Biiyaʼ guiraʼ ni nuu lu sitiu riʼ

guyé lu índice

 CAPÍTULO 21

Biziidibe gácabe ti hombre nadxibalú

Biziidibe gácabe ti hombre nadxibalú

1-3. Xi ti cosa nabé risaca biʼyaʼ Pedru dxi que, ne xiñee nagana guca gueelaʼ que para laabe.

TI GUEELAʼ nuu Pedru lu nisadóʼ stiʼ Galilea ne cayuni stipa para guni remar. Málasi de zitu biiyabe ti xtuxhu lu nisa que. Ñee mayaca guirá gueelaʼ ngue la? Guizáʼ reciu cadxelasaa ca ola que canuá stibe. Bi yooxhoʼ cadxelasaa lube que jmaruʼ si reciu caguiñentaani nisadóʼ que. Maʼ nadxéʼ daataʼ xhaba Pedru ne dede maʼ cayuubaʼ ladi, neca zaqué, cadi cayaanadxí de guni remar.

2 Nécapeʼ nuu xcaadxi discípulo ndaaniʼ canuá que la? qué guinni diʼ Jesús ra nuucabe, purtiʼ biaana guriá nisa. Dxi queca nga biiyaʼ Pedru biʼniʼ Maestru stiʼ ti milagru ra biyaanaʼ mil de binni ora bitale caadxi pan ne chupa chonna benda. Pur ngue gucalaʼdxiʼ ca binni que ñúnicaʼ laabe rey. Peru laabe maʼ gudixhe íquebe cadi chuʼbe lade política, ne ngueca racaláʼdxibe gusiidibe ca discípulo stibe. Ngue runi, bixooñebe de laacaʼ ne gúdxibe ca apóstol stibe quíbacaʼ ndaaniʼ canuá que ne checaʼ chericaʼ nisa. Laga zecaʼ, gudxíʼbabe lu ti dani para guni orarbe stúbibe (Mar. 6:35-45; biindaʼ Juan 6:14-17).

3 Ora biree ca discípulo que, maʼ guiaʼ cá beeu ne mayaca gúnini llena, peru yanna maʼ ziyaaziʼ ni neza ra riaaziʼ Gubidxa. Neca guidubi gueelaʼ biʼniʼ remárcabe, deruʼ chupa chonna kilómetru guzá canuá que lu nisa. Guizáʼ cayúnicabe stipa para gudxiilúcabe nisadóʼ que, ne cumu reciu cundubi bi ne dede candísani ca ola que la? qué gándapeʼ gunadiagasaacabe xi caníʼcabe. Ngue runi, zándaca stale cosa caníʼ ique Pedru.

Nécapeʼ maʼ biziidiʼ Pedru stale de Jesús chupa iza ni gudiʼdiʼ ca, nanna caquiiñeruʼ guiziidiʼ

4. Xiñee naca Pedru ti ejemplu galán para laanu.

4 Cumu jma de chupa iza nga de canazané Pedro Jesús de Nazaret  ne nabé stale cosa maʼ bizaaca lu ca iza ca la? nga runi nápabe stale ni guiníʼ íquebe. Nécapeʼ maʼ biziidibe stale, nánnabe caquiiñeruʼ guiziidibe. Racalaʼdxiʼ Pedru guiziidiʼ jma ne gaca ti hombre nadxibalú. Xiñee yaʼ. Purtiʼ racaláʼdxibe gácabe ti discípulo chaʼhuiʼ, ne pur nga beeda gácabe ti ejemplu galán para laanu. Yanna, guidúʼyanu ximodo bíʼnibe ni.

«Ma bidxela du Mesías»

5, 6. Ximodo bibani Pedru.

5 Qué ziuu dxi gusiaandaʼ Pedru dxi binibiáʼ Jesús de Nazaret. Andrés bíʼchibe nga gudxi laabe ca diidxaʼ riʼ: «Ma bidxela du Mesías». Qué liica niníʼ íquebe pabiáʼ zuchaa xquendanabánibe dede óraque (Juan 1:41).

