Biiyaʼ guiraʼ ni nuu lu sitiu riʼ

guyé lu índice

 CAPÍTULO 15

Ximodo chuʼnu nayecheʼ pur dxiiñaʼ nadipaʼ ni rúninu

Ximodo chuʼnu nayecheʼ pur dxiiñaʼ nadipaʼ ni rúninu

«Galán nga [..] guiecheʼ [binni] pur ca dxiiñaʼ nadipaʼ ni runi.» (ECLESIASTÉS 3:13.)

1-3. 1) Ximodo ruuyaʼ stale binni xhiiñaʼ. 2) Xi ruzeeteʼ Biblia de dxiiñaʼ runi binni ne xi guendarinabadiidxaʼ zadúʼyanu lu capítulo riʼ yaʼ.

CA DXI stinu riʼ stale binni qué riuucaʼ nayecheʼ pur dxiiñaʼ ni cayúnicaʼ ne ruuyacaʼ ni casi xiixa ni nanaa. Guiráʼ dxi rúnicabe dxiiñaʼ ni qué riuuláʼdxicabe ne ora maʼ cayúnicabe xhiiñacabe casi ñaca qué zaluxe dxi. Peru cadi galán diʼ guni sentírcabe zacá. Zanda guidxélacabe xiixa ni zacané laacabe chuuláʼdxicabe xhiiñacabe ne chúʼcabe nayecheʼ ora gúnicabe ni.

2 Biblia ruzeeteʼ cadi naquiiñeʼ diʼ guiree binni gana pur dxiiñaʼ nadipaʼ ni runi. Ruzeeteʼ ni ti ndaayaʼ nga guni binni dxiiñaʼ ne laaca ti ndaayaʼ nga guiráʼ ni ribeendú binni ora guni ni. Pur nga, ti hombre nabé guyuu xpiaaniʼ láʼ Salomón bicaa: «Galán nga gó guiráʼ binni ne gueʼ ne guiecheʼ pur ca dxiiñaʼ nadipaʼ ni runi. Ne de Dios nga zeeda ca ndaayaʼ riʼ» (Eclesiastés 3:13). Cumu guizáʼ nadxii Jiobá laanu ne riuuláʼdxibe guibáninu galán la? racaláʼdxibe chuuláʼdxinu xhiiñanu ne guiechenenu cani zanda gápanu pur laani. Para cadi gusaana de gannaxhii Dios laanu la? caquiiñeʼ guidúʼyanu xhiiñanu cásica modo ruuyabe ni ne chinándanu ca conseju stibe. Biblia na: «Ni jma galán para ti hombre nga gó ne gueʼ ne guiecheʼ pur dxiiñaʼ nadipaʼ ni runi. Ne laaca maʼ biiyaʼ de Dios zeeda ca cosa riʼ» (Eclesiastés 2:24; 5:18).

 3 Lu capítulo riʼ zadúʼyanu tapa guendarinabadiidxaʼ: Ximodo zanda chuʼ ti xpinni Cristu nayecheʼ pur dxiiñaʼ nadipaʼ ni runi. Xi dxiiñaʼ cadi naquiiñeʼ gúninu. Xi zanda guni ti xpinni Cristu para ganda guni xhiiñaʼ ne cadi gusaana de guni xhiiñaʼ Jiobá yaʼ. Ne xi dxiiñaʼ jma risaca naquiiñeʼ gúninu. Ante guicábinu cani gunabadiidxanu ca la? guininu de chupa binni ni nabé nanna guni dxiiñaʼ: Jiobá ne Jesucristu.

JIOBÁ, NI JMA RUNI DXIIÑAʼ, NE JESÚS, NI JMA JNEZA RUNI XHIIÑAʼ

4, 5. Xi cusiene Biblia ni rusihuinni qué huasaana Jiobá de guni dxiiñaʼ.

