzaaquiʼ guʼxhuʼ stiʼ Baal. 2) Ximodo zanda gusihuínninu runi crenu Jiobá cásica biʼniʼ Elías.

12 Yanna, gunabaʼ Elías cani ruzaaquiʼ guʼxhuʼ stiʼ Baal ti cosa ni cadi liica nagana. Gúdxibe laacaʼ gúnicaʼ ti altar, ne quíxhecaʼ ti ofrenda luni ne despué guni orarcaʼ dios sticaʼ ne guinábacaʼ laa gucaaguí ni. Ne Elías laaca zuni zaqueca. Xi para yaʼ. Laca laabe guniʼbe sicaríʼ: «Ni guicabi ne gui nga nga Dios ni dxandíʼ». Peru Elías nanna dxichi tuu nga Dios ni dxandíʼ ne cumu nabé naguidxi fe stibe la? gunábabe cani ruzaaquiʼ guʼxhuʼ stiʼ Baal gucaacaʼ ridxi dios sticaʼ primé. Ngue runi, despué de gulicaʼ ti yuze para gudiicaʼ ofrenda, bizulucaʼ cucaacaʼ ridxi Baal (1 Rey. 18:24, 25). *

 13 Ca dxi stinu riʼ, maʼ qué raca diʼ milagru casi dxiqué. Peru cumu caʼruʼ guchaa Jiobá la? zanda guni crenu laabe cásica biʼniʼ Elías. Casi ora chuʼ tuuxa guiníʼ cadi jneza ni na Biblia la? cadi naquiiñeʼ diʼ guidxíbinu ora guiníʼcabe ni riníʼ íquecabe. Naquiiñeʼ gúninu casi biʼniʼ Elías, gusaananu ca cosa ca lu náʼ Dios ni dxandíʼ ne cadi gúninu modo rábinu. Ximodo zanda gúninu nga yaʼ. Ra gudiʼnu lugar gabi Stiidxaʼ Dios laanu xi gúninu, purtiʼ laani gucuani «para gabi ni laanu paraa cuchéʼ nu» (2 Tim. 3:16).

Rihuinni dxíchica biiyaʼ Elías cadi dxandíʼ dios ni cayuni adorárcabe, ne gucaláʼdxibe guʼyaʼ xquidxi Dios zaqué ni

14. Ximodo biʼniʼ burla Elías ca profeta stiʼ Baal, ne xiñee bíʼnibe ni.

14 Ca profeta stiʼ Baal que gudíxhecaʼ ofrenda sticaʼ lu altar ne bizulú cucaacaʼ ridxi dios sticaʼ ne nacaʼ: «¡Baal, bicabi laadu!» ne zaqué bíʼnicaʼ chupa chonna hora. Peru Biblia na: «Guirutiʼ tu nicabi laacabe». Biaʼ galaa dxi bizulú Elías cayuni burla laacabe ne gudxi laacabe zándaca nuu xhiiñaʼ Baal para guicabi laacabe, o zándaca zeʼ ti guriá guiʼxhiʼ o nisiaasiʼ ne caquiiñeʼ chigucuaanicabe laa. Elías rabi ca xhenemigu: «Lagucaa ridxi biaʼ gándatiʼ». Rihuinni dxíchica biiyaʼ Elías cadi dxandíʼ diʼ dios ni cayuni adorárcabe, ne racaláʼdxibe guʼyaʼ xquidxi Dios zaqué ni (1 Rey. 18:26, 27).

15. Ximodo bisihuinni cani ruzaaquiʼ guʼxhuʼ stiʼ Baal cadi liica jneza gucaanáʼ binni Jiobá casi xpixuaanaʼ.

15 Ora binadiaga ca profeta stiʼ Baal ni guníʼ Elías que la? jmaruʼ si guca lúgucaʼ ne bizulucaʼ «bicaacaʼ ridxi biaʼ gúndatiʼ ne bichuugucaʼ ládicaʼ ne puñal ne lanza casi maca biaacabe gúnicabe, dede gúzecabe rini». Peru qué niquiiñeʼ diʼ guiráʼ ni bíʼnicabe que, purtiʼ «guirutiʼ tu nicabi ne guirutiʼ tu nucaadiaga laacabe» (1 Rey. 18:28, 29). Zaqué bihuinni cadi dxandíʼ diʼ nuu Baal, sínuque biquiiñeʼ si Binidxabaʼ ni para guxheleʼ binni de Jiobá. Yanna, xi rusiidiʼ ni laanu yaʼ. Rizíʼdinu gastiʼ sti Dios casi Jiobá ne tu guni adorar sti dios la? despué zudii cuenta cadi dxandíʼ ni ne zatuilú (biindaʼ Salmo 25:3; 115:4-8).