6 Guleza Pedru Capernaum, ti guidxi nuu guriá nisadóʼ stiʼ Galilea, ti laguna de nisa naxhi. Laabe ne Andrés gúpacabe ti negocio de benda ne Santiago ne Juan, ca xiiñiʼ Zebedeu. Ne laaca ralidxi Pedru ne xheelaʼ nga nabeza suegra ne Andrés. Para ganda guyaanaʼ ca hombre runi guuzeʼ benda que familia sticaʼ la? naquiiñeʼ gúnicaʼ dxiiñaʼ nagueenda, gácacaʼ nadipaʼ ne gúnicaʼ xhiiñacaʼ jneza. Qué ridxagayaanu gánnanu bíʼnicabe dxiiñaʼ guidubi gueelaʼ sin guiziiláʼdxicabe. Ora maʼ cayúnicabe guuzeʼ la? rundaacabe chin stícabe ne riquiiñecabe chupa canua para ganda guindísacabe ni ti cueecabe ca benda ni ganda guinaazecabe. Peru siadóʼ que runirúcabe dxiiñaʼ, purtiʼ naquiiñeʼ cuícabe ca benda que ne gutoocabe laacame, laaca naquiiñeʼ gusiácabe ca chin que ne guni chaahuicabe cani.

7. Xi gunna Pedru de Jesús, ne xiñee nabé risaca ni.

7 Yanna, ximodo beeda gaca Pedru xpinni Jesús yaʼ. Biblia maca ruzeeteʼ guca Andrés bíʼchibe discípulo stiʼ Juan ni Riguunisa. Zándaca gúdxibe Pedru guiráʼ ni riziidibe de Juan ne nabé guyuulaʼdxiʼ Pedru gucaadiaga laabe. Peru ti dxi gúdxicabe Andrés ti cosa nabé risaca. Biluiʼnáʼ Juan Jesús de Nazaret, ne guníʼ: «Ndi nga Dendxu huiini sti Dios». Oraqueca yenanda Andrés Jesús, ne cumu nabé cayéchebe la? yeyúbibe Pedru para gábibe laa maʼ bedandá Mesías que (Juan 1:35-41). Biaʼ tapa mil iza ante, dxi bidxiidéchecabe Dios ndaaniʼ jardín ni guyuu Edén, maca guníʼ Jiobá Dios zuseendaʼ tuuxa risaca para gusiidiʼ binni ximodo guilá (Gén. 3:15). Ne biáʼsipeʼ Mesías ni maca bieeteʼ ne ni chigulá binni que nga ni deruʼ binibiáʼ Andrés. Ora gunna Pedru ni, biree guxooñeʼ ziguuya laabe.

8. Xi riníʼ lá bidii Jesús Pedru, ne xiñee nuu tu riníʼ cadi biaʼsi diʼ lá que para laabe.

8 Ca dxi que jma binibiáʼ binni Pedru casi Simón, o Symeón. Peru primé biaje biiyaʼ Jesús laabe gudxi laabe: «Lii nga Simón, xiiñi Jonás njaʼ, peru ma chi iree lá lu Cefas (didxazá la? ñabi be laa Pedru)» (Juan 1:42). Zándaca gudxi Jesús laabe zacá pur ni gueeda gúnibe despué,  purtiʼ «Cefas» riniʼni «guié». Nga runi, zanda guininu biiyabe zeeda gaca Pedru casi ti guié ngola, tuuxa ni naguidxi ne zanda guni crécabe laa, ni gacané ca xpínnibe guzuhuaa dxiichiʼ. Peru ñee zaqueca ruuyaʼ Pedru laa la? zándaca coʼ. Dede nuu binni, despué de guʼndaʼ ca Evangeliu ca, riníʼ qué liica nusihuínnibe pa zacá laabe. Ne nuu tu riníʼ gúcabe ti hombre ni qué ñanda ñuni xiixa dxiiñaʼ stubi, ne qué nidxela xi ñuni ora bidxaagalú xiixa guendanagana.

9. Xii nga ni ruuyaʼ Jiobá ne Jesús de binni, ne xiñee naquiiñeʼ guni crenu ruuyabe ca cosa galán ni rúninu.

9 Jesús maca nanna nuu ra ruchee Pedru. Peru cásica Bixhózebe, riuuláʼdxibe gúʼyabe xii nga ca cosa ni jma galán runi binni. Nga runi, nánnabe zanda guni Pedru stale cosa galán ne rápabe gana gacanebe laa gusihuinni ca guenda ni jma sicarú napa. Yanna riʼ, laaca ngaca nga ni runi Jiobá ne Jesús, jma ruuyacabe ca cosa galán ni rúninu. Peru xi zanda gúninu pa laapenu riníʼ íquenu qué zadxélacabe gastiʼ ni chuuláʼdxicabe de laanu yaʼ. Neca zacá, naquiiñeʼ gánnanu ruuyacabe ca cosa galán ni rúninu, ne gudiʼnu lugar gusiidicabe laanu ne gacanécabe laanu guchaʼnu modo laanu cásica biʼniʼ Pedru (biindaʼ 1 Juan 3:19, 20).