4 Jiobá nga ti Dios ni jma runi dxiiñaʼ. Nga runi Génesis 1:1 na: «Primé que Dios bizáʼ guibáʼ ne guidxilayú». Dxi biluxe bizaʼbe guiráʼ ca cosa ni nuu ndaaniʼ Guidxilayú riʼ biiyabe «nabé galán cani» (Génesis 1:31). Nga rusihuinni nabé nayecheʼ guyuu Dios pur guiráʼ ca dxiiñaʼ nadipaʼ ni biʼniʼ (1 Timoteo 1:11).

5 Jiobá qué rusaana de guni dxiiñaʼ. Ngue runi, neca maʼ gudiʼdiʼ stale iza de biluxe bizaʼbe guiráʼ cani nuu lu Guidxilayú riʼ, Jesús guníʼ: «Dede yanna cayuni Bixhoze dxiiñaʼ» (Juan 5:17). Peru xi cayuni Bixhózebe yaʼ. Dede guibáʼ cayápabe binni ne cayábibe laacaʼ xi gúnicaʼ. Laaca maʼ gulibe ne espíritu santu ca binni ni chiguni mandarné Jesús guibáʼ (2 Corintios 5:17). Qué huasaana de gúnibe dxiiñaʼ para ganda gaca ni maʼ gudixhe íquebe gúnibe para binni guidxilayú: guibani guiráʼ cani nadxii laabe ndaaniʼ ti guidxilayú cubi (Romanos 6:23). Nápabe razón para chuʼbe nayecheʼ pur guiráʼ ca dxiiñaʼ ni huayúnibe. Millón de binni maʼ bicaadiaga stiidxabe ne yanna maʼ nuucaʼ gaxha de laabe ne maʼ bichaacaʼ xquendanabánicaʼ ti cadi gusaana de gannaxhiibe laacaʼ (Juan 6:44).

6, 7. Ximodo bisihuinni Jesús nabé biʼniʼ dxiiñaʼ.

6 Maʼ xadxí naca Jesús ti ejemplu, purtiʼ laa guca ti binni  ni nabé biʼniʼ dxiiñaʼ. Ante gueedabe lu Guidxilayú riʼ bíʼnibe dxiiñaʼ jnézapeʼ, purtiʼ gucanebe Jiobá para guyáʼ «irá xixé ni nuu ibáʼ ne ni nuu guidxilayú» (Proverbios 8:22-31; Colosenses 1:15-17). Ne dxi guyuube lu Guidxilayú riʼ laaca qué nusaanabe de ñúnibe dxiiñaʼ. Dede nahuiinibe biziidibe gucuibe yoo ne binibiáʼcabe laabe casi ti «carpinteru» (Marcos 6:3). * Guietenaláʼdxinu dxiqué qué ñuu tienda ra ridoo guiráʼ ni riquiiñeʼ ti carpinteru, máquina ni rugá yaga o ca herramienta de biaaniʼ nuu yanna riʼ. Ngue runi gupa xidé biquiiñecabe stipa ne guníʼ ique chaahuicabe modo gúnicabe ca dxiiñaʼ que purtiʼ né náʼ sícabe bíʼnicabe cani. Ñee cuxuíʼlunu canayubi Jesús yaga, o cusaba cani ne caxubiyube cani dede ra chiguiquiiñebe cani la? Ñee laaca cuxuíʼlunu cucuibe ti yoo ne caguíxhebe muriu stiʼ ti yoo, cucaabe puertaʼ o cayúnibe mexaʼ o banguʼ la? Pur guiráʼ ni bíʼnibe ca gúnnabe nabé nayecheʼ riuu binni ora guni xhiiñaʼ jneza.

7 Laaca qué nusaana Jesús de nucheecheʼ diidxaʼ. Chonna iza arondaʼ bíʼnibe dxiiñaʼ nabé risaca riʼ. Cumu racaláʼdxibe gacanebe stale binni la? siadóʼ guieruʼ maʼ cusiidibe laacaʼ dede rixhínnibe (Lucas 21:37, 38; Juan 3:2). Jesús yegusiidiʼ ndaaniʼ «ca guidxi roʼ ne guidxi huiiniʼ, [ne guniʼné] binni modo runi mandar Dios» (Lucas 8:1). Guizáʼ zitu de ra guyé Jesús ne dede guzabe ndaaniʼ yudé ora yegucheechebe diidxaʼ.