Bihuinni tuu nga Dios ni dxandíʼ

16. 1) Xi zándaca bietenalaʼdxiʼ ca israelita ora bíʼyacaʼ altar stiʼ Jiobá ni biʼniʼ chaahuiʼ Elías. 2) Ximodo bisihuinni Elías dxandíʼ runi cré Jiobá.

16 Biaʼ ziyaaziʼ Gubidxa maʼ raca caber Elías gudii ofrenda stiʼ. Primeru biʼniʼ chaahuibe ti altar para Jiobá ni binidé ca xhenemigu Dios. Biquiiñebe doce guié, zándaca para guietenalaʼdxiʼ ca binni de chii tribu que naquiiñeruʼ chinándacaʼ Ley ni bidii Dios Moisés para  ca doce tribu stiʼ Israel. Elías gudixhe chaahuiʼ ofrenda ni chigudii Jiobá, ne bigadxe daatabe ni, ne zándaca yecaabe nisa que ndaaniʼ nisadóʼ Mediterráneo, ni riaana gaxha de raqué. Ne bíʼnibe ti zanja guidubi buelta altar que ne bichá típabe ni de nisa. Bíʼnibe stale cosa para cadi guicá guí ofrenda stibe, ne cadi casi biʼniʼ cani ruzaaquiʼ guʼxhuʼ stiʼ Baal. Ne bíʼnibe zaqué, purtiʼ biʼniʼ crebe de guidubi ladxidoʼbe napa Dios stibe poder (1 Rey. 18:30-35).

Lu oración ni biʼniʼ Elías bisihuinni nuu xizaa pur ca israelita ne gucalaʼdxiʼ nibiguetaʼ ca binni que ra nuu Jiobá

17. Ximodo bisihuinni oración ni biʼniʼ Elías xii nga ca cosa ni jma naguu xizaa laa, ne ximodo zanda gúninu cásica bíʼnibe ora guni orarnu.

17 Despué, biʼniʼ Elías ti oración Jiobá ra guníʼ xii nga ca cosa ni jma naguu xizaa laa. Ni guniʼbe primé ne ni jma risaca para laabe nga ganna binni Jiobá si nga tobi lucha Dios stiʼ guidxi Israel ne cadi Baal diʼ. Guiropa cosa guníʼ Elías nga ganna binni laabe nácabe ti siervu si stiʼ Jiobá, ne Dios si nga naquiiñeʼ gusisácacabe. Ne maʼ para guilúxebe oración que guniʼbe nuube xizaa pur guidxi que, ne racaláʼdxibe gudxiguetaʼ Jiobá ca binni que ranuu ne gaca arrepentircaʼ (1 Rey. 18:36, 37). Neca maʼ bizaaca jma desgracia pur bicheené ca binni que Dios la? nadxiiruʼ Elías laacabe. Yanna, xi zanda guininu de ca oración stinu yaʼ. Ñee laaca rusihuínnicani rusisácanu lá Dios, qué rudxíʼbanu laca laanu ne rianu ca binni ni caquiiñeʼ tu gacané laacaʼ la?

18, 19. 1) Ximodo bicabi Jiobá oración stiʼ Elías. 2) Xi gudxi Elías ca binni que gúnicaʼ, ne xiñee cadi naquiiñeʼ guiácabe cani ruzaaquiʼ guʼxhuʼ stiʼ Baal.

18 Ora bizulú Elías biʼniʼ orar, zándaca guníʼ ique ca binni nuu raqué laaca qué zuni Jiobá xiixa, cásica qué ñanda ñuni Baal xiixa. Peru biluxe biʼniʼ orar si Elías la? maʼ qué niníʼ íquecabe zaqué. Xiñee yaʼ. Purtiʼ relatu riʼ na: «Óraque, bisaba Jiobá gui ne bizaaquini maniʼ que ne yaga, guié, ne yú, ne bicuiidxini nisa daʼ ndaaniʼ zanja» que (1 Rey. 18:38). ¡Aque guendaridxagayaa modo bicabi Jiobá xa! Xi biʼniʼ ca binni que óraque yaʼ.

«Óraque, bisaba Jiobá gui»