«Cadi idxibi luʼ»

10. Xi cosa risaca biʼyaʼ Pedru, ne xi dxiiñaʼ bibiguetaʼ bíʼnibe.

10 Binibiáʼ si Pedru Jesús, zándaca yenebe laa chupa chonna lugar ra yegucheeche diidxaʼ. Ngue runi, zándaca biiyabe primé milagru biʼniʼ Jesús ora biʼniʼ nisa que vinu dxi nuucabe ra ti guendaxheelaʼ ni guca guidxi Caná. Ne ni jma risaca bíʼnibe nga, bicaadiágacabe ca diidxaʼ sicarú ni guníʼ Jesús de Reinu stiʼ Dios. Peru despué bisaanabe Jesús ne bibiguetaʼ bíʼnibe negocio benda. Gudiʼdiʼ si chupa chonna beeu bidxaaga Pedru Jesús, peru biaje riʼ maʼ biʼniʼ invitar Jesús laabe chinándabe laa biaʼ dxi guibánibe.

11, 12. 1) Ñee gunaazeʼ Pedru benda gueelaʼ que la? 2) Xi zándaca caníʼ ique Pedru laga cucaadiaga Jesús.

11 Guyé Pedru guuzeʼ gueelaʼ ante guʼyaʼ Jesús que, peru gastiʼ qué ninaazeʼ. Laabe ne ca xcompañérube maʼ bisábacabe chin stícabe stale biaje, peru gastiʼ cabeecabe cada biaje gutópacabe ni. Cumu maʼ xadxí nga de rié Pedru guuzeʼ la? zándaca maʼ bisaba chin stiʼ stale lugar ndaaniʼ nisa, ra riníʼ ique zanaazeʼ benda. Zándaca dede guyuu ora gúpabe gana ñuuyabe ndaaniʼ nisa que paraa nuu ca benda que ne nuyúbibe modo nicacaʼ lu chin stibe. Pa guníʼ íquebe zacá la? jmaruʼ si guleeni gana laabe. Ne laabe qué rieedibe guuzeʼ purtiʼ si riuuláʼdxibe, sínuque rúnibe ni purtiʼ napa xidé gudiibe ni caquiiñeʼ binnilídxibe. Cumu qué ninaazebe gastiʼ la? guizáʼ triste bibiguétabe guriá nisa que, ne bizulú cusiabe chin stibe. Óraque nga bedandá Jesús.

Ñanda nidiʼdiʼ Pedru dxi ne gueelaʼ ne qué niree gana nucaadiaga Maestru stiʼ ora maʼ caníʼ de Reinu stiʼ Dios, ne laani nga ni jma bisiidibe binni ora bicheechebe diidxaʼ

 12 Stale binni zeeda ranuu Jesús para gucaadiágacaʼ ni cusiidibe. Cumu gurí zisi ca binni que laabe la? ngue runi gudxíʼbabe ndaaniʼ canuá stiʼ Pedru ne gúdxibe laa guixeleʼ huiiniʼ de guriá nisa que, purtiʼ dede lu nisa que nga jma nayaʼniʼ zunadiágacabe ni guiniʼbe. Cásica cayuulaʼdxiʼ Pedru guiráʼ ni caníʼ Jesús zaqueca cayuulaʼdxiʼ ca binni ni zuhuaa guriá nisa que cani caniʼbe. Ñanda nidíʼdibe dxi ne gueelaʼ ne qué nireebe gana nucaadiágabe Maestru stibe ora maʼ caníʼ de Reinu stiʼ Dios, ne laani nga ni jma bisiidibe binni ora bicheechebe diidxaʼ. ¡Ti ndaayaʼ naroʼbaʼ ngue guninebe Cristu dxiiñaʼ para guireeche ca diidxaʼ sicarú que ra nuu guiráʼ binni! Peru ñee zanda gúnibe dxiiñaʼ riʼ la? Xi zanda gúnibe para gudiibe ni guibaniné binnilídxibe yaʼ. Zándaca bietenaláʼdxibe qué ninaazebe nin ti benda gueelaʼ gudiʼdiʼ que (Luc. 5:1-3).