8, 9. Ximodo bihuinni guyuu Jesús nayecheʼ pur dxiiñaʼ ni biʼniʼ.

8 Ñee guyuu Jesús nayecheʼ pur dxiiñaʼ ni biʼniʼ la? Guyuu pue. Gunda bisiidibe stale binni de Stiidxaʼ Dios ne dxi bisaanabe laacaʼ biquiiñecaʼ chuʼ tu gacané laacaʼ para gácacaʼ xpínnibe. Dxiiñaʼ ni bíʼnibe que bidii ni stipa laabe dede biaanabe sin ñobe para gúnibe ni (Juan 4:31-38).  Nabé nayecheʼ guyuu Jesús dxi binduuxeʼ xhiiñaʼ lu Guidxilayú dede gúdxibe Bixhózebe: «Ma bisisaca lii ndaani guidxilayú riʼ, ne ma binduuxe ni biseendu naa beda guneʼ» (Juan 17:4).

9 Guirútiruʼ huaguixhe ti ejemplu ni naquiiñeʼ chinándanu para chuʼnu nayecheʼ pur ca dxiiñaʼ nadipaʼ ni rúninu que Jiobá ne Jesús. Cumu nadxiinu laacabe la? rúninu stipa pur gúninu casi runi Dios ne gúninu «casi biʼni Cristu» (Efesios 5:1; 1 Pedro 2:21). Yanna guidúʼyanu ximodo zanda chuʼnu nayecheʼ pur ca dxiiñaʼ nadipaʼ ni rúninu.

 XIMODO CHUʼNU NAYECHEʼ PUR DXIIÑAʼ NADIPAʼ NI RÚNINU

Pa chinándanu ca principiu ni zeeda lu Biblia zanda chuʼnu nayecheʼ né xhiiñanu

10, 11. Xi zanda gacané laanu para cadi guireʼnu gana xhiiñanu.

10 Guiráʼ ca xpinni Cristu laaca rúnicaʼ dxiiñaʼ. Ne rúnicaʼ stipa pur chuʼcaʼ nayecheʼ ora gúnicaʼ ni. Peru ora qué riuuláʼdxinu xhiiñanu, qué riu’nu nayecheʼ ora maʼ cayúninu ni. Ora guni sentirnu zacá, xi zanda gúninu para chuʼnu nayecheʼ pur dxiiñaʼ nadipaʼ ni gúninu yaʼ.

11 Cadi guireʼnu gana. Nuu tiru qué zanda diʼ guchaʼnu dxiiñaʼ stinu, peru zanda guchaʼnu modo ridúʼyanu ni. Ni zanda gacané laanu nga guiníʼ íquenu modo ruuyaʼ Dios cani. Jiobá rusisaca stipa runi tuuxa para gudii guiráʼ ni caquiiñeʼ binnilidxi, neca cadi stálepeʼ riaxa. Ne lu Stiidxabe cayeeteʼ pa tuuxa qué gudii cani caquiiñeʼ binnilidxi «zeda aca jma nadxaba que ni qué runi cre» (1 Timoteo 5:8). Ora tuuxa guiene racané dxiiñaʼ stiʼ laa para ganda guni ni canabaʼ Dios laa la? jma riuu nayecheʼ que cani runiné dxiiñaʼ.

12. Xi zabeendunu pa gácanu binni ni nabé runi dxiiñaʼ ne gúninu ni jneza ra dxiiñaʼ stinu.

12 Gusihuínninu nabé rúninu dxiiñaʼ ne rúninu ni jneza. Laanu, casi xpinni Cristu, naquiiñeʼ guicá íquenu gúninu xhiiñanu ne guizíʼdinu gúninu ni jneza. Pa nabé rúninu dxiiñaʼ zabeendunu stale cosa, ne tobi de laacani nga zusisaca patrón stinu laanu (Proverbios 12:24; 22:29). Ricaanu stale ndaayaʼ ora rúninu ni jneza, qué ribánanu ca cosa ni riquiiñenu ra dxiiñaʼ, qué runítinu tiempu ne qué ribánanu bidxichi (Efesios 4:28). Ne casi bizíʼdinu lu capítulo 14 que, stale biaje rusisaca ca patrón stinu laanu purtiʼ nacháʼhuinu. Ne neca qué gudiicabe cuenta pa rúninu ni jneza zusiéchenu ladxidóʼ Jiobá ne qué zuchiiñaʼ xquendabiaaninu laanu (Hebreos 13:18; Colosenses 3:22-24).

