Biiyaʼ guiraʼ ni nuu lu sitiu riʼ

guyé lu índice

 CAPÍTULO 22

Qué ñuu dxi nusaanabe Jesús

Qué ñuu dxi nusaanabe Jesús

1, 2. Xi gucalaʼdxiʼ Pedru ñuni ca binni ni cucaadiaga Jesús ndaaniʼ guidxi Capernaum, peru xi bíʼnicaʼ.

TI DXI, nuu Pedru ndaaniʼ sinagoga stiʼ Capernaum, ni riaana ladu guiaʼ de nisadóʼ stiʼ Galilea. Ndaaniʼ guidxi riʼ nga nabézabe ne nabeza binnilídxibe, ca xhamígube ne cani runinebe dxiiñaʼ. Ne laaca ndaaniʼ guidxi riʼ nga rúnibe negocio benda. Laga cusiidiʼ Jesús, hombre ni jma nanna gusiidiʼ, ndaaniʼ sinagoga que, Pedru nuu xizaa ne ruuyadxí lú ca binni ni cucaadiaga laabe. Nanna dxíchinu cayuulaʼdxiʼ Pedru gucaadiaga guiráʼ ca diidxaʼ sicarú ni caníʼ Jesús ora cusiene de Reinu stiʼ Dios, ne racaláʼdxibe laaca ngueca ñuni ca binni que. Peru cadi cayuni sentir diʼ ca binni que ni cayuni sentir Pedru.

2 Stale de laaca maʼ cadi cucaadiágacaʼ. Ne nuu tu dede caníʼ cadi liica jneza ni cusiidiʼ Jesús. Peru ni jma naguu xizaa Pedru nga stale de ca discípulo stiʼ Cristu laaca maʼ cadi cayuuláʼdxicaʼ ni cusiidiʼ Jesús. Rihuinni dxíchica cadxiichicabe. Óraque stale de laacaʼ dede guniʼcaʼ nabé naná ca diidxaʼ cusiidibe, maʼ qué ninacaʼ nucaadiágacaʼ laabe ne zecaʼ. Ne dede dxi que maʼ qué ninándacaʼ Jesús (biindaʼ Juan 6:60, 66).

3. Ximodo gucané fe stiʼ Pedru laa.

3 Dede ca apóstol que guca nagana para laacaʼ guiénecaʼ ni cusiidiʼ Maestru sticaʼ. Pedru laaca qué ñene chaahuiʼ ni bisiidiʼ Jesús, ne pa biénebe ca diidxaʼ que cásipeʼ guníʼ Jesús cani la? zándaca dede bininá cani laabe. Yanna, xi gúnibe yaʼ. Zusaanabe Maestru stibe la? Cadi ndiʼ diʼ nga primé ne últimu biaje guihuinni pa zúnibe ni. Guidúʼyanu ximodo gucané fe ni gupa hombre riʼ laa para bidxiilú ca guendanagana ni gupa ne laacaʼ gucané ni laa ti qué chuʼ dxi gusaana Jesús.

Dxi bisaana xcaadxi binni Jesús

4, 5. Xiñee nabé bidxagayaa stale binni cani biʼniʼ Jesús.

4 Stale biaje qué ñene Pedru cani guníʼ Jesús ne cani biʼniʼ.  Ne ngapeʼ nga bizaaca ti dxi ante. Biʼniʼ si Jesús ti milagru ra biyaanaʼ mil de binni, caadxi de ca binni que gucaláʼdxicaʼ ñúnicaʼ laabe rey, peru bidxagayaacabe ni bíʼnibe. Bireebe de raqué para cadi gúnicabe laabe rey. Despué, gúdxibe ca discípulo stibe quíbacaʼ ndaaniʼ ti canuá ne checaʼ Capernaum. Gueelaʼ queca, laga zécabe lu nisadóʼ stiʼ Galilea, guizáʼ bidxagayaacabe ora biiyacabe zizá Jesús lu nisadóʼ ni caguiñentaa que. Dxi que bisiidiʼ Jesús Pedru pabiáʼ risaca gapa fe.