13, 14. Xi milagru biʼniʼ Jesús pur Pedru, ne xi biʼniʼ sentir Pedru.

13 Biluxe bisiidiʼ si Jesús ca binni que, gúdxibe Pedru: «Yené canuá stiuʼ ra ziaʼ, ne lausaba starraya tu para inaaze tu benda». Neca huaxiéʼ cayuni cré Pedru laabe, guníʼ: «Maistru, idubi gueela bini du dxiiña ne gasti qué ninaʼze du, peru yáquexa lii cayaʼbu laadu guni du ni la? chi usaba du starraya du». Zándaca óraque maʼ qué liica gapa Pedru gana guni guuzeʼ, purtiʼ maʼ bisiá chin stiʼ ne maʼ cadi ora rigaa benda ngue. Neca zaqué, bizuubabe stiidxaʼ Jesús ne zándaca gúdxibe ca hombre ni nuu ndaaniʼ sti canuá que chinándacaʼ laabe (Luc. 5:4, 5).

14 Ora bizulú Pedru ne ca xcompañeru cutópacaʼ chin sticaʼ la? biʼniʼ sentircaʼ nanaani, ngue runi bizulú gudubayucaʼ ni né gana. ¡Guizáʼ bidxagayaacabe! ¡Dxaʼ tipa ni de benda! Oraqueca bicaacabe ridxi xcaadxi hombre nuu ndaaniʼ sti canuá que para gacanecaʼ laacabe. Cumu stale benda ngue la? qué nindaa bidxá tipa ca canuá que, dede biaʼ qué guiaaziʼ si cani purtiʼ nabé maʼ nanaa nuu cani. Qué guirá guni cré Pedru ni. Neca maʼ huayuuyabe xcaadxi biaje pabiáʼ poder napa Jesús, milagru riʼ jma bicaani laabe guiníʼ íquebe. ¡Nuube nezalú ti hombre ni zanda guidxela modo guicá ca benda que lu chin! Tantu bidxibi Pedru, bizuxibi xañee Jesús ne na: «Bixele de naa, Señor, purti naca tobi hombre nabé ruchee». Racá ridúʼyanu guníʼ íquebe huaxiéʼ risácabe para chuʼbe gaxha de Mesías, hombre ni napa poder stiʼ Dios (biindaʼ Lucas 5:6-9).

«Señor, [...] naca tobi hombre nabé ruchee»

15. Xi biʼniʼ Jesús para biluíʼ Pedru maʼ cadi naquiiñeʼ guidxibi.

15 Peru né diidxaʼ nadóʼ gudxi Jesús laabe: «Cadi idxibi luʼ. Dede yanadxí cásica rinaaze lu benda, zacaca zeda neu stale binni ra nuaaʼ»  (Luc. 5:10, 11). Maʼ cadi naquiiñeʼ diʼ guidxíbibe, purtiʼ Jesús peʼ nga cayuni invitar laabe chinebe laa para gúnicabe ti dxiiñaʼ ni qué huayuu dxi gaca. Maʼ qué gapa Pedru xidé cuʼ xaíque ximodo guidxela ni guibaniné binnilidxi. Laaca maʼ qué gápabe razón para chuʼbe xizaa pur ni qué zanda gúnibe ne pur nácabe binni ruchee. Zanda guni crebe rutiidilaʼdxiʼ Jiobá, Dios stiʼ Jesucristu, «guiráʼ donda» stiʼ binni (Is. 55:7). Ne laaca nanna dxíchibe zanda gudii guiráʼ ni caquiiñebe para guibaninebe ne para chuʼbe jma gaxha de laa (Mat. 6:33).

16. Xi biʼniʼ Pedru, Santiago ne Juan ora biʼniʼ invitar Jesús laacaʼ gúnicaʼ ti dxiiñaʼ risaca, ne xiñee nánnanu jneza ni gudixhe íquecaʼ.