13. Xi ribeendunu ora rúninu ni jneza ra dxiiñaʼ stinu.

13 Cadi guiaandaʼ laanu zanda gusisácanu Dios pur cani gúninu. Guiráʼ binni ruuyaʼ ora rúninu ni jneza ra dxiiñaʼ  stinu. Xi ribeendunu ora gúninu zacá yaʼ. Ruuyaʼ «irá binni pabiáʼ sicarú stiidxa Dios ni bilá laanu» (Tito 2:9, 10). Ora gúninu ni jneza stale tu laa rudii cuenta nuunu ndaaniʼ religión ni rusiidiʼ ni dxandíʼ ne pur nga stale tu laa riuulaʼdxiʼ ni. ¡Galán nga pa tobi de cani runinenu dxiiñaʼ niziidiʼ de Dios pur modo laanu! Peru laaca nuu sti cosa jma risaca ni cadi naquiiñeʼ guiaandaʼ laanu: zanda gusiéchenu ladxidóʼ Jiobá ne gusisácanu laa pur cani gúninu. Biblia na: «Guluu  xpiaanuʼ xiiñehuiineʼ ne bisiecheʼ ladxiduáʼ, ti ganda guicabeʼ ni cayuni burla naa» (Proverbios 27:11; biindaʼ 1 Pedro 2:12).

GUINÍʼ IQUE CHAAHUINU ORA CUINU XIIXA DXIIÑAʼ

14-16. Xi chupa guendarinabadiidxaʼ zanda gúninu laca laanu ora guidúʼyanu xi dxiiñaʼ zanda gúninu.

14 Biblia cadi cayabi diʼ laanu xi dxiiñaʼ zanda gúninu o xi qué zanda gúninu. Peru cadi pur nga guiníʼ íquenu zanda guicaanu intiica si dxiiñaʼ gudiicabe laanu, neca raca ni cadi jneza lu ni. Biblia zanda gacané laanu guyúbinu ti dxiiñaʼ ni qué zucaa laanu guchéʼnenu Dios ne ni zanda gacané laanu gápanu ni iquiiñenu. Ne laaca qué zuyúbinu ti dxiiñaʼ ni qué riuulaʼdxiʼ Dios (Proverbios 2:6). Ximodo  zanda gánnanu pa qué riuulaʼdxiʼ Dios gúninu xiixa dxiiñaʼ yaʼ. Nuu chupa guendarinabadiidxaʼ ni zanda gacané laanu gánnanu ni.

15 Ñee ruzeeteʼ Biblia cadi jneza guni binni dxiiñaʼ riʼ la? Stiidxaʼ Dios na cadi jneza diʼ cuanaʼ binni, gusiguii ne guzáʼ bidóʼ (Éxodo 20:4; Hechos 15:29; Efesios 4:28; Apocalipsis 21:8). Nga runi, qué ricaadinu ti dxiiñaʼ ni zucaa laanu gúninu casi cani maʼ guninu ca. Cumu nadxiinu Jiobá la? nga rucaa laanu cadi guicaanu dxiiñaʼ ni nánnanu qué riuuláʼdxibe (biindaʼ 1 Juan 5:3).