5 Birá si gueelaʼ, bidii ca discípulo que cuenta nanda ca binni que laacaʼ. Xi biʼniʼ Jesús óraque yaʼ. Laabe nánnabe cadi zeʼ diʼ ca binni que ra nuube para guiziidicaʼ jma de Dios, sínuque para gúnibe sti milagru ne gudiibe ni gocaʼ, ngue runi guluu jnézabe laacaʼ (Juan 6:25-27). Ne guniʼnérube laacaʼ de laani ndaaniʼ sinagoga stiʼ Capernaum, ne raqué bisiidibe laacaʼ ti cosa guizáʼ risaca ne laaca guca nagana para laacaʼ guiénecaʼ ni, ne stale tu laa dede bidxagayaa ni guniʼbe que.

6. Xi bisiene Jesús, ne xi biʼniʼ ca binni ni cucaadiaga laabe.

6 Jesús gucalaʼdxiʼ nuchaa ca binni que modo riníʼ íquecaʼ, ne cadi chiyúbicaʼ laabe para si gocaʼ, sínuque racaláʼdxibe gudiicaʼ cuenta Dios biseendaʼ laabe ne zudiibe xquendanabánibe pur binni ti zacá ganda guibánicaʼ sin qué chuʼ dxi gáticaʼ. Ne para ganda guiene ca binni que ni, guníʼ Jesús zeeda gaca casi maná, pan ni biaba de guibáʼ ca dxi bibani Moisés. Cumu biiyabe nuu tu caníʼ mal de laabe la? bisiénebe caquiiñeʼ gocaʼ beela ládibe ne guecaʼ rini stibe pa racaláʼdxicaʼ guicaacaʼ guendanabani ni qué zaluxe. Óraque nga bizaaca ni bizéʼtenu ra bizulú capítulo riʼ, stale de laacaʼ bidxiichicaʼ ne guniʼcaʼ: «Nabé naná ca diidxa cusiidi be ca. Tuu ndi zanda icaa cani». Ne dede stale de ca discípulo stiʼ Jesús bisaanacaʼ laabe (Juan 6:48-60, 66). *

7, 8. 1) Xi chiguizaaca Jesús ni caʼruʼ guiene Pedru. 2) Xi bicabi Pedru Jesús.

7 Ñee zuni Pedru casi biʼniʼ ca binni que la? Zándaca laaca qué ñénebe ni bisiidiʼ Jesús, purtiʼ caʼruʼ guiénebe naquiiñeʼ gatiʼ Jesús para guni ni na Dios. Neca zaqué, qué ñuni Pedru ni biʼniʼ xcaadxi discípulo que, purtiʼ laacaʼ nagueenda gucanacaʼ. Rihuinni dxíchica maʼ gadxé Pedru de ca binni que. Xiñee yaʼ. Guidúʼndanu xiruʼ ruzeeteʼ relatu riʼ.

8 Óraque gunabadiidxaʼ Jesús ca apóstol stiʼ: «Laga laatu yaʼ, laca zabigueta tu la?» (Juan 6:67). Neca ca 12 apóstol que nga gunabadiidxaʼ Jesús ni la? Pedru bicabi. Stale biaje laa nga ricabi, zándaca purtiʼ jma huaniisi que xcaadxi apóstol que, o purtiʼ  qué randa rucueeza ni nuu guiníʼ. Ne ni bicabi Pedru óraque, qué ziuu dxi guiaandaʼ, laa guníʼ: «Tu ru ra nuu ñuu du yaʼ, Señor. Lii siouʼ nga ruiʼ neu laadu ni rudii enda nabani ni qué zaluxe» (Juan 6:68).