16 Oraqueca ziné Pedru laabe, ne ngueca nga ni biʼniʼ Santiago ne Juan. Biblia na: «Ulee si cabe ca canuá que lu yuxi, bisaana cabe irá ni raqué, zinanda cabe Jesús» (Luc. 5:11). Rihuinni dxíchica gudixhe  ique Pedru guni ti cosa ni jma risaca: gapa fe Jesús ne Dios ni biseendaʼ laa. Ca dxi stinu riʼ, ca xpinni Cristu laaca rúnicaʼ stipa pur gácacaʼ nadxibalú ne gusihuínnicaʼ nápacaʼ fe, ti ganda gúnicaʼ ni na Jiobá. Ne laaca naquiiñeʼ gánnacabe qué ziuu dxi gusaana Jiobá, Bixhózecabe ni nuu guibáʼ, laacabe (Sal. 22:4, 5).

«Xiñee bidxibi lu»

17. Xi guiráʼ maʼ biiyaʼ Pedru biʼniʼ Jesús chupa iza ni maʼ gudiʼdiʼ.

17 Maʼ gudiʼdiʼ chupa iza dede dxi binibiáʼ Pedru Jesús. Casi bizéʼtenu ra bizulú capítulo riʼ, Pedru ne ca xcompañeru cayúnicaʼ stale stipa para ganda guni remarcaʼ, purtiʼ gueelaʼ que nabé naroʼbaʼ ca ola candisaʼ bi yooxhoʼ que lu nisadóʼ stiʼ Galilea. Qué zanda diʼ gánnanu xipeʼ nga caníʼ ique Pedru óraque, peru maʼ bizaacabe stale cosa ni guietenaláʼdxibe. Maʼ huayuuyabe chupa chonna milagru biʼniʼ Jesús. Casi dxi guca huará suégrabe, biiyabe modo bisianda Jesús laa. Laaca maʼ bicaadiaga Pedru guiráʼ ni maʼ bisiidiʼ Jesús, casi cani guniʼbe lu libana ni bidiibe lu dani que. Pur guiráʼ ni maʼ biiyaʼ Pedru, maʼ zanda guni cré Jesús nga Mesías, ni gulí Jiobá. Ra gudiʼdiʼ ca beeu que maʼ bichaabe stale, maʼ cadi nagueendaca ridxíbibe. Ngue runi, dede gulí Jesús laabe para gácabe tobi de ca 12 apóstol stiʼ. Neca zacá, caquiiñeruʼ guni Pedru stipa para cadi guidxibi, casi chiguidúʼyanu.

18, 19. 1) Xi biʼyaʼ Pedru lu nisadóʼ stiʼ Galilea. 2) Xi biʼniʼ Jesús ora gunabaʼ Pedru laa sáʼ lu nisa.

18 Nacándaruʼ nga ora nuucabe lu nisadóʼ que, zándaca biaʼ las tres o maʼ zirá gueelaʼ, málasi de zitu biiyaʼ Pedru caniibi xiixa lu nisa que. Oraqueca biásabe para guʼyaʼ chaahuibe xii ni. Ñee xtuxhu beeu que nga rihuinni lu ca ola ngola que la? Coʼ, cadi ngue diʼ ni, sínuque ruluiʼni ti bultu ni zedazá né gana. Ora biʼyaʼ chaahuibe ni la? dede qué ganda guni crebe ni: ¡ti hombre ngue zedazá lu nisadóʼ que ne chitiidiʼ gaxha de laacabe! Bidxibi ca discípulo que, dede guníʼ íquecaʼ ti fantasma ngue. Peru hombre que gudxi laacabe: «Lachuu dxí. Cadi idxibi tu, naa ndiʼ». Jesús peʼ ngue caniʼné laacabe (Mat. 14:25-28).

19 Óraque bicabi Pedru: «Señor, pa lii nga la? guridxi naa guenda ra nuu luʼ, saya lu nisa». Ora bíʼyabe milagru que, guizáʼ bidxagayaabe ne maʼ qué nidxíbibe, ngue runi rápabe gana sabe lu nisa que ti iguidxi fe stibe. Né diidxaʼ nadóʼ gudxi Jesús laabe chebe ranuu. Qué liica nidxibi Pedru, casi zeʼ bieeteʼ de ndaaniʼ canuá que ne bizuhuaa lu nisa que. Ñee ruxuíʼluluʼ xi biʼniʼ sentirbe la? ¡Cadi cayaazidibe ndaaniʼ nisa que laga zebe ranuu Jesús! Guizáʼ bidxagayaabe ni cayaca que, peru málasi biʼniʼ sentirbe sti cosa (biindaʼ Mateo 14:29).