16 Ñee laaca zapaʼ donda o zucaaʼ xcaadxi binni guni ni cadi jneza la? Guníʼ ique nudiicabe lii ti dxiiñaʼ para guicábiluʼ teléfono. Zándaca guiníʼ íqueluʼ gasti naca pa guicaaluʼ ni. Peru, xi zazaaca pa ra chiguicábinu teléfono ca zeeda gaca ni ndaaniʼ ti clínica ra rié binni para gusaba baʼduʼ yaʼ. Dxandíʼ, zándaca guiníʼ íquenu cadi laapenu cayacanenu binni ca guiaba xiiñiʼ. Peru, pa gúninu dxiiñaʼ raqué, ñee cadi raʼbuʼ cayacanenu clínica que guni xiixa ni na Stiidxaʼ Dios cadi naquiiñeʼ gaca la? (Éxodo 21:22-24.) Cumu nadxiinu Jiobá la? qué racaláʼdxinu gúninu xiixa ni cayabi Stiidxabe laanu cadi gúninu.

17. 1) Xi naquiiñeʼ guidúʼyanu ante guicaanu xiixa dxiiñaʼ (biiyaʼ cuadru ra na « Ñee zanda guicaa dxiiñaʼ riʼ la?». 2) Xi caquiiñeʼ gúninu ti ganda gacané xquendabiaaninu laanu gúninu ni riuulaʼdxiʼ Dios.

17 Para ganda guiníʼ ique chaahuinu xi dxiiñaʼ zanda guicaanu la? galán guidúʼyanu guiropaʼ guendarinabadiidxaʼ ni zeeda lu párrafo 15 ne 16 ca. Peru nuuruʼ xcaadxi cosa ni naquiiñeʼ guʼyaʼ chaahuinu ante guicaanu ti dxiiñaʼ. * Cadi cuézanu gabi mozo ni nuu xpiaaniʼ laanu xi caquiiñepeʼ gúninu lu cada cosa. Laasinu nga naquiiñeʼ guiníʼ ique chaahuinu xi gúninu. Casi bizíʼdinu lu capítulo 2  que, caquiiñeʼ guidúʼndanu Stiidxaʼ Dios para gusíʼdinu xquendabiaaninu ne guidúʼyanu ximodo zanda gúninu ni na ni lu xquendanabáninu. Óraca zanda gacané xquendabiaaninu laanu gúninu ni riuulaʼdxiʼ Dios ne cadi gusaana de gannaxhiibe laanu purtiʼ maʼ nánnanu «uná nga jneza ne uná nga ni cadi jneza» (Hebreos 5:14).

 GÚNINU XHIIÑANU NE XHIIÑAʼ JIOBÁ

18. Xiñee raca nagana para ca xpinni Cristu gúnicaʼ xhiiñacaʼ ne xhiiñaʼ Jiobá.

18 Lu ca últimu dxi riʼ nuu stale guendanagana, nga runi raca nagana para ca xpinni Cristu gúnicaʼ xhiiñacaʼ ne gúnicaʼ xhiiñaʼ Jiobá (2 Timoteo 3:1). Nánnanu nabé nagana para guidxela binni dxiiñaʼ ne cadi guniti ni. Laaca nánnanu naquiiñeʼ gudiʼnu cani caquiiñeʼ binnilídxinu. Peru pa qué gápanu laanu nin qué zudiʼnu cuenta jma zacá íquenu gúninu xhiiñanu o gápanu bidxichi ne maʼ qué zúnipenu xhiiñaʼ Dios (1 Timoteo 6:9, 10). Guidúʼyanu xi zanda gacané laanu para cadi gusaana de gúninu xhiiñanu ne xhiiñaʼ Jiobá ne guicá íquenu gúninu cani jma risaca (Filipenses 1:10).