9. Ximodo bisihuinni Pedru qué nusaana Jesús.

9 ¡Aque sicarú ca diidxaʼ guníʼ Pedru ca xa! Rihuinni dxíchica nabé nápabe fe Jesús, ngue runi qué nusaanabe laa. Nánnabe Jesús nga tobi lucha ni biseendaʼ Jiobá para gulá binni, ne laaca nánnabe caquiiñeʼ gucaadiágabe cani rusiidiʼ de Reinu stiʼ Dios, ti ganda guilabe. Neca cadi guiráʼ diʼ biaje riénebe cani riníʼ Jesús la? nánnabe Maestru si stibe nga zanda guchiña laabe gaxha de Dios ne gápabe guendanabani ni qué zaluxe.

Naquiiñeʼ gúninu cani bisiidiʼ Jesús lu xquendanabáninu, neca nuu de laacani qué guiene chaahuinu o qué chuuláʼdxinu cani

10. Ximodo zanda chinándanu ejemplu stiʼ Pedru.

10 Ñee riníʼ íqueluʼ casi guníʼ ique Pedru la? Ca dxi stinu riʼ, nuu stale binni na nadxii Jesús, peru cadi dxandíʼ diʼ ni. Para gusihuinni tuuxa dxandíʼ nadxii Cristu, caquiiñeʼ gúʼyacaʼ guiráʼ ni bisiidibe casi biʼyaʼ Pedru cani. Naquiiñeʼ gúninu stipa pur guizíʼdinu cani bisiidibe, guiénenu cani ne gúninu cani lu xquendanabáninu, neca nuu de laacani qué guiene chaahuinu o qué chuuláʼdxinu cani. Zápanu guendanabani ni qué zaluxe pa qué gusaananu Jesús (biindaʼ Salmo 97:10).

Bilidxe Jesús laabe

11. Paraa yené Jesús ca discípulo stiʼ. (Laaca zanda gúʼyaluʼ ni cá ñee yaza.)

11 Qué nindaa de ngue, bireené Jesús ca apóstol stiʼ ne xcaadxi discípulo, ne zecaʼ ti guidxi zitu ni riaana neza guiaʼ. Dede lu nisadóʼ stiʼ Galilea que rihuinni dani Hermón de dxiʼbaʼ hielu ique, ne dani riʼ riaana ni ladu guiaʼ de ra dxaaga layú ni bizabiruaa Dios gudii ca israelita. Laga ziyuucabe ndaaniʼ ca guidxi huiiniʼ ni nuu gaxha de Cesarea de Filipo, jma naroʼbaʼ ruuyacabe dani que. * Ne dede ra nuucabe guizáʼ sicarú rihuinni layú ni bizabiruaa Dios gudii ca israelita que, ne raqué nga gunabadiidxaʼ Jesús ca discípulo stiʼ ti cosa nabé risaca.

12, 13. 1) Xiñee gucalaʼdxiʼ Jesús ñanna xi riníʼ ique ca binni que de laa. 2) Ximodo bisihuinni Pedru napa fe ora bicabi Jesús.

12 Gunabadiidxaʼ Jesús laacabe: «Tu na binni naa». Guxuíʼlunu modo biiyadxí Pedru lú Maestru stiʼ, ne caníʼ ique pabiáʼ nacháʼhuibe ne guizáʼ nuu xpiaanibe. Jesús racalaʼdxiʼ ganna xi caníʼ ique ca binni ni bicaadiaga laa. Ca discípulo que gúdxicaʼ laabe  xi caníʼ binni de laabe. Peru ni nuu Jesús nga ganna pa runi cré ca discípulo stiʼ ni caníʼ ca binni que. Ngue runi gúdxibe laacaʼ: «Laga laatu yaʼ, [...] Tu rabi tu naa» (Luc. 9:18-20).

13 Sti biaje, qué liica niníʼ ique Pedru ne bicabi laabe. Ni guniʼbe que bisihuinni ni cayuni sentir ca binni ni cucaadiaga Jesús, Pedru bicabi: «Lii nga Cristu, Xiiñi Dios ni nabani». Ñee ruxuíʼlunu Jesús dede cuxidxi huiiniʼ ruuyadxí Pedru ne cayabi laabe galán ni guníʼ la? De raqué, guníʼ Jesús Jiobá —ne cadi binni— nga rusiene ca xpinni ni guníʼ Pedru que. Rihuinni dxíchica Jiobá nga bisiene Pedru tobi de ca cosa ni jma risaca ni rusiidiʼ Stiidxaʼ Dios: tuu nga Cristu, Mesías ni nexheʼ gueeda que (biindaʼ Mateo 16:16, 17).