19 Guiráʼ ca binni que bicaacaʼ ridxi ne nacaʼ: «¡Jiobá nga Dios ni dxandíʼ! ¡Jiobá nga Dios ni dxandíʼ!» (1 Rey. 18:39). Oraqueruʼ biiyaʼ guidxi que tuu nga Dios ni dxandíʼ. Ñee cusihuínnicabe maʼ nápacabe fe, purtiʼ si guníʼcabe Jiobá nga Dios ni dxandíʼ despué de biiyacabe biaba guí de guibáʼ la? Coʼ, cadi zaqué diʼ ni. Ngue runi, gunabaʼ Elías ca binni que gusihuínnicaʼ dxandíʼ nápacaʼ fe. Ximodo yaʼ. Ra chinándacaʼ ni na Ley stiʼ Jiobá, purtiʼ ngue nga ni naquiiñeʼ  ñúnicabe maʼ xadxí. Ne Ley stiʼ Jiobá que na naquiiñeʼ gatiʼ cani cadi dxandíʼ naca profeta ne cani runi adorar bidóʼ (Deut. 13:5-9). Cani ruzaaquiʼ guʼxhuʼ stiʼ Baal que nabé gucananaláʼdxicaʼ Jiobá ne gucaláʼdxicaʼ nucueezacaʼ ni naguixhe íquebe gúnibe. Yanna, ñee ziaʼ Jiobá laacabe ne zutiidilaʼdxiʼ donda stícabe pa laacabe que liica ñácabe ca baʼduhuiiniʼ ni bicaa guícabe para Baal que la? (Biindaʼ Proverbios 21:13; Jer. 19:5.) Ne ni biʼniʼ ca hombre riʼ cadi caquiiñeʼ chuʼ tu guiá laacaʼ. Ngue runi, Elías biʼniʼ mandar gáticabe, ne guidxi que bizuubaʼ stiidxabe (1 Rey. 18:40).

20. Xiñee cadi jneza ni riníʼ cani ruundaʼ de historia de dxi gutiʼ cani ruzaaquiʼ guʼxhuʼ stiʼ Baal.

20 Ca dxi nabáninu riʼ, stale binni ni ruundaʼ de historia riniʼcaʼ cadi jneza diʼ modo biluxe relatu riʼ lu dani Carmelo. Nuu tu riuu xizaa cadi málasi gucaa historia riʼ binni guni cásica bíʼnicabe dxi que. Nabé triste guininu ni, peru nuu stale religión rúnicaʼ cásica bíʼnicabe. Peru ni biʼniʼ Elías nga bizuubaʼ stiidxaʼ Jiobá ne biʼniʼ mandar gatiʼ cani cayuni guendaquéiquiiñeʼ. Peru cani dxandíʼ xpinni Cristu la? nánnacaʼ qué zanda diʼ iquiiñecaʼ guiibaʼ para gucaalucaʼ ca xhenemigu Jiobá cásica biʼniʼ Elías. Dxi beeda Jesús lu Guidxilayú la? guniʼbe ximodo naquiiñeʼ guni ca xpínnibe ora gúdxibe Pedru: «Guluu espada stiuʼ jlugar, purti irá ni cuʼ ná espada la? zati né espada» (Mat. 26:52). Qué zandaa diʼ zaquiiñeʼ Jiobá Jesucristu para guuti guiráʼ ca xhenemigu.

21. Xiñee naquiiñeʼ gaca fe stinu naguidxi cásica guca fe stiʼ Elías.

21 Laanu, cani dxandíʼ nácanu xpinni Cristu naquiiñeʼ gusihuínninu nápanu fe Dios pur modo nabáninu (Juan 3:16). Ne Elías bisaana ti ejemplu galán para laanu. Laabe biʼniʼ adorarbe Jiobá si ne guluube gana binni guni casi cayúnibe. Laaca qué nidxíbibe binni ora bisihuínnibe nezalucaʼ ximodo biquiiñeʼ Binidxabaʼ ti religión para guxheleʼ binni de guni adorar Jiobá. Elías biʼniʼ cré zacané Jiobá laa para gusihuinni laabe nga Dios ni naquiiñeʼ gaca adorar ne qué niníʼ ique diʼ laa si zanda gúnini. Rihuinni dxíchica bicaalú Elías ca binni que ti gusihuínnibe Jiobá si nga naquiiñeʼ gaca adorar. Nga runi, galán gaca fe stinu naguidxi cásica guca fe stiʼ Elías.

^ párrafo 7 Biiyaʼ cuadru ni láʼ: « Panda iza qué ñaba nisaguié».

^ párrafo 9 Nabé nagaʼ riuu dani Carmelo. Xiñee yaʼ. Cumu nabé rundubi bi nisa neza ra nuuni la? ngue runi nabé riaba nisaguié ne gupa luni. Ne cumu ca binni que nacaʼ Baal nga rusaba nisaguié la? zándaca lu dani Carmelo que nga ti lugar ra biʼniʼ adorar binni laabe. Nga runi, cumu nabidxi nuu lu dani riʼ yanna la? biáʼsipeʼ modo nuuni que para guihuinni pur gana si ngue runi adorar binni Baal.

^ párrafo 12 Gudxi Elías cani ruzaaquiʼ guʼxhuʼ stiʼ Baal cadi gucaaguicaʼ ofrenda que. Xiñee guniʼbe zaqué yaʼ. Ca binni ni nanna de historia nacaʼ ca binni ni biʼniʼ adorar ca dios sticaʼ dxiqué guyuu biaje bíʼnicaʼ ti huecu xaʼnaʼ ca altar ni biquiiñecaʼ ne raqué nga rucaaguicaʼ ofrenda que ti guihuinni casi ora dios sticaʼ bicaaguí ni.