19. Xiñee caquiiñeʼ guni crenu zacané Jiobá laanu, ne xi qué zusaana de gúninu pa nanna dxíchinu zacanebe laanu.

19 Guni crenu de ladxidoʼno zacané Jiobá laanu. Biblia na: «Gupa confianza Jioba de guidubi ladxidoʼloʼ, ne cadi chinándaluʼ ni na xpiaaniluʼ. Lu guiráʼ ni gúniluʼ biiya’ xi nabe, ne laabe zúnibe ca neza stiluʼ derechu» (Proverbios 3:5, 6). Cadi dxandíʼ naquiiñeʼ guni crenu Jiobá de guidubi ladxidoʼno la? Naquiiñeʼ pue, purtiʼ nadxiibe laanu ne rápabe laanu (1 Pedro 5:7). Ne nanna dxíchibe xi caquiiñenu ne zudiibe cani laanu (Salmo 37:25). Nga runi, qué chuʼ dxi gusiáʼndanu ca diidxaʼ ni zeeda lu Biblia riʼ: «Cadi ibani tu para gapa si tu bidxichi, sínuque laguieche né biaʼ tiica napa tu, purti na Dios rabi laanu: “Qué zusaana laatu ne qué ziaana dxie de acaniá laatu”» (Hebreos 13:5). Stale de ca bíʼchinu ne ca bizáʼnanu ni nuu lu serviciu de tiempu completu huayuuyacaʼ ximodo huadii Jiobá laacaʼ ni caquiiñecaʼ. Pa nanna dxíchinu zudii Jiobá laanu guiráʼ ni caquiiñenu la? qué zacá íquenu gúninu stale dxiiñaʼ para gudiʼnu ni caquiiñeʼ binnilídxinu (Mateo 6:25-32). Qué zudiʼnu lugar gucueeza dxiiñaʼ stinu laanu de gucheechenu stiidxaʼ Dios ne gusaana de  chuunu ca guendaridagulisaa ca (Mateo 24:14; Hebreos 10:24, 25).

20. Xi naquiiñeʼ gúninu para cadi gusaana de guidúʼyanu ni jneza si, ne xi zacané laanu para gúninu ni.

20 Cadi gusaana de guidúʼyanu ni jneza si (biinda’ Mateo 6:22, 23) Ridúʼyanu ni jneza si ora qué ricá íquenu gápanu stale cosa lu xquendanabáninu. Ni jma naquiiñeʼ guicá ique ti xpinni Cristu nga guni xhiiñaʼ Dios. Pa jma racaláʼdxinu gúninu xhiiñaʼ Dios la? qué zacá íquenu guni ganarnu stale bidxichi o guibáninu né stale luju. Laaca qué zacá íquenu sinu guiráʼ ca cosa ni ridoo lu televisión o lu radiu ni na binni caquiiñenu para ganda guibáninu nayecheʼ. Xi zacané laanu para cadi gusaana de guidúʼyanu ni jneza si yaʼ. Cadi sinu ca cosa ni cadi caquiiñenu para cadi guzáʼbinu. Cadi gápanu ca cosa ni zucaa laanu cueenu tiempu para guni tendernu laa. Biblia na, jma galán ziuʼnu pa «napa nu ni idóʼ no ne ni gacu nu» (1 Timoteo 6:8). Ni jma galán gúninu nga gápanu ca cosa si ni dxandíʼ caquiiñenu.

21. Xiñee naquiiñeʼ gucáʼ íquenu gúninu cani jma naquiiñeʼ gaca, ne xi naquiiñeʼ gúninu primé lu xquendanabáninu.

21 Quixhe íquenu gúninu xhiiñaʼ Jiobá primé lu xquendanabáninu. Cumu huaxiéʼ tiempu nápanu la? naquiiñeʼ gucáʼ íquenu gúninu cani jma naquiiñeʼ gaca. Pa qué gúninu zacá la? jma zacá íquenu iquiiñenu tiempu risaca stinu para gúninu ca cosa ni huaxiéʼ risaca ne maʼ qué zúninu cani jma naquiiñeʼ gaca. Xii nga cani jma naquiiñeʼ gúninu yaʼ. Ni jma risaca para stale binni nga gúʼndacaʼ ndaaniʼ ca scuela roʼ ca ne guyúbicaʼ gúnicaʼ dxiiñaʼ risaca. Peru Jesús gudxi ca discípulo stiʼ ni jma risaca nga guyúbicaʼ gúnicaʼ ni na Reinu stiʼ Dios primé lu xquendanabánicaʼ (Mateo 6:33). Laanu, cani dxandíʼ xpinni Cristu, rúninu ni na Reinu stiʼ Dios primé lu xquendanabáninu. Guiráʼ cani riguixhe íquenu gúninu, cani racaláʼdxinu ugaandanu ne guiráʼ cani rúninu, rusihuínnicani jma risaca Reinu ca para laanu ne gúninu ni  na Dios que guicá íquenu gápanu stale cosa risaca ni nuu lu guidxilayú riʼ.