14. Xi dxiiñaʼ risaca bidii Jesús Pedru.

14 Stiidxaʼ Dios maca bisiene zeeda gaca Cristu casi «Guie ni bisaʼbi cani cucuí yoo» (Sal. 118:22; Luc. 20:17). Pur ni na ca diidxaʼ riguixhená riʼ ne pur ni na xcaadxi diidxaʼ riguixhená, Jesús bisiene zandisaʼ Jiobá ti neza binni ridagulisaa lu ti guié. Guié ca nga Jesús, ne Pedru bidii cuenta laabe nga Cristu. Despué, bidii Jesús Pedru ti dxiiñaʼ nabé risaca lade ca binni ridagulisaa. Cadi bidiidibe laa ti puestu risaca lade ca apóstol, casi riníʼ stale binni, sínuque bidiibe laa stale dxiiñaʼ guni. Relatu ca na gudxi Jesús Pedru zudiibe laa «ca llave sti ibáʼ» (Mat. 16:18, 19). Zanda guininu biquiiñebe ca llave riʼ casi ora nuxhélebe ti puertaʼ para chonna grupu de binni ti ganda chuʼcaʼ lu Reinu stiʼ Dios: primé ca judíu ne ca binni de sti guidxi ni guyuu ládecaʼ, despué ca samaritanu ne últimu cani cadi judíu.

15. Xi gudxi Pedru Jesús, ne xiñee.

15 Despué, gudxi Jesús ca discípulo stiʼ ti cosa nabé risaca: ca binni ni gudiicabe laa jma dxiiñaʼ, jma stale ni naquiiñeʼ guni, ne qué nindaa de ngue bidii Pedru cuenta jneza ngue ni guníʼ Maestru stiʼ (Luc. 12:48). Gudxi si Jesús Pedru xi dxiiñaʼ ngue chiguni la? bisiénerube laacaʼ xiruʼ chiguizaaca Mesías, gúdxibe laacaʼ maʼ cadi candaa zuninácabe laabe ne dede zuuticabe laabe Jerusalén. Ora gudxi Jesús ca diidxaʼ que Pedru, guleechube Jesús ne gúdxibe laa: «Dios guʼya qué izaaca lu ni nouʼ ca» (Mat. 16:21, 22).

16. Ximodo bilidxe Jesús Pedru, ne xi zanda guizíʼdinu de ca diidxaʼ ni guníʼ Jesús.

 16 Ora guníʼ Pedru ca diidxaʼ riʼ, ni nuube nga gacanebe Jesús, ngue runi biaanacásibe ora bidxiideche Jesús laabe ne biiyadxí xcaadxi discípulo que —laaca zándaca caníʼ íquecaʼ cásica Pedru— ne guníʼ: «Bixele de naa, binidxabaʼ, purti cadi de Dios zeeda ni cá ique lu ca sínuque de binni guidxilayú» (Mar. 8:32, 33; Mat. 16:23). Zanda guizíʼdinu stale cosa de ca diidxaʼ ni guníʼ Jesús riʼ. Jma nga nagueenda riníʼ íquenu casi riníʼ ique binni Guidxilayú ne cadi casi riníʼ ique Dios. Pa qué guiníʼ ique chaahuinu xi guininu la? sin gudiʼnu cuenta zándaca gucaʼnu tuuxa guni xiixa ni riuulaʼdxiʼ Binidxabaʼ ne cadi ni riuulaʼdxiʼ Dios. Peru guibiguétanu lu relatu stiʼ Pedru ne guidúʼyanu xi bíʼnibe ora gudxi Jesús labe ca diidxaʼ riʼ.