«Biiya si Pedru pabiáʼ reciu nuu bi que la? bidxibi»

20. 1) Xi ti cosa ni cadi jneza biʼniʼ Pedru, ne xi bizaaca. 2) Xi gudxi Jesús Pedru.

20 Ra biʼyaʼ Jesús pabiáʼ napa Pedru fe la? biquiiñebe poder stiʼ  Jiobá para ganda sabe lu nisa. Yanna, para cadi guiaaziʼ Pedru ndaaniʼ nisa la? naquiiñeʼ ñuuyadxibe Jesús; peru oraquepeʼ nga bitiixhilube sti ladu. Biblia na: «Biiya si Pedru pabiáʼ reciu nuu bi que la? bidxibi». Ora bíʼyabe modo cadiñentaa nisadóʼ que ne cadxelasaa ca ola que canuá que la? guizáʼ bidxíbibe. Zándaca dede guníʼ íquebe raqué gátibe. Ti ratu huiiniʼ si birá fe stibe purtiʼ bidxíbibe. Pedru, hombre guníʼ Jesús naca casi ti «guié» purtiʼ nabé naguidxi que, bizulú biaaziʼ casi ti guié ora rilá ndaaniʼ nisadóʼ. Nécapeʼ nánnabe xhúʼbabe, bicaabe ridxi: «Bilá naa, Señor». Oraqueca bisigaanáʼ Jesús ne gundisaʼ laabe, ne ora maʼ zuhuaabe lu nisa que gudxi laabe: «Aque huaxiéʼ fe napu xa. Xiñee bidxibi lu, hombre» (Mat. 14:30, 31).

21. Xiñee cadi galán diʼ guidxibi binni, ne xi zanda gúninu para gácanu binni nadxibalú.

21 ¡Stale nga ni biziidiʼ Pedru pur ni gudxi Jesús laa! Racá ridúʼyanu cadi galán diʼ nga guidxibi binni, purtiʼ rucaani laa guni stale cosa ni cadi jneza. Zanda gusirani fe stinu ne guxhéleni laanu de Dios. Nga runi, naquiiñeʼ gúninu stipa pur gácanu binni nadxibalú. Ximodo zanda gúninu ni yaʼ. Ra guicá íquenu gúninu ni jneza guiráʼ ora. Pa chuʼnu xizaa pur ca cosa ni ruchibi laanu, cani ribee gana laanu o cani zanda guxheleʼ laanu de gúninu ni na Jiobá ne Cristu la? zará fe stinu. Peru pa guiníʼ íquenu guiráʼ ni maʼ biʼniʼ Dios ne Xiiñiʼ dxiqué, cani cayúnicaʼ yanna ne cani chigúnicaʼ pur ca binni ni nadxii laacaʼ la? zacá nga casi ñaca ñuuyadxinu Jiobá ne Jesús, ne maʼ qué zadxíbinu.

22. Xiñee naca Pedru ti ejemplu galán para laanu.

22 De raqué zinanda Pedru Jesús ora zeʼ ranuu canuá que. Ora gudxíʼbabe, biiyabe maʼ gulezadxí bi yooxhoʼ que ne maʼ nexhedxí nisadóʼ stiʼ Galilea. Guizáʼ bidxagayaa Pedru ne xcaadxi apóstol que, dede gúdxicaʼ Jesús: «Dxandí pe Xiiñi Dios lii» (Mat. 14:33). Laga zeedayaba xpiaaniʼ dxi, nanna dxíchinu nabé nayecheʼ guyuu ladxidóʼ Pedru. Gueelaʼ que biziidibe jma naquiiñeʼ guni crebe zanda gacané Jiobá ne Jesús laabe, ne maʼ cadi naquiiñeʼ guidxíbibe. Peru cayaadxaruʼ gúnibe stale cosa para gueeda gácabe casi guié ni guníʼ Jesús que. Pedru qué nusaana de nudxiilú. Yanna laanu yaʼ, ñee zaguixhe íquenu chinándanu ejemplu stibe para gácanu ti binni nadxibalú la? ¡Aque galán gaca fe stinu naguidxi cásica guca fe stiʼ Pedru xa!