GUCHEECHENU STIIDXAʼ DIOS NÉ STALE GANA

Rusihuínninu nadxiinu Jiobá ora riguixhe íquenu gucheechenu stiidxabe

22, 23. 1) Xi dxiiñaʼ jma risaca nga rúninu, ne ximodo rusihuínninu risaca ni para laanu (biiyaʼ cuadru ra na « Nabé nayecheʼ huabaneʼ pur ni gudixhe iqueʼ guneʼ».) 2) Ximodo naquiiñeʼ guidúʼyanu dxiiñaʼ stinu.

22 Ca xpinni Dios nánnanu maʼ nabáninu lu ca últimu dxi riʼ. Nga runi, rucaa íquenu gúninu dxiiñaʼ jma risaca ni caquiiñeʼ guni ti xpinni Cristu: rucheechenu stiidxaʼ Reinu ne racanenu binni para gaca xpinni Cristu (Mateo 24:14; 28:19, 20). Cumu ejemplu stiʼ Jesucristu nga zinándanu la? nga runi qué rusaananu de gúninu dxiiñaʼ riʼ ti ganda guilá binni. Ximodo rusihuínninu risaca ni para laanu yaʼ. Stale de laanu qué rusaananu de gucheechenu diidxaʼ. Ne nuu tu laa riguixhe chaahuiʼ tiempu stiʼ para ganda gaca precursor ne misioneru. Stale binni riguucaʼ gana xiiñicaʼ para gúnicaʼ xhiiñaʼ Dios guidubi dxi ne zaqueca quixhe íquecaʼ ugaandacaʼ xiixa dxiiñaʼ ndaaniʼ xquidxi Dios. Cumu guiráʼ ca xpinni Cristu rucheechecaʼ diidxaʼ né stale gana, ñee zanda guininu riuucabe nayecheʼ pur ca dxiiñaʼ nadipaʼ ni rúnicabe la? Riuucabe pue. Gástiruʼ sti cosa ni jma rusiecheʼ laanu, quixhedxí ladxidoʼno ne gudii laanu stale ndaayaʼ que gúninu ni na Jiobá de guidubi xhiálmanu. Biblia na: «Ndaayaʼ stiʼ Jiobá nga ni runi binni ricu, ne qué reedané ni yuubaʼ» (Proverbios 10:22).

23 Stale de laanu rúninu dxiiñaʼ guidubi dxi para ganda gudiʼnu ni caquiiñeʼ binnilídxinu. Neca zacá, Jiobá racalaʼdxiʼ chuʼnu nayecheʼ pur ca dxiiñaʼ nadipaʼ ni rúninu. Pa guidúʼyanu dxiiñaʼ stinu casi modo ruuyaʼ Jiobá ni ne chinándanu ca principiu stibe la? ziuʼnu nayecheʼ né xhiiñanu. Ne laaca cadi naquiiñeʼ gudiʼnu lugar chuʼ xiixa ni gucueeza laanu de gucheechenu ca diidxaʼ nacubi ne galán stiʼ Reinu. Zacá zusihuínninu nadxiinu Jiobá ne qué racaláʼdxinu gusaana de gannaxhiibe laanu.

^ párrafo 6 Diidxaʼ «carpinteru» ni biquiiñecabe lu diidxaʼ griegu «zanda gaca ni ti binni nanna guzáʼ cosa de yaga, gucuí ti yoo o guzáʼ xcaadxi cosa» casi mexaʼ ne banguʼ.

^ párrafo 17 Revista La Atalaya 15 stiʼ abril 1999, yaza 28-30, ne 15 stiʼ noviembre 1982, yaza 26, cusiene chaahuiʼ cani xi naquiiñeʼ gánnanu ora guicaanu xiixa dxiiñaʼ.