17. Xi gucalaʼdxiʼ Jesús niníʼ ora na: «Bixele de naa».

17 Nanna Pedru cadi caníʼ diʼ Jesús nácabe «binidxabaʼ». Purtiʼ gadxé diidxaʼ biquiiñeʼ Jesús ora guniʼné Binidxabaʼ. Ti dxi gúdxibe laa: «Biree de ra nuaa», peru Pedru gúdxibe laa: «Bixele de naa» (Mat. 4:10). Racá rihuinni cadi cayábidibe Pedru maʼ qué zaca apóstol stibe, purtiʼ nánnabe nachaʼhuiʼ ne zanda guni stale dxiiñaʼ; ni guniʼbe raríʼ nga cadi jneza modo riníʼ ique. Casi ora ñabi Maestru stibe laabe guiduubabe lú, ti ganda tiidiʼ ne chuʼbe neza deche para chinándabe laa ne gacanebe laa.

Pa gudiʼnu lugar gulídxecabe laanu, zanda chuʼnu gaxha de Jesucristu ne de Jiobá

18. Xi biʼniʼ Pedru ora guluu jneza Jesús laa, ne xi zanda guizíʼdinu de laa.

18 Lugar de ñacaná ladxidóʼ Pedru pur ca diidxaʼ ni guníʼ Jesús que, nidxiichi, o niníʼ cadi jneza ni guniʼbe que, laga bidii lugar uguu jnézabe laa. ¡Stale nga ni zanda guiziidiʼ ca xpinni Cristu de hombre riʼ! Guiranu ziuu biaje gulídxecabe laanu, peru pa racaláʼdxinu gacanécabe laanu chuʼnu gaxha de Jesucristu ne de Jiobá, Bixhózebe, naquiiñeʼ gudiʼnu lugar gulídxecabe laanu ne guiníʼ íquenu paraa zanda gacané ni laanu (biindaʼ Proverbios 4:13).

Qué nusaana Pedru Jesús neca bilídxebe laa

Gucuaabe ndaayaʼ pur qué nusaanabe Jesús

19. Xi gudxi Jesús cani cucaadiaga laa, ne xi zándaca guníʼ ique Pedru óraque.

19 Qué nindaa de ngue, guníʼ Jesús stiʼ cosa ni bidxagayaa cani cucaadiaga laabe: «Caadxi de cani nuu raríʼ qué zati dede  qué guʼya guenda guidxilayú sti tiru, peru ma para gune ganar» (Mat. 16:28). Tuu nga cani zacaa ndaayaʼ riʼ yaʼ. Zándaca nuu Pedru ganna ni. Peru cumu cadi xadxí ngue de bilidxe Jesús laabe la? zándaca guníʼ íquebe: «Ñee zacaʼ tobi de ca binni ca la?».

20, 21. 1) Bisiene xi biʼyaʼ Pedru lu ti visión. 2) Ximodo gucané visión que Pedru para bidii cuenta cadi jneza diʼ ni gudxi Jesús que.

20 Peru ti semana despué, yené Jesús Santiago, Juan ne Pedru «lu ti dani soo», zándaca lu dani Hermón, ni riaana chupa chonna kilómetru de raqué. Zándaca maʼ huaxhinni, ngue runi, maʼ daʼ bacaandaʼ lúcabe. Laga cayuni orar Jesús, bizaaca ti cosa ni bidxagayaacabe stale, ¡dede biree bacaandaʼ lúcabe! (Mat. 17:1; Luc. 9:28, 29, 32.)

21 Málasi bizulú bizaaniʼ lú Jesús casi ruzaaniʼ Gubidxa. Ne naquichibé bihuinni xhábabe dede riaʼquiʼ biaaniʼ. De raqué, biiyacabe chupa bultu cueʼ Jesús, tobi que ruluíʼ Moisés ne stobi que ruluíʼ Elías. Ne cayuíʼnecaʼ Jesús diidxaʼ de «modo chi gati  be» Jerusalén ne modo guiásabe lade gueʼtuʼ. Óraque nga gunna dxichi Pedru napa xidé gacaná Jesús ne gatiʼ, ne bidiibe cuenta cadi jneza diʼ ni gúdxibe Jesús que (Luc. 9:30, 31).

22, 23. 1) Ximodo bisihuinni Pedru pabiáʼ nachaʼhuiʼ ne riuulaʼdxiʼ gacané xcaadxi. 2) Xi sti ndaayaʼ gucuaa Pedru, Santiago ne Juan gueelaʼ que.

22 Ruluíʼ si gucalaʼdxiʼ Pedru ñuu lu visión que. Zándaca gucaláʼdxibe nindaa ni xcaadxi. Guyuu ti ora, ruluíʼ zixeleʼ Moisés ne Elías de Jesús, ngue runi guníʼ Pedru: «Maistru, aque galán nuu nu rarí njaʼ. Zanda guni du chonna ranchu huiiniʼ, tobi para lii, tobi para Moisés, ne stobi para Elías». Peru cadi caquiiñeʼ diʼ gucuícabe ranchu huiiniʼ para Moisés ne Elías, purtiʼ ca binni riʼ maʼ xadxí de gúticaʼ, ne ti visión si nga cayuuyaʼ ca apóstol que. Rihuinni dxíchica qué ganna chaahuiʼ Pedru xi caníʼ, peru cadi dxandíʼ bisihuínnibe pabiáʼ nacháʼhuibe ne riuuláʼdxibe gacanebe xcaadxi la? (Luc. 9:33.)

Biiyaʼ Pedru, Santiago ne Juan ti visión ni qué ñuu dxi ñaandaʼ laacaʼ

23 Gueelaʼ que gucuaa Pedru, Santiago ne Juan sti ndaayaʼ. Málasi biseeguʼ ti za laacabe lu dani que, ne gucuá ti ridxi lade za que ne na «Ndi nga Xiiñeʼ ni nadxieeʼ. Laucaa diaga laa». ¡Jiobá peʼ ngue guníʼ! Zaqué nga biluxe visión que, ne biaana guionnaʼ apóstol que né Jesús sti biaje lu dani que (Luc. 9:34-36).

24. 1) Ximodo gucané visión que Pedru. 2) Ximodo zanda gacané visión que laanu.

24 Nánnanu guizáʼ biecheʼ Pedru pur ndaayaʼ ni gucuaa ora biʼyaʼ visión que, ne laanu laaca zanda guni sentirnu cásica biʼniʼ sentirbe ora gánnanu xi bizaaca gueelaʼ que. Gudiʼdiʼ si stale iza, apóstol riʼ guníʼ: «Biduʼya pe du enda nandxóʼ» stiʼ Jesús. Lu visión que biiyabe guenda nandxóʼ stiʼ Jesús ora maʼ gueeda gaca Rey guibáʼ. Visión riʼ bisihuinni jneza ni cá lu stale diidxaʼ riguixhená ni zeeda lu Stiidxaʼ Dios ne gucané ni Pedru iguidxi fe stiʼ, ti ganda gudxiilú ca guendanagana ni guidxaagalú (biindaʼ 2 Pedro 1:16-19). Cadi guiaandaʼ laanu, pa gácanu casi Pedru laaca zaguu Jiobá ndaayaʼ laanu. Yanna, ximodo zanda chinándanu ejemplu stibe yaʼ. Ra qué gusaananu Maestru ni jma nanna gusiidiʼ ni bidii Dios laanu, guizíʼdinu de laa, gudiʼnu lugar gulidxe laanu ne gúninu cani bisiidibe lu xquendanabáninu.

^ párrafo 6 Nabé ridxagayaanu ni biʼniʼ ca binni riʼ, purtiʼ ti dxi ante guníʼcabe naca Jesús profeta stiʼ Dios (Juan 6:14).

^ párrafo 11 De ra nuu nisadóʼ stiʼ Galilea, ni riaana 210 metru xagueteʼ de nivel stiʼ nisadóʼ, guzácabe 50 kilómetru ne gudíʼdicabe caadxi lugar galán dede yendácabe 350 metru luguiáʼ de nivel stiʼ nisadóʼ.